Í gær var haldinn ráðstefna sem bar yfirskriftina Ný tækifæri til atvinnuþátttöku.  Þeir sem stóðu fyrir ráðstefnunni voru Öryrkjabandalagið og Vinnumálastofnun í samstarfi við Alþýðusamband Íslands og Samtök atvinnulífsins.

Margir góðir aðilar fluttu erindi á ráðstefunni t.d Laila Gustavsen ráðuneytisstjóri í atvinnumálaráðneyti  Noregs. Fram kom í máli hennar að Norðmenn eru að gjörbylta þessum málum hjá sér og t.d hefur Norska Vinnumálastofnunin og Tryggingastofnun verið sameinuð.  Fram kom í máli hennar að Norðmenn eru að einfalda kerfið svo fólk þurfi aðeins að leita á einn stað.  Með áðurnefndri sameiningu verður atvinnu-og félagsleg ráðgjöf á einum stað.  Einnig kom fram hjá Laila að Norðmenn hafa virkilega trú á því að þær umbætur sem þau vinna nú að hafi þau áhrif að það hægi verulega á fjölgun öryrkja.

Bolli Þór Bollason ráðuneytisstjóri í forsætisráðuneytinu fór yfir helstu niðurstöður úr örorkumatsnefndinni sem skipuð var af forsætisráðherra.  Í máli hans kom fram að nefndin var sammála um að stórefla þyrfti starfsendurhæfingu hér á landi í því skyni að hjálpa einstaklingum sem af einhverjum ástæðum hafa ekki náð að festa rætur á vinnumarkaðnum sökum örorku.

Einnig var Gylfi Arnbjörnsson frá ASÍ með erindi sem bar heitið,,Endurskoðun samningsbundinna veikinda- og slysaréttinda í ljósi nýrra viðhorfa til endurhæfingar". 

Alþýðusamband Íslands og Samtök atvinnulífsins hafa verið að ræða saman að undanförnu um breytingu á veikinda- og slysarétti, en megin markmið ASÍ og SA er að stofna nýjan Áfallatryggingarsjóð.  Í þeim tillögum sem Gylfi fór yfir á fundinum í gær er gert ráð fyrir verulegum breytingum á veikinda- og slysarétti launafólks á hinum almenna vinnumarkaði og einnig er gert ráð fyrir því að stór hluti framlags atvinnurekanda í sjúkrajóði stéttarfélaganna muni renna í þennan nýja áfallatryggingarsjóð.  Einnig er gert ráð fyrir aðkomu ríkisins, sveitarfélaga og lífeyrissjóða að þessum nýja sjóði.  Rétt er að geta þess að þessar viðræður eru á algjöru byrjunarstigi. 

Það sem Gylfi kynnti á ráðstefnunni í gær hugnast formanni félagsins alls ekki og telur formaður að stíga verði afar varlega í þessu máli.  Hugmyndir um breytingu á sjúkrasjóðum félaganna og einnig breytingu á veikinda-og slysaréttinum hugnast formanni félagsins ekki og það eru verulega skiptar skoðanir varðandi þessar hugmyndir innan aðildarfélaga Starfsgreinasambandsins. 

 Vissulega eru allir sammála því að stórefla verði starfsendurhæfingu og það er eitthvað sem stéttarfélögin geta svo sannarlega tekið þátt í að gera í fullri samvinnu við ríkið, sveitarfélögin, lífeyrissjóðina og alla þá sem hafa hagsmuni af því að efla starfsendurhæfingu. 

En umpólun sjúkrasjóða stéttarfélaganna og hugmyndir um að skerða veikindarétt er eitthvað sem formaður VLFA hræðist.  Vissulega er rétt að geta þess enn og aftur að þessi mál eru á byrjunarstigi og erfitt að leggja endanlegt mat á þessa fyrirhuguðu breytingu.

Reyndar undrast formaður félagsins af hverju við Íslendingar förum ekki sömu leið í þessum málum og Norðmenn eru að gera.  En í máli Lailu var ekki annað að skilja en að norska ríkið sæi alfarið um alla þá þætti er lúta að þeim breytingum sem þar er verið að gera í þessum sama málaflokki.   

Fyrir örfáum vikum skilaði öryrkjanefnd sem skipuð var af forsætisráðherra skýrslu um endurskoðun örorkumats og eflingu starfsendurhæfingar en nefndinni var ætlað að koma með tillögur til úrbóta í þessum málum.  Það er lítið mál að leggja fram fagrar skýrslur sem eiga að taka á þessum málum er lúta að starfsendurhæfingu þeirra sem dottið hafa út af vinnumarkaðnum.  Hins vegar er öllu meira mál  hver eigi að fjármagna þessa auknu starfsendurhæfingu og hver á að hafa umsjón með henni, en þeim spurningum hefur ekki verið svarað.

Í Kastljósi á mánudaginn sl. var afar athyglisvert viðtal við Ástu Gunnarsdóttur kennara en hún átti við geðræn vandamál að stríða til langs tíma en hefur nú náð bata með aðstoð iðjuþjálfunardeildar Landsspítalans.  Ásta hefur verulegar áhyggur af því að iðjuþjálfun hjá geðdeild Landsspítalans verði lokað 1. maí nk. þar sem ekki fást iðjuþjálfar til starfa vegna lágra launa.  Hún telur að sú endurhæfing sem hún fékk hjá iðjuþjálfun Landsspítalans hafi algerlega bjargað sér og gert það að verkum að hún varð aftur vinnufær. 

Það er hálf kaldhæðnislegt að á sama tíma og verið er að skila skýrslu sem skipuð var af forsætisráðherra um að stórefla þurfi starfsendurhæfingu þá næst ekki að manna iðjuþjálfunardeild Landsspítalans og allt útlit að henni verði lokað 1. maí vegna þess að laun iðjuþjálfa eru alltof lág.   

Hvernig væri fyrir hið opinbera að það tæki á svona máli eins og Ásta bendir réttilega á af fullri einurð og ákveðni og bjargi því að iðjuþjálfun á Landsspítalanum leggist ekki af.  Flottar nefndir og fagrar skýrslur skila ekki miklu einnar og sér.  Það eru allir sammála um að það þarf að stórauka starfsendurhæfingu til að það takist þá þarf ríkið að koma að því máli af fullum þunga og leggja verulega aukið fé í það verkefni. Eigum við ekki að byrja á því að hlúa að þeim meðferðarúrræðum sem þegar eru til staðar áður en menn leggjast í stórbreytingar á kerfinu.

Hægt er að horfa á viðtalið við Ástu Gunnarsdóttur í Kastljósinu með því smella hér   

Stjórn félagsins fundaði á mánudaginn var og á fundinum var farið yfir hinn ýmsu mál sem nú eru í gangi hjá félaginu.  

Stjórn félagsins ákvað á fundinum í gær að aðalfundur félagsins skuli vera haldinn á svipuðum tíma og í fyrra eða nánar tiltekið seinni partinn í apríl.

Nú eru að verða liðinn fjögur ár frá því núverandi stjórn tók við Verkalýðsfélagi Akraness.  Það verður að segjast alveg eins og er að VLFA hefur tekið algjörum stakkaskiptum á þessum fjórum árum bæði hvað varðar félagslega þáttinn og alls ekki síður fjárhagslega, en félagsjóður var til að mynda rekinn á yfirdrætti þegar ný stjórn tók við 2003.

Stjórn félagsins hefur á þessum fjórum árum tekist að snúa þessari skelfilegu fjárhagsstöðu algjörlega við og er fjárhagsstaða félagsins mjög góð um þessar mundir.

Fjölgað hefur um rúma 500 félagsmenn á þessum árum og þjónustan við félagsmenn hefur verið stóraukin.  Vissulega er stjórnin þó meðvituð um að alltaf má gera betur hvað varðar þjónustu við félagsmenn.  En markmiðið er skýrt hjá stjórn félagsins, það er að vera það stéttarfélag sem býður sínum félagsmönnum uppá hvað bestu þjónustuna.

Til að nálgast þetta markmið hefur stjórn sjúkrassjóðs ákveðið að bæta við í það minnsta þremur nýjum styrktarflokkum úr sjúkrasjóði félagsins.  Þetta verður kynnt nánar á aðalfundi félagsins í apríl.

Að undanförnu hafa starfsmenn félagsins unnið að því koma umsóknum um orlofshús/íbúð í póst.  Umsóknarblöðin ættu að vera búinn að berast öllum félagsmönnum um og eftir helgina.

Umsóknarfrestur er til kl. 14:00 föstudaginn 13.apríl.  Þau orlofshús sem félagið býður uppá í sumar eru á eftirfarandi stöðum:

• Svínadalur Hvalfjarðastrandarhreppi.
• Ölfusborgir við Hveragerði.
• Húsafell í Borgarfirði.
• Hraunborgir í Grímsnesi.
• Íbúð í Stykkishólmi.
• Þrjár íbúðir á Akureyri.
• Sumarbústaður að Eiðum.
• Bláfell Biskuptungum.

Formaður félagsins ásamt aðaltrúnaðarmanni Íslenska járnblendifélagsins funduðu með Ingamundi Birni forstjóra IJ og  Önnu Dóru Guðmundsdóttur en hún er ný tekin við starfi sem nefnist  mannauðsstjórnandi hjá ÍJ.

Tilefni fundarins var að fara yfir ýmsa þætti í bónuskerfi fyrirtækisins sem ekki hafa verið að virka sem skildi.  Því miður hefur bónuskerfið  ekki verið að skilja þeim árangri sem samningsaðilar voru sammála um að það ætti að geta gefið starfsmönnum. 

Í samningaviðræðunum þegar kjarasamningur var gerður árið 2005 kom fram að aðilar áætluðu að bónusinn myndi að jafnaði vera í kringum 5,6% á samningstímanum.  Á árinu 2006 var bónusinn hins vegar einungis 3.38% eða sem nemur 2.2% minna heldur en aðilar vonuðust til að hann myndi gefa.

Formaður hefur fundað með trúnaðartengiliðum vegna þessa máls.  Fólu trúnaðartengiliðir ÍJ formanni að leggja til breytingar á bónuskerfinu og á fundinum í morgun afhenti formaður félagsins fram tillögur þar að lútandi. 

Forstjóri Íj tók nokkuð jákvætt í þessar tillögur.  Ákveðið var að funda aftur í byrjun apríl og mun forstjóri IJ væntanlega svara á þeim fundi hvort fyrirtækið sé tilbúið að ganga að þessum tillögum eða ekki.

Fram kom í máli Ingimunds að gríðarlegur tími og orka hefur farið í að undirbúa verkefni er lítur að hinni nýju sérframleiðslu sem hefst væntanlega næsta vor . 

En eins og fram hefur komið hér á heimasíðunni þá mun Íslenska járnblendifélagið hefja framleiðslu á svokölluðu sérefni sem nefnist FSM og við það mun rekstur verksmiðjunnar styrkjast til mikilla muna að sögn þeirra sem til þekkja.  Við þessa stækkun munu skapast í kringum 35 til 40 ný störf.

Formaður félagsins telur afar ánægjulegt að forsvarsmönnum Íj hafi tekist að ná þessari sérframleiðslu hingað til lands,  einfaldlega vegna þess að rekstur IJ hefur verið nokkuð sveiflukenndur á liðnum árum og áratugum.  En eins og áður sagði þá eru umtalsverðar líkur á því rekstur verksmiðjunar sé nokkuð vel tryggður í það minnsta næsta áratuginn með tilkomu á áðurnefndri sérframleiðslu FSM.