Í júlí á síðasta ári tók fyrirtækið ISS við rekstri mötuneytis og ræstinga hjá Elkem Ísland á Grundartanga af Fangi, sem var í 100% eigu Elkem Ísland. Krafa Verkalýðsfélags Akraness var að við þessa yfirtöku skyldu launakjör fyrrverandi starfsmanna Fangs haldast óbreytt, enda hafa þau verið með sambærilegum hætti og laun annarra starfsmanna á stóriðjusvæðinu.

Stóriðjusamningar eru að sumu leyti töluvert betri en gengur og gerist á hinum almenna vinnumarkaði, svo sem veikindaréttur, orlofs- og desemberuppbætur og fleira til. Á þeirri forsendu sýnir Verkalýðsfélag Akraness fulla hörku þegar kemur að því að fyrirtæki láta verktaka hafa verk á svæðinu, og krefst þess að launakjör skerðist á engan hátt við breytingarnar.

Þetta hefur gengið að flestu leyti við yfirtöku ISS á starfsemi Fangs, en þó ekki að öllu leyti og átti formaður félagsins og trúnaðarmaður starfsmanna því fund með Ragnari Árnasyni, lögmanni Samtaka atvinnulífsins og forsvarsmönnum ISS í gær þar sem farið var yfir þessi ágreiningsefni og Verkalýðsfélag Akraness gerði þeim félögum algerlega grein fyrir því að það yrði ekki liðið að öll þau kjaraatriði sem starfsmenn Fangs höfðu tapist á einn eða neinn hátt. Er málið nú til skoðunar hjá forsvarsmönnum ISS og vonast formaður eftir því að málið leysist án aðgerða.

Eins og fram hefur komið hér á heimasíðunni þá flutti formaður félagsins ræðu á Austurvelli sl. laugardag, en Hagsmunasamtök heimilanna og Nýtt Ísland óskuðu eftir að formaður flytti ræðu á fundinum.

Á milli 600 og 700 manns mættu á Austurvöll og hefur formaður fengið gríðarlega jákvæð viðbrögð við ræðunni. Formaður fjallaði meðal annars um pólítísk tengsl verkalýðshreyfingarinnar, stöðugleikasáttmálann, lífeyrissjóðsmál og Icesave. Formaður sagði m.a. í ræðu sinni:

"Ég vil byrja á því að upplýsa að sá sem hér stendur tilheyrir ekki neinum stjórnmálaflokki, enda er það mín skoðun að forystumenn í Verkalýðshreyfingunni eigi ekki undir nokkrum kringumstæðum að vera eyrnamerktir einhverjum einum ákveðnum stjórnmálaflokki. Enda eru forystumenn í Verkalýðshreyfingunni að vinna fyrir félagsmenn sem tilheyra öllum stjórnmálaflokkum.

Það er einnig gríðarlega mikilvægt að verkalýðshreyfingin sé hafin yfir allan vafa hvað varðar traust og trúverðugleika. En það gerir hún alls ekki með því að forystumenn í verkalýðshreyfingunni séu yfirlýstir stuðningsmenn einhverra ákveðinna stjórnmálaafla og noti verkalýðshreyfinguna til að koma sínum flokkspólítísku málum á framfæri.

Með öðrum orðum, verkalýðshreyfingin á að vinna að málefnum er lúta að hagsmunum launafólks algerlega óháð því frá hvaða stjórnmálaöflum slík málefni koma."

Hægt er að lesa ræðuna í heild sinni með því að smella hér. Einnig var fundurinn tekinn upp á myndband og þegar formanni hefur borist myndbandið þá mun ræðan verða birt í máli og mynd hér á heimasíðunni.

Guðbjartur Hannesson, formaður fjárlaganefndar, kom í heimsókn á skrifstofu félagsins í gær. Það var margt sem bar á góma hjá formanni félagsins og Guðbjarts, m.a. erfiðleikar skuldsettra heimila, Icesave og fyrirhuguð fyrningaleið, enda stóð heimsóknin yfir í rúman klukkutíma.

Formaður telur það afar mikilvægt að í fyrirhuguðum breytingum á fiskveiðistjórnunarkerfinu verði það haft að leiðarljósi að atvinnuöryggi sjómanna og fiskvinnslufólks verði tryggt með afgerandi hætti komi til verulegra breytinga á kerfinu. Guðbjartur leiðir hóp sem vinnur nú að tillögum að breytingum á núverandi fiskveiðistjórnunarkerfi.

Það er alltaf ánægjulegt þegar þingmenn gefa sér tíma til að líta við á skrifstofu félagsins og ræða ýmislegt sem snertir málefni launafólks, en þessi heimsókn var afar ánægjuleg og gagnleg í alla staði.

Eins og fram hefur komið hér á heimasíðunni birti Verkalýðsfélag Akraness áskorun í bæjarblöðunum á Vesturlandi þar sem skorað var á öll vel fjárhagslega stæð fyrirtæki að standa við þann samning sem gerður var 17. febrúar 2008. Eins og flestir vita gekk samninganefnd ASÍ frá samkomulagi við Samtök atvinnulífsins um frestun á launahækkunum sem áttu að taka gildi 1. janúar - 1. júní næstkomandi.

Eins og einnig kom fram hér á heimasíðunni hefur HB Grandi tilkynnt að þeir muni standa við þessa hækkun og nú rétt áðan hafði formaður samband við forsvarsmenn hrognavinnslu Vignis G. Jónssonar, en þar starfa á þriðja tug manna, og fékk hann þær upplýsingar að fyrirtækið muni einnig standa við þann samning sem gerður hafi verið.

Formaður tekur ofan fyrir þessum tveimur fyrirtækjum en nú hefur komið í ljós að þau eru búin að standa við þann samning sem gerður var 17. febrúar 2008 að öllu leyti sem þýðir á mannamáli að starfsmenn þessara fyrirtækja hafa ekki orðið af vel á annað hundrað þúsund króna vegna þess samkomulags sem ASÍ gerði við SA. Þær hækkanir sem um ræðir núna eru 6.500 kr. hækkun á launatöxtum og 2,5% launahækkun á kaupliði. Einnig eiga þeir sem ekki starfa eftir launatöxtum að fá 2,5% hækkun. Formaður vill ítreka þakklæti til áðurnefndra fyrirtækja og skorar jafnframt á önnur vel stæð útflutningsfyrirtæki að gera slíkt hið sama.