• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Fréttir

Fréttir

14
 Dec

Verkalýðsfélag Akraness skorar á bæjarráð að greiða starfsmönnum Akraneskaupstaðar jólabónus

Rétt í þessu var að ljúka fundi sem formaður félagsins átti með bæjarráði Akraneskaupstaðar. Tilefni fundarsins voru þær sértæku launahækkanir sem sveitarfélögin á höfuðborgarsvæðinu hafa verið að veita sínum starfsmönnum að undanförnu. Þær sértæku aðgerðir hafa fyrst og fremst beinst að þeim tekjulægstu og hafa laun einstaka hópa t.d. skólaliða og starfsmanna og leikskólum, hækkað um 6 - 16 þúsund á mánuði.

Einnig hafa sveitarfélögin á höfuðborgarsvæðinu verið að veita starfsmönnum sínum ýmis hlunnindi eins og líkamsræktarkort og annað slíkt.

Verkalýðsfélag Akraness skoraði á bæjarráð að greiða starfsmönnum Akraneskaupstaðar 30.000 kr. jólabónus líkt og starfsmenn Hafnarfjarðarbæjar fá. Einnig skoraði Verkalýðsfélag á bæjarráð að skoða með jákvæðum hug þær launahækkanir sem beinst hafa að tekjulægstu starfsmönnum sveitarfélaganna á höfuðborgarsvæðinu, enda er það með öllu ólíðandi að laun fyrir sambærileg störf séu lakari á landsbyggðinni en á höfuðborgarsvæðinu. Við slíkt verður ekki unað.

Bæjarráð ætlar að skoða þessi mál og nú er bara að vona að þeir fylgi fordæmi sveitarstjórnarmanna á höfuðborgarsvæðinu og geri vel við sína starfsmenn öllum til heilla.

12
 Dec

Fundað með SA um sérkjarasamninga Verkalýðsfélags Akraness

Í morgun var fundað með Samtökum Atvinnulífsins vegna þeirra sérkjarasamninga sem Verkalýðsfélag Akraness er aðili að, þ.e.a.s. sérkjarasamningur starfsmanna Síldarbræðslunnar og einnig sérkjarasamningur starfsmanna Spalar.

Farið var yfir þær kröfur sem starfsmenn áðurnefndra fyrirtækja hafa lagt fram og viðbrögð fengin frá Samtökum Atvinnulífsins. Það er mat formanns eftir þessa fundi, að töluverð gjá sé á milli samningsaðila og er ljóst að ef takast á að ganga frá nýjum kjarasamningum fyrir áramót þá þurfi nánast kraftaverk til.

Næsti fundur hefur ekki verið ákveðinn, hvorki vegna sérkjarasamnings bræðslumanna né starfsmanna Spalar, en að öllum líkindum verður fundað aftur fyrir jól.

11
 Dec

Formaður boðaður til fundar hjá bæjarráði

Eins fram hefur komið hér á heimasíðunni þá óskaði Verkalýðsfélag Akraness eftir fundi með bæjarráði vegna þeirra sértæku aðgerða í launamálum sem sveitarfélögin á höfuðborgarsvæðinu hafa verið að grípa til á undanförnum dögum og vikum. Formaður hefur verið boðaður til fundar með bæjarráði á föstudaginn nk. kl. 16:30 vegna þessara mála.

Það liggur fyrir að Kópavogur, Hafnarfjörður og Reykjavíkurborg hafa verið að grípa til launahækkana til þeirra sem eru með hvað lægstu launin og nægir þar að nefna störf við umönnun, á leikskólum sem og í grunnskólum.

Það liggur einnig fyrir að Hafnarfjarðarbær hefur hækkað laun leiðbeinenda á leikskólum og skólaliða og nema þær hækkanir frá 6.000 upp í 16.000 krónur á mánuði.

Einnig liggur fyrir að Hafnarfjarðarbær ætlar að láta alla sína starfsmenn fá 30.000 króna jólauppbót, 16.000 kr. styrki til líkamsræktar og hálfsárs sundkort á einungis 1.000 krónur. Í Fréttablaðinu ekki alls fyrir löngu sagði Ellý Erlingsdóttir, forseti bæjarstjórnar Hafnarfjarðar, Hafnafjörð vilja vera til fyrirmyndar í launamálum sinna starfsmanna.

Á þeirri forsendu mun formaður Verkalýðsfélags Akraness spyrja bæjarráð Akraness hvort þeir ætli að fylgja fordæmi sveitarfélaganna á höfuðborgarsvæðinu hvað varðar þær sértæku aðgerðir sem sveitarfélögin hafa veri að grípa til vegna launamála sinna starfsmanna. Formaður er ekki í neinum vafa um að bæjarstjórn Akraness vill vera til fyrirmyndar í þessum málum eins og t.a.m. Hafnarfjarðarbær hefur verið.

Það er með öllu óþolandi að launakjör á höfuðborgarsvæðinu séu með allt öðrum hætti en gengur og gerist fyrir sömu störf á landsbyggðinni. Það er skoðun formanns að slíkt eigi ekki að viðgangast og mun hann beita sér af fullum þunga fyrir því að laun starfsmanna sveitarfélaga á landsbyggðinni verði samræmd launakjörum á höfuðborgarsvæðinu, enda eru allir starfsmenn þessara sveitarfélaga að vinna eftir sama kjarasamningi.

10
 Dec

Jólablað Verkalýðsfélags Akraness komið út

Í dag verður jólablaði Verkalýðsfélags Akraness dreift til allra Akurnesinga og nærsveitunga, sem og í fyrirtæki og stofnanir á svæðinu.

Fréttablaðið er mjög vandað og hefur aldrei verið jafn stórt og í ár, en blaðið er fjórum síðum stærra en vant hefur verið.

Eðli málsins samkvæmt er mest fjallað um komandi kjarasamninga í fréttablaðinu. T.a.m. er haft eftir formanni félagsins að sú kröfugerð sem Starfsgreinasambandið hefur lagt fram vegna komandi kjarasamninga á hinum almenn vinnumarkaði sé hófstillt og hvetur formaður til þess að ekki verði gefinn neinn afsláttur af þeirri kröfugerð sem lögð hefur verið fram til Samtaka atvinnulífsins.

Hægt er að lesa fréttablaðið með því að smella á myndina sem fylgir þessari frétt.

Góð vinnustaðaheimsókn til Norðuráls
09
 Dec

Góð vinnustaðaheimsókn til Norðuráls

Formaður fór í vinnustaðaheimsókn til Norðuráls síðasta föstudag, en stjórn félagsins leggur mikla áherslu á að vera í nánu og góðu sambandi við félagsmenn sína og var þessi vinnustaðaheimsókn einn liður í þeirri vinnu.

Á föstudaginn var það C vaktin sem formaður heimsótti og fór formaðurinn víða um verksmiðjuna og tók tugi starfsmanna tali en heimsóknin stóð í tæpa þrjá tíma.

Þau mál sem brunnu helst á starfsmönnum voru öryggis og launamál og fékk formaður fjölmargar spurningar þessum málum tengdar.  Formaður er ekki í neinum vafa um að öryggismál Norðuráls verða tekin föstum tökum á næstu misserum. Sérstaklega í ljósi þess að öll orka fyrirtækisins á liðnum árum hefur farið í stækkun verksmiðjunnar, nú er þeim kafla hins vegar lokið.  Á þeirri forsendu munu forsvarsmenn Norðurál geta einbeitt sér mun betur að þeim þáttum er lúta að innri kjarastarfsemi fyrirtækisins t.d. öryggismálum.

Fram kom í máli formanns að í næstu kjarasamningum verður gerð skýlaus krafa um að minnka launamuninn  á milli Alcan og Norðuráls enn frekar.  Enda er það með öllu óásættanlegt að það skuli ríkja launamunur á milli verkasmiðja í sömu starfsgrein.

Þessi heimsókn var feikilega vel heppnuð og mun formaður stefna að því að heimsækja allar vaktirnar á næstu vikum.  Í dag starfa um 500 manns hjá Norðuráli og eru um 400 þeirra félagsmenn Verkalýðsfélags Akraness. 

Verkalýðsfélag Akraness styrkir góðgerðarmál á Akranesi
07
 Dec

Verkalýðsfélag Akraness styrkir góðgerðarmál á Akranesi

Í lok árs 2005 gerði stjórn Verkalýðsfélags Akraness mjög góðan samning við Landsbankann á Akranesi um öll bankaviðskipti félagsins. Í einu ákvæði samningsins er kveðið á um að Landsbankinn greiði Verkalýðsfélagi Akraness kr. 500.000 í sérstakan styrktarsjóð sem nota á til að styrkja góðagerðarmál á félagssvæði VLFA.

Þetta er í annað sinn sem stjórn félagsins útdeilir úr styrktarsjóðnum.  Þau félög og samtök sem fá styrki úr sjóðnum í ár eru:

  • Styrktar-og líknarsjóður Akraneskirkju 100.000 kr.
  • Björgunarfélag Akraness unglingastarf 100.000 kr.
  • Mæðrastyrksnefnd Akraness               100.000 kr.
  • Skátafélagið Akranesi unglingastarf     100.000 kr.
  • Sambýlið Akranesi Vesturgötu              50.000 kr.
  • Sambýlið Laugabraut                           50.000 kr
Kynningarfundur með starfsmönnum Íslenska járnblendifélagsins
06
 Dec

Kynningarfundur með starfsmönnum Íslenska járnblendifélagsins

Undanfarna mánuði hefur formaður félagsins verið með kynningarfundi fyrir starfsmenn Íslenska járnblendifélagsins um réttindi og skyldur starfsmanna Íj og í dag voru það starfsmenn á C vakt sem fengu sína kynningu.  Formaður er búinn að halda kynningarfundi með öllum vöktunum og nú á einungis eftir að funda með dagmönnunum.

Þessir kynningafundir hafa heppnast alveg ótrúlega vel og hafa starfsmenn látið mjög vel af þessum fundum og ávalt hafa skapast skemmtilegar umræður um hin ýmsu mál er lúta að starfi starfsmanna Íslenska járnblendifélagsins.

Þessir fundir hafa klárlega skilað árangri og sem dæmi má nefna að á þeim hefur formaður farið ítarlega yfir bónuskerfi starfsmanna sem því miður hefur ekki verið að skila þeim árangri sem samningsaðilar vonuðust til þegar bónuskerfið var sett á.  Það eru þættir í bónuskerfinu sem starfsmenn geta haft áhrif á og hefur formaður farið yfir þá þætti á fundunum sem haldir hafa verið.  Það hefur skilað þeim árangri að bónusinn hefur aldrei mælst jafnhár eins og síðustu tvo mánuði.

Fundað stíft vegna kjarasamnings á hinum almenna vinnumarkaði
05
 Dec

Fundað stíft vegna kjarasamnings á hinum almenna vinnumarkaði

Fundartörnin við Samtök atvinnulífsins vegna kjarasamnings á hinum almenna vinnumarkaði hélt áfram í dag.  Þau málefni kjarasamningsins sem voru til umfjöllunar í dag voru m.a. sérmál fiskvinnslunnar, ræstingin og málefni er lúta þjónustusviði samningsins.  Á morgun verður hins vegar fundað um sérmál er lúta að iðnaðarkafla kjarasamningsins.

Þrátt fyrir nokkuð stíf fundarhöld síðustu daga þá er ekkert byrjað að ræða um launaliði samningsins og ekki er vitað á þessari stundu hvenær þær viðræður muni hefjast.

Í Morgunblaðinu í dag er talað um að efasemdir séu innan verkalýðshreyfingarinnar um að það takist að klára samninga fyrir jól.  Erfitt er að leggja mat á slíkar vangaveltur þar sem samningsaðilar eru ekki farnir að ræða aðalmálið sem er að sjálfsögðu launaliðir kjarasamningsins.  En vonandi næst að ganga frá nýjum kjarasamningi í desember eins og viðræðuáætlun samningsaðila gerir ráð fyrir. 

Eins og fram hefur komið hér á heimasíðunni þá er VLFA með tvo sérkjarasamninga sem eru lausir nú um áramótin, annarsvegar vegna starfsmanna síldarbræðslunnar og hins vegar vegna starfsmanna gjaldskýlisins við Hvalfjarðagöng.  Formaður hefur lagt fram kröfugerð vegna þessara samninga til Samtaka atvinnulífsins og er áformað að funda fljótlega vegna þessara samninga með forsvarsmönnum SA.

04
 Dec

Annríki í Karphúsinu

Fulltrúar SGS, þau Aðalsteinn, Anna, Vilhjálmur og Fjóla ræða við fulltrúa SA , þá Arnar og Jón Rúnar í KarphúsinuFulltrúar SGS, þau Aðalsteinn, Anna, Vilhjálmur og Fjóla ræða við fulltrúa SA , þá Arnar og Jón Rúnar í KarphúsinuFormaður félagsins hefur haft í nógu að snúast í dag. Fyrir hádegi sat hann samningafund vegna sérkjarasamnings fyrir starfsmenn fiskimjölsverksmiðja. Eftir hádegið tók við fundur samninganefndar SGS við SA vegna almennu kjarasamninganna.

Á morgun verður fundað vegna sérmála fiskvinnslunnar og einnig verður farið yfir málefni er lítur að ræstingarkafla kjarasamningsins.

Ljóst er að kjaraviðræður eru komnar á fullt skrið og framundan er gríðarlegt annríki vegna þeirra.

03
 Dec

Lyf & heilsa á Akranesi neitar að taka þátt í verðkönnun

Mikill verðmunur reyndist vera á hæsta og lægsta verði á lausasölulyfjum, þ.e. lyfjum sem seld eru án lyfseðils, í verðkönnun sem verðlagseftirlit ASÍ gerði mánudaginn 26. nóvember sl. Kannað var verð á 24 algengum tegundum lausasölulyfja á höfuðborgarsvæðinu og á Akranesi. Lyfjaver við Suðurlandsbraut var langoftast með lægsta verðið í könnuninni eða á 15 lyfjum af þeim 24 sem skoðuð voru.

Könnunin var gerð í eftirfarandi 10 apótekum: Árbæjarapótek Hraunbæ 102b, Garðsapótek Sogavegi 108, Laugarnesapótek Kirkjuteigi 21, Lyf og heilsa Eiðistorgi Seltjarnarnesi, Lyfja Lágmúla 5, Lyfjaval Þönglabakka 6, Lyfjaver Suðurlandsbraut 22, Rimaapótek Langarima 21, Apótek Vesturlands Akranesi og Lyf & heilsu Akranesi. Könnunin var gerð með þeim hætti að lausasölulyfin voru skönnuð á kassa í viðkomandi apóteki og verðtökufólkið fékk kassastrimil. Ef ekki var mögulegt að fá strimil var verð skráð jafnóðum niður þegar það var skannað á kassa.

Forsvarsmaður Lyf & heilsu á Akranesi hafði samband við ASÍ eftir að könnuninni lauk og fór fram á að verð á lauasölulyfjum úr apótekinu yrði ekki birt miðað við framangreinda aðferðafræði.

Formaður Verkalýðsfélags Akraness harmar þá ákvörðun hjá forsvarsmönnum hjá Lyfju & heilsu að neita að taka þátt í áðurnefndri könnun og það eftir að búið er að taka verðkönnuna.

Það er alveg ljóst að eftir að Apótek Vesturlands kom inná markaðinn hér á Akranesi þá hefur lyfjaverð lækkað umtalsvert neytendum til hagsbóta. Það sést vel á því að Apótek Vesturlands var með lægsta verðið í sex af 24 tilfellum í verðkönnuninni.

Hægt er að skoða niðurstöður verðkönnunarinnar í heild sinni með því að smella hér.

Page 145 of 208

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image