Á sunnudaginn var Sjómannadagurinn haldinn hátíðlegur, en Verkalýðsfélag Akraness leggur sitt af mörkum til hátíðarhaldanna eins og undanfarin ár. Aðkoma félagsins að sjómannadeginum er meðal annars fólgin í því að standa fyrir athöfn við minnismerki um týnda sjómenn í kirkjugarðinum, en þar er árlega lagður blómsveigur til að minnast þeirra sem drukknað hafa og týnst á sjó.

Að þeirri athöfn lokinni er haldið í hátíðarsjómannamessu í Akraneskirkju þar sem meðal annars er heiðraður sjómaður fyrir vel unnin störf í þágu þjóðar. Í ár var það Jóhannes Eyleifsson sem fékk æðstu viðurkenningu sjómannadagsráðs Verkalýðsfélags Akraness, en það má segja að Hanni á Lögbergi, eins og hann er ætíð kallaður hér á Akranesi, sé holdgervingur sjómennskunnar enda hóf hann sjómennsku með föður sínum einungis 12 ára gamall. Og enn er hann að og fyrir örfáum dögum síðan lauk hann sinni 60. grásleppuvertíð á sínum langa sjómannsferli, en Jóhannes á og rekur smábátinn Leifa AK 2.

Að heiðrun lokinni bauð Akraneskaupstaður þeim hjónum og fulltrúum sjómannadagsráðs til hátíðarkvöldverðar á veitingastaðnum Galito á Akranesi. Stjórn Verkalýðsfélags Akraness vill óska Jóhannesi og konu hans, Drífu Garðarsdóttur, innilega til hamingju með heiðrunina.

Þessu til viðbótar kom Verkalýðsfélag Akraness að fjármögnun á fjölskyldudagskrá á hafnarsvæðinu vegna sjómannadagsins, en eins og undanfarin ár er það Björgunarfélag Akraness sem sá um framkvæmd dagskrárinnar. 

Dagana 2. og 3. júní sl. var haldinn formannafundur Starfsgreinasambands Íslands í Grindavík. Rétt er að geta þess að Starfsgreinasamband Íslands er stærsta landssambandið innan ASÍ og er fjöldi félagsmanna sambandsins yfir 51.000. 

Fundurinn var nokkuð góður og voru fjölmörg mál til umræðu, en á fundinum lagði formaður VLFA fram ályktun um mikilvægi samningsfrelsis stéttarfélaga og launafólks. Spruttu miklar umræður um ályktun formannsins en hún laut að því að ef tekið verður upp nýtt vinnumarkaðslíkan, eins og æði margt bendir til að geti orðið, þá verði tryggt með afgerandi hætti að ekki verði hróflað við forræði, sjálfstæði og frjálsum samningsrétti stéttarfélaganna til kjarasamningsgerðar. En eins og margoft hefur komið fram hér á heimasíðu félagsins þá hefur VLFA verulegar áhyggjur af því að stefnt sé að því í nýju vinnumarkaðsmódeli að skerða og takmarka frjálsan rétt félaganna til kjarasamningsgerðar.

Formaður færði ítarleg rök máli sínu til stuðnings og það er skemmst frá því að segja og afar ánægjulegt að sjá og heyra að fleiri og fleiri forystumenn í verkalýðshreyfingunni eru farnir að hafa áhyggjur af því að samningsfrelsið verði hugsanlega skert og kom mikill stuðningur fram hjá mörgum formönnum SGS við ályktun VLFA. Ályktunin var borin undir atkvæði fundarins og fór atkvæðagreiðslan með þeim hætti að 9 formenn samþykktu ályktunina, enginn sagði nei, en nokkrir formenn sátu hjá. Það kom skýrt fram í máli formanns VLFA að það megi ekki undir nokkrum kringumstæðum skerða eða takmarka frjálsan samningsrétt launafólks enda er samningsrétturinn hornsteinn stéttarfélagsbaráttunnar á Íslandi, eins og fram kemur í ályktuninni.

Ályktunin hljóðaði með eftirfarandi hætti:

Ályktun um samningsrétt

Formannafundur Starfsgreinasambands Íslands haldinn í Grindavík dagana 2. og 3. júní vill taka það skýrt fram að SGS mun ekki verða aðili að nýju vinnumarkaðsmódeli sem nú er unnið að, ef það leiðir til þess að frjáls samningsréttur stéttarfélaganna verður skertur eða takmarkaður á nokkurn hátt.

Formannafundurinn vill einnig taka það sérstaklega fram að ef það kemur til þess að breyta þurfi lögum um stéttarfélög og vinnudeilur vegna nýs vinnumarkaðsmódels þá verði það tryggt að slíkar breytingar leiði alls ekki til skerðingar eða takmörkunar á frjálsum samningsrétti stéttarfélaganna.

Formannafundur SGS er sannfærður um að forræði hvers stéttarfélags til kjarasamningsgerðar og frjáls samningsréttur sé hornsteinn stéttarfélagsbaráttu á Íslandi og það frjálsræði og þann samningsrétt megi ekki skerða eða takmarka á nokkurn hátt

Í dag heimsótti Júlíus Pétur Ingólfsson, stjórnarmaður í Verkalýðsfélagi Akraness, alla leikskólana á Akranesi sem eru Akrasel, Garðasel, Teigasel og Vallarsel. Tilefni heimsóknanna var Sjómannadagurinn sem er næstkomandi sunnudag en það er hefð hjá Verkalýðsfélagi Akraness að heimsækja öll leikskólabörn og gefa þeim harðfisk í tilefni dagsins.

Stjórn félagsins er það mikill heiður að geta glatt leikskólabörn á Akranesi með þessum hætti og minnt þau á mikilvægi sjómannsstarfsins. Það skein mikil gleði úr hverju andliti og kunnu börnin svo sannarlega að þakka fyrir sig.

Næstkomandi sunnudag verður Sjómannadagurinn haldinn hátíðlegur um land allt. Björgunarfélag Akraness sér um fjölbreytta dagskrá við Akraneshöfn og víðs vegar um bæinn ættu allir að geta fundið afþreyingu við sitt hæfi.

Dagskrá:

Kl. 9.00-18.00
Frítt í sund í Jaðarsbakkalaug.

Kl. 10.00
Minningarstund við minnismerki um týnda sjómenn í kirkjugarði.

Kl. 10.00-16.00  
Opið í Akranesvita. Málverkasýning Sigfríðar Lárusdóttur prýðir veggi vitans.

Kl. 11.00       
Dýfingakeppni á vegum Sjóbaðsfélags Akraness. Keppendur og áhorfendur safnast saman við Aggapall við Langasand. Dýfingarnar munu fara fram af bátnum Jóni forseta. Keppt verður í tveimur greinum, annars vegar hefðbundinni stungu og hins vegar frjálsri aðferð. Aldursflokkar verða tveir, 49 ára og yngri og 50+. Veitt verða verðlaun fyrir þrjú efstu sætin í hvorum flokki.

Kl. 11.00            
Sjómannadagsmessa, sjómaður heiðraður. Blómsveigur lagður að sjómanninum á Akratorgi að lokinni athöfn.

Kl. 11.00
Íslandsmótið í Eldsmíði hefst á Byggðasafninu og stendur fram eftir degi. Eldsmíðahátíð fer fram 2.-5. júní á Byggðasafninu. Allir hjartanlega velkomnir að fylgjast með.

Kl. 13.00-14.00
Dorgveiðikeppni á Sementsbryggjunni.

Kl. 13.30            
Sigling á smábátum

Kl. 13.30-16.30  
Kaffisala í Jónsbúð á vegum Slysavarnafélagsins Líf. Allir hjartanlega velkomnir.

Kl.14.00-16.00  
Björgunarfélag Akraness sér um fjölskylduskemmtun í samstarfi við Akraneskaupstað, Verkalýðsfélag Akraness, HB Granda, Faxaflóahafnir og Runólf Hallfreðsson ehf. við Akraborgarbryggjuna. Á boðstólnum verða m.a.: Fyrirtækjakeppni Gamla Kaupfélagsins, þrautir og leikir fyrir börn, kassaklifur, hoppukastalar, úrval fiska til sýnis, koddaslagur, karahlaup og fleira.  

Kl. 14.00-16.00  
Félagar í Sjósportfélaginu Sigurfara verða á svæðinu með kajaka og fleira .

Kl. 15.00             
Þyrla landhelgisgæslunnar kemur til okkar og sýnir björgun úr sjó.

Kl. 19.00             
Sumargleði Kórs Akraneskirkju í Vinarminni. Fjölbreytt dagskrá í tali og tónum. Sérstakur gestur verður Gísli Gíslason, hafnarstjóri Faxflóahafna. Boðið verður upp á ljúffenga sjávarréttasúpu. Aðgangseyrir kr. 2.500.

Fleiri upplýsingar um Sjómannadaginn 2016 má finna á heimasíðu Akraneskaupstaðar www.akranes.is