Skipið kom með súrál til Grundartanga í fyrradag. Eftirlitsmaður Alþjóðaflutningasambandsins kannaði aðbúnað og formaður Verkalýðsfélags Akraness hefur kynnt sér málið eins vel og kostur er. Hefur formaðurinn lýst yfir vanþóknun sinni á meðferðinni á skipshöfn Castor Star. Skipverjar, sem eru frá Georgíu og Úkraínu, sögðust ekki hafa fengið laun greidd frá því í september og auk þess hefðu þeir ekki fengið almennilegan mat í þrjár vikur. Athugun mun hafa leitt í ljós að matur var af skornum skammti og illa farinn og því stöðvuðu skipverjarnir sjálfir uppskipun í hádeginu í gær að höfðu samráði við eftirlitsmann Alþjóðaflutningasambandsins.

Fulltrúi Siglingastofnunar kom síðan um borð í morgun til að kanna skipið og pappíra því tengdu.  Eins og áður sagði þá finnur formaður félagsins til með áhöfn skipsins og vonar að þessar aðgerðir skipverjanna beri tilætlaðan árangur.