• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Fréttir

Fréttir

05
 Jan

Tilkynning frá Símenntunarmiðstöðinni á Vesturlandi

Námsvísir vorannar hefur komið inn um lúguna um þetta leyti, en brugðið verður út af vananum í þetta sinn. Ástæðan er sú að Símenntunarmiðstöðin á 10 ára afmæli á þessu ári eða 19. febrúar nk.

Af því tilefni hefur stjórn stofnunarinnar skipað afmælisnefnd sem mun vinna að veglegu afmælisblaði sem verður gefið út á vormánuðum.  Einnig er fyrirhugað að halda upp á þessi tímamót með ýmsu móti sem mun vara allt afmælisárið.

Námskeið vorannar verða birt á vefnum okkar www.simenntun.is og einnig munu námskeið verða auglýst í staðarmiðlum og með öðrum hætti jafnt og þétt alla vorönnina.

Við vonum að þetta valdi ekki óþægindum og hlökkum til að vinna áfram  að því að byggja upp öfluga  stofnun á sviði sí- og endurmenntunar á Vesturlandi.

Ef þú hefur ósk um námskeið eða ábendingar um bætta þjónustu þá sendu endilega póst á This email address is being protected from spambots. You need JavaScript enabled to view it.  eða hringdu í okkur í síma 437-2390.

Með afmæliskveðjum,

Inga Dóra Halldórsdóttir framkvæmdastjóri

02
 Jan

Greiðslur úr sjúkrasjóði námu 26,5 milljónum á árinu 2008

Greiðslur úr sjúkrasjóði Verkalýðsfélags Akraness á árinu 2008 voru 26,5 milljónir og jukust um 4 milljónir á milli ára.  Ástæða þessarar aukningar er sú að félagið hefur að undanförnu að fjölgað og hækkað styrki sem félagsmönnum standa til boða. 

Það er afar ánægjulegt að geta látið félagsmenn njóta góðrar afkomu félagsins undanfarinna ára með hækkun og fjölgun á nýjum styrkjum, enda er það yfirlýst stefna stjórnar félagsins að reyna eftir fremsta megni að þjónusta sína félagsmenn eins vel og kostur er. 

Atvinnurekendur úr stjórnum lífeyrissjóða og frysting verðtryggingar
30
 Dec

Atvinnurekendur úr stjórnum lífeyrissjóða og frysting verðtryggingar

Á forsíðu Fréttablaðsins þann 27. desember sl. var viðtal við forseta Alþýðusambands Íslands þar sem hann taldi endurskoðun kjarasamninga í uppnámi. Ástæða þess að forseti ASÍ telur samningana í uppnámi segir hann vera þá að ríkisstjórnin hafi ekki sýnt áhuga á samstarfi við verkalýðshreyfinguna og einnig óánægja með fjárlagafrumvarpið og vill verkalýðshreyfingin sjá frekari breytingar á eftirlaunafrumvarpinu. Undir þessi sjónarmið tekur stjórn Verkalýðsfélags Akraness með ASÍ

Einnig telur stjórn Verkalýðsfélags Akraness að nýta eigi ákvæði um endurskoðun kjarasamninga til að knýja ríkisstjórn Íslands til þess að frysta verðtrygginguna á meðan mesta verðbólguskotið gengur yfir. Það liggur fyrir að eignir almennings eru að brenna upp í þeirri óðaverðbólgu sem nú geisar hér á landi og það gengur ekki upp að lífeyrissjóðir, bankar og fjármagnseigendur séu þeir einu sem hagnist á því verðbólguskoti sem nú geisar. Það er lag núna að beita ákvæði um endurskoðun kjarasamninga til að knýja á um frystingu verðtryggingar.

Það á einnig að gera þá kröfu á samtök atvinnulífsins við endurskoðun kjarasamninga að atvinnurekendur víki úr stjórnum lífeyrissjóða því það er á engan hátt eðlilegt að atvinnurekendur séu að véla með lífeyrir launafólks. Þetta á að vera eitt af grundavallaratriðum við endurskoðun kjarasamninga að atvinnurekendur víki úr stjórnum lífeyrissjóða.

Ekki alls fyrir löngu var fjallað um það hér á heimasíðunni hversu óeðlilegt það sé að atvinnurekendur sitji í stjórnum þessara sjóða. Það var því mjög ánægjulegt að sjá að sjómannadeild Framsýnar á Húsavík ályktaði nýverið um að gerð verði krafa um að atvinnurekendur víki úr stjórnum lífeyrissjóða. Það þyrfti að kanna hvort að það sé ekki orðinn víðtækur stuðningur innan verkalýðshreyfingarinnar um þetta atriði því eins og áður sagði þá nær það engri átt að atvinnurekendur séu að taka ákvarðanir um fjárfestingarstefnu sjóðanna, þeir eru jú lífeyrir okkar félagsmanna og einnig eru þetta kjarasamningsbundin réttindi sem um hefur verið samið í kjarasamningum.

Lækkun krónunnar hefur jákvæð áhrif á laun sjómanna
30
 Dec

Lækkun krónunnar hefur jákvæð áhrif á laun sjómanna

Í gær var haldinn aðalfundur Sjómannadeildar Verkalýðsfélags Akraness.  Auk venjubundinna aðalfundastarfa þá var nýgerður kjarasamningur sjómanna kynntur og voru fundarmenn almennt nokkuð sáttir við hann þó vissulega séu alltaf einhver atriði samningsins sem menn hefðu viljað sjá með öðrum hætti.

Fram kom hjá fundarmönnum að þetta ár er búið að vera almennt nokkuð fengsælt fyrir sjómenn en hrun íslensku krónunnar hefur leit til þess að laun sjómanna hafa hækkað umtalsvert á árinu sem nú er að líða. 

Sjómenn munið aðalfund Sjómannadeildar Verkalýðsfélags Akraness á morgun
28
 Dec

Sjómenn munið aðalfund Sjómannadeildar Verkalýðsfélags Akraness á morgun

Verkalýðsfélag Akraness vill minna sjómenn á aðalfund Sjómannadeildar Verkalýðsfélags Akraness á morgun.  Fundurinn hefst kl. 14:00 og verður hann í fundarsal félagsins að Sunnubraut 13.

Á fundinum á morgun verður nýgerður kjarasamningur sjómanna til umfjöllunar.  Samningurinn er framlenging á síðast gildandi samningi með þeim breytingum sem fram koma í þessum samningi.

Atkvæði um kjarasamninginn verða greidd hjá hverju aðildarfélagi fyrir sig og á atkvæðagreiðslu að ljúka fyrir áramót. Í upphafi næsta árs verða atkvæði síðan talin sameiginlega hjá aðildarfélögum SSÍ um samninginn.

Verði samningurinn samþykktur hækkar kauptrygging og launaliðir frá 1. janúr 2009. Hægt er að nálgast samninginn og kaupgjaldsskrána á heimasíðu Sjómannasambandsins http://www.ssi.is/

25
 Dec

Gleðileg jól

Starfsmenn og stjórn Verkalýðfélags Akraness óskar félagsmönnum sínum og landsmönnum öllum gleðilegra jóla og farsældar á nýju ári, með þökk fyrir samfylgdina á liðnum árum.

Stál í stál
23
 Dec

Stál í stál

Nú á Verkalýðsfélag Akraness eftir að ganga frá einum kjarasamningi í þessari samningalotu, en það er kjarasamningur fyrir starfsmenn Klafa.  Starfsmenn Klafa sjá um allar upp- og útskipanir á Grundartangasvæðinu ásamt því að þjónusta bæði Norðurál og Elkem Ísland.

Eigendur Klafa eru stóriðjufyrirtækin á Grundartanga þ.e.a.s Norðurál og Elkem Ísland en þau eiga 50% hvort um sig.

Verkalýðsfélag Akraness hefur átt í viðræðum við Samtök atvinnulífsins að undanförnu vegna þessa kjarasamnings en hann rann út 1. desember sl.  Eins og fram kom hér á heimasíðunni þá samdi félagið við Elkem Ísland um nýjan kjarasamning og er sá kjarasamningur að gefa starfsmönnum 17,7% við undirskrift og uppí rúm 22% á samningstímanum.

Samtök atvinnulífsins lagði hins vegar fram tilboð að nýjum kjarasamningi Klafa fyrir nokkrum dögum en það tilboð var ekki í neinu samræmi við það sem um var samið fyrir starfsmenn Elkem fyrr í þessum mánuði.  Rétt er að það komi fram að starfsmenn Klafa voru eitt sinn starfsmenn Elkem og tóku laun eftir þeim samningi, en fyrir nokkrum árum var nokkrum deildum innan fyrirtækisins skipt upp og stofnuð fyrirtæki í kringum þær deildir.

Á þeirri forsendu er það óskiljanlegt að eigendur Klafa skuli hafa lagt fram tilboð til handa starfsmönnum Klafa sem kveður á um lakari hækkanir en um var samið hjá Elkem.  Það er ekki bara það að starfsmönnum Klafa hafi verið boðið lakari hækkanir en starfsmönnum Elkem, heldur vildu Samtök atvinnulífsins einnig að kjarasamningur Klafa yrði gerður að fyrirtækjasamningi.

Það er morgunljóst að Verkalýðsfélag Akraness mun alls ekki ganga frá samningi fyrir starfsmenn Klafa sem kveður á um lakari hækkanir og réttindi heldur en um var samið til handa starfsmönnum Elkem, frá þeirri kröfu verður ekki kvikað. 

Einnig liggur það fyrir að starfsmenn munu ekki samþykkja að breyta sínum kjarasamningi í fyrirtækjasamning.  Nú er bara að vona að eigendur Klafa og SA sjái að sér svo hægt verði að klára nýjan kjarasamning eins fljótt og kostur er, ella er allt eins líklegt að það stefni í átök til að ná fram þeirri sanngjörnu kröfu að starfsmenn Klafa fái sömu hækkanir og um var samið handa starfsmönnum Elkem Ísland fyrr í þessum mánuði. 

Elkem skoðar möguleika á sólarkísil verksmiðju á Grundartanga
22
 Dec

Elkem skoðar möguleika á sólarkísil verksmiðju á Grundartanga

Á vef Skessuhorns birtist þessi frétt.  Í tengslum við að Elkem á Íslandi, sem rekur Járnblendiverksmiðjuna á Grundartanga, vinnur nú að því að endurnýja starfsleyfi sitt, eru einnig uppi áform um að reisa þar sólarkísilverksmiðju. Elkem hugar nú að staðsetningu fyrir slíka verksmiðju sem framleiddi sólarrafhöðlur, m.a. í tjald- og fellihýsi.

Hörð samkeppni er um þessa nýju verksmiðju Elkem enda gæti hún skapað 200-300 störf.  Einar Þorsteinsson, forstjóri ELKEM á Íslandi, sagði í fréttum RUV að Grundartangi sé vel til þess fallinn að hýsa nýju verksmiðjuna og að í nýja starfsleyfinu sé óskað eftir heimild fyrir henni. Einar segir um sé að ræða 10.000 tonna verksmiðja, en ákvörðun um staðsetningu hennar verði tekin á næsta ári.

Verði Grundartangi fyrir valinu gæti þessi nýja verksmiðja risið innan fárra ára. Einar bendir á að margir aðrir staðir í heiminum komi einnig til greina, svo sem í Asíu og Bandaríkjunum, Kanada og víðar. Þarna sé aðallega spurning um hagstæðustu orkumöguleikana.

Einar segir að Ísland standi vel að því leyti að hér sé Elkem með járnblendiverksmiðju, en kísilsólarframleiðslan er mjög tengd slíkri framleiðslu. Einar telur líklegt að samkeppnin verði hörðust við Kanada, sökum þess að þar starfræki Elkem járnblendiverksmiðju.

Það yrði gríðarlega jákvætt ef þessi framleiðsla yrði að veruleika og myndi slík verksmiðja styrkja stoðir okkar Akurnesinga í atvinnumálum enn frekar.
22
 Dec

Kjarasamningur við Launanefnd sveitarfélaga samþykktur

Á föstudaginn sl. var talið upp úr kjörkössum vegna kjarasamnings Verkalýðsfélags Akraness við Launanefnd sveitarfélaga og er skemmst frá því að segja að samningurinn var samþykktur með öllum greiddum atkvæðum.

Á miðvikudaginn sl. var haldinn kynningarfundur um samninginn og kom fram hjá fundarmönnum að miðað við aðstæður í íslensku efnahagslífi þá væri þetta ásættanlegur samningur, sérstaklega í ljósi þess að einungis væri um skammtímasamning í 9 mánuði að ræða.

Að undanförnu hefur starfsmönnum Akraneskaupstaðar í Verkalýðsfélagi Akraness fjölgað nokkuð og eru nú tæplega 100 starfsmenn félagsmenn í Verkalýðsfélagi Akraness. 

19
 Dec

Uppbygging á Grundartanga

Ákjósanlegt iðnaðarsvæðiÁkjósanlegt iðnaðarsvæðiFréttabréf Verkalýðsfélags Akraness kom út í dag og er fréttabréfið borið út í öll hús og fyrirtæki á Akranesi og í nágrenni. 

Í fréttabréfinu er m.a. viðtal við Gísla Gíslason hafnastjóra Faxaflóahafna um væntanlega uppbyggingu fyrirtækja á Grundartanga.  Í viðtalinu segir Gísli að nokkrir aðilar hafi þegar ákveðið að hefja starfsemi á Grundartanga og vonast er til að a.m.k tveir þeirra hefjist handa við húsbyggingar á komandi ári.

Einnig kemur fram hjá Gísla að þó nokkur áhugi sé hjá fleiri aðilum sem eru með spennandi verkefni en ekki sjái fyrir endann á því hvort takist að klófesta þá aðila.  Gísli telur að Grundartangasvæðið sé ákjósanlegt fyrir ýmis konar iðnaðarstarfsemi. 

Formaður félagsins tekur undir það með hafnastjóranum að Grundartangasvæðið sé ákjósanlegt fyrir iðnaðarstarfsemi af ýmsum toga og telur hann að til lengri tíma litið séu atvinnuhorfur á félagssvæði VLFA nokkuð góðar sé tekið tillit til þess ástands sem nú ríkir í íslensku atvinnulífi.

Hægt er að lesa fréttabréfið með því að smella HÉR

Page 133 of 212

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image