Fyrir helgina gekk Verkalýðsfélag Akraness frá breytingu á vaktakerfi starfsmanna Faxaflóahafna sem starfa í hliðgæslu á Grundartanga. En í síðasta kjarasamningi var gerð bókun um að lagt yrði niður 12 tíma vaktakerfi og tekið yrði upp 8 tíma vaktakerfi eins og er hjá Elkem Ísland á Grundartanga.
Það vaktakerfi hefur reynst afar vel og eru þeir starfsmenn sem þar starfa afar ánægðir með það vaktakerfi sem byggist á því að unnar eru sex átta tíma vaktir á fimm dögum og svo fimm dagar í frí.
Þetta þýðir að dagvinnuskylda starfsmanna fer úr 173,33 í 156 tíma á mánuði og heildar vinnutímafjöldi á mánuði fer úr 182 tímum í 145,6 tíma og er hér um gríðarlega vinnutímastyttingu um að ræða.
Samningsaðilar og starfsmenn eru sammála að það sé lýðheilsumál að hætta með tólf tíma vaktakerfi enda er það afar lýjandi og slítandi að starfa eftir svoleiðis vaktakerfi til langs tíma.
Formaður er afar ánægður að tekist hafi að uppfylla umrædda bókun á tilsettum tíma og mun nýja vaktakerfið taka gildi 1. september nk. Grunnlaun gæslumanna á Grundartanga eru frá 387.473 kr. uppí 423.680 kr. og munu heildarlaun á nýja vaktarkerfinu nema frá 614.000 kr. uppí 664.000 kr. fyrir utan orlofs og desemberuppbætur.
Formaður vil þakka forstjóra Faxaflóhafna Gísla Gíslasyni innilega fyrir afar gott samstarf á liðnum árum, en eins og fram hefur komið í fjölmiðlum er Gísli að ljúka störfum sem forstjóri Faxaflóahafna á næstu dögum eða vikum.
Fundað var í deilu stéttarfélaganna við Norðurál í gær í húskynnum ríkissáttasemjara, en það er óhætt að segja að búið sé að funda oft í þessari deilu, enda eru liðnir 6 mánuðir frá því kjarasamningurinn rann út.
Nú er ljóst að það fer að draga til ögurstundar í þessari deilu, en eins og staðan er í dag þá ber talsvert á milli samningaaðila. Verkalýðsfélag Akraness hefur lagt ofuráherslu á að grunntaxtar verkamanna taki hækkunum eins og gert var í lífskjarasamningum en því hafa Norðurálsmenn og fulltrúi Samtaka atvinnulífsins alfarið hafnað til þessa.
Norðurál og fulltrúi SA vilja tengja launabreytingar við launavísitölu, en við þær efnahagslegu hamfarir sem nú eru uppi hér á landi sem og víðsvegar um heimsbyggðina vegna Covid 19 er algerlega galið að tengja launabreytingar við umrædda vísitölu.
Það er reyndar grátbroslegt að alþjóðlegt stórfyrirtæki eins og Norðurál skuli hafna að semja eins og allur íslenskur vinnumarkaður hefur undirgengist að gera og bjóða launabreytingar sem eru umtalsvert lægri en samið var um í lífskjarasamningum.
Það er í raun sprenghlægilegt að Samtök atvinnulífsins sem tóku þátt í því skapa og fæða lífskjarasamninginn skuli nú ekki vilja kannast við króann og leggja hins vegnar til að semja um launabreytingar sem miðast við hækkun launavísitölunnar. Það verður fróðlegt að sjá þegar kjarasamningar á hinum almenna vinnumarkaði verða lausir eftir tvö ár hvort SA verði þá tilbúið að semja við hálaunahópanna t.d. hjá VR um launavísitöluhækkanir.
Á fundinum í gær lögðu félögin fram lokatilboð til Norðuráls sem byggist á lífskjarasamningum og ef því tilboði verður hafnað eða gerð tilraun til lækkunar á því munu stéttarfélögin lýsa yfir árangurslausum fundi hjá ríkissáttasemjara og funda með starfsmönnum þar sem lagt verður til að kosið verði um að hefjast aðgerða til að knýja fram sanngjarna og réttlátar kröfur stéttarfélaganna sem allur vinnumarkaðurinn hefur nú þegar undirgengist.
Í gær var fundur í kjaradeilu félagsins við Norðurál haldinn hjá ríkissáttasemjara en nú eru liðnir um 6 mánuðir frá því að kjarasamningur við Norðurál rann út og enn er langt í land að takist að ná saman nýjum kjarasamningi.
Það er reyndar umhugsunarefni að ekki sé búið að ganga frá nýjum kjarasamningi því krafa Verkalýðsfélags Akraness byggist á lífskjarasamningunum eins og uppundir 95% af íslenskum vinnumarkaði hefur undirgengist að gera.
Því miður hafa forsvarsmenn Norðuráls með aðstoð Samtaka atvinnulífsins hafnað að semja með sambærilegum hætti og gert var við sveitarfélögin, ríkið og aðra samninga sem byggjast á lífskjarasamningum. Þeir hafa hins vegar lagt ofur áherslu á að samið verði með sama hætti og gert var í síðasta samningi sem byggðist á því að launabreytingar tóku mið af 95% af því sem launavísitala Hagstofunnar hækkaði um árlega.
En því miður hefur launavísitalan ekki verið að skila sömu launabreytingum eins og launahækkanir á launatöxtum hefur skilað á liðnum árum og munar þar umtalsverðu. Sem dæmi þá hefur launavísitalan hækkað frá 1998 til dagsins í dag um 336% á meðan launataxtar á hinum almenna vinnumarkaði hefur hækkað um 388%. En ef tekið er tillit til þess að starfsmenn Norðuráls hafa einungis fengið 95% af launavísitölunni þá myndi það þýða ef sama fyrirkomulag hefði verið við lýði frá 1998 að launabreytingar starfsmanna hefðu verið 319% en launataxtar á hinum almenna vinnumarkaði hafa hækkað um 388%.
Á þessu sést að það er alls ekki ráðlegt fyrir verkafólk í Norðuráli að tengja launahækkanir sýnar við launavísitöluna í ljósi þess að taxtalaun í landinu hafa hækkað umtalsvert meira en rétt er að geta þess að launakerfi starfsmann Norðuráls byggist upp á launataxtakerfi.
Næsti formlegi samningafundur hjá ríkissáttasemjara er á næsta mánudag og er morgunljóst að á þeim fundi mun endanlega koma í ljós hvort deiluaðilar eru að fara að ná saman eða hvort það stefni í nokkuð hörð átök á vinnustaðnum. Það er einnig morgunljóst að Verkalýðsfélag Akraness ætlar ekki, getur ekki og vill ekki semja um lakari launabreytingar en gert var í lífskjarasamningum og þeim skilaboðum hefur formaður VLFA komið rækilega til skila til forsvarsmanna Norðuráls.
Þrátt fyrir langar samningaviðræður við forsvarsmenn Norðuráls hefur ekki enn tekist að klára nýjan kjarasamning til handa starfsmönnum fyrirtækisins. En rétt er að geta þess að kjarasamningurinn rann út um síðustu áramót og eru því að verða liðið hálft ár frá því samningurinn rann út.
Vissulega ber þó að geta þess að Kórónufaraldurinn tafði viðræður um nokkrar vikur en það afsakar samt ekki að ekki sé enn búið að ganga frá nýjum samningi.
Það ber þó að geta þess að áhrif kórónufaraldursins hefur haft áhrif ekki bara hvað varðar töf á viðræðum heldur einnig á sjálfa kröfugerðina. En eins og flestir sem fylgjast með kjörum starfsmanna Norðuráls þá samdi félagið um svokallaða launavísitölutengingu í kjarasamningunum sem gerður var 2015 og áður en faraldurinn skall á var þetta ein af aðalkröfum félagsins að halda þeirri tengingu inni áfram.
Launabreytingar í síðasta kjarasamningi miðuðust við 95% af launavísitölunni sem Hagstofan birtir mánaðarlega, en frá 2015 til 2019 gaf launavísitalan að meðaltali 5,92% launahækkun til handa starfsmönnum Norðuráls.
En eins og áður sagði að eftir að kórónufaraldurinn skall á þá breytti Verkalýðsfélag Akraness kröfugerð sinni enda fóru að renna á formann félagsins tvær grímur um að ekki væri skynsamlegt að halda áfram að tengja launabreytingar starfsmanna við 95% af launavísitölunni. Ástæðan var m.a. sú að á árinu 2015 til 2019 var eitt mesta hagvaxtarskeið sem verið hefur á íslenskum vinnumarkaði frá bankahruninu, en núna er íslenskt efnahagslíf að sigla inní einn mesta efnahagssamdrátt síðustu 100 ára bara svo sé vitnað beint í Seðlabankann og fjármálaráðuneytið.
Þetta mun að öllum líkindum leiða til þess að launavísitalan mun ekki skila miklu enda líklegt að margar atvinnugreinar þurfi að lækka launakostnað sem mun skila sér í mun minni hækkunar launavísitölunnar en gert var ráð fyrir.
Þessu til viðbótar má nefna að starfsmenn Norðuráls taka laun sín eftir svokölluðu taxtakerfi en á liðnum árum þá hafa launataxtar bæði á almennum vinnumarkaði sem og hjá opinbera markaðnum hækkað umtalsvert meira en launavísitalan hefur verið að skila. Það gerist vegna þess að á undanförnum árum þá hefur verið samið um krónutöluhækkanir á launataxta í stað prósentuhækkana sem þýðir að hlutfallslega hafa launataxtar hækkað um meira en önnur laun í prósentum talið.
Þessu til viðbótar þá gefa launabreytingar sem samið var um í lífskjarasamningum miklu meiri hækkanir en launavísitalan mun nokkurn tíma geta gefið í þessum árferði og á þeirri forsendu ákvað Verkalýðsfélag Akraness að gera þá sanngjörnu kröfu að samið yrði með sama hætti og gert var í lífskjarasamningum og 95% af vinnumarkaðnum hefur undirgengist.
Ef Verkalýðsfélag Akraness myndi semja um launavísitölutengingu þá myndi sú hækkun skila einungis rétt rúmum 13 þúsund króna hækkun á lægsta launataxta starfsmanna Norðuráls en lífskjarasamningurinn myndi tryggja 24 þúsund króna hækkun eða 11 þúsundum meira en launavísitalan myndi gera.
Síðan er fullkomin óvissa hvað launavísitalan verður á þessu ári og því næsta en við vitum að launahækkun lífskjarasamningsins myndi skila aftur 24 þúsund króna hækkun 1. Janúar 2021 og 25 þúsund króna hækkun 1. Janúar 2022.
Það er með ólíkindum að Norðurál skuli hafna því að koma með sömu launahækkanir og allir aðrir á vinnumarkaðnum hafa undirgengist en félagið er ekkert að fara fram á meira en það sem lífskjarasamningurinn kvað á um. Það sem hins vegar vekur ekki minni furðu er að Samtök atvinnulífsins sem eru einnig með í þessum viðræðum leggja ofuráherslu á að stéttafélögin semji um tengingu við launavísitöluna. Það yrði fróðlegt að sjá hvað Samtök atvinnulífsins myndu gera í næstu kjarasamningum á hinum almenna vinnumarkaði, ef t.d. hátekjuhóparnir innan VR gerðu kröfu um að tengja laun sín við launavísitöluna. Það er hins vegar morgunljóst að prósentuhækkanir gagnast hátekjuhópnum mun betur en lágtekjuhópunum og því verður eins og áður sagði fróðlegt að sjá viðbrögð SA ef þessi karfa myndi koma upp hjá hópum sem eru með háartekjur.
Það er klárt mál eftir skoðun félagsins að launavísitalan hefur skilað mun minna en launahækkanir á launatöxtum hefur skilað, en formaður hefur gert samanburð aftur til ársins 1998 sem sannar mikinn mun á milli þessara leiða.
Næsti fundur verður á næsta þriðjudag og ljóst að ef ekkert gerist á þeim fundi er allt eins líklegt að skráð verði árangurslaus fundur hjá ríkissáttasemjara og farið að huga að aðgerðum til að knýja í gegn sanngjarnan kjarasamning í anda lífskjarasamningsins sem nánast allur vinnumarkaðurinn hefur undirgengist eins og áður hefur komið fram.
Formaður VLFA hefur farið yfir alla þessa tölfræði með forsvarsmönnum Norðuráls og SA sem og þá staðreynd að rekstrarforsendur Norðuráls eru um þessar mundir mjög góðar miðað við ástand í efnahagslífi heimbyggðarinnar vegna kórónufaraldursins.
Rétt í þessu lauk aðalfundi Verkalýðsfélags Akraness en fundurinn var haldinn á Gamla kaupfélaginu.
Í skýrslu stjórnar fór formaður ítarlega yfir liðið starfsár og kom fram í máli hans að starfsemi og rekstur félagsins hafi á árinu 2019 gengið mjög vel. Fram kom að félagsmenn VLFA séu alls 3100 með gjaldfrjálsum félagsmönnum.
Fram kom í máli formanns að 1250 félagsmenn hafi fengið greitt úr sjúkrasjóði félagsins, 318 félagsmenn hafi nýtt sér menntastyrki frá félaginu, 328 félagsmenn nýttu sé niðurgreiðslu er lýtur að veiðikorti, útilegukorti og afsláttarmiðum á Fosshótelum og að lokum þáðu 100 eldri félagsmenn boð um dagsferð sem félagið býður eldri félagsmönnum árlega uppá.
Þetta þýðir að um 65% af heildar félagsmönnum Verkalýðsfélags Akraness nýttu sér þjónustu félagsins að einhverju leyti og eru þessi atriði fyrir utan alla aðstoð sem veitt er daglega á skrifstofu félagsins, sem og þá sem nýtta sér fría lögfræðiaðstoð sem félagið býður sínum félagsmönnum uppá. Það má klárlega færa góð og gild rök fyrir því að yfir 80% félagsmanna hafi notið þjónustu félagsins, með einum eða öðrum hætti á liðnu starfsári.
Það kom líka fram á aðalfundinum að félagið hefur fest kaup á nýju húsnæði að Þjóðbraut 1, en nýja húsnæðið er alls 311 fermetrar. Húsnæðið er hluti af versluninni Model en verslunin er að minnka við sig um þessa 311 fermetra. Húsnæðið að Sunnubraut 13 þar sem skrifstofa félagsins er nú til húsa er orðið of lítið, enda er neðri hæð húsnæðisins einungis rétt rúmir 100 fermetrar. Það kom fram í máli formanns að nýja húsnæðið verður afhent um mánaðarmótin, en þá er eftir vinna við að stúka það niður, gera fundarherbergi og skrifstofur fyrir starfsmenn, en áætlað er að félagið flytji um mánaðarmótin ágúst/september. Hér er um flott framtíðarhúsnæði að ræða fyrir félagið, en rétt er að geta þess að Sunnubraut 13 fer uppí kaupverðið og einnig má það koma fram hér að eignin að Kirkjubraut 40 sem VLFA átti, var selt á þessu ári. Fjármunir af þessum sölum er síðan notaðir til að fjármagna þessi kaup og endurbætur að Þjóðbraut 1. Það er mikilvægt að félagið sé með góða staðsetningu, gott aðgengi og góða aðstöðu fyrir starfsemi sína, en félagið verður 100 ára 2024 og því mikilvægt að húsnæði félagsins uppfylli þær kröfur sem gerðar eru til starfsemi stéttarfélaga nú til dags.
Það kom líka fram í skýrslu stjórnar að félagið stendur vel, bæði félagslega sem og fjárhagslega, en heildar rekstrarafgangur af allri samstæðu félagsins nam 168 milljónum og eigið fé Verkalýðsfélags Akraness nemur rúmum 1,6 milljarði.
Eins og fram hefur komið hér á heimasíðunni þá vísuðu stéttarfélögin sem eiga aðild að kjarasamningi Norðuráls, deilu sinni til ríkissáttasemjara í síðustu viku. En þar á undan höfðu samningsaðilar fundað sextán sinnum saman og má því segja að þetta hafi verið sautjándi samningafundur deiluaðila.
Það sem útaf stendur í þessari deilu er atriði sem lúta að launalið samningsins en Verkalýðsfélag Akraness og VR eru samstiga í því að samið verði við Norðurál í anda þeirra krónutöluhækkana eins og gert var í lífskjarasamningum. En fyrir Kórónufaraldurinn var krafa stéttarfélaganna að samið yrði með sambærilegum hætti og gert var í síðasta samningi þ.e.a.s með tengingu við launavísitöluna.
En á fundinum í morgun rakti formaður VLFA ítarlega ástæðu þess að félagið vill ekki tengja launabreytingar sinna félagsmanna við launavísitöluna en aðalástæðan liggur í því að íslenskt samfélag er að sigla inní eitt mesta efnahagssamdrátt síðustu 100 ára að mati Seðlabankans með tilheyrandi atvinnuleysi og kaupmáttarrýrnun launafólks næstu 2 til 3 ára.
Einnig liggur fyrir að þróun hækkunar á kauptöxtum jafnt á almenna vinnumarkaðnum sem og hjá ríki og sveitarfélögum og öðrum viðmiðunarhópum frá árinu 2014 til 2020 hefur sýnt að launahækkanir taxtakerfisins virðast skila sér illa inní hækkun launavísitölunnar.
Því miður hafa forsvarsmenn Norðuráls til þessa hafnað að semja í anda lífskjarasamningsins og er það miður. En á fundinum í morgun kom skýrt fram að VLFA og VR ætla ekki, vilja ekki og geta ekki samið með öðrum hætti en eins og gert var í lífskjarasamningum. Við vitum hvað þær launabreytingar munu skila okkar félagsmönnum en höfum ekki hugmynd um hvernig launavísitalan mun þróast á næstu vikum, mánuðum eða árum vegna þessa ástands sem uppi er á alþjóðavísu vegna Covid 19.
Formaður átti góðan fund með félagsmönnum sínum í gær en fundurinn var haldinn í Bíóhöllinni og fékk formaður skýrt umboð frá sínum félagsmönnum að fylgja fast eftir að samið yrði með sambærilegum hætti og gert var í lífskjarasamningum.
Næsti fundur hjá ríkissáttasemjara verður miðvikudaginn 10. júní 2020.
Félagsmenn Verkalýðsfélags Akraness sem starfa hjá Norðuráli eru minntir á fundinn á næsta miðvikudag, þar sem alvarlega staða í kjaraviðræðum við Norðurál verður til umfjöllunar.
Fundurinn verður haldinn miðvikudaginn 3. júní og hefst klukkan 17.00 en fundurinn verður haldinn í Bíóhöllinni á Akranesi.
Formaður mun gera ítarlega grein fyrir stöðunni og fara vel yfir hana og hvetur formaður alla sem tök hafa á að mæta. Þetta er hálfgerð skyldumæting, því nú reynir á samstöðu meðal félagsmanna!
Á síðasta mánudag var haldinn sautjándi samningafundur vegna kjarasamnings stéttarfélagana við Norðurál.
Eins og fram hefur komið þá hefur lítið þokast áfram í viðræðunum þrátt fyrir að 5 mánuðir séu liðnir frá því að kjarasamningurinn rann út á milli aðila.
Vissulega er þó rétt að geta þess að Kórónufaraldurinn hefur eðlimálsins samkvæmt tafið viðræðurnar en það réttlætir samt ekki þann mikla seinna gang sem hefur einkennt viðræðurnar. Þau atriði sem helst eru eftir liggja að launaliðnum en aðalkrafan var að laun starfsmanna myndu halda áfram að taka mið af hækkun á launavísitölunni eins og samið var um í kjarasamningum 2015.
Hins vegar eftir að Kórónufaraldurinn skall á með öllum þeim efnahagslegu hamförum þá runnu tvær grímur á formann Verkalýðsfélags Akraness að ekki væri skynsamlegt að semja um tengingu við launavísitöluna þegar efnahagslífið er að sigla inní eina mestu efnahagskreppu síðustu 100 ára eins og Seðlabankinn hefur ítrekað bent á með tilheyrandi skerðingu launa og atvinnumissi.
Á þeirri forsendu ákvað VLFA og VR að breyta kröfugerð sinni er lýtur að hækkun kauptaxta og gera kröfu um að laun starfsmanna hækki með sama hætti og samið hefur verið um í svokallaða lífskjarasamningi. Með sömu útfærslu og ríki, sveitafélög, Faxaflóahafnir og fleiri hópar hafa undirgengist.
Ástæðan fyrir því að meðal annars VLFA og VR vilja semja í anda Lífskjarasamningsins er þríþætt.
Í fyrsta lagi liggur fyrir að framundan er eitt mesta samdráttarskeið á íslenskum vinnumarkaði og í íslensku efnahagslífi í hartnær 100 ár eins og áður hefur komið fram og því afar ólíklegt að launavísitalan muni skila starfsmönnum miklum launabreytingum á næstu tveimur til þremur árum.
Í öðru lagi þá hefur formaður VLFA skoðað launabreytingar hjá fjölmörgum hópum sem taka laun eftir launatöxtum eins og starfsmenn Norðuráls gera. Í þeirri skoðun kemur fram að launataxtar t.d. á hinum almenna vinnumarkaði og opinbera markaðnum hafa hækkað mun meira en launavísitalan hefur gert t.d. frá 2014 til 2019. Ástæðan er einföld, áhersla hefur verið á að hækka taxtalaun í kjarasamningum almennt meira en önnur laun og svo virðist vera sem launahækkanir á launatöxtum skili sér frekar illa inn í mælingu á launavísitölunni.
Í þriðja lagi þá liggur fyrir að lífskjarasamningurinn þar sem samið var um fastar krónutöluhækkanir hjá öllum þeim sem taka laun eftir launatöxtum var mjög góður og myndu slíkar hækkanir skila starfsmönnum ásættanlegum launahækkunum á næstu þremur árum.
Það kom hinsvegar formanni VLFA verulega á óvart að forsvarsmenn Norðuráls og fulltrúi Samtaka atvinnulífsins höfnuðu alfarið að semja í anda Lífskjarasamningsins eins og 95% af öllum íslenskum vinnumarkaði hefur nú þegar gert.
Samkvæmt öllum fyrirliggjandi gögnum þá er það staðreynd að lægsti launataxti Norðuráls hefur á liðnum árum dregist verulega aftur úr öðrum lágmarks launatöxtum á íslenskum vinnumarkaði vegna þess að áhersla verkalýðshreyfingarinnar á liðnum árum hefur verið á sérstaka hækkun á taxtalaunum og því miður hefur launavísitalan ekki fangað þessa umfram hækkun á launatöxtum nema að litlu leyti.
Á samningafundinum með forsvarsmönnum Norðuráls lýsti formaður forundrun sína að stórfyrirtæki eins og Norðurál og Samtök atvinnulífsins skuli hafna að semja við starfsmenn Norðuráls eins og nánast allur íslenskur vinnumarkaður hefur nú þegar undirgengist að gera. Rétt er að vekja sérstaka athygli á því að blessunarlega er Norðurál með góðar rekstrarforsendur um þessar mundir, þrátt fyrir erfiðar markaðsforsendur.
Það er alveg morgunljóst að VLFA og VR, ætla ekki, geta ekki og vilja ekki semja um minna en þær launabreytingar sem lífskjarasamningurinn gaf og í ljósi þessa djúpstæða ágreinings var ákveðið að vísa deilunni til ríkissáttasemjara á grundvelli 2. mgr. 24. gr. laga nr. 80/1938
Ríkissáttasemjari hefur nú þegar boðað til fundar á næsta fimmtudag.
Aðalfundur Verkalýðsfélags Akraness verður haldinn þriðjudaginn 9. Júní kl. 17:00 á Gamla Kaupfélaginu, Kirkjubraut 11
Dagskrá:
Á aðalfundi verða ekki afgreiddar með atkvæðagreiðslu aðrar tillögur og ályktanir en þær sem borist hafa til skrifstofu félagsins 5 dögum fyrir aðalfund eins og 28. grein laga félagsins kveður á um. Ársreikningur félagsins mun liggja frammi á skrifstofu félagsins 7 dögum fyrir aðalfund. Komi tillögur eða ályktanir fram þá munu þær liggja frammi á skrifstofu félagsins og verða einnig kynntar á heimasíðu félagsins.
Félagsmenn eru eindregið hvattir til að mæta.
Boðið verður upp á kvöldverð eftir fundinn.
Atvinnuleysi meðal félagsmanna Verkalýðsfélags Akraness hefur aukist gríðarlega eins og vítt og breitt um landið, en í apríl voru 278 félagsmenn Verkalýðsfélags Akraness atvinnulausir að fullu eða að hluta. En á sama tíma fyrir ári voru 80 félagsmenn á atvinnuleysisbótum og hefur atvinnuleysi meðal félagsmanna VLFA aukist miðað við sama tíma í fyrra um 247%.
Þetta þýðir að um 10% félagsmanna VLFA eru atvinnulausir að fullu eða á hlutabótum það er ekki bara að Covid-19 skýri þessa miklu fjölgun á atvinnuleysi meðal félagsmanna, heldur liggur fyrir að margir misstu lífsviðurværi sitt þegar Ísfiskur varð gjaldþrota.
Það er ekki bara að Ísfiskur hafi orðið gjaldþrota heldur sagði Vignir G Jónsson upp 15 manns og Skaginn 3x 43 starfsmönnum.
Það er alveg ljóst að atvinnuástandið hér á Akranesi er alls ekki viðunandi og ljóst að bæjaryfirvöld og aðrir hagsmunaaðilar verða að taka höndum saman um laða að fleiri atvinnutækifæri. Við Akurnesingar höfum þurft að horfa upp á að nánast öllum aflaheimildum hefur verið rænt af okkur með skelfilegum afleiðingum fyrir allt fiskvinnslufólk sem og samfélagið í heild sinni.
Fjórtándi samningafundur Verkalýðsfélags Akraness með forsvarsmönnum Norðuráls var haldinn 11. maí eftir langt hlé vegna Covid-19. Á þessum fundi greindi formaður VLFA forsvarsmönnum Norðuráls frá því að aðalkrafa félagsins er laut að því að launabreytingar í samningum myndu taka breytingum eftir launavísitölunni væri ekki lengur uppi á borðinu af hálfu VLFA.
Ástæðan er þríþætt. Í fyrsta lagi liggur fyrir að framundan er eitt mesta samdráttarskeið á íslenskum vinnumarkaði og í íslensku efnahagslífi í hartnær 100 ár og því afar ólíklegt að launavísitalan muni skila starfsmönnum miklum launabreytingum á næstu tveimur til þremur árum.
Í öðru lagi þá hefur formaður VLFA skoðað launabreytingar hjá fjölmörgum hópum sem taka laun eftir launatöxtum eins og starfsmenn Norðuráls gera. Í þeirri skoðun kemur fram að launataxtar t.d. á hinum almenna vinnumarkaði hafa hækkað mun meira en launavísitalan hefur gert t.d. frá 2014 til 2019. Ástæðan er einföld, áhersla hefur verið á að hækka taxtalaun í kjarasamningum almennt meira en önnur laun og svo virðist vera sem launahækkanir á launatöxtum skili sér frekar illa inn í mælingu á launavísitölunni.
Í þriðja lagi þá liggur fyrir að lífskjarasamningurinn þar sem samið var um fastar krónutöluhækkanir hjá öllum þeim sem taka laun eftir launatöxtum var mjög góður og myndu slíkar hækkanir skila starfsmönnum mjög góðum launahækkunum á næstu þremur árum.
Þær launataxtahækkanir sem samið var um í lífskjarasamningum voru eftirfarandi:
Þessar hækkanir myndu því skila verkamönnum hjá Norðuráli yfir 7% launahækkun fyrir hvert ár, sem klárlega yrði langt umfram það sem launavísitalan mun skila enda erum við að sigla inn í eitt mesta samdráttarskeið á íslenskum vinnumarkaði eins og áður sagði.
Þessum upplýsingum kom formaður á framfæri á þessum fjórtánda samningafundi. Í gær var síðan fimmtándi samningafundurinn haldinn með forsvarsmönnum Norðuráls og á ótrúlegan hátt var ekki annað að skilja á forsvarsmönnum Norðuráls og forsvarsmanni Samtaka atvinnulífsins en að hækkunum samkvæmt lífskjarasamningum hafi algerlega verið hafnað. En næsti fundur verður 25. maí eða á næsta mánudag og þá munu forsvarsmenn Norðuráls leggja fram tillögu að hækkun á launaliðnum.
Það er alveg morgunljóst að VLFA ætlar ekki, getur ekki og vill ekki semja um minna en þær launabreytingar sem lífskjarasamningurinn gaf og því er allt eins líklegt að deilunni verði vísað strax á næsta mánudag til ríkissáttasemjara ef tilboð Norðuráls verður á skjön við það sem aðrir hópar hafa verið að semja um þar sem lífskjarasamningurinn hefur verið hafður til hliðsjónar.
VLFA mun ekki gefa neitt eftir í þessum viðræðum enda engin ástæða til enda gengur rekstur fyrirtækisins blessunarlega bara nokkuð vel miðað við krefjandi markaðsaðstæður.
Félagsmenn athugið Verkalýðsfélag Akraness mun aftur bjóða upp á leigu í bústað í Vestmannaeyjum, en bústaðurinn ber heitið Smiðjan og er við Höfðaból. Þetta er sami bústaður og félagið hefur leigt síðastliðinn sumur og hefur notið mikilla vinsælda hjá okkar félagsmönnum.
Leigutímabilið er frá 3. Júní til 14. ágúst og núna ætlum við að prufa að leigja þennan bústað frá frá miðvikudegi til miðvikudags og sjá hvort félagsmönnum finnst það betra en að leigja frá föstudegi til föstudags eins og tíðkast með aðra bústaði.
Það þarf ekkert að fjölyrða um það að það er alltaf gaman að koma til Vestmannaeyja enda einstök náttúrufegurð hvert sem augum er litið.
Þær vikur sem eru lausar eru eftirfarandi:
Hægt er að taka panta sumarhús inni á félagavefnum en rétt er að geta þess að nokkrar vikur eru einnig lausar í öðrum sumarhúsum í eigu Verkalýðsfélags Akraness. Til þess að sjá hvaða vikur eru lausar til útleigu í sumar smellið hér.
(Athugið samt að þessi listi sýnir stöðuna þann 12. maí 2020)
Núna gildir reglan fyrstur kemur fyrstur fær!
Hlýðum Víði og ferðumst innanlands í sumar!
Í mars sl. féll dómur í Félagsdómi en málið laut að því að Verkalýðsfélag Akraness taldi að verulega hefði vantað uppá svokallaðan vikulegan frídag hjá einum starfsmanni og þrátt fyrir miklar viðræður við Norðurál um lausn á málinu tókst það ekki. Á þeirri forsendu ákvað félagið að stefna Norðuráli fyrir félagsdómi og féll dómur í mars en á ótrúlegan hátt var málinu vísað frá dómi vegna þess að dómurinn taldi ekki sannað að vikulegur frídagur hjá umræddum starfsmanni hafi verið skertur í 125 skipti eins og VLFA hélt fram.
Hins vegar kom skýrt fram í dómnum að ekki væri ágreiningur um að umræddur starfsmaður hafi verið svikinn um greiðslu vegna vikulegs frídags eins sem dómur var ekki sammála um hversu margir dagar þeir hefðu verið.
En orðrétt segir í niðurstöðu Félagsdóms:
„Skipulag vakta er því í samræmi við meginreglu, sem kemur fram í 1. mgr. greinar 2.13.5 í kjarasamningi aðila og 1. mgr. 54 gr. laga nr. 46/1980 um að starfsmaður skuli fá að minnsta kosti einn vikulegan frídag sem tengist beint daglegum hvíldartíma“.
„Fyrir liggur að starfsmaðurinn vann á tímabilinu 15. október 2014 til 15. október 2018 mun meira en þessu nemur. Fyrir vikið urðu samfelldar vinnulotur Daníels mjög oft lengri en sjö dagar og alloft mun lengri. Einnig segir orðrétt í niðurstöðu dómsins. „Norðurál hefur viðurkennt að í þeim tilvikum sem vinnulotur starfsmannsins spönnuðu tveggja vikna tímabil hafi verið farið gegn kjarasamningi í framangreindum ákvæðum laga nr. 4671980.“
Með öðrum orðum ekki nokkur vafi að brotið var gróflega á réttindum starfsmannsins eins og fram kemur í niðurstöðu Félagsdóms en á óskiljanlegan hátt var málinu samt vísað frá dómi vegna þess að dómurinn taldi VLFA hafa fært sönnur á að um væri að ræða 125 skipti. Lögmaður Norðuráls svaraði ekki hvað fyrirtækið teldi að dagarnir ættu að vera margir ef þeir væri ekki 125 eins og Verkalýðsfélag Akraness var búið að telja út. Það er óskiljanlegt að starfsmaðurinn skildi ekki fá að njóta vafans í ljósi þess að ekki var ágreiningur um að búið var að brjóta gróflega á réttindum starfsmannsins og Norðurál svaraði ekki hvað þeir teldu að dagarnir væru margir ef þeir væru ekki 125.
Eftir dóminn komst Verkalýðsfélag Akraness að samkomulagi um að starfsmanninum skyldu greiddar 1,6 milljón vegna brota á vikulegum frídegi en það gerir að brotið hafi verið á umræddum starfsmanni 84 sinnum vegna vikulegs frídags.
Í ljósi aðstæðna í íslensku samfélagi hefur stjórn Sjómenntar ákveðið að rýmka úthlutunarreglur vegna styrkveitinga og bjóða einstaklingum og fyrirtækjum uppá þann valkost að sækja námskeið á netinu eða í fjarkennslu þeim að kostnaðarlausu.
Átakið gildir frá 15.mars til og með 31.ágúst 2020 og gildir gagnvart námi/námskeiðum sem haldin eru innan þessa sama tímaramma.
Nánari útfærsla á átaksverkefninu: Gerðir verða samningar við fræðsluaðila sem bjóða upp á vefnám/fjarnám þar sem fyrirtækjum og einstaklingum er boðin þátttaka í námi/námskeiðum þeim að kostnaðarlausu. Þak á þáttökugjaldi pr. einstakling pr. námskeið er kr. 30.000,- samkvæmt þessum samningum.
Breytingar á úthlutunarreglum eru eftirfarandi:
Um leið og Sjómennt hvetur stjórnendur fyrirtækja til þess að sinna sí-og endurmenntun starfsmanna sinna, vill stjórnin koma því á framfæri að tekið verði á móti öllum góðum hugmyndum að fræðslu sem kynnu að nýtast og falla vel að úthlutunarreglum sjóðsins.
Nánari upplýsingar veitir Kristín Njálsdóttir í síma 863 6480 eða á tölvupósti, This email address is being protected from spambots. You need JavaScript enabled to view it.
Verkalýðsfélag Akraness
Kt. 680269-6889
Til skrifstofunnar geta félagsmenn leitað eftir
upplýsingum og annarri aðstoð.
300 Akranes
4309900
skrifstofa@vlfa.is
Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.
