• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Fréttir

Fréttir

16
 Jun

62 einstaklingar á atvinnuleysisskrá á Akranesi

Stóriðjan á Grundartanga hefur tryggt okkur skagamönnum mikla hagsældStóriðjan á Grundartanga hefur tryggt okkur skagamönnum mikla hagsældSamkvæmt upplýsingum frá Vinnumálastofnun þá eru 136 manns á atvinnuleysisskrá þessa stundina á Vesturlandinu öllu. Skiptingin á milli kynjanna er þannig að það eru 58 karlar og 78 konur.  Á Akranesi eru 62 á skrá 16 karlar og 46 konur af þessum 62 eru 15 í einhverskonar hlutastarfi.

Á þessu sést að atvinnuástandið hjá okkur skagamönnum verður að teljast nokkuð gott ef tekið er tillit til þess samdráttar sem orðið hefur í veiðum og vinnslu á undanförnum misserum.  Það þarf ekkert að fara í grafgötur með það að stóriðjan á Grundartanga hefur tryggt atvinnumöguleika okkar Akurnesinga gríðarlega á undanförnum árum. 

Ef Norðurál og Íslenaska járnblendið nyti ekki við er alveg ljóst að atvinnuástandið væri mun ótryggara heldur en það er í dag.  Það er hægt að segja að stóriðjan á Grundartanga hafi búið til mikla hagsæld fyrir okkur skagamenn og á þeirri forsendu skilur formaður félagsins það mæta vel að Húsvíkingar vilji ólmir fá álver á Bakka. 

12
 Jun

Erfitt að fylla skarð Grétars Þorsteinssonar

Á fundi miðstjórnar Alþýðusambands Íslands í gær sem formaður Verkalýðsfélags Akraness sat tilkynnti Grétar Þorsteinsson, forseti ASÍ, að hann sæktist ekki eftir endurkjöri sem forseti á ársfundi ASÍ í lok október n.k. Grétar var fyrst kjörinn forseti ASÍ í maí 1996, og mun hafa gengt þessu embætti í tólf og hálft ár þegar að ársfundi kemur. Það er því ljóst að nýr forseti ASÍ verður kjörinn í lok október.

Það er einnig ljóst að það verður erfitt að fylla það skarð sem Grétar skilur eftir sig sem forseti ASÍ og vonandi finnst verðugur einstaklingur til að taka við þessu veigamikla starfi.  Það vill til að verklýðshreyfing á marga frambærilega forystumenn innan sinna vébanda því það skiptir gríðarlega miklu máli að það veljist vel hæfur einstaklingur til að gegna þessu veigamikla starfi.

Verkalýðsfélag Akraness hefur ávallt átt afar gott samstarf við forsetann í gegnum árin enda er Grétar mjög vandaður maður sem gott er að leita til þegar vandi steðjar að.

Það verður spennandi að sjá hverjir munu gefa kost á sér í þetta embætti en það ætti að skýrast á næstu vikum og mánuðum en kosið verður um nýjan forseta á ársfundinum í október eins og fram hefur komið.

Nóg að gera við að verja áunnin réttindi
09
 Jun

Nóg að gera við að verja áunnin réttindi

Það hefur verið nóg að gera hjá starfsmönnum félagsins við að innheimta launkröfur fyrir félagsmenn að undanförnu.  Sem dæmi þá er félagið með tvær kröfur hjá ábyrgðasjóði launa vegna gjaldþrota en kröfurnar eru á fyrirtækin Öryggismiðstöð Vesturlands og byggingarfyrirtækið Handverksmenn sem voru tekin til gjaldþrotaskipta fyrr í vetur.  Krafa vegna þessara gjaldþrota er um 1. milljón króna.

Einnig er félagið að stefna byggingarfyrirtæki vegna vangreidds orlofs en um er að ræða 10 starfsmenn og er heildarkrafan vel á fjórðu milljón.

Að lokum er rétt að segja frá máli pólks sjómanns sem slasaðist um borð í loðnubáti í febrúar árið 2007 í sínum fyrsta túr.  Honum var tjáð af skipstjóra að hann ætti ekki rétt til launa vegna slysins þar sem um tímabundna ráðningu hafi verið um að ræða.  Maðurinn leitaði til Verkalýsðfélags Akraness fyrir nokkrum dögum vegna þessa máls.  Formaður félagsins fór í málið enda algerlega ljóst að skipstjórinn hafi rangt fyrir sér í þessu máli þar sem um slys var um að ræða.  Í 36.gr sjómannalaga kemur skýrt fram hver réttur sjómanna er ef um slys er að ræða um borð í skipum.

Formaður hefur verið í sambandi við útgerðina og það liggur fyrir að hér var um mistök að ræða og verður pólska sjómanninum greiddar rétt tæpar 2.7 milljónir vegna þess slys sem hann varð fyrir. 

Á þessu sérst hversu mikilvægt það er fyrir félagsmenn að vera aðilar að öflugu stéttarfélagi.

Atkvæðagreiðsla að hefjast um nýgerðan kjarasamning ríkisstarfsmanna
05
 Jun

Atkvæðagreiðsla að hefjast um nýgerðan kjarasamning ríkisstarfsmanna

Starfsgreinasamband Íslands gekk nýlega frá kjarasamningi við ríkið fh. aðildarfélaga sambandsins víða um land. Eitt af aðildarfélögum sambandsins er Verkalýðfélag Akraness.

Verði samningurinn samþykktur í atkvæðagreiðslu gildir hann frá 1. maí 2008 til 31. mars 2009. Um er að ræða skammtímasamning.

Ákveðið hefur verið að afgreiða samninginn í sameignlegri póstatkvæðagreiðslu meðal allra félagsmanna innan Starfsgreinasambandsins sem starfa eftir samningnum. Starfsgreinasambandið mun því sjá um atkvæðagreiðsluna og senda þeim sem hafa atkvæðisrétt kjörgögn á næstu dögum. Eftir að fólk hefur greitt atkvæði þarf það að koma atkvæðaseðlum í póst.

Með atkvæðaseðlinum munu fylgja góðar upplýsingar um breytingarnar sem náðust í viðræðunum við ríkið. Þeir sem vilja, geta auk þess fengið samninginn í heild sinni á Skrifstofu félagsins.

Verkalýðsfélag Akraness vill skora á félagsmenn að nýta sér atkvæðisréttinn með því að greiða atkvæði um kjarasamninginn. Því það skiptir miklu máli að menn greiði atkvæði um samninginn og sýni þannig í verki að þeim sé ekki sama um sín kjör. Að sjálfsögðu greiða menn atkvæði eftir sinni bestu samvisku.

Frekari upplýsingar er hægt að fá á Skrifstofu Verkalýðsfélagsins.

04
 Jun

61 án atvinnu á Akranesi

Stóriðjan tryggir nokkuð gott atvinnuástand á AkranesiStóriðjan tryggir nokkuð gott atvinnuástand á AkranesiSamkvæmt upplýsingum frá Vinnumálastofnun hér á Akranesi þá eru 61 á atvinnuleysinsskrá.  Það eru 18 karlar án atvinnu og 42 konur sem gerir um 1% atvinnuleysi. 

Það hafa ekki verið neinar stórar uppsagnir á félagssvæði Verkalýðsfélags Akraness frá því að HB Grandi sagði upp rúmum 40 konum í landvinnslu fyrirtækisins síðastliðinn vetur.  Atvinnuástandið á félagssvæði VLFA er nokkuð gott þessa stundina þó vissulega séu blikur á lofti og þá sérstaklega í byggingargeiranum.

Vissulega er aldrei gott þegar fólk hefur ekki atvinnu en það sem bjargar okkur skagamönnum er sú mikla uppbygging sem orðið hefur á Grundartangasvæðinu á undanförnum árum.  Formaður félagsins vill ekki hugsa þá hugsun til enda ef atvinnumöguleikarnir á stóriðjusvæðinu á Grundartanga væru ekki til staðar.  Sérstaklega í ljósi þess mikla niðurskurðar sem orðið hefur í vinnslu og veiðum hér á Akranesi á undanförnum árum.

02
 Jun

Sumarhús félagsins í Ölfusborgum skemmt vegna jarðskjálftans

Ekki var hægt að leigja út sumarhús félagsins í Ölfusborgum um síðustu helgi eins og til stóð vegna afleiðinga jarðskjálftans sem reið yfir á fimmtudaginn sl. Það liggur fyrir að töluverðar skemmdir hafa orðið á innbúinu, leirtau er meira og minna brotið sem og aðrar skemmdir. Í sumum bústöðum er ekki komið vatn á ennþá og þessa stundina er ekki víst hvort hægt verður að leigja út bústaðinn um næstu helgi sökum áðurnefndra skemmda.

Nefnd á vegum sumarhúsaeigenda í Ölfusborgum kom saman til fundar í morgun til að ákveða næstu skref en verið er að velta því fyrir sér hvort fenginn verði verktaki til að sjá um að laga þær skemmdir sem orðið hafa á húsum í orlofsbyggðinni.

Félagið á einnig sumarbústað í Hraunborgum í Grímsnesi og hafa forsvarsmenn félagsins kannað þann bústað og liggur fyrir að ekki urðu neinar skemmdir þar þó svo hann sé töluvert nálægt upptökum skjálftans.

Tveir sjómenn heiðraðir í morgun
01
 Jun

Tveir sjómenn heiðraðir í morgun

Í hátíðarguðþjónustu í morgun voru tveir sjómenn heiðraðir það voru þeir Friðrik Kristinsson og Reynir Magnússon en þeir félagar hafa gengt sjómennsku nær allt sitt líf.  Verkalýðsfélag Akraness vill óska þeim Kristni og Reyni innilega til hamingju með heiðrunina í dag.  Að lokinni guðþjónustunni var gengið að minnismerki sjómanna að Akratorgi og þar var lagður krans til minningar um látna sjómenn.

Það er sjómannadeild Verkalýðsfélags Akraness sem sér um heiðrun á sjómönnum ár hvert og athöfnina við minningu um látna sjómenn í góðri samvinnu með okkar sóknarpresti séra Eðvarði Ingólfssyni.

Verkalýðsfélag Akraness sendir öllum sjómönnum og fjölskyldum þeirra bestu kveðjur í tilefni sjómannadagsins. 

Allir miðar búnir á Bubba
30
 May

Allir miðar búnir á Bubba

Nú liggur fyrir að húsfyllir verður á tónleikunum með Bubba Mothens sem Verkalýðsfélag Akraness býður félagsmönnum sínum á og haldnir verða í Bíóhöllinni í kvöld.

Yfir 300 miðar eru nú farnir og ljóst að það stefnir í mikla stemningu á komandi tónleikum. Það gleður stjórn félagsins að sjá að þetta framtak virðist falla í afar góðan jarðveg hjá félagsmönnum enda er það stefna stjórnar félagsins að þjónusta sína félagsmenn eins vel og kostur er og eru þessir tónleikar einn liður í þeirri vinnu.

Nánar verður greint frá tónleikunum eftir helgi og myndir þaðan birtar hér á síðunni.

400 leikskólabörn fengu harðfiskpoka frá Verkalýðsfélagi Akraness
30
 May

400 leikskólabörn fengu harðfiskpoka frá Verkalýðsfélagi Akraness

Forsvarsmenn Verkalýðsfélags Akraness fóru í morgun í alla leikskóla bæjarins og gáfu börnunum harðfiskpoka í tilefni af sjómannadeginum sem verður haldinn hátíðlegur vítt og breitt um landið á sunnudaginn kemur.

Það voru um 400 leikskólabörn sem fengu harðfiskpoka frá félaginu og það var afar ánægjulegt að sjá hversu þakklát öll börnin voru með þetta framtak Verkalýðsfélags Akraness.

Börnin höfðu á orði hversu rosalega góður harðfiskurinn væri og ekki spillir fyrir að harðfiskur er nokkuð hollur.  Harðfiskurinn kemur frá Kjarnafiski hér á Akranesi en það er Börkur Jónsson harðfiskverkandi sem á og rekur Kjarnafisk. 

Stjórn félagsins hefur tekið ákvörðun um þetta verði gert að árlegum viðburði að fara með harðfiskpoka til leikskólabarna í tilefni sjómannadagsins.  

Kynningarfundur með starfsmönnum Sjúkrahúss Akraness
29
 May

Kynningarfundur með starfsmönnum Sjúkrahúss Akraness

Klukkan 15:00 í dag mun formaður félagsins halda kynningarfund með starfsmönnum Sjúkrahúss Akraness vegna nýgerðs kjarasamnings við ríkið. Formaður mun á þessum kynningarfundi fara ítarlega yfir samninginn og jafnframt gera grein fyrir fyrirkomulagi á kosningu um nýgerðan samning.

Eins og fram hefur komið hér á heimasíðunni þá telur formaður að þessi samningur við ríkið sé nokkuð ásættanlegur. Helstu atriði samningsins eru þau að launataxtar hækka um kr. 20.300. Því til viðbótar kom ný launatafla sem gefur félagsmönnum sem vinna eftir samningnum hækkum sem nemur rétt tæpu 1%. Sem dæmi þá grunnraðast flestir starfsmenn Sjúkrahúss Akraness inn í 6. launaflokk og starfsmaður sem er orðinn 35 ára gamall fær hækkun sem nemur 21.524 kr á grunnlaun.

Einnig mun dögum vegna veikinda barna fjölga úr 10 í 12 og framlag í sjúkrasjóð félagsins mun hækka upp í 0,75%.

Rétt er að geta þess að gildistími þessa samnings er mun styttri en kjarasamnings hins almenna vinnumarkaðar sem undirritaður var hinn 17. febrúar. Gildir þessi samningur einungis til 31. mars 2009 eða í 11 mánuði. Var það gert vegna þess ástands sem nú ríkir í íslensku efnahagslífi, en eins og flestir vita þá er verðbólgan komin upp í rúm 12% sem þýðir að óvarlegt hefði verið að gera samning til langs tíma.

Page 138 of 210

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image