Samninganefnd stéttarfélaganna stóð fyrir fundi í gær með starfsmönnum Norðuráls þar sem þeim var kynnt staðan í kjaradeilu við forsvarsmenn Norðuráls.

Það er skemmst frá því að segja að frábær mæting var á fundinn en rúmlega tvö hundruð manns mættu og greinilegt var að það ríkir mikil samstaða á meðal starfsmanna að ná fram jöfnun launa á við sambærilegar verksmiðjur. Formaður samninganefndar fór yfir stöðuna lið fyrir lið, kynnti launasamanburð sem gerður hefur verið og þær meginkröfur sem samninganefnd heldur á lofti.

Það kom skýrt fram hjá formanni samninganefndar að það ber gríðarlega mikið á milli samningsaðila ennþá og á þeirri forsendu hafi ríkissáttasemjari tekið ákvörðun um að hvíla þessar viðræður til 6. apríl næstkomandi. En eins og margoft hefur komið fram hér á heimasíðunni þá er krafa stéttarfélaganna einfaldlega sú að laun starfsmanna Norðuráls verði jöfnuð við laun Alcan í Straumsvík. Í þessum samanburði sem kynntur var í gær á fundinum kemur fram að í sumum tilfellum munar tugum þúsunda á mánuði þegar borið er saman einingaverð.

Það er ljóst að það var töluverður hiti í starfsmönnum og kom tillaga frá þeim að stéttarfélögin létu kjósa um verkfallsheimild á meðal starfsmanna. Það er mat formanns Verkalýðsfélags Akraness sem jafnframt er formaður samninganefndar að stéttarfélögunum beri að fara eftir þessari kröfu starfsmanna og hefur hann nú þegar kallað samninganefnd saman til fundar í fyrramálið þar sem undirbúningur að verkfallsheimild verður hafinn.

Samninganefnd stéttarfélaganna vill minna starfsmenn Norðuráls á áríðandi fund í kvöld vegna þeirrar grafalvarlegu stöðu sem upp er komin í kjaradeilu um nýjan kjarasamning. Á fundinum mun formaður samninganefndar gera grein fyrir stöðunni og í framhaldi af því munu starfsmenn geta spurt samninganefndina um það sem fram hefur farið í þessum erfiðu kjaraviðræðum.

Fundurinn hefst klukkan 20:30 í Gamla kaupfélaginu og eru starfsmenn eindregið hvattir til að mæta.

Endurskoðendur félagsins hafa að undanförnu verið að vinna í ársreikningi félagsins og liggja nú fyrir fyrstu drög sem sýna afkomu félagsins síðasta starfsár. Það er afar ánægjulegt að rekstur félagsins heldur áfram að ganga vel og er til að mynda rekstrarafgangur af öllum sjóðum félagsins þrátt fyrir erfiðleika á atvinnumarkaðnum.

Greiddar voru út úr sjúkrasjóði félagsins um 24 milljónir króna í formi sjúkradagpeninga og annarra styrkja, til dæmis heilsueflingarstyrks og gleraugnastyrks svo eitthvað sé nefnt af þeim styrkjum sem félagið býður upp á. Greiddar voru út úr þeim starfsmenntasjóðum sem félagið er aðili að rúmar 6 milljónir króna sem er töluverð aukning á milli ára en það er greinilegt að félagsmenn hafa verið mjög duglegir við að sækja hin ýmsu námskeið og endurmenntunarúrræði sem að í boði eru.

Aðalfundur félagsins verður einhvers staðar í kringum 20. apríl og verður haldinn í Gamla kaupfélaginu en fundurinn verður auglýstur fljótlega í staðarblöðum og hér á heimasíðunni.

Samninganefnd stéttarfélaganna boðar til áríðandi fundar vegna grafalvarlegu stöðu sem upp er komin í kjaradeilu við forsvarsmenn Norðuráls.

Fundurinn verður haldinn mánudaginn 29. mars kl. 20:30 í Gamla Kaupfélaginu, Kirkjubraut 11, Akranesi.

Formaður Verkalýðsfélags Akraness, sem jafnframt er formaður samninganefndar, mun gera starfsmönnum ítarlega grein fyrir stöðunni og munu starfsmenn geta spurt samninganefndina um hin ýmsu atriði sem lúta að kjarasamningsgerðinni.

Eins og áður hefur komið fram er staðan grafalvarleg og er það mat samninganefndar að það hafi gætt afskaplega lítils samningsvilja af hálfu forsvarsmanna Norðuráls og við slíka framkomu ætlar samninganefndin ekki að sætta sig við.

Krafan er, eins og margoft hefur komið fram hér á heimasíðu félagsins, það er að launakjör starfsmanna Norðuráls verði með sambærilegum hætti og gerist hjá starfsmönnum Alcan í Straumsvík.

Þessi krafa byggist á mjög sanngjörnum hætti enda hefur Verkalýðsfélag Akraness bent á að rekstur Norðuráls hefur gengið frábærlega þau 12 ár sem fyrirtækið hefur verið með starfsemi á Grundartanga en heildarhagnaður fyrirtækisins á umræddu tímabili eru um 36 milljarðar króna. Og það er ekki bara að reksturinn hafi gengið þetta vel heldur hafa gengisbreytingar á gjaldmiðlinum okkar verið útflutningsfyrirtækjum afar hagstæð frá árinu 2008.

Til að sýna fram á hvernig gengisbreytingarnar hafa unnið Norðuráli í hag, þá selur Norðurál sínar afurðir í dollurum en greiðir laun í íslenskum krónum.

Árið 2006 greiddi Norðurál 1,8 milljarð íslenskra króna í laun. Á gengi þess tíma gerir þessi upphæð í dollurum talið 26 milljónir USD í launakostnað. Árið 2009 eru greiddir í íslenskum krónum rúmir 3 milljarðar í laun enda fjölgaði starfsmönnum um tæpa 170 og einnig komu kjarasamningsbundnar launahækkanir fram á tímabilinu. Hins vegar var launakostnaðurinn árið 2009 í dollurum talið samt sem áður 26 milljónir Bandaríkjadala. Eða sem sagt nánast sama upphæð í dollurum talið og greidd var árið 2006 þrátt fyrir að starfsmönnum hafi fjölgað um 170 og kjarasamningsbundnar launahækkanir hafi komið til framkvæmda.

Þetta sýnir svo ekki verður um villst hvernig gengið hefur verið að hjálpa Norðuráli, sem og öðrum útflutningsfyrirtækjum gríðarlega. Á þeirri forsendu er grátlegt og dapurlegt að verða vitni að því að þetta fyrirtæki skuli ekki sýna þann sóma að ganga að þeirri sanngjörnu kröfu að greidd séu sömu laun og í annarri sambærilegri álverksmiðju.