Við opnum fyrir umsóknir orlofshúsa fyrir sumarið þriðjudaginn 17. mars og umsóknarfrestur er til 29. mars 2026

Sumartímabilið er frá 27. maí - 2. sept. og leigutími hverrar eignar er ein vika, frá miðvikudegi til miðvikudags.

Sótt er um á mínar síður félagsins - mitt.vlfa.is -> orlofskerfi

Mikilvægt er að fara yfir persónuupplýsingar, að netfang og símanúmer séu rétt, svo hægt sé að hafa samband við félagsmann ef þörf er á.

Í umsókninni er hægt að velja sex vikur til að sækja um en hver félagsmaður getur einungis fengið úthlutaðri einni viku yfir sumartímabilið.

Punktastaða ræður úthlutun.

Úthlutun fer fram 31. mars og þeir sem fá úthlutað orlofshúsi fá sent sms og tölvupóst.

Krafa stofnast í heimabanka og greiða þarf leiguverð fyrir 8. apríl.

Ef leiga er ekki greidd fellur hún niður og húsinu verður endurúthlutað.

Endurúthlutun fer fram 9. apríl (vikur sem ekki hefur verið greitt fyrir). 

Eindagi vegna endurúthlutunar er 15. apríl og eftir það verður hægt að bóka lausar og ógreiddar vikur á mínar síður.

Nánari upplýsingar um eignir og verð á orlofssíðu félagsins - hér

Formaður Verkalýðsfélags Akraness og formaður Starfsgreinasambands Íslands (SGS) tók þátt í pallborðsumræðum á Iðnþingi Samtaka iðnaðarins þar sem rætt var um stöðu og framtíð iðnaðar á Íslandi. Á pallborðinu var hann með Álfheiði Ágústdóttur forstjóra Elkem Ísland.

Í máli sínu lagði formaðurinn mikla áherslu á mikilvægi stóriðju fyrir íslenskt atvinnulíf og samfélög víðs vegar um landið. Hann sagði að starfsemi á Grundartanga og víðar um land væri meðal mikilvægustu stoða atvinnulífsins og hefði gríðarlega þýðingu fyrir byggðir landsins.

„Stóriðjan á Grundartanga og vítt og breitt um landið er burðarstólpi atvinnulífsins, ekki síst hér á Vesturlandi en einnig víðar. Þessi starfsemi skapar þúsundir starfa, bæði beint og óbeint, og hefur gríðarleg áhrif á lífskjör fólks og þróun samfélaga,“ sagði formaðurinn.

Hann lagði jafnframt áherslu á að stjórnvöld þyrftu að marka skýra eigendastefnu um nýtingu auðlinda landsins og hvernig tryggja megi að þær nýtist þjóðinni best.

„Við verðum að nýta auðlindir okkar á þann hátt að þær tryggi fólkinu í landinu störf og öflugt atvinnulíf. Til þess þarf að tryggja fyrirtækjum í orkufrekum iðnaði samkeppnishæf rekstrarskilyrði,“ sagði hann.

Í umræðunni benti formaðurinn einnig á mikilvægi orkufyrirtækja í efnahagslífinu og nefndi sérstaklega afkomu Landsvirkjunar á síðustu árum.

„Landsvirkjun hefur á síðustu fimm árum greitt um 110 milljarða króna í arð til ríkisins og um 70 milljarða í tekjuskatt. Það eru samtals um 180 milljarðar króna sem hafa runnið í ríkissjóð,“ sagði hann og bætti við að þessi sterka afkoma væri ekki tilkomin af sjálfu sér.

„Þessi árangur verður ekki til í einhverju tómarúmi. Hann byggir á því að hér starfar öflugur orkufrekur iðnaður sem skapar verðmæti og eftirspurn eftir orkunni,“ sagði formaðurinn.

Á pallborðinu kom jafnframt fram alvarleg staða varðandi rekstur Elkem á Grundartanga. Álfheiður Ágústdóttir sagði að samkeppnishæfi fyrirtækisins væri ekki lengur til staðar og orðaði það þannig að Elkem Ísland væri „fyrst út“ ef ekkert breyttist í rekstrarumhverfi orkufreks iðnaðar.

Þegar hún var spurð um framtíð fyrirtækisins sagði hún að núverandi raforkusamningar fyrirtækisins rynnu út eftir um þrjú ár og að ef ekkert breyttist í rekstrarskilyrðum gæti niðurstaðan orðið sú að fyrirtækið lokaði starfsemi sinni hér á landi.

Formaðurinn sagði þessi skilaboð grafalvarleg fyrir samfélagið á Vesturlandi.

„Þetta eru grafalvarleg tíðindi fyrir okkur Akurnesinga og fyrir allt svæðið. Lokun fyrirtækis af þessari stærðargráðu hefði gríðarleg áhrif á lífsafkomu hundruða fjölskyldna,“ sagði hann.

Hann benti á að áhrifin myndu ekki einungis ná til starfsmanna fyrirtækisins sjálfs heldur einnig til fjölda afleiddra starfa í þjónustu, verktöku og viðhaldi.

„Þetta myndi ekki bara snerta þá sem starfa hjá fyrirtækinu heldur einnig fjölmörg afleidd störf og fyrirtæki sem byggja afkomu sína á starfseminni. Þá myndi þetta jafnframt hafa veruleg áhrif á rekstur sveitarfélaga á svæðinu,“ sagði formaðurinn.

Að lokum lagði hann áherslu á að stjórnvöld og orkufyrirtæki yrðu að gæta þess að rekstrarumhverfi orkufreks iðnaðar á Íslandi væri áfram samkeppnishæft.

„Við verðum að passa okkur á að fara ekki með gullgæsina okkar út í móa og lóga henni. Ef við setjum of miklar álögur á greinina eða gerum rekstrarumhverfið óstöðugt getur það grafið undan þeirri verðmætasköpun sem íslenskt samfélag nýtur í dag,“ sagði formaður Verkalýðsfélags Akraness.