• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Fréttir

Fréttir

10
 Aug

Laun starfsmanna Elkem Ísland hækka um 6,5%

Síðastliðinn föstudag gekk formaður félagsins, ásamt aðaltrúnaðarmanni Elkem Ísland frá launahækkun sem gildir fyrir starfsmenn Elkem fyrir árin 2015 og 2016. Forsaga málsins er sú að þann 21. mars 2014 gekk Verkalýðsfélag Akraness frá kjarasamningi við Elkem Ísland og gilti hann frá 1. janúar 2014 til 31. janúar 2017, eða í rétt rúm 3 ár. Í samningnum fólst meðal annars að laun skyldu hækka um rúm 9% á fyrsta ári, en launahækkanir fyrir 2015 og 2016 skyldu taka hlutfallslega mið af launahækkunum sem um semdist á hinum almenna vinnumarkaði.

Á fundi samningsaðila á föstudaginn var tekist á um hver sú hækkun ætti að vera, en vildu fulltrúar SA og forsvarsmenn Elkem meina að hún ætti að vera mun lægri en niðurstaðan náðist um. En samstaða náðist að lokum um niðurstöðuna milli samningsaðila og nú liggur það semsagt fyrir að laun starfsmanna Elkem ísland munu hækka um 6,5% afturvirkt frá 1. janúar síðastliðnum. Rétt er að geta þess að starfsmenn voru búnir að fá 2% sem komu til framkvæmda 1. janúar síðastliðinn þannig að laun starfsmanna munu hækka afturvirkt um 4,5%. Þetta þýðir að starfsmenn munu fá greiðslu vegna afturvirkni sem nemur 150-200 þúsund krónum. Orlofs- og desemberuppbætur munu hækka samtals um kr. 20.856 og munu hvor um sig nema kr. 170.864, eða samtals kr. 341.728.

Síðan mun önnur hækkun koma til framkvæmda 1. janúar 2016 upp á 5,5%. Þessar hækkanir gera það að verkum að kjarasamningur Elkem ísland sem undirritaður var 21. mars 2014 er að gefa yfir 22% í heildina, eða sem nemur að meðaltali 7,6% á ári. Þegar kjarasamningurinn var kynntur fyrir starfsmönnum árið 2014 reiknaði formaður með því að launahækkanir vegna áranna 2015 og 2016 yrðu á bilinu 3,5-4%, en nú hefur komið í ljós að sú hækkun varð töluvert meiri, eða eins og áður sagði 6,5% og 5,5%.

Byrjandataxti verður 242.775 og starfsmaður sem hefur starfað í 10 ár hjá Elkem verður með grunnlaun upp á 285.884. Heildarlaun starfsmanns í efsta þrepi eru komin upp í tæp 500.000 á mánuði, en rétt er að geta þess að á bak við þessi laun er vinnutími upp á 145,6 tíma á mánuði, en ekki 173,33 eins og er á hinum almenna vinnumarkaði.

Fantagóður samningur handa starfsmönnum Spalar í gjaldskýli Hvalfjarðarganga
30
 Jul

Fantagóður samningur handa starfsmönnum Spalar í gjaldskýli Hvalfjarðarganga

Rétt í þessu var Verkalýðsfélag Akraness að kynna fyrir starfsmönnum nýgerðan fyrirtækjasamning sem félagið gerði við Spöl ehf. sem á og rekur Hvalfjarðargöng. Þessi fyrirtækjasamningur nær til starfsmanna sem starfa í gjaldskýlinu við Hvalfjarðargöng. Það er skemmst frá því að segja að það náðist hörkusamningur til handa starfsmönnunum en að meðaltali eru þeir að hækka í launum um tæpar 75.000 kr. á mánuði og gerir sú hækkun að meðaltali um tæp 20%. Samningurinn gildir afturvirkt frá 1. janúar síðastliðnum sem þýðir að starfsmenn munu fá greiðslu vegna afturvirkni sem nemur yfir 500.000 kr.

Verkalýðsfélag Akraness er afar ánægt með þennan samning enda er hann umtalsvert innihaldsríkari heldur en þeir samningar sem gerðir voru á hinum almenna vinnumarkaði þótt í grunninn séu þær viðmiðanir sem þar voru gerðar notaðar. Það er alltaf ánægjulegt þegar góður árangur næst við að bæta kjör okkar félagsmanna og vill félagið þakka forsvarsmönnum Spalar fyrir að hafa tekið þátt í að bæta kjör sinna starfsmanna eins og áður sagði.

22
 Jul

Laun starfsmanna Norðuráls taka hækkun launavísitölu upp á 4,32% frá og með 1. júlí

Eins og fram hefur komið hér á heimasíðunni þá gerði Verkalýðsfélag Akraness tímamótasamning við Norðurál 17. mars síðastliðinn. Tímamótin voru fólgin í því að laun starfsmanna voru launavísitölutryggð en starfsmenn hækkuðu strax um rúm 6% frá og með 1. janúar síðastliðnum ásamt því að fá 300.000 kr. eingreiðslu hver og einn. Næsta hækkun tekur gildi núna frá 1. júlí síðastliðnum og miðast hún við hækkun launavísitölunnar frá desember 2014 til júlí 2015. Nú liggur hækkun launavísitölunnar fyrir og mun hún skila starfsmönnum launahækkun upp á 4,32% sem mun gilda eins og áður sagði frá og með 1. júlí síðastliðnum.

Þetta þýðir að allt hefur gengið upp samkvæmt því sem menn reiknuðu með að samningurinn myndi gefa starfsmönnum á fyrsta árinu en heildarlaunahækkunin nemur um 16% með 300.000 kr. eingreiðslunni sem starfsmenn fengu. Án hennar nemur launahækkunin rúmum 11%. Orlofs- og desemberuppbætur hækka einnig með hækkun launavísitölunnar en þær námu 340.000 kr. samtals en með hækkun launavísitölunnar sem tekur gildi frá og með 1. júlí munu þær fara upp í 354.654 kr. sem er hækkun um 14.654 kr. Þetta þýðir líka að grunnlaun starfsmanns eftir 10 ára starf eru komin uppundir 300.000 kr. á mánuði en heildarlaunin eru tæpar 610.000 kr. með öllu. Næsta hækkun launa starfsmanna Norðuráls mun vera hækkun launavísitölunnar frá júlí 2015 til desember 2015 og taka gildi 1. janúar næstkomandi.   

15
 Jul

Kjarasamningur Samiðnar við SA samþykktur

Rafrænni kosningu um kjarasamning Samiðnar við Samtök atvinnulífsins er nú lokið. Skrifað var undir samningin 22. júní síðastliðinn en eftir honum starfa félagsmenn Iðnsveinadeildar Verkalýðsfélags Akraness. Niðurstöður kosningarinnar eru að 66,67% sögðu já en 33,33% sögðu nei. Samningurinn er því samþykktur og gildir hann frá 1. maí 2015 og til loka árs 2018.

Hægt er að kynna sér samninginn nánar hér.

03
 Jul

Kosning hafin um kjarasamning Samiðnar við SA

Kosning er nú hafin um kjarasamning Samiðnar við Samtök atvinnulífsins sem skrifað var undir 22. júní, en eftir þeim samningi starfa félagsmenn í Iðnsveinadeild Verkalýðsfélags Akraness.

Kosningin er rafræn og voru kjörgögn póstlögð til félagsmanna á kjörskrá fyrr í vikunni og eru því að berast þeim þessa dagana. Til að kjósa skal smella á hnappinn "Rafræn kosning" hér neðarlega til hægri á síðunni og fylgja leiðbeiningum sem fylgja kjörgögnum. Kosning stendur yfir til kl. 12:00 á hádegi 15. júlí.

Verði samningurinn felldur og samningar takast ekki mun koma til verkfalla 6. september. Verði samningarnir hins vegar samþykktir gilda þeir til loka árs 2018. Mikilvægt er að góð þátttaka verði í kosningunni þannig að vilji félagsmanna sé skýr, ekki síst ef niðurstaðan verður sú að félagsmenn telji að sækja eigi meira en kjarasamningarnir gera ráð fyrir. Félagsmenn eru því hvattir til að nýta atkvæðarétt sinn og láta afstöðu sína í ljós.

Hægt er að skoða kjarasamninginn hér.

Laust orlofshús í Hraunborgum frá 5.-10. júlí
01
 Jul

Laust orlofshús í Hraunborgum frá 5.-10. júlí

Orlofshús félagsins í Hraunborgum er laust dagana 5. til 10 júlí. Áhugasamir geta bókað tímabilið á skrifstofu félagsins í síma 4309900 eða á netfangið This email address is being protected from spambots. You need JavaScript enabled to view it. 

25
 Jun

Hækkun menntastyrkja - Landsmennt-Sveitamennt-Ríkismennt

Félagsmenn Verkalýðsfélags Akraness eru duglegir að sækja um styrki sem þeir eiga rétt á, til dæmis vegna náms. Því er vakin athygli á því að nú hafa þrír sjóðir sem Verkalýðsfélag Akraness á aðild að: Landsmennt, Sveitamennt og Ríkismennt, ákveðið að hækka hámark styrkja sinna en hámarkið hefur verið kr. 60.000 á ári síðustu ár.

Landsmennt

Stjórn Landsmenntar hefur samþykkt að hækka hámarksupphæð einstaklingsstyrkja í 70.000 kr. f.o.m. 1. júlí nk. Upphæð styrkja er miðuð við greidd iðgjöld síðustu 12 mánaða en hægt er að fá styrk (þá lægri) eftir 6 mánaða aðild. Styrkur getur þó aldrei orðið hærri en 70.000 kr eða mest 75% kostnaðar. 

Hækkun á geymdum rétti (uppsafnaður réttur) er eftirfarandi:

  • 2015 verður hægt að taka út kr. 190.000.- fyrir eitt samfellt nám/námskeið. Ferðakostnaður vegna náms getur að hámarki orðið kr. 70.000.- (nær til náms sem hefst e.1.júlí 2015)
  • 2016 verður hægt að taka út kr. 200.000.- og 2017 verði upphæðin orðin 210.000.-

Ekki hefur verið gerð breyting á styrkjum til meiraprófs eða til tómstundanámskeiða. Hækkunin nær til þess náms sem hefst eftir 1. júlí 2015.

Sveitamennt

Stjórn Sveitamenntar hefur samþykkt að hækka hámarksupphæð einstaklingsstyrkja í 75.000 kr. f.o.m. 1. júní 2015. Upphæð styrkja er miðuð við greidd iðgjöld síðustu 12 mánaða en hægt er að fá styrk (þá lægri) eftir 6 mánaða aðild. Styrkur getur þó aldrei orðið hærri en 75.000 kr eða mest 75% kostnaðar. Hækkun á geymdum rétti (3ja ára) verður til samræmis við þessa hækkun kr. 225.000.-.

Hækkunin nær til náms/námskeiða sem hefjast eftir 1. júní 2015. Engin breyting er á styrkjum til meiraprófs eða styrkum til tómstundanámskeiða.

Ríkismennt

Stjórn Ríkismenntar hefur samþykkt að hækka hámarksupphæð einstaklingsstyrkja í 75.000 kr. f.o.m. 1. júní 2015. Upphæð styrkja er miðuð við greidd iðgjöld síðustu 12 mánaða en hægt er að fá styrk (þá lægri) eftir 6 mánaða aðild. Styrkur getur þó aldrei orðið hærri en 75.000 kr eða mest 75% kostnaðar. Hækkun á geymdum rétti (3ja ára) verður til samræmis við þessa hækkun kr. 225.000.-

Hækkunin nær til náms/námskeiða sem hefjast eftir 1. júní 2015. Engin breyting er á styrkjum til meiraprófs eða styrkum til tómstundanámskeiða.

24
 Jun

Nýr kjarasamningur við Bændasamtök Íslands vegna starfa í landbúnaði

Starfsgreinasambandið hefur gengið frá nýjum kjarasamningi við Bændasamtök Íslands vegna starfsfólks í landbúnaði. Samningurinn tekur sömu hækkunum og samið var um í almennum kjarasamningi við Samtök atvinnulífsins auk þess sem farið var yfir gildissvið samningsins og er nú talað um að hann taki til starfsfólks í landbúnaði en ekki einungis á lögbýlum. Þá voru upphæðir sem draga má frá launum vegna fæðis og húsnæðis hækkaðar lítillega. Samningurinn gildir frá 1. maí 2015 og út árið 2018 eins og aðrir samningar á almennum vinnumarkaði. 

Nýja kjarasamninginn má lesa með því að smella hér.

Nýja kauptaxta vegna starfa í landbúnaði má skoða með því að smella hér.

24
 Jun

Fundur í samstarfsnefnd Akraneskaupstaðar og VLFA - fatapeningar hækka

Í gær var fundur með samráðsnefnd Akraneskaupstaðar og Verkalýðsfélags Akraness vegna kjarasamnings þessara aðila, en þessi samráðsnefnd hefur það verkefni að koma saman til að taka á þeim ágreiningsefnum sem koma upp milli samningsaðila og leysa úr þeim ef kostur er.

Þrjú mál voru tekin fyrir á þessum fundi, tvö þeirra eru til frekari skoðunar og vonast formaður til þess að þau fái farsæla niðurstöðu. Annað þeirra lýtur að innröðun starfsmanns í launatöflu samkvæmt starfsmati, en það er mat félagsins að viðkomandi starfsmaður sé kolrangt metinn inn miðað við ábyrgð og umfang þess starfs sem viðkomandi aðili innir af hendi. Hitt málið sem enn er ólokið varðar jöfnun réttinda á milli kjarasamninga Starfsmannafélags Reykjavíkur og Verkalýðsfélags Akraness og var sameininlegur skilningur fulltrúa Akraneskaupstaðar að fundin verði farsæl lausn á því máli.

Málið sem var afgreitt í gær laut að framkvæmd kjarasamninga varðandi fatnað starfsmanna, en umtalsverð óánægja hefur verið hjá starfsmönnum með þá framkvæmd sem hefur verið á þessum þætti og þá fjárhæð sem greidd er vegna fatakaupa. Starfsmenn hafa einungis verið að fá kr. 12.000 á ári til fatakaupa, sem dugar á engan hátt að mati starfsmanna. Samþykkt var að hækka þessa upphæð upp í kr. 16.500 á þessu ári og 20.000 á árinu 2016, til að koma örlítið til móts við starfsmenn. Formaður lagði áherslu á að til viðmiðunar verði hafður raunkostnaður við úthlutun fatnaðar samkvæmt ákvæðum kjarasamnings, og taldi formaður félagsins að núverandi fjárhæð endurspegli ekki þann raunkostnað.

Þetta var svo sem ágætis fundur, en mikilvægt er að tekið sé á þeim ágreiningsefnum sem upp koma af einurð og festu og þau séu afgreidd á skömmum tíma, því það er óþolandi og ólíðandi að uppi sé ágreinigur í málum um langa hríð og ekki sé leitast við að finna lausn á þeim. Því ber að fagna því að brugðist var skjótt við þessum atriðum og vonast formaður eftir því að búið verði að afgreiða öll þessi mál í byrjun ágúst.

23
 Jun

Iðnaðarmenn semja, verkfalli afstýrt

Í gærkvöldi undirritaði Samiðn fyrir hönd aðildarfélaga sinna nýjan kjarasamning við Samtök atvinnulífsins sem gildir til loka árs 2018, en Verkalýðsfélag Akraness er eitt af aðildarfélögum Samiðnar.


Almennar launahækkanir eru í takt við samninga sem undirritaðir voru 29. maí sl. og voru samþykktir í gær. Almennar launahækkanir eru metnar á um 16% en þær eru breytilegar vegna launaþróunartryggingar. Gerðar eru breytingar á kauptaxtakerfinu. Byrjunartaxti var færður upp í eins árs taxta, öðrum töxtum hliðrað upp en sjö ára taxti fellur út. Þannig hækka byrjunarlaun um rúm 15% strax, en um 30% á samningstímanum. Með breytingum á kauptaxtakerfinu er verið að færa taxtakerfið nær markaðslaunum en það er gert meðal annars til að draga úr félagslegum undirboðum. Auk þessa voru gerðar ýmsar lagfæringar á gildandi kjarasamningi.


Samningurinn verður kynntur félagsmönnum á næstu dögum. Atkvæðagreiðsla hefst í byrjun næstu viku og lýkur kl. 12:00 miðvikudaginn 15. júlí.

Samninginn má lesa með því að smella hér.

Page 50 of 208

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image