• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Fréttir

Fréttir

Nokkur landsbyggðarfélög íhuga sterklega að mynda bandalag í komandi kjarasamningum
11
 Jun

Nokkur landsbyggðarfélög íhuga sterklega að mynda bandalag í komandi kjarasamningum

Eins og fram hefur komið hér á heimasíðunni þá funduðu nokkur sterk landsbyggðarfélög saman á föstudaginn sl.  Þau félög sem komu saman voru Verkalýðsfélag Akraness, Verkalýðsfélag Húsavíkur, Afl-Starfsgreinafélag Austurlands, Aldan stéttarfélag og Drífandi Vestmannaeyjum.

Það sem helst var til umræðu voru fyrirhugaðar breytingar á veikinda- og slysarétti samhliða því að stofna nýjan áfallatryggingarsjóð. 

Formenn áðurnefndra félaga leggjast alfarið gegn þessum hugmyndum sem ASÍ og SA hafa verið að vinna að og lúta að breytingum á veikinda- og slysarétti sem og stofnun á nýjum áfallatryggingasjóði.

Einnig ræddu formenn áðurnefndra félaga komandi kjarasamninga og hvort félögin ættu að fara saman í komandi kjarasamninga í ljósi þeirrar staðreyndar að Flóbandlags félögin ætla að semja sér eins og þau hafa reyndar gert áður. 

Formaður VLFA telur að þessi landsbyggðarfélög eigi klárlega að mynda bandalag og fara sameinuð í næstu kjarasamninga.  Vissulega væri ánægjulegt ef fleiri landsbyggðarfélög myndu vilja koma með í þessa hugsanlegu vegferð vegna komandi samninga.  Formaður er hins vegar nokkuð bjartsýnn á að umrædd stéttarfélög fari sameinuð til næstu kjarasamningagerðar og telur einnig töluverðar líkur á að fleiri stéttarfélög taki þátt í nýju bandalagi ef af verður. 

Fundurinn á Egilsstöðum einkenndist af einstakri samstöðu og góðum baráttuhug fyrir komandi kjarasamninga og var t.d. ákveðið að funda aftur 6. júlí á Sauðarkróki og er allt eins líklegt að fleiri stéttarfélög innan SGS verði á þeim fundi en voru á Egilsstöðum.

08
 Jun

Fundað um kjaramál á Egilsstöðum

Í dag 8. júní komu fulltrúar frá nokkrum landsbyggðarfélögum Starfsgreinasambandsins saman til fundar á Egilsstöðum til að ræða framkomnar hugmyndir um breytingar á veikinda og slysarétti launafólks innan ASÍ og hugsanlegt samstarf í komandi kjarasamningum. Kjarasamningar eru lausir 31. desember n.k. Mikil samstaða, baráttuhugur og góður andi ríkti á fundinum.  Formaður Verkalýðsfélags Akraness var fulltrúi félagsins á umræddum fundi.Niðurstaða fundarins er að ekki komi til greina að blanda inn í gerð komandi kjarasamninga þeim hugmyndum sem komið hafa fram af hálfu nefndar Samtaka atvinnulífsins og Alþýðusambandsins er lúta að stofnun ,,Áfallatryggingasjóðs”. Fundarmenn tóku saman greinargerð um málið þar sem afstaða hópsins er skýrð. Greinagerðin fylgir hér á eftir.Eftir fundinn er kominn góður grundvöllur til áframhaldandi samstarfs og tillögugerðar fyrir komandi kjarasaminga. Næsti fundur félagana og þeirra félaga sem vilja vera með verður haldinn 6. júlí á Sauðárkróki.

Hægt er er að lesa sameignlega yfirlýsingu frá þeim aðilum sem sátu fundinn með því að smella á meira.

Yfirlýsing:

Föstudaginn 8. júní komum við neðangreind saman á Egilsstöðum til að ræða framkomnar hugmyndir að breytingum á veikinda og slysarétti launafólks innan ASÍ,  og hugsanlegt samstarf í komandi kjarasamningum.

Niðurstaða okkar er að ekki komi til greina að blanda saman þeim hugmyndum sem komið hafa fram af hálfu nefndar SA og ASÍ er lúta að stofnun ,,Áfallatryggingasjóðs” við gerð komandi kjarasamninga.

Ljóst er eftir fundinn í dag að kominn er góður grundvöllur til áframhaldandi samstarfs og tillögugerðar fyrir komandi kjarasaminga. Næsti fundur hópsins verður 6. júlí á Sauðárkróki

Vegna hugmynda um þróun áfallatrygginga eins og það er nefnt í minnisblaði sameiginlegrar nefndar ASÍ og SA viljum við taka eftirfarandi fram.

  1. Þær hugmyndir sem lagðar hafa verið fram fyrir aðildarfélögin eru lítt mótaðar og óljósar.
  2. Í minnisblaðinu er tekið fram að aðeins sé lokið fyrsta áfanga af fimm eða fleirum, í undirbúningi þessara breytinga.
  3. Samráð við aðildarfélög hefur verið af skornum skammti hingað til og nauðsynlegt er að forystufólki aðildarfélaga og sjúkrasjóða þeirra fái að kynna sér tillögurnar.
  4. Þrátt fyrir ofangreint virðist af, m.a. ummælum framkvæmdastjóra SA í fjölmiðlum nú nýverið, sem uppi séu hugmyndir um að taka þessar breytingar upp í komandi kjarasamningum .
  5. Í minnisblaði nefndarinnar er tekið fram að til undirbúnings næsta áfanga sé nauðsynlegt að fá ábendingar frá „baklandi nefndarinnar“ eins og það er orðað, þ.e. stéttarfélögum og fyrirtækjum. Okkur er ekki kunnugt um að óskað hafi verið slíkra ábendinga né að undirbúningur formlegrar vinnu við slíkt ferli sé hafinn.
  6. Þær hugmyndir sem fyrir liggja, fela í sér veigamiklar breytingar á nánast öllum þáttum veikinda- og slysaréttar félagsmanna okkar og stöðu sjúkrasjóða félagsmannanna. Það er því eðlilegt að við viljum stíga varlega til jarðar í þessu máli.
  7. Sumar af þeim hugmyndum sem felast í tillögunum eru jákvæðar við fyrstu sýn. Endurskoðun á rétti og málsmeðferð örorkubótaþega er brýn og ýmislegt jákvætt hefur verið unnið síðustu ár til að auka lífsgæði þessa fólks – s.s. Janus endurhæfing og Starfsendurhæfing Norðurlands.
  8. Framkomnum hugmyndum má skipta í eftirfarandi þætti sem hvern um sig má framkvæma sjálfstætt.
  9. Aukin réttindi og bætt lífskjör örorkuþega með nýjum úrræðum. Þennan þátt styðjum við en bendum á að mestu breytingarnar verða að vera hjá opinberum aðilum en ekki stéttarfélögum.
  10. Flutningur veikindaréttar frá fyrirtækjunum til sjúkrasjóða stéttarfélaganna.Þetta er framkvæmanlegt með hækkun sjúkrasjóðsiðgjalda.
  11. Miðstýrð stjórnun við endurhæfingarmeðferð. Hér sjáum við ekki rökin eða nauðsyn. Við teljum þessum verkþætti best komið í heimabyggð og bendum á góðan árangur m.a. Starfsendurhæfingar Norðurlands.
  12. Flutningur sjúkrasjóðsiðgjalda í sameiginlegan sjóð þar sem forræði sjúkrasjóðs og þar með veikindaréttar félagsmanna er framseldur til sjóðs þar sem verkalýðshreyfingin hefði þegar best léti helming stjórnarmanna. Að svo stöddu sjáum við engann tilgang með þessari breytingu og sýnist að hér verði einungis búið til ný miðstýrð stofnun sem fjarlægist verkalýðshreyfinguna í hugum félagsmanna okkar og fái á sig hálfopinberan stimpil. Að auki höfum við verulegar efasemdir um að aðrir ,,aðilar” leggi þessu nýja „kerfi“ til fjármagn án þess að krefjast áhrifa í stjórn sjóðsins. Þannig yrðu fulltrúar verkalýðsfélaganna í minnihluta stjórnar innan skamms og forræði hreyfingarinnar á þessum mikilvæga þætti réttinda launafólks horfið.
  1. Með tilliti til þróunar í nágrannalöndum okkar þar sem sífellt harðar er sótt að verkalýðsfélögum með þeim afleiðingum að félagsaðild fer minnkandi, teljum við sjúkrasjóði stéttarfélaganna eitt mikilvægasta tæki okkar til að tryggja framtíð verkalýðshreyfingarinnar. Þess vegna finnst okkur fráleitt að setja stærstan hluta veikindaréttar félagsmanna okkar í einn pott með stjórnaraðild SA og mögulega fleiri og sjáum verulegar líkur á því að innan fárra ára verði unnt að kaupa sér réttindi þar án félagsaðildar í verkalýðsfélagi.

Að teknu tilliti til ofangreindra atriða teljum við útilokað að breytingar á veikinda-og slysarétti félagsmanna okkar í anda þessara tillagna verði til umfjöllunar í komandi kjarasamningum.

AFL – Starfsgreinafélags                 VerkalýðsfélagHúsavíkur og nágrennis

Hjördís Þóra Sigurþórsdóttir        AðalsteinnBaldursson

Sigurður Hólm Freysson              Kristbjörg Sigurðardóttir

Sverrir Albertsson                      Olga Gísladóttir                                                                                                             

Aldan Stéttarfélag                                    Verkalýðsfélag  Akraness

Þórarinn Sverrisson                                     VilhjálmurBirgisson

Dífandi Stéttarfélag

Arnar Hjaltalín

07
 Jun

Lögreglan og Vinnumálastofnun funduðu í dag um kæru VLFA á hendur Formaco

Lögreglan á Akranesi vinnur að rannsókn málsins af fullri einurðLögreglan á Akranesi vinnur að rannsókn málsins af fullri einurðFulltrúar frá Lögreglunni á Akranesi og Vinnumálastofnun funduðu í morgun vegna kæru Verkalýðsfélags Akraness á hendur fyrirtækinu Formaco.

Eins og fram hefur komið hér á heimasíðunni þá liggur fyrir að Formaco hefur haft á annan tug Litháa í vinnu á síðastliðnu eina og hálfa ári, í það minnsta.  Litháarnir eru hvorki með kennitölur né dvalarleyfi hér á landi og hefur Formaco ekki greitt opinber gjöld af mönnunum eins og lög kveða skýlaust á um að eigi að gera.

Lögin eru skýr bæði hvað varðar skattskyldu af erlendum starfsmönnum og einnig því sem lýtur að skráningu á erlendum starfsmönnum, þ.e.s til Vinnumálastofnunar, útlendingaeftirlitsins sem og til Þjóðskrár. 

Að mati formanns félagsins liggur fyrir að lög hafa verið brotin hvað varðar skráningar af umræddum starfsmönnum alla vega hvað varðar dvalarleyfi og kennitölur fyrir starfsmennina.  Það liggur líka fyrir að ekki hafa verið greidd opinber gjöld af Litháunum frá því þeir hófu störf hér á landi.

Formaður spyr sig: hvað gerist ef fyrirtæki hér á landi komast í auknum mæli upp með að ráða erlenda starfsmenn með það að markmiði að komast hjá því að greiða opinber gjöld.  Með þessu geta óprúttnir atvinnurekendur komist hjá því að greiða tugi prósenta í hinn ýmsu opinberu gjöld t.d tekjuskatt og mótframlag í lífeyrissjóð.

Hér er um að ræða gríðarlega mikið hagsmunamál fyrir samfélagið allt.  Háttarlag þeirra sem þetta ástunda skekkir samkeppnisstöðu annarra fyrirtæka og einnig verður erfitt að halda úti velferðaþjónustu hér á landi ef fyrirtæki reyna að komast hjá því að greiða það sem þeim ber til samfélagsins.  Á þessu máli verður ríkisvaldið að taka af fullri hörku.  Formaður hefur vitneskju um að starfsmenn ríkisskattstjóra séu nú þegar farnir að skoða þetta mál.

Fiskveiðistjórnunarkerfið ekki að virka
06
 Jun

Fiskveiðistjórnunarkerfið ekki að virka

Í ályktun Framkvæmdastjórnar Starfsgreinasambands Íslands  frá 23. maí s.l. var þess krafist  að unnið verði að markvissri stefnumörkun um atvinnuöryggi verkafólks í fiskvinnslu, þannig að geðþóttaákvarðanir kvótaeigenda geti ekki lagt lífsgrundvöll fjölda manns í rúst í einum vettvangi.

Ályktunin var gerð í tilefni af því að atvinnulífi Flateyringa og hagsmunum fiskvinnslufólks var þar ógnað. Við vorum minnt á, að við höfum í reynd enga tryggingu fyrir því að íslenskirkvótaeigendur landi ekki afla sínum annars staðar, jafnvel í útlöndum eins og þeim er heimilt. En sjaldan er ein báran stök. Nú blasir enn eitt vandamálið við fiskvinnslunni, sem eru tillögur Hafrannsókarstofnunar um allt að 30% niðurskurð á aflaheimildum. Það er ljóst að slíkur niðurskurður mun hafa víðtæk áhrif, einkum í sjávarbyggðunum.

Knýi nauðsyn fiskverndarsjónarmiða til niðurskurðar á afla, eins og vísindamenn leggja til, verður að tryggja, með öllum ráðum, að það bitni sem minnst á fiskvinnslu innanlands og það er hægt. SGS minnir á að verulegur aflahlutur er fluttur í gámum til vinnslu í útlöndum, - vinnslu sem vel er hægt að sinna hér heima!  Því ríður á að stilla saman strengi stjórnvalda, verkalýðshreyfingar og aðila í sjávarútvegi og vinnslu til þess að koma í veg fyrir atvinnuhrun í sjávarplássunum. Stoppa þarf útflutning á gámafiski og leita leiða til þess að auka veðmæti þess afla sem enn er veiddur hér á landi, m.a. með fullvinnslu innanlands.

Það er skoðun formanns félagsins að það hafi sýnt sig að núverandi fiskveiðistjórnunarkerfi er alls ekki að virka eins og til þess var ætlast þegar það var sett á.  Það nægir að skoða hvernig þróunin hefur orðið eftir að kvótakerfið var sett á 1984 en þá var heimilt að veiða um 230 þúsund tonn af þorski en nú hafa komið tillögur frá Hafró um að fiskveiðiheimildir verði einungis 130 þúsund tonn á komandi fiskveiðiári. 

Það sér það hver heilvita maður að umrætt kvótakerfi hefur ekki skilað því sem það átti að gera þ.e.s. byggja upp þorskstofninn.  Á þeim rúmum 20 árum sem kvótakerfið hefur verið við lýði þá hefur þorskkvótinn verðið skertur um tæp 100 þúsund tonn ef farið verður að nýjum tillögum Hafró. 

05
 Jun

Lögreglan byrjuð að rannsaka kæru Verkalýðsfélags Akraness á hendur Formaco

Eins og fram kom hér á heimasíðunni þá lagði Verkalýðsfélag Akraness fram kæru á hendur fyrirtækinu Formaco á föstudaginn sl. 

Formaður félagsins hefur verið í nánu sambandi við Vinnumálastofnun varðandi þetta mál og hefur félagið t.d. komið öllum þeim upplýsingum sem félagið hefur aflað sér til Vinnumálastofnunar.  Fram kemur í viðtali við Unni Sverrisdóttur, lögfræðing Vinnumálastofnunar, í DV í gær að stofnunin hafi í raun hvatt VLFA til að leggja fram kæru á hendur Formaco á þeirri forsendu að fyrirtækið hefur ekki skráð starfsmenn sína eins og lögin kveða á um.  Lögfræðingur Vinnumálastofnunar segir í þessu sama viðtali að það virðist margt vera dularfullt hjá þessu fyrirtæki og ekkert nema gott að lögreglan skoði hugsanleg lögbrot aftur í tímann.

Vissulega er það rétt að Vinnumálastofnun taldi fulla ástæðu að lögð yrði fram kæra í þessu máli og málið rannsakað af lögreglu.   Verkalýðsfélag Akraness hefur og mun berjast af fullri einurð fyrir því að farið sé eftir þeim leikreglum sem eiga að gilda á íslenskum vinnumarkaði. 

Þessi afstaða lögmanns Vinnumálastofnunar til kærunar sýnir svo ekki verður um villst að Vinnumálastofnun er sammála VLFA um að Formaco hafi að öllum líkindum brotið lög er varða atvinnuréttindi útlendinga.

Lögreglan á Akranesi er byrjuð að rannsaka þetta mál og mun hún gera það í fullri samvinnu við Vinnumálastofnun.  Það er stefna stjórnar Verkalýðsfélags Akraness að taka fast á þeim málum er lúta að félagslegum undirboðum á okkar félagssvæði og er óhætt að fullyrða að fá ef nokkur stéttarfélög hafa tekið þessi mál jafn föstum tökum og VLFA. 

Sjómenn til hamingju með daginn
03
 Jun

Sjómenn til hamingju með daginn

Stjórn Verkalýðsfélags Akraness óskar sjómönnum öllum og fjölskyldum þeirra innilega til hamingju með daginn.  Í dag tilheyra tæplega 200 sjómenn sjómannadeild Verkalýðsfélags Akraness og hefur þeim því miður farið nokkuð fækkandi vegna samdráttar í aflaheimildum hér á Akranesi á undanförnum árum.

Sem dæmi þá má nefna að horfið hafa um 1500 þoskígildistonn héðan frá Akranesi á undanförnum 10 árum sem gerir það eðlilega að verkum að sjómönnum hefur fækkað jafn og þétt. 

Það er öllum ljóst að það voru og eru íslenskir sjómenn sem hafa skapað þau góðu lífskilyrði sem við Íslendingar búum við, það er eitthvað sem við megum aldrei gleyma.

Við hátíðarmessu í morgun var Örn Helgason vélstjóri til margra ára á skipum Haraldar Böðvarssonar heiðraður fyrir sín góðu störf í þágu sjávarútvegs á liðnum áratugum.

01
 Jun

Í dag lagði Verkalýðsfélag Akraness fram kæru á hendur fyrirtækinu Formaco til lögreglunnar á Akranesi

Í dag lagði Verkalýðsfélag Akraness fram kæru á hendur fyrirtækinu Formaco til lögreglunnar á Akranesi fyrir að vera með erlenda starfsmenn án tilskilina leyfa t.d. dvalarleyfi og kennitölur.

Eins og áður hefur komið fram hér á heimasíðunni þá hefur umrætt fyrirtæki verið að reisa stórt og mikið iðnaðarhúsnæði hér á Akranesi á undanförnum mánuðum.  Formaður félagsins fór í hefðbundið eftirlit fyrir nokkrum vikum þar sem Formaco er að reisa áðurnefnt iðnaðarhúsnæði.  Í þeirri eftirlitsferð kom í ljós að litháískir starfsmenn Formaco voru hvorki með kennitölur né dvalarleyfi, þó svo að hluti þeirra væri búinn að starfa hér á annað ár.

Fyrirliggjandi eru gögn sem sýna að Formaco er með í það minnsta á annan tug Litháa og Pólverja og það án þess að þeir séu með kennitölur eða dvalaleyfi eins lögin kveða skýrt á um að þurfi að vera.  Það liggja einnig fyrir grunsemdir um að ekki hafi verið greitt útsvar til sveitarfélaga eða tekjuskatt til ríksins af Liháunum og er það klárlega brot á skattalögunum.  

Það er alveg klárt mál að það skekkir samkeppnisstöðu annarra fyrirtækja þegar einstaka fyrirtæki eins og Formaco kemst upp með að greiða ekki þau opinberu gjöld af sínum starfsmönnum sem lög kveða skýrt á um að eigi að greiða.

Eins og áður sagði þá er Formaco að öllum líkindum með vel á annan tug erlendra starfsmanna án kennitalna og dvalarleyfis.  Samkvæmt upplýsingum sem VLFA hefur aflað sér þá hefur Formaco verið með erlenda starfsmenn að störfum á eftirtöldum stöðum á árinu 2007: Bílaás Akranesi, ITS Keflavík, Slökkvistöðin Fjarðarbyggð, Áhorfendastúkan Dalssmára Kópavogi, Íshella Hafnafirði og Tunguháls Reykjavík.

Formaður spyr sig: er það ásættanlegt að sveitarfélög semji við fyrirtæki sem ekki fara eftir þeim lögum og reglum sem gilda á hinum íslenska vinnumarkaði?  Alla vega er það óeðlilegt að sveitarfélög og ríki semji við fyrirtæki sem ekki greiðir útsvar eða önnur opinber gjöld hér á landi.  Opinberir aðilar, þ.e.s ríki og sveitarfélög, eiga að sniðganga slík fyrirtæki því á einhvern hátt verðum við að halda uppi okkar velferðakerfi og það gerum við ekki ef fyrirtæki hunsa þær skyldur sínar að greiða til samfélagsins eins og þeim ber samkvæmt lögum.

Hægt er að lesa kæruna með því að smella á meira

Sýslumaðurinn Akranesi

Stillholti 16-18

Akranesi.                                             

 

 

                                                                                                            1. júní 2007.

                                                                                                             Boðsent.

 

 

Undirritaður formaður Verkalýðsfélags Akraness, Vilhjálmur Birgisson, kemur hér með f.h. félagsins á framfæri við lögregluyfirvöld kæru á hendur einkahlutafélaginu Formaco og forráðamönnum þess.

 

Kærandi:

Vilhjálmur Birgisson , kt 050865-5339 f.h. Verkalýðsfélags Akraness, kt 680269-6889, Sunnubraut 13, Akranesi.

 

Kærðu:

            Formaco ehf., kt. 411097-2349, Fossaleyni 8, 112 Reykjavík.

            Forráðamenn félagsins:

Ragnar Jóhannsson, kt. 230953-5629, Stararrima 65, 112 Reykjavík, framkvæmdastjóri.

Helga Margrét Jóhannsdóttir, kt. 121061-2879, Stararrima 65, 112 Reykjavík, formaður stjórnar.

  

Hinn kærði atburður:

 

Samkvæmt upplýsingum sem Verkalýðsfélag Akraness hefur aflað hafa eftirfarandi Litháar starfað hjá fyrirtækinu í a.m.k. tæpt ár og sumir jafnvel vel á annað ár. Tilgreind er erlend kennitala við hvert nafn.

 

            Vygantas Duda, 36101090750

            Stanislovas Slezevicius 37709161193

            Zilvinas Buzas 36695070488

            Vytautas Gedminas 38108200705

            Paulius Posiakinas 38303030783

            Giedrius Gulbinas 37505200690

            Raimundas Stirbinskis 37507151039

            Marius Smailys 38502020973

            Dalius Marasinskas 38104160928

            Aleksandr Sirmer

Valerij Sidorenko

Jurij Denbnoveckij

Viaceslav Vorobjov

     Pranas Salkauskas

  

Hefur hluti þeirra starfað við byggingu mannvirkja fyrir Bílás á nýju iðnaðarsvæði á Akranesi sem Formaco  ehf. er að vinna að sem verktaki.  Einnig sá Formaco um byggingu á nýju húsnæði Bílvers hér á Akranesi á síðasta ári.   Önnur verkefni sem Formaco ehf. hefur unnið við á þessu ári eru:

  

            Fyrir ITS í Keflavík.

            Fyrir Slökkvistöð Fjarðarbyggðar

            Við áhorfendastúku Dalssmára í Kópavogi.

            Fyrir Íshellu í Hafnarfirði

            Við byggingu að Tunguhálsi í Reykjavík.

  

Ofangreindir Litháar  voru ekki tilkynntir til yfirvalda í samræmi við lög og reglur og eru ekki komnir með íslenska kennitölu.  Einnig hefur ekki verið staðið skil á lögbundnum skattgreiðslum né gjöldum í samræmi við íslenska skatta- og vinnuréttarlöggjöf.

  

Ef óskað er eftir frekari upplýsingum mun undirritaður fúslega veita þær. Jafnframt er kunnugt um að Vinnumálastofnunin hefur verið að vinna að því að upplýsa málið.

 

Virðingarfyllst,

 

_____________________________________

Vilhjálmur Birgisson, formaður

31
 May

Málþing Landsmenntar var haldið í skíðaskálanum í Hveradölum í gær

Málþing Landsmenntar um starfsmenntun í atvinnulífinu var haldið í Hveradölum í gær.  Margir góðir aðilar voru með erindi á þessu málþingi og t.d. var Steinunn K. Pétursdóttir, starfsmannastjóri Smellins frá Akranesi, með nokkuð gott erindi.  Hún gerði málþinginu grein fyrir því hversu mikla áherslu Smellinn leggur á að starfsmenn nýti sér þá starfsmenntun sem í boði er, með það að markmiði að auka enn frekar framleiðni fyrirtækisins og starfsánægju starfsmanna.

Það kom einnig fram hjá Ásmundi Pálssyni framkvæmdastjóra Fræðslunets Suðurlands að hann undrast örlítið hversu fáir í raun notfæra sér starfsmenntasjóði stéttarfélaganna sé tekið tillit til allra þeirra möguleika sem í boði eru.  Vissulega á þessi gagnrýni rétt á sér og við í verkalýðshreyfingunni þurfum að skoða hvað við getum gert til að auka starfsmenntun okkar félagsmenn enn frekar.

29
 May

Ekki tímabært að hefja viðræður um breytingar á veikinda- og slysarétti í komandi kjarasamningum

Eins fram hefur komið hér á heimasíðunni þá eru þreifingar hafnar hjá nokkrum landsbyggðarfélögum innan Starfsgreinasambands Íslands um að semja sér í komandi kjarasamningum.  Eru þessar þreifingar til komnar vegna þess að Flóabandalagsfélögin Efling stéttarfélag, Verkalýðsfélag Hlíf og Verkalýðs-og sjómannafélag Keflavíkur hafa tekið þá ákvörðun um að fara ein og sér í komandi kjarasamningaviðræður. 

Það er alveg ljóst að meginkrafa næstu kjarasamninga verður að færa lágmarkslaunin upp að markaðslaununum og til að það takist verður að koma til veruleg hækkun á lægstu taxtana.  Hækkun lægstu taxtanna verður að vera forgangsmál í komandi kjarasamningum einfaldlega vegna þess að lágmarkstaxtarnir eru til skammar fyrir verkalýðshreyfinguna.

Vilhjálmur Egilsson framkvæmdastjóri SA segir í viðtali við DV fyrir nokkrum dögum að stærsta málið í komandi samningum sé að stokka upp tryggingaréttinn sem snýr að veikindum og örorku.  Formaður félagsins veit að það er mikill áhugi hjá Samtökum atvinnulífisins fyrir því að breyta veikinda- og slysarétti í komandi kjarasamningum. 

Formaður félagsins telur alls ekki tímabært að hefja viðræður um breytingar á veikinda- og slysarétti í næstu samningum og er alveg ljóst að hann er ekki einn um þá skoðun meðal formanna félaga innan Starfsgreinasambands Íslands. 

Hins vegar er breið samstaða meðal formanna SGS um að knýja íslensk stjórnvöld til að stórefla starfsendurhæfingu hér á landi með það að markmiði að draga úr þeirri miklu aukningu sem orðið hefur á örorku meðal landsmanna.

Nokkur landsbyggðarfélög íhuga að semja sér í komandi kjarasamningum
25
 May

Nokkur landsbyggðarfélög íhuga að semja sér í komandi kjarasamningum

Á fundi Starfsgreinasambands Íslands á Siglufirði í vikunni voru kjaramál og undirbúningur viðræðna við Samtök atvinnulífsins til umræðu, en eins og flestir vita þá renna kjarasamningar á hinum almenna vinnumarkaði út um áramótin.

Á fundinum kom nokkuð skýrt fram að Flóabandalagsfélögin ætli að viðhalda sínu samstarfi í komandi kjarasamningum eins og þau hafa reyndar gert í undangengnum samningum. Þessi félög ætla með öðrum orðum að semja sér.  Þau félög sem mynda Flóabandalagið eru Efling stéttarfélag, Verkalýðsfélagið Hlíf í Hafnafirði og Verkalýðs- og sjómannafélag Keflavíkur.

Innan Starfsgreinasambands Íslands eru 26 stéttarfélög og því verður það að teljast afar undarlegt að umrædd félög sem mynda Flóabandalagið vilji fara ein og sér í komandi kjarasamninga sérstaklega í ljósi þess að kjörorð SGS eru sameinuð til sóknar.

Í ljósi þeirra staðreynda að Flóabandalagið ætlar að semja sér eins og í undanförnum kjarasamningum þá hafa nokkur félög á landsbyggðinni verið að kanna kosti þess og galla að mynda bandalag í komandi kjarasamningum.  Á næstu dögum og vikum munu standa yfir þreifingar á milli nokkurra félaga og er allt eins líklegt að nokkur landsbyggðarfélög semji algerlega sér í komandi kjarasamningum. 

Stjórn VLFA mun fjalla um þessa hugmynd á stjórnarfundi sem boðað hefur verið til næstkomandi þriðjudag.  Eins og áður sagði þá íhuga nokkur kraftmikil stéttarfélög á landsbyggðinni það sterklega að koma sameinuð að samningsborðinu í komandi kjarasamningum.

Page 156 of 211

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image