Í gær útskrifuðust 15 starfsmenn Norðuráls úr framhaldsnámi Stóriðjuskóla Norðuráls. Frá upphafi eða frá árinu 2011 hafa 177 nemendur verið útskrifaðir úr Stóriðjuskólanum, þar af 99 úr grunnnámi og 78 úr framhaldsnámi.

Stóriðjuskólinn var á sínum tíma eitt af baráttumálum Verkalýðsfélags Akraness og það tókst í kjarasamningunum 2011 enda var það sameignilegur skilningur forsvarsmanna Norðuráls og stéttarfélaganna að það væri ávinningur beggja aðila að setja á laggirnar slíkt stóriðjunám. Starfsmenn hafa ekki einungis gagn af náminu sem slíku heldur veitir námið starfsmönnum hærri laun. Þeir starfsmenn sem ljúka grunnnáminu fá 5% launahækkun og ljúki þeir síðan framhaldsnámi koma önnur 5% til hækkunar svo í heildina er hægt að fá launahækkun upp á 10%.

Það hefur verið mikil ásókn í stóriðjuskólann og oft hafa færri komist að en vilja. Það varð smá stopp á náminu þegar Covid faraldurinn gekk yfir en vonandi er skólinn að fara aftur á fulla ferð svo hægt verði að taka inn fleiri nemendur á komandi árum því ávinningur beggja er eins og áður sagði ótvíræður.

Það er stefna stjórnar VLFA að vera með góða orlofskosti handa félagsmönnum og það kallar á að halda þarf orlofshúsum félagsins vel við. Nú var verið að setja upp nýtt gestahús við Ásenda 9 en um er að ræða rúmgott hús með salerni, sturtu og svefnaðstöðu fyrir fjóra. Þetta er afar jákvæð viðbót við bústaðinn. Gamla gestahúsið var úr sér gengið og því bráðnauðsynlegt að ráðast í þessa endurnýjun sem hefur heppnast gríðarlega vel.

Einnig var orðin mikil þörf á að taka bústaðinn að Ásenda 10 í gegn að utan en klæðningin var farin að láta verulega á sjá. Þar hefur klæðningin nú að stórum hluta verið endurnýjuð og einnig þakkanturinn. Gluggar voru pússaðir niður sem og hurðar og má segja að bústaðurinn sé eins og nýr að utan eftir þessar viðamiklu endurbætur. Það er eins og áður sagði mikið lagt upp úr því hjá félaginu að hafa bústaðina eins góða og kostur er og það er mikilvægt að brýna fyrir félagsmönnum að ganga vel um bústaðina og muna að þetta eru jú eigur okkar allra.

Fleiri myndir af endurbótum í Ásenda 10 og af flutningi gestahússins í Ásenda 9 má sjá hér.