Eins og fram hefur komið hér á heimasíðunni er búið að fresta viðræðum um nýjan kjarasamning starfsmanna Norðuráls þar til dómur fellur í máli er lítur að stefnu Félags vélstjóra og málmtæknimanna, VM, en þeir gera kröfu um að eiga aðild að kjarasamningi Norðuráls. Formaður hefur áður gert grein fyrir sinni afstöðu í því máli og hægt er að lesa hér á heimasíðunni hver hún er.  En rétt er að ítreka það að VLFA harmar þessi vinnubrögð forsvarsmanna VM.

Formaður hefur að undanförnu fundað með starfsmönnum Norðuráls og á föstudaginn fundaði hann með dagvinnufólkinu og gerði þeim grein fyrir þeirri stöðu sem upp er komin og hvernig viðræðurnar hafa gengið fyrir sig. Í kvöld mun formaður síðan ljúka við að funda með restinni af starfsmönnum og það eru B og C vaktirnar sem hann mun hitta í kvöld. Það er töluvert mál að ná öllum starfsmönnum saman á svona fjölmennum vinnustað eins og Norðurál er og á þeirri forsendu getur það tekið nokkra daga að hitta alla starfsmennina.

Fundirnir hafa gengið mjög vel þar sem formaður hefur gert grein fyrir stöðu mála bæði hvað varðar þetta alvarlega mál er viðkemur stefnu VM manna og einnig hvernig viðræðurnar hafa gengið fram að þessu. Formaður hefur greint frá því á fundunum að Verkalýðsfélag Akraness muni ekki hvika frá þeirri kröfu í þessum viðræðum að launakjör starfsmanna Norðuráls verði með sambærilegum hætti og gerist í sambærilegum iðnaði. Frá þessari kröfu mun félagið ekki víkja enda eru engar forsendur fyrir slíku nú og hefur rekstur Norðuráls til að mynda gengið mjög vel á undanförnum árum og rétt er að benda á að álverðið í dag eru rúmir 2.200 dollarar pr. tonn.