Árleg ferð félagsins með eldri félagsmenn var farin í gær og heppnaðist vel. Lagt var af stað kl. 9 og ekið sem leið lá til Hveragerðis. Leiðsögumaður í ferðinni var Gísli Einarsson og sagði hann frá ýmsu áhugaverðu á leiðinni, meðal annars frá skáldum Hveragerðis. Fyrsti viðkomustaður var kirkjan í Hveragerði en þar var vel tekið á móti hópnum með stuttri kynningu á kirkjunni og safnaðarheimilinu og að henni lokinni var öllum frjálst að ganga um og skoða.

Næst  var haldið í Hespuhúsið í Ölfusinu en þar er Guðrún Bjarnadóttir með opna jurtalitunarvinnustofu. Guðrún tók á móti hópnum og sagði frá sínum verkefnum og vinnustofunni. Hún sýndi svo þeim sem vildu hvernig jurtalitunin fer fram. Vinnustofan er mjög rúmgóð og ýmislegt hægt að skoða en einnig hægt að fá sér sæti og slaka á eða glugga í bók. Guðrún selur jurtalitað garn en jafnframt fullgerðar prjónavörur, spil og púsl. Eftir að hafa fræðst og verslað hjá Guðrúnu hélt hópurinn áfram ferð sinni.

Hádegismaturinn var borðaður á Stracta hóteli á Hellu og þar fengu allir góðan mat og  drykk og var þjónustan til fyrirmyndar. Boðið var upp á lambakjöt í aðalrétt og litlar pavlovur í eftirrétt. Allir fóru saddir og sælir af stað aftur og ekið var að Sólheimum í Grímsnesi.

Á Sólheimum fékk hópurinn fræðslu um starf Sesselju Hreindísar Sigmundsdóttur og hvernig hún með mikilli elju og framsýni stofnaði Sólheima árið 1930. Nú 95 árum síðar er starfið á Sólheimum í miklum blóma og var bæði áhugavert og gaman að fá að heyra um það. Sólheimahús var skoðað en það er húsið sem Sesselja reisti á fyrstu árum Sólheima og þar bjó hún ásamt börnunum. Eftir að hafa gengið um svæðið fékk hópurinn kaffi, hjónabandssælu og pönnukökur í kaffihúsi Sólheima.

Að lokinni heimsókn að Sólheimum var komið að heimferð. Komið var til Akraness á slaginu kl. 18 og voru allir ánægðir með viðburðaríkan dag í góðum félagsskap. 

Myndir frá ferðinni má sjá hér. 

Á aðalfundi félagsins í maí sl. voru breytingar gerðar á eftirfarandi styrkjum og tóku gildi 31. maí 2025.

• Glasa- og tæknifrjóvgun, ættleiðing: styrkur hækkaður úr 100.000 kr. í 200.000 kr. 
• Heilsuefling: ekki er lengur hægt að nota styrkinn vegna kaupa á skóm, fatnaði, búnaði eða aðgangslyklum.

Breyting á heilsueflingarstyrk er gerð í samræmi við lög og reglur um tekjuskatt nr. 90/2003. Styrkurinn er áfram að hámarki 55.000 kr. á hverjum 12 mánuðum (50% af reikningi) og hægt að nota hann vegna kaupa á kortum á líkamsræktarstöðvum og sundstöðum, hjá íþróttafélögum, vegna æfinga/þjálfunar hjá þjálfara og annarri skipulagðri hreyfingu.

Félagið hvetur félagsmenn til að kynna sér þá styrki sem veittir eru á hverjum tíma og hvað þeir fela í sér.

Upplýsingar um styrki eru aðgengilegir á heimasíðu félagsins, www.vlfa.is - sjúkrasjóður

Þeir styrkir sem félagið veitir eru;

• Fæðingarstyrkur
• Meðferð sjúkraþjálfara, sjúkranuddara, kírópraktors
• Styrkur vegna glasa- og tæknifrjóvgunar og ættleiðingar
• Styrkur vegna heilsufarsskoðunar, undir það fellur m.a. tannlæknakostnaður
• Styrkur vegna gleraugna og linsukaupa
• Styrkur vegna heyrnartækjakaupa
• Heilsueflingarstyrkur
• Viðtalsmeðferð hjá sálfræðingi, fjölskylduráðgjafa og ADHD greining hjá sálfræðingi
• Styrkur vegna göngugreiningar og innleggja