Á morgun mun formaður Verkalýðsfélags Akraness, bæjarstjórinn á Akranesi og Ragnar Þór Ingólfsson formaður VR funda með íbúum á Holtsflöt 4 og Eyrarflöt 2 vegna þess neyðarástands sem hefur skapast eftir að Heimavellir ákváðu að selja allar leiguíbúðir félagsins hér á Akranesi.

Formaður og bæjarstjórinn hafa verið að reyna að aðstoða þá einstaklinga sem eru að lenda í klónum á þessari siðlausu ákvörðun Heimavalla m.a. með því að leita að íbúðum til leigu handa þessum einstaklingum sem þarna eiga í hlut.

Það hefur gengið nokkuð vel og verða möguleikar í stöðunni kynntar fyrir íbúum á fundinum á morgun. Einnig mun formaður VR fara yfir hugmyndir að nýjum svokölluðum hlutdeildarlánum.

En til upprifjunar á málinu þá hefur formaður fjallað um þá framkvæmd sem leigufélagið Heimavellir gerðu og þann ótrúlegan gjörning og siðlausa athæfi sem laut að því að selja bæði Holtsflöt 4 og Eyrarflöt 2 með þeim afleiðingum að nánast 26 fjölskyldur er í fullkominni angist og kvíða vegna þess að þau verða húsnæðislaus á næstu mánuðum.

Eins og flestir vita þá keyptu Heimavellir þessar íbúðir af Íbúðalánasjóði og sérkjörum á sínum tíma með þeim formerkjum að tryggja öflugan og tryggan leigumarkað hér á Akranesi.

En nú örfáum árum síðar hafa Heimavellir pakkað saman og selt nánast allar eignir sem þeir fengu á sérkjörum frá Íbúðalánasjóði á sínum tíma.

En hvað skyldi nú Heimavellir hafa selt íbúðirnar á til nýrra eigenda? Jú, ég hef aflað mér þær upplýsingar og hef kaupsamninga undir höndum og þar kemur í ljós að 18 íbúðir að Holtsflöt 4 voru seldar á 582 milljónir sem gerir að meðaltali rétt rúmar 32 milljónir á íbúð! En rétt er að geta þess að fasteignamat fyrir árið 2020 var rétt tæpar 860 milljónir eða 276 milljónum undir fasteignamati eða 47%.

Heimavellir seldu einnig 8 íbúðir á Eyrarflöt 2 til sömu aðila á 190 milljónir sem gerir að meðaltalsverð á pr. íbúð var 23,7 milljónir. Hins vegar nemur fasteignamat fyrir árið 2020 á þessum 8 íbúðum á Eyrarflötinni um 260 milljónum eða 37% undir fasteignamati.

Með öðrum orðum þá seldu Heimavellir þessum nýju eigendum Eyrarflöt 2 og Holtsflöt 4 þessar tvær blokkir 341 milljónum undir fasteignamati. En rétt er að geta þess að Holtsflöt 4 var byggð árið 2007 og er meðaltals fermetri á íbúð á Holtsflötinni 123 fermetrar. Eyrarflöt 2 var byggð árið 2004 og meðalfermetri á íbúð 78,6 fermetrar.

Það sem líka vekur undrun mína er að Íbúðarlánasjóður virðist blessa söluna á Eyrarflötinni því það voru kvaðir sem kváðu á um að óheimilt væri að hafa eigendaskipti á íbúð sem hvílir lán til leiguhúsnæðis, nema að til komi samþykki stjórnar Íbúðalánssjóðs. Það er ekki að sjá annað en að stjórn Íbúðalánssjóðs hafi heimilað þessi eigendaskipti og það þrátt fyrir að selja eigi allar íbúðirnar!

Það er algjörlega með ólíkindum að Heimavellir skuli hafa vogað sér að selja þessar eignir langt undir fasteignamati án þess að bjóða leigjendum kaup á íbúðunum með sama gríðarlega afslætti og þarna átti sér stað. Siðleysið og vanvirðingin gagnvart sínum leigjendum er algert og það er eins og forsvarsmenn Heimavalla hafa algerlega gleymt þeirri staðreynd að á bakvið þennan gjörning eru manneskjur og barnafólk sem þurfa að þjást og lifa við mikinn kvíða við að finna sér og sínum þak yfir höfuðið.

Ég ítreka enn og aftur það sem ég hef áður skrifað um þetta mál hafi Heimavellir algera skömm fyrir þessa ómanneskjulegu framkomu gagnvart grandalausum leigjendum!

Í gær var haldinn sjötti kjarasamningafundurinn með forsvarsmönnum Norðuráls og hafa viðræðurnar gengið þokkalega til þessa.

Aðalfókusinn á síðustu fundum hefur verið á þær hugmyndir að breyta vaktakerfinu í kerskála og steypuskála - úr 12 tíma vaktakerfi í 8 tíma vaktakerfi eins og tíðkast í öllum sambærilegum verksmiðjum í orkusæknum iðnaði.

En hér yrði um gríðarlega breytingu um að ræða ef samkomulag næst en í 12 tíma vaktakerfinu eru starfsmenn að skila 182 vinnustundum á mánuði en í 8 tíma vaktakerfinu er starfsmenn að skila 145,6 vinnustundum á mánuði.

Þetta myndi leiða af sér að á nýju 8 tíma vaktakerfi myndu starfsmenn skila að meðaltali að frádregnu orlofi 1552 vinnustundum í stað 1876 vinnustundum á ári,  sem þýðir að vaktavinnumenn í Norðuráli myndu vinna 324 vinnustundum minna en þeir gera á 12 tíma vaktakerfinu. Sem þýðir einnig að starfsmenn skila að jafnaði 27 vinnustundum minna á mánuði eða heilum 2 mánuðum minna á ári en í 12 tíma vaktakerfinu.

Það er morgunljóst og sést á öllum hinum verksmiðjunum að þetta 8 tíma vaktakerfi er mun manneskjulegra og fjölskylduvænna að ógleymdu því að það er lýðheilsumál að draga úr miklu vinnuframlagi vaktavinnufólks sem vinnur alla daga ársins jafnt að degi, kveldi eða nóttu.

Hins vegar liggur fyrir að aðalkrafa starfsmanna NA er að samið verði með sama hætti og í síðasta kjarasamningi hvað launabreytingar varðar en þar verið að tala um að laun starfsmanna Norðurál hækki í takt við launavísitölubreytingar.

Næsti fundur hefur verið boðaður þriðjudaginn 4  febrúar.

Rétt í þessu lauk kosningu Verkalýðsfélags Akraness vegna kjarasamnings félagsins við Samband íslenskra sveitafélaga, en þeir sem heyra undir þennan kjarasamning eru félagsmenn VLFA sem starfa hjá Akraneskaupstað, Hvalfjarðasveit og dvalar-og hjúkrunarheimilinu Höfða.

Það er skemmst frá því að segja að gríðarleg ánægja er með samninginn, sem endurspeglast í því að allir þeir sem kusu um samninginn sögðu já við samningum.

Það er afar ánægjulegt að sjá, að þeir félagsmenn sem heyra undir þennan kjarasamning við sveitafélögin skuli vera sammála forystu félagsins um ágæti þessa samningsins. Það er mat formanns félagsins að þessi samningur sé félagsmönnum afar góður þar sem verið er að stíga þétt og jöfn skerf í því að lagfæra kjör þeirra sem starfa hjá sveitafélögunum, en byggist á hugmyndafræðinni sem samið var um í Lífskjarasamningum.

Þessi niðurstaða gerir það að verkum að um næstu mánaðarmót munu starfsmenn fá eingreiðslu og afturvirkni sem hljóðar samtals uppá 151.000 krónur fyrir fullt starf sem og að laun munu hækka að lágmarki um 17.000 kr.

.

Á kjörskrá voru: 402 og 62 kusu eða 15,42%  - JÁ sögðu 62 eða 100%  Vissulega hefði þátttaka í atkvæðagreiðslu samningsins mátt vera meiri en engu að síður er niðurstaðan afdráttarlaus og það er forysta Verkalýðsfélags Akraness gríðarlega ánægð með.

Fimmti samningafundur stéttarfélaganna með forsvarsmönnum Norðuráls var haldinn í gær.

Aðalumræðuefnið á þessum samningafundi laut að því að hvort vilji væri fyrir því að halda áfram viðræðum að því að taka upp 8 tíma vaktakerfi í kerskála og steypuskála eins og tíðkast í öllum sambærilegum verksmiðjum á Íslandi.

Niðurstaðan var að halda þeirri vinnu áfram, en rétt er að geta þess að þetta er mjög flókið viðfangsefni enda um gríðarlega mikla breytingu um að ræða. En frá upphafi verkasmiðjunnar hefur verið 12 tíma vaktakerfi þar sem starfsmenn skila 182 tímum á mánuði en í 8 tíma vaktakerfinu er vinnustundafjöldin einungis 145,6 vinnustundir á mánuði. Hér munar hvorki meira en 36,4 vinnustundum á mánuði, miðað við það vaktakerfis er nú er við lýði og þess sem aðrar verksmiður vinna eftir.

Í dag er vinnuskylda starfsmanna 156 vinnustundir á mánuði þannig að starfsmenn fá fasta yfirvinnu í dag upp á 26 tíma en þeir munu eðli málsins falla niður og síðan þarf að finna lausn á tímanum á milli 156 tíma vinnuskyldunnar og 145,6 tímanna sem unnir eru í 8 tíma vaktakerfinu. En það er mjög mikilvægt að ná að eyða langflestum svokölluðum bætivöktum þannig að vinnuskylda starfsmanna verði ekki fleir en þessar 145,6 vinnustundir.

Þetta er það sem við erum að vinna að og ef þetta kerfi nær í gegn þá má áætla aðstarfsmenn muni vinna um 340 vinnustundum minna á ársgrundvelli en þeir gera í dag, sem þýðir að starfsmenn munu vinna rúmum 2 mánuðum minna á ársgrundvelli en þeir gera í 12 tíma vaktakerfinu.

Það er mat samninganefndar að 8 tíma vaktakerfið sé mun fjölskyldu- og manneskjuvæna en það kerfi sem nú er við lýði. Það er ákall í þjóðfélaginu að gera vinnustaði fjölskylduvænni með því að stytta vinnutíma og þá sérstaklega hjá vaktavinnufólki og þessi leið yrði svo sannarlega stórt skref í þeirri viðleitni.

En að sjálfsögðu skipta launin miklu máli, en með minni vinnu eru útborguð laun eðlilega lægri og gefa fyrstu útreikningar formanns Verkalýðsfélags Akraness til kynna að útborguð laun muni lækka á bilinu 50 - 60 þúsund á mánuði, en það skýrist að starfsmenn vinna 36 vinnustundum minna á mánuði sem nemur heili vinnuviku!  En ef starfsmenn taka auka vaktir sem nema 26 tímum munu þeir ekki verða fyrir lækkun launa.

En þessar umræður eru á viðkvæmu stigi og það getur brugðið til beggja átta en samninganefndin er algerlega einhuga um að láta á þetta reyna og leggja þetta síðan fyrir starfsmenn.

Rétt er að geta þess að starfsmenn Fjarðaráls skiptu úr 12 tíma vaktakerfi í 8 tíma kerfi og hefur það heppnast gríðarlega vel og er almenn ánægja meðal starfsmanna um þá breytingu.

Að sjálfsögðu kom aðalkrafa starfsmenna einnig til umræðu á þessum fundi sem lýtur að launavísitölutengingunni, en Norðurál hefur hafnað henni eins og hún var meðhöndluð í síðasta kjarasamningi. Formaður hefur áréttað að þetta sé forgangskafa sem ekki verði kvikað frá.