• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Fréttir

Fréttir

Baráttan um sólarkísilflöguverksmiðju tapast endanlega ef
14
 Oct

Baráttan um sólarkísilflöguverksmiðju tapast endanlega ef

Baráttan um að fá nýja sólarkísilflöguverksmiðju á Grundartanga sem Elkem Ísland er að berjast fyrir mun tapast endanlega ef nýr Orku-, umhverfis- og auðlindaskattur verður að veruleika. Þetta kom meðal annars fram í máli forstjóra Elkem Íslands, Einars Þorsteinssonar, á fundi með þingmönnum Norðvestur kjördæmis á föstudaginn var.

Elkem Ísland er í baráttu um að fá þessa verksmiðju hingað til lands við Kanada og eitt Asíuríki. Þessi nýja verksmiðja myndi skila 350 nýjum störfum, þar á meðal yrði töluvert af hátæknistörfum verksmiðjunni tengdri. Það kom einnig fram í máli Einars að ef þessi skattur verður að veruleika er verið að setja núverandi störf starfsmanna Elkem Ísland í umtalsverða hættu. Þessi nýi skattur mun þýða um tveggja milljarða aukaskatt á fyrirtækið en eins og fram hefur komið á heimasíðunni hefur fyrirtækið aldrei skilað slíkum hagnaði frá stofnun þess.

Það kom að lokum fram í máli Einars að fyrirtækið hefur fjárfest hér á landi á undanförnum misserum fyrir um 8 milljarða króna og nýverið var tekin ákvörðun um að ráðast í gagngerar endurbætur á ofni 3 sem er stærsti ofninn. Hann tjáði einnig á fundinum að ef þessi fyrirhugaði skattur hefði verið til staðar þegar ákvörðun um viðhald á ofni 3 var tekin hefðu eigendur fyrirtækisins að öllum líkindum tekið ákvörðun um að slökkva á ofninum sem hefði þýtt að rúmlega 30 manns hefðu hugsanlega misst atvinnu sína.

Þessi vanhugsaði skattur er formanni Verkalýðsfélags Akraness óskiljanlegur í ljósi þess að verið er að setja rekstrargrundvöll stóriðjufyrirtækja í stórhættu og þar af leiðandi störf starfsmannanna líka. Það er mat formanns að hér sé Ríkisstjórn Íslands að kasta meiri hagsmunum fyrir minni.

Verkalýðsfélag Akraness er 85 ára í dag
14
 Oct

Verkalýðsfélag Akraness er 85 ára í dag

Í dag eru liðin 85 ár frá stofnun Verkalýðsfélags Akraness. Í tilefni afmælisins hefur veglegu afmælisblaði verið dreift í öll hús á Akranesi. Stjórn og starfsmenn óska félagsmönnum öllum innilega til hamingju með daginn.

Hér á eftir fer frásögn af stofnun félagsins:

Það var fimmtudaginn 9. okt. 1924, að allmargir sjómenn og verkamenn og ein kona, komu saman til fundar í Báruhúsinu á Akranesi, í þeim tilgangi að vinna að undirbúningi að stofnun verkalýðsfélags á Akranesi.

 Það fólk sem hér var samankomið, var hert í miskunnarlausri baráttu fyrir lífshagsmunum sínum og heimila sinna.  Þetta voru menn, sem sóttu sjóinn á litlum vélbátum og sumir á opnum árabátum, af miklu kappi, - verkamenn sem báru daginn út og daginn inn, og kona sú, sem getið er í fundargerðinni, vann við fiskþvott, en slíkt starf var að mestu unnið í óupphituðu húsnæði, og stundum undir beru lofti, og kom fyrir að brjóta þurfti ís af þvottakörunum áður en fiskþvottur gæti hafist.

 Fundarstjóri á þessum fundi var kjörinn Sveinbjörn Oddsson, og fundarritari Sæmundur Friðriksson.  Frummælandi á þessum undirbúningsfundi var Oddur Sveinsson á Akri.        

 Hann flutti snjallt erindi um alþýðuhreyfinguna í Evrópu, og lýsti starfi hennar og stefnu, og hversu miklu hún gæti komið til leiðar með starfsemi sinni.  Hvatti Oddur eindregið til stofnunar verkalýðsfélags hér á Akranesi. 

 Þá ræddi Sæmundur Friðriksson, um stofnun verkalýðsfélags, og lýsti því hversu mikla þýðingu slíkur félagsskapur gæti haft fyrir verkalýðinn á sjó og landi, bæði í kaupgjalds- og atvinnumálum.    

 Sveinbjörn Oddsson kvað ekki hægt á einu kvöldi, að sýna fram á hvernig best væri ráðin bót á öllu því sem umbóta þurfti með, og lýsti á hvern hátt hann hyggði, að verkalýðsfélag gæti náð árangri ef stofnað yrði.  

 Auk þess töluðu þeir Þorsteinn Benediktsson og Sigurður Jörundsson, og mæltu þeir báðir með stofnun verkalýðsfélags.  Þess ber að geta, að bræðurnir frá Teig, Ásgrímur, Sigurjón og Stefán, stuðluðu mjög að stofnun félagsins.      

 Á fundi þessum var kosin 5 manna nefnd, til þess að vinna að frekari undirbúningi.  Kosningu hlutu eftirtaldir menn:  Sveinbjörn Oddsson, Sæmundur Friðriksson, Jörgen Hansson, Indriði Jónsson og Oddur Sveinsson.      

 Þá var kosin 9 manna nefnd til þess að gera tillögur um stjórn fyrir væntanlegt félag og hlutu kosningu eftirtaldir:  Indriði Jónsson, Sigurjón Sigurðsson, Sigurður Björnsson, Eiríkur Guðmundsson, Jónas Guðmundsson, Ólafur Kristjánsson, Gísli Einarsson, Halldór Sigurðsson og frú Sveinsína Sveinsdóttir.  Síðan var fundi frestað og framhaldsfundur boðaður hinn 14. okt. 1924.      

 

Framhaldsfundur var haldinn boðaðan fundardag, og þá lagt fram frumvarp að lögum fyrir félagið og það samþykkt samhljóða á fundinum.  Stofndagur Verkalýðsfélags Akraness er því 14. október 1924.  Stofnendur munu hafa verið alls 108 að tölu.

1. grein laganna hljóðaði svo:

Félagið heitir:  Verkalýðsfélag Akraness. Starfssvið: Ytri Akraneshreppur.

2. grein:

Tilgangur félagsins er að efla og styðja hag og menningu alþýðunnar á því svæði, sem félagið nær yfir, með því að vinna að sjálfsbjargarviðleitni almennings, ákveða vinnutíma og kaupgjald, og með sjálfstæðri þátttöku alþýðunnar í stjórnmálum lands og sveitarfélags, allt í samræmi við önnur verkalýðsfélög og Alþýðusambandið. 

 Fyrsta stjórn félagsins var skipuð eftirtöldum mönnum:  Formaður:  Sæmundur Friðriksson; ritari:  Oddur Sveinsson og féhirðir Eiríkur Guðmundsson, Tungu.  Meðstjórnendur:  Jörgen Hansson og Ágúst Ásbjörnsson; varaformaður:  Sveinbjörn Oddsson; vararitari:  Gísli Gíslason og varaféhirðir:  Jónas Guðmundsson.

 

Formenn Verkalýðsfélags Akraness frá stofnun þess á árinu 1924.

1924-1925         Sæmundur Friðriksson

1925-1937         Sveinbjörn Oddsson

1937-1961         Hálfdán Sveinsson

1961-1966         Guðmundur Kristinn Ólafsson

1966-1981         Skúli Þórðarson

1981-1986         Agnar Jónsson

1986-1989         Guðmundur M. Jónsson

1989-2003         Hervar Gunnarsson

2003-                Vilhjálmur Elías Birgisson

12
 Oct

Störf í stóriðju sett í hættu

Hitafundur á Akranesi um Orku-, umhverfis- og auðlindaskatt.Hitafundur á Akranesi um Orku-, umhverfis- og auðlindaskatt.Verkalýðsfélag Akraness og bæjaryfirvöld stóðu fyrir fundi á föstudaginn var þar sem fjallað var um fyrirhugaðan nýjan skatt sem nefnist Orku-, umhverfis- og auðlindaskattur. Í fjárlagafrumvarpinu er gert ráð fyrir að þessi nýi skattur eigi að geta skilað ríkissjóði 16 milljörðum króna.

Til fundarins voru boðaðir allir þingmenn Norðvesturkjördæmis ásamt iðnaðarráðherra, einnig var forstjórum stóriðjufyrirtækjanna Norðuráls, Elkem Ísland og Sementsverksmiðjunnar boðið á fundinn. Því miður sáu einungis þrír þingmenn sér fært að mæta en það voru þeir Guðbjartur Hannesson, formaður fjárlaganefndar, Einar Kr. Guðfinnsson og Ásbjörn Óttarsson.

Fram kom í máli Ragnars Guðmundssonar, forstjóra Norðuráls, að honum fyndist óskiljanlegt að mæting þingmanna væri ekki betri í ljósi þess alvarleika sem þetta mál væri. Það kom einnig fram í máli hans að verið væri að stefna rekstraröryggi verksmiðjunnar í hættu ef þessi áform yrðu að veruleika. Einar Þorsteinsson, forstjóri Elkem Íslands, sagði að sú mikla uppbygging sem verið hefur hjá fyrirtækinu á undanförnum misserum hefði ekki orðið að veruleika ef tillögur sem nú er getið um í fjárlagafrumvarpinu hefðu verið fram komnar þegar ákvörðun var tekin um stækkun verksmiðjunnar.

Formaður Verkalýðsfélags Akraness tók til máls á fundinum og bað stjórnvöld vinsamlegast um að endurskoða þennan nýja skatt sem á að setja á stóriðjufyrirtækin einfaldlega í ljósi þess að verið er að setja störf starfsmanna í stóriðjum í umtalsverða hættu með slíkri skattlagningu. Formaðurinn sagði einnig að hægt væri að ná meira út úr stóriðjunum til ríkisins með því að hækka laun starfsmanna en slíkt skilar sér að sjálfsögðu í auknum skatttekjum til ríkis og sveitarfélaga.

Það kom einnig fram á fundinum að áform stjórnvalda eru fordæmalaus í sögu landsins og ganga auk þess þvert á gerða alþjóðasamninga. Fyrirtækin eru með langtíma orkusamninga og Norðurál er til að mynda nýbúið að undirrita fjárfestingarsamning sem fyrirtækin vinna sínar áætlanir útfrá. Með þessum hugmyndum er verið að skapa stórhættu með að nokkur erlendur fjárfestingaraðili hafi áhuga á að fjárfesta hér á landi.

Kjör stjórnar Verkalýðsfélags Akraness
08
 Oct

Kjör stjórnar Verkalýðsfélags Akraness

Samkvæmt 29. gr. laga Verkalýðsfélags Akraness ber að viðhafa allsherjaratkvæðagreiðslu um kjör stjórnar.

Framboðslistum til stjórnarkjörs í Verkalýðsfélagi Akraness árið 2009, ásamt meðmælendum skv. reglugerð ASÍ um allsherjaratkvæðagreiðslur, ber að merkja kjörstjórn og skila á skrifstofu félagsins, Sunnubraut 13 fyrir kl. 12:00 þann 23. október nk.

Hvert það framboð er gilt sem fram kemur innan þess tíma og hefur skriflegt samþykki þeirra sem framboðslistann skipa.

Stjórn og trúnaðarráð Verkalýðsfélags Akraness hefur lagt fram framboðslista til stjórnar. Berist kjörstjórn ekki aðrir listar telst framboðslisti stjórnar og trúnaðarráðs sjálfkjörinn til næstu tveggja ára.

Framboðslisti stjórnar og trúnaðarráðs er nú til kynningar hér á heimasíðu félagsins, hægt er að skoða listann með því að smella á meira.

 

Framboðslisti stjórnar og trúnaðarráðs

 

Aðalstjórn    

Formaður           

Vilhjálmur Birgisson     

050865-5339

Varaformaður

Bryndís Ó. Guðjónsdóttir      

160859-3859

Ritari

Guðmundur R. Davíðsson

150254-4939

Vararitari

Þórarinn Helgason               

200350-4489

Meðstjórnandi

Júlíus Pétur Ingólfsson               

080159-3079

Varameðstjórnandi          

Skúlína Guðmundsdóttir     

310760-3239

                          

Formenn deilda

Stóriðjudeild          

Oddur Kristinn Guðmundsson

060966-4869

Almenn deild

Elí Halldórsson

301246-2699

Opinber deild

Sigríður Sigurðardóttir

280647-4119

Matvæladeild

Guðrún Linda Helgadóttir

100865-5489

Iðnsveinadeild

Sigurður Guðjónsson

170342-4379

Sjómanna- og vélstjórad.

Jóhann Örn Matthíasson

020945-2579

Varaformenn deilda

Stóriðjudeild

Jón Jónsson

131038-4299

Almenn deild

Tómas Rúnar Andrésson

050559-4169

Opinber deild

Guðrún Guðbjartsdóttir

181175-5759

Matvæladeild

Alma M. Jóhannsdóttir

220856-4459

Iðnsveinadeild           

Þórólfur Guðmundsson

230674-4859

Sjómanna og vélstjórad.  

Svavar S. Guðmundsson

050569-3579
07
 Oct

Stór fundur um nýja skatta á stóriðjufyrirtækin á föstudaginn

Eins og fram hefur komið hér á heimasíðu félagsins þá verður fundur um nýjan skatt sem til stendur að leggja á stóriðjufyrirtækin hér á landi sem heitir Orku- umhverfis- og auðlindaskattur. Þessi skattur á að skila ríkissjóði samkvæmt nýju fjárlagafrumvarpi um 16 milljarða króna. Það hefur einnig komið fram hér á síðunni að slík skattlagning myndi þýða 6 milljarðar fyrir Norðurál, 2 milljarðar fyrir Elkem Ísland og yfir 200 milljónir fyrir Sementsverksmiðjuna.

Með þessum skatti væri verið að leggja rekstrargrundvöll þessara fyrirtækja í umtalsverða hættu, en ekki síður er verið að stefna atvinnuöryggi þúsunda starfsmanna í stóriðjum á okkar svæði í stórhættu ef þessi skattur verður að veruleika. Á þeirri forsendu hefur Verkalýðsfélag Akraness í samráði við bæjaryfirvöld á Akranesi ákveðið að boða alla þingmenn Norðvestur-kjördæmisins ásamt iðnaðarráðherra og forstjórum áðurnefndra stóriðjufyrirtækja á fund sem haldinn verður í Tónbergi, föstudaginn 9. október kl. 16:00.

Hér er einfaldlega um grafalvarlegt mál að ræða, því það er alveg ljóst að sú farsæla uppbygging sem orðið hefur á Grundartanga á undanförnum árum og áratugum hefði ekki orðið ef skattheimta sem nú er fyrirhuguð hefði orðið að veruleika hér á árum áður.

Elkem Ísland hefur t.a.m. aldrei nokkurn tímann skilað 2 milljörðum í hagnað frá því þeir hófu starfsemi, en þetta frumvarp gerir hins vegar ráð fyrir því að þeir greiði 2 milljarða í aukaskatt á næsta ári. Hins vegar hefur fyrirtækið ráðist í framkvæmdir fyrir 8 milljarða á síðustu misserum, en fyrirtækið hefur nýverið hafið framleiðslu á nýrri afurð sem nefnist FSM og þessa dagana er verið að ráðast í gríðarlegar endurbætur á ofni 3 sem kostar fyrirtækið um 800 milljónir.

Það er ljóst að ef þessi fyrirhugaði skattur hefði legið fyrir þegar Elkem lokaði verksmiðju sinni í Noregi og færði starfsemina hingað til lands, þá hefði uppbygging og stækkun Elkem á Grundartanga aldrei orðið að veruleika.

Er þetta sú atvinnumálastefna sem núverandi ríkisstjórn ætlar að standa fyrir? Að drepa niður traustustu fyrirtæki okkar svæðis með stóraukinni skattheimtu sem ekkert fyrirtæki getur staðið undir.

Krafan er skýr, burtu með þennan skatt. Það er hægt að ná auknum tekjum til ríkisins með því að hækka laun starfsmanna og það mun verða hlutverk Verkalýðsfélags Akraness. Hærri laun skila ríki og sveitarfélögum yfir 37% í formi skattgreiðslna starfsmanna.

Rætt var við formann félagsins í Ísland í bítið í gærmorgun, meðal annars um þetta mál. Hægt er að hlusta á viðtalið hér.

07
 Oct

Ársfundur Starfsgreinasambands Íslands hefst á morgun

Ársfundur Starfsgreinasambands Íslands mun hefjast á morgun á Hótel Selfossi. Það er alveg ljóst að fjölmörg mál verða til umræðu á ársfundinum en að sjálfsögðu munu mál er lúta að stöðu kjaramála, skuldsetningu heimilanna og aukinni skattbyrði á almenning verða til umræðu á þinginu.

Það er alveg ljóst að almennt verkafólk sem gekk frá hófstilltum kjarasamningi þann 17. febrúar 2008 getur ekki tekið á sig meiri byrðar en orðið er. Nú þegar hefur almennt verkafólk verið þvingað til að fresta og afsala sér þeim hófstilltu launahækkunum sem áttu að taka gildi 1. mars sl. Það er alveg klárt að þessi mál munu verða til umræðu á þinginu en afstaða Verkalýðsfélags Akraness til frestunarinnar á sínum tíma var skýr, að þeir atvinnurekendur sem hefðu til þess fjárhagslega burði ættu að standa við gerða samninga, en félagið var að sjálfsögðu tilbúið að sína þeim fyrirtækjum sem áttu í rekstrarerfiðleikum svigrúm til að vinna úr sínum málum.

Það verður væntanlega líka til umræðu sú ákvörðun að ekki skyldi hafa verið farið með það samkomulag sem gert var um frestun áður umsaminna launahækkana í allsherjaratkvæðagreiðslu á meðal þeirra félagsmanna sem unnu eftir viðkomandi kjarasamningi. En það var mat félagsins á sínum tíma að slíkt stæðist enga skoðun.

Staðan er einfaldlega þannig í dag að almennum launþegum er vítt og breitt að blæða út sökum þess ástands sem nú ríkir í íslensku efnahags- og atvinnulífi og nú stendur til að skattpína almenna launþega um 63 milljarða á næsta ári ef marka má fyrirliggjanda fjárlagafrumvarp fyrir árið 2010.

Fulltrúar Verkalýðsfélags Akraness á ársfund SGS eru eftirfarandi:

Vilhjálmur Birgisson

Skúlína Guðmundsdóttir

Guðrún Linda Helgadóttir

Tómas Rúnar Andrésson

Jón Jónsson

Jóna Adolfsdóttir

05
 Oct

Þingmenn og ráðherra boðaðir til fundar á Akranesi

Á að leggja styrkustu stoðir atvinnulífs Akurnesinga í rúst?Á að leggja styrkustu stoðir atvinnulífs Akurnesinga í rúst?Eins og fjallað hefur verið um hér á síðunni þá gert ráð fyrir nýjum skattalið í fjárlagafrumvarpinu sem ber beitið Orku-, umhverfis- og auðlindagjöld en áætlað er að þau komi til með að skila inn 16 milljörðum kr. á næsta ári.

Ef þessar hugmyndir ná fram að ganga þá myndi það þýða að Norðurál yrði gert að greiða um 6 milljarða króna í þennan nýja skatt, Elkem Ísland um 2 milljarða og Sementsverksmiðjan rúmar 203 milljónir.

Það er algjörlega ljóst að ef þessi nýi skattur verður að veruleika þá mun það stefna störfum í þessum fyrirtækjum í stórhættu. Sem dæmi þá hefur t.a.m. Elkem Ísland aldrei nokkurn tímann skilað 2 millljörðum í hagnað. Einnig má nefna að Sementsverksmiðjan berst fyrir lífi sínu þessi misserin. Á þessu sést hvers lags firring það er að ætla sér að fara að skattleggja þessi fyrirtæki sem í raun og veru eru að halda uppi atvinnustarfseminni á Akranesi og í nærsveitum.

Verkalýðsfélag Akraness og bæjaryfirvöld hafa boðað til fundar á föstudaginn kemur í bæjarþingsalnum þar sem Ragnar Guðmundsson forstjóri Norðuráls, Einar Þorsteinsson forstjóri Elkem Ísland og Gunnar Sigurðsson forstjóri Sementsverksmiðjunnar munu mæta. Einnig verður öllum þingmönnum Norðvesturlandskjördæmis boðið ásamt iðnaðarráðherra.

Hér er um grafalvarlegt mál að ræða þar sem atvinnuöryggi um 1.000 starfsmanna er í húfi, á þeirri forsendu er gríðarlega mikilvægt að gera þingmönnum og ráðherra grein fyrir þeirri alvarlegu stöðu sem upp getur komið ef þessar hugmyndir verða að veruleika.

Það er mat Verkalýðsfélags Akraness að hægt sé að fá auknar skatttekjur með því að hækka laun starfsmanna, en við hækkun launa starfsmanna þá fá ríki og sveitarfélög samtals rúm 37% til sín. Það má ekki gleyma því að stóriðjufyrirtækin eru með samninga við ríkið um kaup á raforku mörg ár fram í tímann og það gengur ekki upp að ætla sér að koma með auknar skattgreiðslur á þessi fyrirtæki þegar gengið hefur verið frá samningum fram í tímann. Slíkt gerir ekki annað en að fæla alla erlenda fjárfesta frá landinu.

Það eru lausir samningar hjá starfsmönnum Norðuráls nú um áramótin og með þessum tillögum er verið að setja þá kjarasamningsgerð í fullkomna upplausn.

02
 Oct

Ríkisstjórnin ógnar framtíð starfa í stjóriðju

Í fjárlagafrumvarpinu sem lagt var fram í gær er gert ráð fyrir að skattar sem lagðir verða á einstaklinga á næsta ári hækki um 36,8 milljarða kr. Skattar á vörur og þjónustu eiga að hækka um tæplega 31 milljarð kr. Þar af hækkar virðisaukaskattur um tæpa 10 milljarða kr. Það er alveg ljóst að heimili þessa lands munu á engan hátt þola þá auknu skattbyrði sem fyrirhuguð er á næsta ári og ljóst að ef ekki verður breyting á mun heimilum þessa lands blæða endanlega út.

Það er með ólíkindum að ekki skuli skoðuð gaumgæfilega sú hugmynd að skattleggja lífeyrissjóðsiðgjöld jafnóðum og þau eru greidd inn í sjóðina, og hætta þar af leiðandi núverandi kerfi sem byggist á því að sjóðsfélagar greiða skatt þegar kemur að lífeyristöku. Ef slíkt yrði gert yrði klárlega hægt að komast hjá þeim miklu skattahækkunum sem þegar hafa verið boðaðar.

Í gær birtist afar athyglisverð grein í Morgunblaðinu eftir tryggingastærðfræðingana Benedikt Jóhannesson og Bjarna Guðmundsson þar sem þeir segja að með því að skattleggja lífeyrisgreiðslur strax geti ríkið náð allt að 30-35 milljörðum króna í ríkissjóð á ári. Þeir tala einnig um að hugsanlega sé þetta ein besta leiðin til að leysa hina brýnu þörf á skatttekjum án þess að valda heimilum búsefjum með hækkunum á álögum.

Nýr liður í skattahlið fjárlaga hefur verið kynntur og ber beitið Orku-, umhverfis- og auðlindagjöld en þeim er ætlað að skila inn 16 milljörðum kr. á næsta ári. Ef þessi skattur verður að veruleika er ljóst að starfsöryggi starfsmanna stóriðjufyrirtækjanna Norðurál, Elkem Ísland og Sementsverksmiðjunnar verður stefnt í stórhættu.

Viðtal var við formann félagsins á vef Skessuhorns í dag og birtist það í heild sinni hér að neðan:

 

“Þær tillögur sem nú liggja fyrir varðandi orku- og kolefnisskatta á stóriðjufyrirtæki gerir það að verkum að það er verið að leggja störf þeirra sem starfa við stóriðju hér á landi í stórhættu,” segir Vilhjálmur Birgisson formaður Verkalýðsfélags Akraness í samtali við Skessuhorn. Eins og kunnugt er kynnti fjármálaráðherra í gær fjárlagafrumvarp næsta árs og er þar gert ráð fyrir verulegum skattaálögum á stóriðjuna sem ekki hefur verið til staðar hingað til. “Á okkar starfssvæði er þetta einkum Grundartangasvæðið þar sem þúsund störf eru nú sett í fullkomna hættu. Stóriðjan þar beinlínis heldur lífinu í samfélaginu á Akranesi og nágrannabyggðum. Ef þessar hugmyndir ná fram að ganga gæti þessi skattur á Norðurál á Grundartanga numið á sjötta milljarði króna, hjá Elkem Ísland vel á annan milljarð og á Sementsverksmiðjuna einhver hundruð milljóna. Það er morgunljóst að Sementsverksmiðjan og Elkem Ísland hafa enga burði til að taka slíka skattlagningu á sig og því er eins og ég sagði verið að ógna framtíð þessara fyrirtækja og störfum fólksins.”

Vilhjálmur segir að þessu til viðbótar séu kjarasamningur starfsmanna Norðuráls lausir um næstu áramót. “Ef þessi áform ríkisstjórnarinnar lenda á fyrirtækinu er verið að setja kjarasamningsgerðina í algjört uppnám.  Okkar tillaga er sú að það eigi að ná inn sköttum úr stóriðju í gegnum tekjuskatta starfsmanna. Þar fá ríkið og sveitarfélög 37% af laununum og ætti að sjá hag sinn í að svo verði áfram í stað þess að ógna tilveru fyrirtækjanna. Það er með ólíkindum að horfa upp á vinnubrögð þessarar ríkisstjórnar þar sem er verið að ógna starfsöryggi allra sem starfa í stóriðju. Ég vil því skora á ríkisvaldið að endurskoða þessar tillögur strax.”

Vilhjálmur vill benda ríkisstjórn á skoða gaumgæfilega að skattleggja lífeyrisgreiðslur jafnóðum. “Það gæti skilað ríkissjóði 30-40 milljörðum á ári. Þetta myndu heimili landsins ekki finna fyrir á einn eða neinn hátt nú. Á þeirri forsendu á að skipa hóp sérfræðinga til að skoða það að skattleggja lífeyrisgreiðslurnar strax og hætta þessari endemis vitleysu. Stjórnvöld verða að átta sig á því að ofan á minni veltu og verkefni í þjóðfélaginu eru stjórnvöld að hækka skattaálögur svo mikið bæði á einstaklinga og fyrirtæki að fólki er einfaldlega að blæða út,” sagði Vilhjálmur að lokum.
Skipa þarf hóp sérfræðinga til að kanna kosti og galla á skattlagningu lífeyrissjóðsgjalda
30
 Sep

Skipa þarf hóp sérfræðinga til að kanna kosti og galla á skattlagningu lífeyrissjóðsgjalda

Samkvæmt fréttum ekki alls fyrir löngu vinnur ríkisstjórnin nú að útfærslu fjárlagafrumvarpsins, en reiknað er með að niðurskurður í ríkisútgjöldum muni nema um 179 milljörðum til ársins 2013. Fram kemur í fréttinni að draga þurfi saman í ríkisútgjöldum um 63 milljarða á næsta ári.

Það er alveg ljóst að koma mun til töluverðra skattahækkana til að mæta þessum niðurskurði sem framundan er. Töluverðar líkur eru á hækkun á tekjuskatti og einnig hefur heyrst um hækkanir á öðrum sköttum ríkisins.

Meðal nýrra hugmynda sem skotið hafa upp kollinum er hvort framkvæmanlegt sé að skattleggja lífeyrissjóðsiðgjöld jafnóðum og þau eru greidd inn í sjóðina, og hætta þar af leiðandi núverandi kerfi sem byggist á því að sjóðsfélagar greiða skatt þegar kemur að lífeyristöku.

Í dag birtist afar athyglisverð grein í Morgunblaðinu eftir tryggingastærðfræðingana Benedikt Jóhannesson og Bjarna Guðmundsson þar sem þeir segja að með því að skattleggja lífeyrisgreiðslur strax geti ríkið náð allt að 30-35 milljörðum króna í ríkissjóð á ári. Þeir tala einnig um að hugsanlega sé þetta ein besta leiðin til að leysa hina brýnu þörf á skatttekjum án þess að valda heimilum búsefjum með hækkunum á álögum.

Þegar mætir menn eins og Benedikt Jóhannesson og Bjarni Guðmundsson, tryggingastærðfræðingar fjölmargra lífeyrissjóða, koma með slíkar tillögur ber ríkisstjórn Íslands að taka þær alvarlega. Skipa þarf færustu hagfræðinga til þess að vega kosti og galla þess að skattleggja lífeyrissjóðsgjöld jafnóðum. Ef hægt er að komast hjá því að stórhækka hér skatta á almenning með því að fara þessa leið þá er til mikils að vinna.

Í greininni er bent á að með þessari hugmynd vinnist eftirfarandi:

  • Ríkið og sveitarfélög þurfa ekki að taka jafnmikil lán og ella
  • Ekki þarf að hækka skattbyrði á almenning
  • Séð er fyrir fjórðungi halla fjárlaga
  • Ráðstöfunartekjur almennings skerðast ekki
  • Neysla dregst ekki meira saman og kreppan dýpkar því ekki
  • Skatturinn fer ekki út í verðlag

Það er gríðarlega mikilvægt eins og áður hefur komið fram að skipaður verði hópur sérfræðinga til að fara yfir þessar tillögur. Til mikils er að vinna til draga úr þeim mikla niðurskurði sem framundan er í ríkisrekstrinum, niðurskurði sem klárlega mun leiða af sér að opinberum störfum mun fækka. Með hækkun á sköttum mun neysla dragast saman sem mun leiða af sér að störf munu tapast við verslun og þjónustu og hækkun á neyslusköttum mun hafa áhrif til hækkunar á verðtryggðum lánum launþega.

Ef hægt er að komast hjá því að draga úr hækkun á sköttum með því að nýta þennan möguleika á skatttöku lífeyrissjóðsgjalda sem skilar ríkissjóði 35 milljörðum, þá er það eitthvað sem ríkisvaldinu ber skylda til að skoða gaumgæfilega.

85 ára afmælisblað Verkalýðsfélags Akraness í undirbúningi
29
 Sep

85 ára afmælisblað Verkalýðsfélags Akraness í undirbúningi

Þann 14. október nk. verða liðin 85 ár frá því að Verkalýðsfélag Akraness var stofnað á framhaldsaðalfundi í Báruhúsinu á Akranesi. Þá skráðu 108 félagsmenn sig í félagið. Í dag eru félagsmennirnir tæplega 3.000 og hafa þeir aldrei verið fleiri.

Stjórn Verkalýðsfélags Akraness telur það skyldu sína að varðveita þá miklu sögu sem félagið geymir og hefur því ákveðið að minnast þessara tímamóta með útgáfu afmælisblaðs. Ritstjóri blaðsins er Haraldur Bjarnason og hefur hann að undanförnu verið önnum kafinn við að safna efni, viðtölum og myndum í blaðið sem dreift verður í hús á afmælisdaginn.

Page 115 of 208

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image