• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Fréttir

Fréttir

Atkvæðagreiðslu lýkur á morgun
25
 May

Atkvæðagreiðslu lýkur á morgun

Klukkan 12:00 á morgun lýkur atkvæðagreiðslu um kjarasamninga Verkalýðsfélags Akraness við Samtök atvinnulífsins annars vegar vegna starfa á almennum vinnumarkaði (Almenn deild og Matvæladeild) og hins vegar vegna iðnaðarmanna (Iðnsveinadeild).

Kjarasamningar og kynningargögn liggja frammi á skrifstofu félagsins þar sem opinn kjörfundur fer fram. Einnig er hægt að skoða upplýsingar um almenna samninginn með því að smella hér og samning iðnaðarmanna hér.

25
 May

Forsvarsmenn Norðuráls bera fyrir sig bókun

Á mánudaginn var fundað vegna launaliðar Norðuráls í húsakynnum ríkissáttasemjara. Það er skemmst frá því að segja að árangurinn af þessum fundi var akkúrat enginn. Það sem forsvarsmenn fyrirtækisins bjóða starfsmönnum er sá samningur sem samið var um á hinum almenna vinnumarkaði eða sem nemur 11,4% til þriggja ára.

Þetta tilboð er algjörlega óásættanlegt með öllu ef tilboð skyldi kalla. Sérstaklega í ljósi þess að hér er um gríðarlega sterkt útflutningsfyrirtæki að ræða sem hefur hagnast um 50-60 milljarða frá því það hóf starfsemi á Grundartanga árið 1998. Þessu til viðbótar hefur fyrirtækið hagnast verulega vegna gengis íslensku krónunnar sem og hækkandi afurðaverðs en nú er álverðið í 2.500 dollurum og hefur hækkað umtalsvert á liðnum misserum.

Það er einnig alveg með ólíkindum að Norðurál skuli ekki vilja fylgja í fótspor Elkem Ísland sem gekk frá kjarasamningi við sína starfsmenn ekki alls fyrir löngu, kjarasamningi sem gefur starfsmönnum 9,6% í beina launahækkun á þessu ári en heildarhækkunin nemur 26% á þremur árum að teknu tilliti til eingreiðslu sem um var samið.

Ragnar Guðmundsson, forstjóri Norðuráls, og Hannes Sigurðsson, aðstoðarframkvæmdastjóri Samtaka atvinnulífsins, margítrekuðu það á fundinum á mánudaginn að verkalýðshreyfingin að undanskildu Verkalýðsfélagi Akraness, væri búin að skuldbinda sig í bókun til að ganga frá kjarasamningi upp á 11,4% eins og samið var í nýgerðum kjarasamningi.   En þar segir m.a. um Sameiginlega launastefnu ASÍ og SA:

"Almennar launahækkanir verða samtals 11,40% á samningstímanum. Sérstök hækkun kauptaxta er láglaunaaðgerð sem hækkar launakostnað misjafnlega eftir því hve margir taka laun skv. kauptöxtum. Framangreind niðurstaða kjarasamninga felur í sér að mótuð hefur verið sameiginleg og samræmd launastefna gagnvart þeim fjölmörgu samningum sem enn eru ógerðir á samningssviði aðila. Samningsaðilar skuldbinda sig til þess að framfylgja framangreindri launastefnu í framhaldinu"

Formaður spyr sig hvaða heimild hefur verkalýðshreyfingin til að taka aðra ógerða kjarasamninga í slíka láglaunagíslingu og það t.d. gagnvart fyrirtæki sem malar gull og er með launakostnað í kringum 10% af heildarveltu.  Það er alveg ljóst að þessi vinnubrögð verkalýðshreyfingarinnar eru ekkert annað en stórfelld skemmdarverk enda hefur það svo sannarlega sannað sig þegar forstjóri Norðuráls ber fyrir sig þessa bókun.

Það er alveg hægt að segja að útlitið í þessum viðræðum sé afar dökkt og sér formaður VLFA alls enga ástæðu til að boða til annars fundar meðan þetta er afstaða fyrirtækisins enda mun félagið ekki skrifa undir slíkan samning gagnvart útflutningsfyrirtæki.  Rétt er að geta þess að fiskvinnslufyrirtækin eru að hækka laun um rúm 9% á þessu ári í nýjum samningi á hinum almenna vinnumarkaði og er það gert vegna sterkrar stöðu útflutningsfyrirtækja.  Í ljósi þess er þessi afstaða forsvarsmenna Norðuráls ótrúleg og í raun og veru dapurlegt að fyrirtækið skuli ekki leyfa starfsmönnum að njóta ávinnings af afar góðum rekstrarskilyrðum.

Eins og fram kom áðan þá er staðan ekki góð og mun formaður boða starfsmenn Norðuráls til fundar í Bíóhöllinni í næstu viku þar sem farið verður yfir þessa skelfilegu stöðu sem upp er komin.

20
 May

Viðræðum slitið við Samtök atvinnulífsins vegna Klafa

Verksmiðjur Elkem Ísland og Norðuráls á GrundartangaVerksmiðjur Elkem Ísland og Norðuráls á GrundartangaSamningafundur var haldinn hjá ríkissáttasemjara í dag vegna kjaradeilu félagsins við Samtök atvinnulífsins vegna Klafa ehf. En Klafi er fyrirtæki sem sér um alla þjónustu á Grundartangahöfn, meðal annars upp- og útskipanir og er í eigu risanna tveggja á svæðinu, það er að segja Norðuráls og Elkem Ísland, til helminga. 

Krafa félagsins er að starfsmenn Klafa fái sömu launahækkanir og eingreiðslu og um var samið hjá Elkem Ísland enda eru starfsmenn Klafa fyrrverandi starfsmenn Elkem Ísland. Það fyrirkomulag að stofna nýtt félag utan um út- og uppskipanir var tekið upp fyrir nokkrum árum síðan en átti ekki að leiða til þess að kjör þeirra sem þar starfa myndu dragast aftur úr starfsmönnum Elkem Ísland.

Samtök atvinnulífsins buðu nákvæmlega sömu launahækkanir og um var samið á hinum almenna vinnumarkaði en því var snarlega hafnað með afgerandi hætti hjá ríkissáttasemjara í dag. Óskuðu formaður Verkalýðsfélags Akraness og trúnaðarmaður starfsmanna Klafa eftir að bókaður yrði árangurslaus fundur en það er skilyrði til þess að starfsmenn geti gripið til einhverra róttækra aðgerða til að knýja fram þá sanngjörnu kröfu að fá sömu launahækkanir og starfsfélagar þeirra hjá Elkem Ísland.

Þessari kröfu verður fylgt eftir af fullum þunga og mun formaður funda með starfsmönnum á þriðjudaginn þar sem aðgerðir verða skipulagðar en fátt virðist nú geta komið í veg fyrir alvarleg átök á Grundartangasvæðinu vegna þessarar deilu. En slík deila mun klárlega geta haft áhrif á bæði starfsemi Elkem Ísland sem og Norðuráls.

20
 May

18,4% launamunur á milli fiskvinnslufyrirtækja á Akranesi

Bónusgreiðslur eru afar mismunandiBónusgreiðslur eru afar mismunandiKynningarfundur var haldinn í gær um nýgerðan kjarasamning á hinum almenna vinnumarkaði. Þar fór formaður yfir helstu atriði samningsins. Fram kom í máli fundarmanna að vissulega hefðu lágmarkslaunin þurft að hækka mun meira en um var samið en sem betur fer náðist þó að skila örlítið meiri ávinningi til fiskvinnslufólks heldur en margra annarra sem taka kjör eftir kjarasamningi á hinum almenna vinnumarkaði. Nægir að nefna í því samhengi að laun fiskvinnslufólks eru að hækka um rúm 11% á þessu ári að teknu tilliti til 50 þúsund króna eingreiðslu og 25 þúsund króna álags á orlofs- og desemberuppbætur. Samt sem áður kom fram í máli formanns að laun fiskvinnslufólks séu ekkert til að hrópa húrra yfir en það er verkefni verkalýðshreyfingarinnar að bæta kjör þessa fólks sem og annarra sem starfa á hinum almenna vinnumarkaði.

Einnig kynnti formaður samanburð sem hann gerði á bónusum fiskvinnslufyrirtækjanna á Akranesi. Þau fyrirtæki sem hann skoðaði voru HB Grandi, Norðanfiskur, hrognavinnsla Vignis G. Jónssonar, lifrabræðslan Akraborg og Laugafiskur. Það er skemmst frá því að segja að bónusgreiðslur til starfsmanna sem starfa í fiskvinnslu eru afar mismunandi. Hæsti meðaltalsbónusinn var hjá lifrarbræðslunni Akraborg en þar var meðaltalsbónusinn á síðustu 12 mánuðum 349 kr. sem gerir 60.492 kr. á mánuði og því hafði sérhæfður fiskvinnslumaður sem starfar hjá Akraborg 234.992 kr. í mánaðarlaun. Þessi starfsmaður mun hækka upp í 256.698 kr. sem er hækkun upp á tæp 22 þúsund. Það er skemmst frá því að segja að starfsmenn Akraborgar njóta rúmum 37 þúsund krónum hærri launagreiðslna eða sem nemur 18,4% heldur en það fiskvinnslufyrirtæki sem greiðir hvað minnstan bónus en hann var 152 kr.

Formaður fagnar því framtaki hjá Akraborg að taka upp nýtt bónuskerfi sem skilar bæði starfsmönnum og fyrirtækinu miklum ávinningi sem leiðir til þess að fyrirtækið er að greiða langhæsta bónusinn á meðal fiskvinnslufyrirtækja. Ef bónusinn heldur áfram að vera jafn lifandi og hann var á síðustu 12 mánuðum má áætla að meðaltalsbónusinn hjá starfsmönnum Akraborgar verði 405 kr.

Kynningarfundur og atkvæðagreiðsla vegna nýrra kjarasamninga
18
 May

Kynningarfundur og atkvæðagreiðsla vegna nýrra kjarasamninga

Vegna nýgerðra kjarasamninga við Samtök atvinnulífsins um störf á almennum vinnumarkaði annars vegar og iðnaðarmanna hins vegar boðar Verkalýðsfélag Akraness til kynningafundar á Gamla Kaupfélaginu, Kirkjubraut 11 fimmtudagskvöldið 19. maí kl. 20:00. Eftir kynninguna hefst kosning um samningana og geta fundarmenn kosið á staðnum.

Opinn kjörfundur stendur til kl. 12:00 fimmtudaginn 26. maí og verður hægt að kjósa á skrifstofu félagsins, Sunnubraut 13 fram að þeim tíma. Kjarasamningar og kynningargögn liggja frammi á skrifstofu. Einnig er hægt að skoða upplýsingar um almenna samninginn með því að smella hér og samning iðnaðarmanna hér.

Athygli er vakin á því að þessir samningar eiga ekki við um þá félagsmenn sem starfa í stóriðju, hjá sveitarfélögum eða ríki, aðeins þá sem starfa á almennum vinnumarkaði (Almenn deild VLFA) og iðnaðarmenn (Iðnsveinadeild VLFA).

Þeir félagsmenn sem þetta á við um eru eindregið hvattir til að mæta á kynningarfundinn annað kvöld og kynna sér efni samninganna.

Fyrirtækjasamningur kynntur fyrir starfsmönnum ISS á Grundartanga
16
 May

Fyrirtækjasamningur kynntur fyrir starfsmönnum ISS á Grundartanga

Formaður fundaði með starfsmönnum ISS á Grundartanga en það eru starfsmenn sem sjá um ræstingu og mötuneyti hjá Elkem Ísland. Tilefni fundarins var nýgerður fyrirtækjasamningur sem formaður ásamt trúnaðarmanni hafa verið að vinna að um alllanga hríð og fór formaður yfir innihald samningsins.

Fyrirtækjasamningurinn gildir í 3 ár og er starfsmaður með 10 ára starfsreynslu að hækka úr 289 þúsund krónum í 306 þúsund krónur á mánuði en inni í því er 8,8% vaktaálag sem miðast við að unnið sé fjórðu hverja helgi. Þessu til viðbótar tókst að hækka orlofs- og desemberuppbætur umtalsvert en þær voru 104.547 kr. hvor fyrir sig eða samtals 209.094 kr. í 119.889 kr. hvora fyrir sig eða samtals 239.778 kr. sem er hækkun upp á 14,7%.

Einnig munu starfsmenn fá þessa hefðbundnu eingreiðslu upp á 50 þúsund krónur og viðbótarhækkun um 10 þúsund vegna orlofsuppbótar og 15 þúsund krónur vegna desemberuppbótar en þessar eingreiðslur koma vegna þess hversu lengi hefur dregist að ganga frá kjarasamningi.

13
 May

Þrír kjarasamningar undirritaðir í dag

Húsakynni ríkissáttasemjaraHúsakynni ríkissáttasemjaraÞað er óhætt að segja að þetta hafi verið annasamur dagur varðandi kjarasamningsgerð en formaður félagsins undirritaði þrjá samninga hjá ríkissáttasemjara í dag við Samtök atvinnulífsins. Eins og áður hefur komið fram var það kjarasamningur á hinum almenna vinnumarkaði sem gengið var frá. Einnig var gengið frá samningi vegna starfsmanna fiskimjölsverksmiðjunnar og síðast en ekki síst þá tókst loksins að ganga frá fyrirtækjasamningi fyrir starfsmenn ISS sem starfa í mötuneytinu og við ræstingar hjá Elkem Ísland á Grundartanga. 

Greint verður nánar frá innihaldi þessara samninga eftir helgi og samningarnir verða kynntir fyrir starfsmönnum alla næstu og þarnæstu viku.  

13
 May

Sérhæfður fiskvinnslumaður hækkar um tæpar 20 þúsund krónur

Rétt í þessu undirritaði formaður félagsins nýjan kjarasamning á hinum almenna vinnumarkaði hjá ríkissáttasemjara. Meginatriði samningsins eru eftirfarandi:

Launabreytingar verða með þeim hætti að frá 1. júní 2011 hækka laun um 4,25%, 1. febrúar 2012 hækka þau um 3,5% og 1. febrúar 2013 um 3,25%. Þeir sem eru að starfa eftir launatöxtum munu hækka um krónutölu með eftirfarandi hætti: 1. júní 2011 verður 12.000 kr. hækkun, 1, febrúar 2012 11.000 kr. hækkun og 1. febrúar 2013 11.000 kr. hækkun.

Lágmarkstekjutrygging í dagvinnu mun hækka úr 165 þúsund krónum í 182 þúsund krónur 1. júní 2011, 1. febrúar 2012 í 193 þúsund og 1. febrúar 2013 í 204 þúsund. Það er helst þessi þáttur sem formaður félagsins er afar ósáttur með í þessum samningi  enda var krafa félagsins að lágmarkslaun myndu vera komin upp í 204 þúsund við undirritun samningsins en það náðist ekki í gegn.

Einnig mun koma eingreiðsla í júní að upphæð kr. 50.000 fyrir starfsmann í fullu starfi í mánuðunum mars-maí. Starfsmenn sem létu af störfum í apríl eða eru í hlutastarfi fá hlutfallslega greiðslu miðað við starfstíma í mars og apríl. Álag mun koma á orlofsuppbótina sem nemur 10.000 kr. og á desemberuppbótina munu koma 15.000 kr. fyrir árið 2011.

Sem dæmi þá munu grunnlaun sérhæfðs fiskvinnslumanns hækka úr 174.500 kr. í 186.500 kr. og einnig munu bónusgreiðslur hækka um 16,25%. Þannig að starfsmaður í frystihúsi HB Granda á Akranesi sem er með fastan bónus upp á rétt rúmar 254 kr. mun hækka um 41 kr. og mun því bónusinn fara upp í 295 kr. Heildarhækkun sérhæfðs fiskvinnslumanns hjá HB Granda í 7 ára þrepi er því rúmar 19 þúsund krónur á mánuði eftir samning.

Formaður mun kynna samninginn af fullum krafti í næstu viku og verður væntanlega opinn kjörfundur á kynningarfundunum sem og á skrifstofu félagsins en það verður auglýst nánar síðar.

12
 May

Árangurslaus fundur

Fundað var vegna launaliðar Norðuráls í húsakynnum ríkissáttasemjara í gær. Það er skemmst frá því að segja að árangurinn af þessum fundi var lítill sem enginn. Fram kom í máli Ragnars Guðmundssonar, forstjóra Norðuráls, að fyrirtækið sé tilbúið til að koma með þær launahækkanir sem um var samið á hinum almenna vinnumarkaði en þar var samið til þriggja ára og nam heildarkostnaðarhækkun 11,4%.

Formaður Verkalýðsfélags Akraness lét það koma skýrt fram að þessu tilboði Norðuráls væri hafnað alfarið enda engar forsendur fyrir því að fyrirtæki starfandi í útflutningi sem hefur hagnast gríðarlega á gengisfalli íslensku krónunnar og einnig á stórhækkuðu afurðaverði, en nú er álverðið í 2.700 dollurum tæpum, skili ekki þeim ávinningi að einhverju leyti til sinna starfsmanna.

Það er alveg ljóst að Verkalýðsfélag Akraness mun ekki undir nokkrum kringumstæðum skrifa undir kjarasamning sem ekki verður í anda þess sem gerðist á Grundartangasvæðinu, nánar tiltekið við Elkem Ísland. Þar var samið upp á 9,6% launahækkun á fyrsta ári ásamt eingreiðslu sem nam föstum mánaðarlaunum og var því heildarhækkun á fyrsta ári 17,6% en samningurinn gildir til þriggja ára og gefur starfsmönnum 25% launahækkun sé tekið tillit til eingreiðslunnar.

Eins og áður hefur komið fram þá mun félagið ekki ganga frá kjarasamningi undir þessum tölum og þessu til viðbótar vantar 3% til að jafna þann launamun sem ríkir á milli Elkem og Alcan í Straumsvík annars vegar og Norðuráls hins vegar.

Lagt var fram tilboð til forsvarsmanna Norðuráls í anda þess sem samið var um við Elkem Ísland ásamt þriggja prósenta viðbótinni sem nefnd var hér að ofan. Væntanlega mun svar koma við þessu tilboði eftir helgi en það skal segjast alveg eins og er að formaður er ekki ýkja bjartsýnn á jákvæða niðurstöðu hvað það varðar.

11
 May

Fundur vegna kjarasamnings Norðuráls

Fundur verður haldinn vegna launaliðar kjarasamnings Norðuráls klukkan 13 í dag í húsakynnum ríkissáttasemjara. Þetta er fyrsti fundurinn vegna Norðuráls í langan tíma og löngu orðið tímabært að fara að koma þeim samningaviðræðum á skrið enda var launaliðurinn laus nú um áramótin.

Kröfurnar eru skýrar og er algjört grundvallaratriði að sömu kjör náist og í nýgerðum kjarasamningi við Elkem Ísland auk þeirra þriggja prósenta sem skilja þessar tvær verksmiðjur að þegar kemur að launum starfsmanna þeirra. Annað sem lögð verður áhersla á er meðal annars hækkun grunnlauna sem og bónuskerfið. Álverð er nú í hæstu hæðum og því er ekki afsakanlegt að fyrirtækið láti starfsmenn sína ekki njóta þess góða ávinnings sem af því hefur hlotist.

Page 91 of 208

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image