Aðalfundur Verkalýðsfélags Akraness var haldinn í gær þar sem farið var yfir starfsemi félagsins á liðnu ári, ársreikningar afgreiddir og breytingar á lögum félagsins samþykktar.

Á fundinum kom fram að rekstur félagsins var áfram mjög jákvæður á árinu 2025. Samstæðureikningur félagsins sýnir rúmlega 220 milljóna króna hagnað og hefur fjárhagsstaða félagsins sjaldan verið sterkari. Eigið fé félagsins nemur nú tæpum 2,9 milljörðum króna og handbært fé rúmum 2,4 milljörðum króna.

Fjárhagslegur styrkur félagsins endurspeglar traustan rekstur og ábyrga fjármálastjórn um leið og hann skapar mikilvægan grunn fyrir áframhaldandi hagsmunabaráttu, öfluga þjónustu við félagsfólk og sterka stöðu sjóða félagsins til framtíðar.

Á fundinum var jafnframt lögð áhersla á að styrkur Verkalýðsfélags Akraness felist ekki aðeins í sterkri fjárhagsstöðu heldur einnig í öflugu félagsstarfi, virkri þátttöku félagsmanna og öflugri hagsmunagæslu fyrir launafólk á félagssvæðinu. Félagið stendur því sterkt bæði félagslega og fjárhagslega.

Aðalfundurinn samþykkti einnig breytingar á lögum félagsins. Markmið breytinganna er að færa lög félagsins nær nútímanum, skýra einstök ákvæði og tryggja að umgjörð starfseminnar taki mið af þeim breytingum sem orðið hafa á samfélagi, vinnumarkaði og starfsháttum verkalýðshreyfingarinnar á síðustu árum.

Stjórn, trúnaðarmönnum og starfsfólki félagsins voru færðar þakkir fyrir góð störf á liðnu ári, auk þess sem félagsfólki var þakkaður stuðningur þess og þátttaka í starfi félagsins.