Í gær var haldinn bæjarstjórnarfundur hjá Akraneskaupstað sem vart er í frásögur færandi að öðru leyti en því að stór hluti fundarins fjallaði um sameiningu Starfsmannafélags Akraneskaupstaðar (STAK) við Starfsmannafélag Reykjavíkurborgar. Einnig var á fundinum mikið fjallað um hvort meirihluti bæjarstjórnar myndi láta laun starfsmanna bæjarins taka eftir kjarasamningum Starfsmannafélags Reykjavíkurborgar strax, eða að láta núverandi kjarasamning við launanefndina gilda út samningstímann fyrir starfsmenn Akraneskaupstaðar.

Formaður félagsins sat og fylgdist með umræðum á þessum fundi og vill fara yfir þessi mál bæði til fróðleiks fyrir starfsmenn Akraneskaupstaðar sem og fyrir þann bæjarráðsmann sem fór mikinn á þessum fundi og heitir sá maður Sveinn Kristinsson frá Samfylkingunni. Sveinn byrjaði á því að tala um það að það væri óvenjulegt að formaður VLFA skyldi hafa verið að tjá sig opinberlega um það sem fram fór á fundi sem formaður sat nýverið með bæjarráði og fjallaði um frjálsa félagaaðild. Í máli Sveins kom fram að vissulega væri frjáls félagaaðild í gildi hér á landi og allir starfsmenn bæjarins gætu ákveðið í hvort stéttarfélaginu þeir vildu frekar vera en svo kom fram hjá honum að það yrði að vera með samþykki þess stéttarfélags sem viðkomandi starfsmaður væri nú þegar í.

Ég spyr, hvernig getur það kallast félagafrelsi þegar það er annar aðili en þú sjálfur sem ákveður hvort þú getir skipt um stéttarfélag eða ekki. Að sjálfsögðu eiga starfsmennirnir sjálfir að ákveða í hvaða stéttarfélagi þeir eru og það er nánast grátlegt að horfa upp á það að til eru einstakir aðilar innan bæjarkerfisins sem leggja sig í líma við það að hindra að félagsmenn Starfsmannafélags Reykjavíkurborgar geti gengið í VLFA.

Einnig sagði Sveinn á þessum fundi að sá áróður hefði dunið í fjölmiðlum að kjör starfsmanna Akraneskaupstaðar myndu lækka ef þau tækju eftir kjarasamningum Starfsmannafélags Reykjavíkurborgar. Hann sagði líka að þessum áróðri hefði ekki verið svarað og taldi hann að kosningin um sameiningu STAK við Starfsmannafélag Reykjavíkurborgar væri nægilegur vitnisburður þess að starfsmenn teldu hag sínum betur borgið í síðarnefnda félaginu. 

Þær upplýsingar sem formaður VLFA hefur um það hvernig þessi sameining var kynnt fyrir starfsmönnum Akraneskaupstaðar skýrir að mörgu leyti hvers vegna þessi sameining varð að veruleika. Flestir starfsmenn sem ég hef talað við sögðust hafa fengið upplýsingar um að þeir myndu hækka umtalsvert í launum ef þeir myndu sameinast Starfsmannafélagi Reykjavíkurborgar og einnig átti að hafa verið ýjað að því við fólkið að gert yrði nýtt starfsmat fyrir öll störf. Þetta er kannski meginástæða þess að fólk greiddi þessari sameiningu atkvæði sitt. Það er mat formanns að slíkt hafi verið gert á röngum forsendum. Starfsfólkið fékk ekki þá kynningu á þessu máli sem eðlileg hefði verið.

Rétt er að upplýsa starfsmenn um það að starfsmat Reykjavíkurborgar er byggt á sömu forsendum og starfsmat launanefndar Sveitarfélaga sem starfsmenn eru að vinna eftir núna, svokölluðu breska starfsmati.

Varðandi þann þátt Þegar Sveinn talaði um áróður er hann væntanlega að meina þær athugasemdir sem formaður VLFA hefur gert við samanburð á þeim kjörum sem félagsmenn STAK eru með í dag og hins vegar þeim kjörum sem þeir hefðu hjá Starfsmannafélagi Reykjavíkurborgar.

Vissulega er það rétt hjá Sveini að því hefur ekki verið svarað né það hrakið þegar formaður félagsins hefur ítrekað bent á að tekjulægstu starfsmenn Akraneskaupstaðar standa flestir í stað og sumir hverjir lækka umtalsvert taki þeir laun eftir kjarasamningi Starfsmannafélags Reykjavíkurborgar. Hins vegar hefur formaður líka bent á að forstöðumenn, millistjórnendur og stjórnendur eru að hækka um allt að tugi þúsunda króna á mánuði. Þetta eru blákaldar staðreyndir sem verða ekki hraktar og ég spyr hvernig getur það verið sanngjarnt að tekjulægstu hóparnir eigi að standa í stað eða nánast enga hækkun að fá og jafnvel lækka, á meðan þeir tekjuhæstu hækka um tugi þúsunda í launum.

Ég spyr aftur Svein: er þetta hin eina sanna jafnaðarstefna að færa þeim tekjuhærri ennþá meira og svíða þá tekjulægstu? Er þetta jafnaðarstefnan hjá Sveini hvað varðar það launamisrétti sem gætir í okkar samfélagi?

Hægt að lesa meira með því að smella á meira.

Einnig kom eftirfarandi fram hjá Sveini á fundinum í gær, og þetta er afar athyglisvert. Hann sagði að það væri ekkert mál að slíta öllu samstarfi við launanefnd sveitarfélaganna. Það væri bara ákvörðun pólitíkusanna hvort það skyldi gert eða ekki. Benti hann á í því samhengi að hann hefði leitað til virtasta lögfræðings í vinnurétti til að kanna hvort að þetta væri ekki örugglega hægt. Sveinn hvatti eindregið til þess samstarfinu yrði slitið, sennilega vegna þess að launanefnd sveitarfélaganna er búin að fara illa með starfsmenn Akraneskaupstaðar.

Ég reyndar spyr: hví í ósköpunum er Sveinn Kristinsson ekki búinn að beita sér fyrir því þegar hann var í meirihluta í þessum bæ að segja upp samstarfinu við launanefnd sveitarfélaganna úr því hann hefur álit virts lögfræðings sem segir það ekki vera mikið mál og lagfæra launakjör starfsmanna Akraneskaupstaðar? Hann er búinn að hafa fleiri, fleiri ár til að framkvæma þetta, kemur svo á þessum fundi og belgir sig út eins og hani og reynir að telja fólki trú um að það sé verið að svíkja það stórkostlega fái það ekki að taka laun eftir kjarasamningi Reykjavíkurborgar.  

Ég er margbúinn að benda á það og bjóðast til að setjast yfir það með Sveini Kristinssyni og sýna honum það svart á hvítu að ófaglært starfsfólk fær enga hækkun og eins og áður sagði lækka einstök störf. Að geta talað með þessum hætti eins og Sveinn gerði í gær, vitandi fyrir víst að það eru störf að lækka ef þau taka eftir kjarasamningi Starfsmannafélags Reykjavíkurborgar er ámælisvert og reyndar til skammar. 

Ég býð Sveini enn og aftur, og hef margoft gert, að setjast niður og sýna honum það hvaða afleiðingar það hefur fyrir starfsfólk bæjarins að taka laun eftir kjarasamningi Starfsmannafélags Reykjavíkurborgar. Það þýðir kannski ekki ef vilji Sveins er í þá áttina að þeir ríku verði ríkari og þeir fátæku fátækari.

Eitt er Þó víst að stjórn Verkalýðsfélags Akraness mun berjast fyrir bættum hag allra sinna félagsmanna af festu og ákveðni og býður alla þá starfsmenn Akraneskaupstaðar sem telja hag sínum betur borgið í VLFA velkomna í félagið og munum við kappkosta að þjónusta þá eins vel og kostur er. Mikilvægt er líka fyrir starfsmenn Akraneskaupstaðar að muna það núna að fram er að fara endurmat á starfsmati sem gert var árið 2004 og þeir starfsmenn sem telja starfsmat sitt rangt geta nú óskað eftir endurmati á sínu starfi. Það ferli er nú að fara af stað.

Að lokum vill formaðurinn segja að þetta hefur ekkert með pólitík að gera, enda er formaður félagsins að vinna fyrir félagsmenn sem koma úr öllum flokkum. Það er einfaldlega ekki hægt að horfa upp á að það sé verið að hvetja til þess að laun starfsmanna taki eftir kjarasamningi sem gefi þeim tekjulægstu lægri laun en þeir hafa nú þegar. Það er eitthvað sem stjórn VLFA getur á engan hátt sætt sig við.  Fremstur í flokki fyrir því að starfsmenn bæjarins taki laun eftir kjarasamningi sem er lakari að sumu leyti fyrir einstaka hópa starfsmanna bæjarins er Sveinn Kristinsson. Þess vegna er þessi pistill skrifaður með hagsmuni þeirra tekjulægstu að leiðarljósi.

Fyrsta loðnan sem landað hefur verið hér á Akranesi á þessari loðnuvertíð barst í gærkveldi, en þá landaði Faxi RE um 1.100 tonnum.  Samkvæmt upplýsingum sem formaður félagsins aflaði sér þá er búið að manna á vaktir í síldarbræðslunni og er reiknað með að bræðsla hefjist í kvöld.

Það er mikið fagnaðarefni að sjá að tannhjól síldarbræðslunnar séu byrjuð að snúast aftur eftir gríðarlegan samdrátt á liðnu ári, en nú er liðið rúmt ár síðan bræðsla átti sér stað síðast í verksmiðjunni.  Eins og fram hefur komið hér á heimasíðunni þá var flest öllum starfsmönnum verksmiðjunnar sagt upp störfum í janúar í fyrra vegna samdráttar á uppsjáfarafla.  Hins vegar hefur einhver hluti af þeim starfsmönnum sem sagt var upp störfum í fyrra verið endurráðnir, því ber að fagna.