Staðan á Grundartanga er nú mjög alvarleg eftir að búið er að slökkva á 340 kerum af 520, sem þýðir að einungis um 180 ker eru nú í rekstri. Þetta jafngildir framleiðslugetu álíka og var árið 2001 og undirstrikar hversu mikið áfall þetta er fyrir starfsemina, starfsfólkið og samfélagið á Akranesi og í nærsveitum.

Allir sem þekkja til vinnu og reksturs álvera vita og átta sig á alvarleikanum þegar búið er að slökkva á jafn stórum hluta kera. Það er morgunljóst að þetta er ekki stöðvun sem varir í nokkra daga eða vikur, heldur miklu umfangsmeira ástand sem mun taka tíma að leysa.

Fjölmargir félagsmenn Verkalýðsfélags Akraness hafa haft samband við félagið á liðnum sólarhring. Eðlilega er fólk bæði óttaslegið og kvíðið yfir stöðunni sem upp er komin. Því er afar mikilvægt að upplýsingagjöf til starfsmanna byggist á eins áreiðanlegum og traustum upplýsingum og kostur er, svo tryggja megi gagnsæi og ró í þessum erfiðu aðstæðum.

Allir sem þekkja til vita að stóriðjurnar á Grundartanga eru lífæð okkar Akurnesinga. Þegar sú æð stíplast getur það svo sannarlega haft alvarlegar afleiðingar fyrir afkomu okkar og samfélagið allt. Þess vegna er brýnt að unnið sé hratt, skipulega og af fullri alvöru að því að koma starfseminni aftur í eðlilegt horf.

Verkalýðsfélag Akraness hefur kallað eftir upplýsingum um stöðuna, en eins og hún er nú eru allir sem vettlingi geta valdið að reyna að lágmarka skaðann og meta umfangið. Vonandi skýrist málið betur á morgun og næstu daga, en ljóst er að um mjög alvarlega stöðu er að ræða.

Þetta áfall kemur jafnframt á sama tíma og Elkem Ísland hefur tilkynnt að draga eigi úr framleiðslu í verksmiðjum félagsins á Íslandi vegna krefjandi markaðsaðstæðna, en það verður gert með því að slökkva á einum af þremur ofnum fyrirtækisins í allt að tvo mánuði. Slíkar aðgerðir endurspegla þær miklu áskoranir sem fyrirtækin í orkufrekum iðnaði standa nú frammi fyrir.

Stóriðjan á Grundartanga skapar um 151 milljarð króna í útflutningstekjur á ári, sem eru tæplega 8% af öllum útflutningstekjum þjóðarinnar. Slík starfsemi skiptir því ekki aðeins miklu máli fyrir okkur hér á Akranesi og í nærsveitum, heldur einnig fyrir þjóðarbúið allt.

Það er mikilvægt að við stöndum saman, styðjum við starfsfólkið og gerum allt sem í okkar valdi stendur til að tryggja að starfsemin komist sem fyrst aftur í eðlilegt horf.

Formaður Verkalýðsfélags Akraness, var á 10. þingi Starfsgreinasambands Íslands (SGS) endurkjörinn formaður sambandsins til næstu tveggja ára. Þingið, sem fram fór í Hofi á Akureyri, stóð yfir í þrjá daga og safnaði saman 135 fulltrúum frá öllum 18 aðildarfélögum SGS víðs vegar að af landinu. Þar ríkti einstök samheldni, kraftur og baráttusókn sem undirstrikuðu styrk hreyfingarinnar.

Á þinginu voru samþykktar sjö afar mikilvægar ályktanir sem snerta kjarnahagsmuni launafólks. Þær fjalla meðal annars um byggðastefnu, starfsemi PCC á Bakka, húsnæðismál, kjara- og leikskólamál, lífeyrismál og starfsemi erlendra vörsluaðila lífeyrissparnaðar. Allar samþykktir og niðurstöður þingsins má nálgast á sérstökum þingvef SGS.

Eftir endurkjörið flutti formaðurinn ræðu þar sem hann lagði áherslu á mikilvægi samstöðu og sameiginlegrar baráttu:

„Hvorki stjórnvöld né atvinnurekendur geta hunsað okkur ef við stöndum saman sem eitt afl. Ég hef setið mörg þingin í áranna rás og hef í raun aldrei fundið fyrir jafnmikilli samstöðu og nú – og samt krafti – og það skiptir öllu máli.“

Að lokum var þakkað fyrir traustið og undirstrikað að áfram verði staðið fast í baráttunni fyrir réttindum og kjörum launafólks.

Samstaðan er okkar sterkasta vopn – baráttan heldur áfram.

Í dag var 25 starfsmönnum Norðuráls sagt upp störfum. Allir sem missa vinnuna starfa á framleiðslusviði fyrirtækisins, en þar starfar stór meirihluti allra starfsmanna.

Ástæðan sem gefin er fyrir þessum aðgerðum er aukinn framleiðslukostnaður sem hefur skapað erfiðar aðstæður í rekstri fyrirtækisins. Þrátt fyrir það breytir það ekki þeirri staðreynd að þetta eru mjög þung tíðindi fyrir þá einstaklinga sem nú missa lífsviðurværi sitt og fjölskyldur þeirra.

Formaður Verkalýðsfélags Akraness, segir:

„Það er þyngra en tárum taki að þurfa enn á ný að horfa upp á fjölda félagsmanna missa störf sín. Þetta er gífurlegt áfall fyrir samfélagið okkar á Akranesi og sár staða fyrir þá einstaklinga sem í hlut eiga. Við munum gera allt sem í okkar valdi stendur til að styðja félagsmenn okkar í gegnum þessar aðstæður.“

Akranes hefur á liðnum árum og áratugum þurft að þola margvíslegar hremmingar í atvinnumálum. Við höfum séð stór fyrirtæki dragast saman eða hætta starfsemi með miklum samfélagslegum afleiðingum. Því eru uppsagnirnar hjá Norðuráli ekki aðeins áfall fyrir þá 25 sem missa vinnuna, heldur minna þær okkur líka á hve brothætt atvinnuöryggi getur verið í samfélagi sem er háð fáum, stórum vinnuveitendum.

VLFA mun fylgjast grannt með framvindu mála og standa vörð um hagsmuni félagsmanna á þessum erfiðu tímum.

Árleg ferð félagsins með eldri félagsmenn var farin í gær og heppnaðist vel. Lagt var af stað kl. 9 og ekið sem leið lá til Hveragerðis. Leiðsögumaður í ferðinni var Gísli Einarsson og sagði hann frá ýmsu áhugaverðu á leiðinni, meðal annars frá skáldum Hveragerðis. Fyrsti viðkomustaður var kirkjan í Hveragerði en þar var vel tekið á móti hópnum með stuttri kynningu á kirkjunni og safnaðarheimilinu og að henni lokinni var öllum frjálst að ganga um og skoða.

Næst  var haldið í Hespuhúsið í Ölfusinu en þar er Guðrún Bjarnadóttir með opna jurtalitunarvinnustofu. Guðrún tók á móti hópnum og sagði frá sínum verkefnum og vinnustofunni. Hún sýndi svo þeim sem vildu hvernig jurtalitunin fer fram. Vinnustofan er mjög rúmgóð og ýmislegt hægt að skoða en einnig hægt að fá sér sæti og slaka á eða glugga í bók. Guðrún selur jurtalitað garn en jafnframt fullgerðar prjónavörur, spil og púsl. Eftir að hafa fræðst og verslað hjá Guðrúnu hélt hópurinn áfram ferð sinni.

Hádegismaturinn var borðaður á Stracta hóteli á Hellu og þar fengu allir góðan mat og  drykk og var þjónustan til fyrirmyndar. Boðið var upp á lambakjöt í aðalrétt og litlar pavlovur í eftirrétt. Allir fóru saddir og sælir af stað aftur og ekið var að Sólheimum í Grímsnesi.

Á Sólheimum fékk hópurinn fræðslu um starf Sesselju Hreindísar Sigmundsdóttur og hvernig hún með mikilli elju og framsýni stofnaði Sólheima árið 1930. Nú 95 árum síðar er starfið á Sólheimum í miklum blóma og var bæði áhugavert og gaman að fá að heyra um það. Sólheimahús var skoðað en það er húsið sem Sesselja reisti á fyrstu árum Sólheima og þar bjó hún ásamt börnunum. Eftir að hafa gengið um svæðið fékk hópurinn kaffi, hjónabandssælu og pönnukökur í kaffihúsi Sólheima.

Að lokinni heimsókn að Sólheimum var komið að heimferð. Komið var til Akraness á slaginu kl. 18 og voru allir ánægðir með viðburðaríkan dag í góðum félagsskap. 

Myndir frá ferðinni má sjá hér.