Í gær kom Katrín Jakobsdóttir forsætisráðherra ásamt Henný Hinz aðstoðarmanni ríkistjórnarinnar á sviði vinnumarkaðsmála í heimsókn á skrifstofu félagsins.

Með formanni VLFA og SGS á fundinum sat nýráðinn framkvæmdastjóri SGS Björg Bjarnadóttir. Eðli málsins samkvæmt voru komandi kjaraviðræður á hinum almenna vinnumarkaði aðalumræðuefnið og kom formaður SGS því vel á framfæri hverjar áherslur SGS eru í komandi kjarasamningum.

Það kom fram í máli formanns að hann hefur verulegar áhyggjur af komandi kjaraviðræðum í ljósi þess að enn og aftur hefur grátkór auðvaldsins hafið upp raust sína að ekkert sé til skiptanna og svigrúm til launabreytinga sé ekkert.

Formaður sýndi forsætisráðherra fyrirsagnir sem birst hafa í fjölmiðlum í aðdraganda kjarasamninga á liðum árum og áratugum og þar sést að aldrei hefur við svigrúm til launahækkana þegar kemur að því að semja fyrir verkafólk, aldrei!

Formaður vék einnig að stöðu útflutningsgreina þar sem allar hagtölur sýna að blússandi gangur er hjá þeim öllum.   Álverin skiluðu um 50 milljörðum í hagnað í fyrra, kísilverin skiluðu einnig frábæri afkomu, þrjú stærstu sjávarútvegsfyrirtækin skiluðu yfir 40 milljörðum í hagnað og einnig liggur fyrir að ferðaþjónustan er á blússandi uppleið, enda landið nánast uppselt.

Spáð er að arðgreiðslur til fyrirtækja muni nema um 200 milljörðum á þessu ári og samt voga hagsmunaaðilar auðvaldsins sér að halda því fram að ekkert sé til skiptanna.

Formaður vék einnig að því að í lífskjarasamningum hafi verkalýðshreyfingin lagt grunn að því að skapa stöðugleika í formi lágrar verðbólgu og hagstæðra vaxtakjara fyrir launafólk en ytri aðstæður eins framboðskortur á húsnæði, Covid og stríðið í Úkraníu hafi valdið því að verðbólgan hefur farið á flug að nýju.

Allt atriði sem launafólk ber ekki nokkra ábyrgð á og því fráleitt að ætlast til þess að launafólk leggi til fórnir enn og aftur enda hefur nánast allur ávinningur af síðasta kjarasamningi sogast í burtu yfir til fjármálakerfisins, einnig hafa leigjendur þurft að þola miklar hækkanir að ógleymdum aukum útgjöldum vegna hækkunar á matar og bensínverði sem og aðrar hækkanir sem dunið hafa á neytendum.

Formaður vék einnig að því hvernig munurinn er á milli íslensku vístölunnar og Samræmdri vísitölu neysluverðs sem mæld er eins í 27 ríkjum ESB og EES. En vegna þess að við erum með eigið húsnæði inní íslensku vísitölunni þá hefur hún ætíð mælst mun hærri en samræmda vísitalan sem leiðir til þess að verðtryggðar skuldir heimilanna og leiguverð hefur hækkað mun meira fyrir vikið.

Það var gott að fá tækifæri til að koma þessum áherslum milliliðalaust til forsætisráðherra og ber formaður þá von að hún hafi meðtekið þá alvarlegu stöðu sem blasir við launafólki og heimilum og var m.a. staðfest í könnun sem Fréttablaðið lét gera þar sem fram kom að 33,3% eiga í erfiðleikum að ná endum saman um hver mánaðarmót!

Aðalsteinn Leifsson ríkissáttasemjari kom í heimsókn á skrifstofu félagsins í morgun og átti tæplega tveggja tíma samtal við formann VLFA sem jafnframt er formaður SGS.

Eðli málsins samkvæmt voru komandi kjaraviðræður á hinum almenna vinnumarkaði aðalumræðuefnið. En ljóst er að komandi kjarasamningar verða afar snúnar og erfiðar, enda ljóst að nánast allur ávinningur af síðasta kjarasamningi er búin að sogast í burtu vegna vaxandi verðbólgu og hækkandi vaxta og leiguverðs.

Það verður mikil áskorun að ná saman nýjum kjarasamningi sem tryggir og varðveitir kaupmátt launafólks, enda liggur fyrir að lífskjarasamningurinn átti að tryggja lága verðbólgu og hagstæðari vaxtakjör. Þau markmið náðust á fyrra hluta samningstímabilsins en á síðustu 12 mánuðum eða svo hefur svo sannarlega hallað undan fæti með hækkandi verðbólgu og hækkandi vöxtum.

Eitt er víst að lífskjarasamningurinn var skynsamur og launafólk gerði allt rétt enda voru allir sammála um að hann myndi tryggja stöðugleika í íslensku samfélagi. Hins vegar er utanaðkomandi atriði eins og framboðsskortur af íbúðarhúsnæði og áhrif af Covid og stríðinu í Úkraníu sem hafa keyrt verðbólguna upp hér á landi sem og víðar um heimsbyggðina.

Eitt er víst að verkalýðshreyfingin verður að verja lífskjör sinna félagsmanna með öllum tiltækum ráðum og muni komandi kjarasamningar ráðast af því að eyða og draga úr óréttlæti, misskiptingu og ójöfnuði í íslensku samfélagi.

Þetta var gott spjall við Aðalstein, enda er ríkissáttasemjara umhugað að þjónusta samningsaðila eins vel og kostur þegar kjaraviðræður eru í gangi milli samningsaðila.

Björg Bjarnadóttir hefur verið ráðin nýr framkvæmdastjóri Starfsgreinasambands Íslands og mun hún hefja störf 1. október næstkomandi.

Björg starfaði sem skrifstofustjóri hjá einu af aðildarfélögum SGS í um 13 ár og þekkir því innviði í starfsemi stéttarfélaga mjög vel. Frá 2018 hefur Björg starfað við kennslu í Fjölbrautarskóla Vesturlands ásamt því að gegna stöðu forstöðumanns bókasafns og sjá um skjalavörslu fyrir fjölbrautarskólann. Hún hefur einnig starfað sem VIRK-ráðgjafi fyrir öll stéttarfélögin á Akranesi og var einn af fyrstu ráðgjöfum sjóðsins og tók þátt í þróun og uppbyggingu þjónustunnar frá upphafi. Hún sat sem aðalmaður í stjórn Festu lífeyrissjóðs frá 2013-2015 og sem varamaður frá 2015-2019 auk þess sem hún sat í verðlagsnefnd búvara á árunum 2015-2017. Þá hefur Björg sinnt hinum ýmsu félags- og sjálfboðaliðastörfum, m.a. umsjón með vikulegu barnastarfi hjá Rauða krossinum.

Björg hefur lokið meistaranámi í upplýsingarfræði (MIS-gráða), ásamt því að vera með viðbótardiplóma í opinberri stjórnsýslu, kennsluréttindi á meistarastigi og starfsréttindi sem grunn- og framhaldsskólakennari. Hún er auk þess með BA-próf í íslensku og stúdentspróf af félagsfræðibraut.

Ráðningarferlið var í höndum Hagvangs en alls bárust 13 umsóknir um stöðuna. Starfsgreinasambandið býður velkomna til starfa og óskar henni velfarnaðar í störfum sínum fyrir sambandið.

Vikuna 25. júlí til og með 29. júlí er skrifstofa félagsins lokuð vegna sumarleyfa.

Við opnum aftur þriðjudaginn 2. ágúst.

Ef erindið er mjög nauðynlegt má senda okkur póst á This email address is being protected from spambots. You need JavaScript enabled to view it.