Í gær lauk tveggja daga trúnaðarmannanámskeiði fyrir trúnaðarmenn Verkalýðsfélags Akraness.

Á þessu námskeiði var kenndur þriðji hluti námskeiða fyrir trúnaðarmenn,  en þessi hluti laut að lestri á launaseðlum og launaútreikningum sem kennt var fyrri daginn, en síðari dagurinn laut að almannatryggingum og lífeyrissjóðum.

Það voru 14 trúnaðarmenn Verkalýðsfélags Akraness sem voru skráðir á þetta námskeið,  það skiptir öll stéttarfélög miklu máli að vera með öfluga trúnaðarmenn enda eru þeir tengiliðir stéttarfélaganna inn á vinnustaðina.

Eitt höggið enn sem við Akurnesingar verðum fyrir er orðið að staðreynd, en í dag rann upp sú stund að stjórn Ísfisks hefur óskað eftir gjaldþrotaskiptum á félaginu og því klárlega komið á hreint að endurkoma tæplega 50 starfsmanna í fiskvinnslu til starfa hjá þessu ágæta fyrirtæki verður ekki að veruleika.

Það liggur fyrir að flestir eygðu þá von að Ísfiskur myndi ná að endurfjármagna sig og hefja vinnslu af fullum krafti að nýju, eftir nokkra mánaða hlé, en nú er þeirri draumsýn endalega lokið.

Það má segja að það séu takmörk fyrir því hvað hægt er að leggja miklar hremmingar á eitt samfélag  í atvinnumálum, en það verður ekkert undan því litið að atvinnuástand hér á Akranesi er ekki glæsilegt um þessar mundir og er þar vægt til orða kveðið.

Að hugsa sér að fyrirkomulag um stjórn fiskveiða skuli vera þess valdandi að einn stærsti útgerðabær landsins skuli hafa verið lagður í rúst, hvað varðar veiðar og vinnslu sjávarafurða.

Formaður Verkalýðsfélags Akraness vill minna á að fyrir sameiningu Haraldar Böðvarssonar & co við Granda árið 2004 störfuðu 350 manns hjá fyrirtækinu og fyrirtækið greiddi út laun það árið fyrir 2,2 milljarða, núvirt eru þetta 4,7 milljarðar. Það var landað um 170 þúsundum tonna á Akranesi árið 2004, en í dag er allt farið.

Nú kalla sum sveitarfélög eftir mótvægisaðgerðum frá stjórnvöldum vegna loðnubrests, en hvað megum við Akurnesingar segja þar sem öllum aflaheimildum okkar hefur nánast verið rænt af samfélaginu vegna græðgisvæðingar tengdum framsalskerfinu.

Takið eftir, enn og aftur, að árið 2004 greiddi Haraldur Böðvarsson laun vegna veiða og vinnslu inn í okkar samfélag sem námu 2,2 milljörðum, núvirt 4,7 milljarðar og ekkert kom í staðin. Til að setja þetta í samhengi þá væri þetta eins og að Reykjavíkurborg myndi missa launagreiðenda sem greiddi laun fyrir 75 milljarða á ári!

Var einhver að tala um að einhver sveitafélög þyrftu mótvægisaðgerðir? Já, við Akurnesingar þurfum svo sannarlega mótvægisaðgerðir af hálfu stjórnvalda, enda er ábyrgð stjórnmálamanna á þessum hamförum sem nú hefur enn og aftur riðið yfir okkar dásamlega samfélag verið mikil.

Verkalýðsfélag Akraness hefur verið á fullu að aðstoða félagsmenn sína sem ekki fengu greidd laun sín frá því september á síðasta ári og mun Verkalýðsfélag Akraness lána öllum þeim félagsmönnum sínum 250 þúsund krónur strax eftir helgi með veði í kröfu á Ábyrgðarsjóðlauna. En vangreidd laun starfsmanna Ísfisks nema rétt tæpum 42 milljónum króna til félagsmanna VLFA.

Hugur formanns og stjórnar Verkalýðsfélags Akraness er hjá félagsmönnum sínum sem hafa þurft, enn og aftur að upplifa tekjumissi og atvinnumissi, en stór hluti þeirra sem starfaði hjá Ísfiski fengu uppsögn hjá HB Granda þegar þeir fóru í skjóli nætur í burtu frá Akranesi með allar okkar aflaheimildir árið 2017.

Formaður VLFA vísar ábyrðinni á stjórnmálamenn sem hafa skapað þetta umhverfi í kringum fiskveiðistjórnunarkerfið þar sem einstaka útgerðamenn eða útgerðir geta labbað út úr greininni og skilið fólkið eftir í djúpum sárum og um leið veitt samfélaginu öllu þungt högg í kviðinn með þeim afleiðingum að samfélagið er í keng!

Í dag var sjöundi kjarasamningsfundurinn með forsvarsmönnum Norðuráls haldinn en þetta var ágætis fundur.

Eins og fram hefur komið þá er eitt að aðalverkefnum í þessum viðræðum að kanna og reyna hvort hægt sé að ná niðurstöðu um að breyta vaktakerfi í kerskála og steypuskála úr 12 tíma vöktum í 8 tíma vaktir eins og tíðakast í öllum sambærilegum verksmiðjum.

Það er skemmst frá því að segja að við sjáum til lands í þeirri vinnu og er upplagið nánast frágengið og því orðið ljóst að vaktavinnufólk mun fá tækifæri til þess að kjósa um hvort fólk vilji óbreytt 12 tíma vaktakerfi eða fara yfir á 8 tíma fjölskylduvænna og manneskjulegra vaktakerfi.

Nú liggur fyrir að ræða þarf önnur kjaraatriði eins og launabreytingar en þar er ófrávíkjanleg krafa frá starfsmönnum að halda áfram að miða launabreytingar við launavísitöluna.

Næsti fundur verður í næstu viku en vonast formaður til þess að eftir hálfan mánuð eða svo verði kominn á nýr kjarasamningur til handa starfsmönnum Norðuráls.

Í gær hélt Verkalýðsfélag Akraness og bæjarstjóri Akraneskaupstaðar fund með íbúum á Holtsflöt 4 og Eyrarflöt 2 og var fundurinn haldinn á Gamla kaupfélaginu.

En til fundarins var boðað vegna þeirrar skelfilegu stöðu sem upp kom þegar leigufélagið Heimavellir ákvað allt í einu að selja allar leiguíbúðir félagsins til nýrra aðila sem ekki hafa í hyggju að leigja þær áfram út, heldur að selja þær.

Við þennan siðlausa gjörning Heimavalla voru 26 fjölskyldur settar í fullkoma óvissu um framtíð þess að hafa öruggt húsnæði.

Það var mat formanns VLFA og bæjarstjóra Akraneskaupstaðar að við þessu neyðarástandi hjá þessu ágæta fólki yrði að bregðast við og á þeirri forsendu fór formaður VLFA í það að leita að íbúðum til að lágmarka þann skaða og óvissu sem þetta siðlausa framferði Heimavalla hafði skapað umræddum íbúum.

Það jákvæða var að á fyrstu stigum málsins höfðu eigendur Uppbyggingar sem eiga Asparskóga 29 sem er nýtt fjölbýlishús samband við formann VLFA og bæjarstjóra Akraneskaupstaðar og bauðst til að bregðast við þessu neyðarástandi með því að koma með allt að 10 íbúðir inná leigumarkaðinn handa þessu fólki.

En hér er um að ræða 5 þriggja herbergja íbúðir og 5 fjögurra herbergja íbúðir og er vert að þakka eigendum Uppbyggingar fyrir að bregðast svona vel við þessum aðstæðum.

En eftir samtal við eigendur Uppbyggingar var ákveðið að bjóða fólki að taka íbúðirnar á svokallaðri kaupleigu sem byggist á því að þegar svokölluð hlutdeildarlán verða orðin að lögum og fólkið uppfyllir þau skilyrði sem verða í kringum hlutdeildarlánin þá verði hægt að nota hluta af leiguverðinu sem útborgun í íbúðinni ef fólk vill kaupa hana.  Þetta er mjög jákvætt en nú er bara að bíða eftir að hlutdeildarlánin verða lögfest en áætlað er að það verði á vorþinginu.

Hins vegar liggur fyrir að fjögra herbergja íbúðirnar munu ekki rúmast innan tekjumarka hlutdeildarlánanna og því verða þær leigðar í langtímaleigu.  Það ber svo sannarlega að þakka eigendum Uppbyggingar fyrir þeirra framlag við að koma til móts við þetta neyðarástand sem skapast hefur hjá þessu fólki.

Þetta voru ekki einu íbúðirnar sem formaður VLFA og bæjarstjóri Akraness náðu að útvega í þetta neyðarverkefni heldur var íbúum tilkynnt að íbúðir væru lausar á Holtsflöt 6.  En þar var um þrjár þriggja herbergja og ein fjögurra herberja.  Síðan var íbúum einnig tilkynnt að formaður VLFA og bæjarstjóri Akraneskaupstaðar hefðu reddað þremur þriggja herbergja leiguíbúðum á Asparskógum.

Einnig fór bæjarstjóri Akraneskaupstaðar yfir aðrar lausnir sem hann er að vinna að með Mannvirkjastofnun og einnig leigufélaginu Bjargi en ekki væri hægt að greina nákvæmlega frá þeirri vinnu þar sem hún væri á frumstigi.

Þetta var mjög góður fundur og ánægjulegt að finna þakklætið frá íbúum í okkar garð vegna þeirra vinnu sem við höfum lagt í þetta neyðarverkefni.  En ljóst er að öll þessi úrræði munu ekki uppfylla þarfir og væntingar allra, því miður.