Um 50 smábátasjómenn vítt og breitt um landið óskuðu eftir að funda með formanni Verkalýðsfélags Akraness vegna þeirrar staðreyndar að þeir hafa ekki notið þeirra sjálfsögðu mannréttinda að eiga kjarasamning. Það er þyngra en tárum taki að smábátasjómenn skuli ekki hafa í gildi kjarasamning þar sem laun og önnur réttindi eru tryggð eins og nánast allar aðrar starfsstéttir hér á landi búa við.

Að sjálfsögðu varð formaður við þessari beiðni og var haldinn fundur síðastliðinn föstudag á Gamla Kaupfélaginu þar sem eins og áður sagði uppundir 50 manns mættu. Var gríðarlega góð stemmning á meðal fundarmanna en á fundinum óskuðu allflestir sjómennirnir eftir að fá að ganga í Verkalýðsfélag Akraness og óskuðu jafnframt eftir því að félagið myndi gæta að þeirra hagsmunum við gerð nýs kjarasamnings. Það var auðsótt mál að taka við þessum smábátasjómönnum inn í félagið og í framhaldinu var kosin 10 manna samninganefnd sem mun móta kröfugerð sem lögð verður fyrir Landssamband smábátaeigenda fljótlega en nefndin mun funda næstkomandi miðvikudag þar sem farið verður yfir hin ýmsu hagsmunamál er lúta að réttindum smábátasjómanna. Hjá fundarmönnum kom einnig fram að fleiri hefðu í hyggju að skrá sig í Verkalýðsfélag Akraness. Á þeirri forsendu setjum við hér tengil inn á inntökubeiðni (efsta eyðublaðið) í Verkalýðsfélag Akraness.

Í gær var haldinn fundur um lífeyrissjóðsmál er tengjast sjóðnum sem Verkalýðsfélag Akraness er aðili að sem er Festa. En samkvæmt úttektarskýrslunni sem rannsóknarnefndin gerði kemur fram að sjóðurinn hafi tapað tæpum 20 milljörðum eða um 36% af heildareignum sínum.

Gylfi Jónasson, framkvæmdastjóri sjóðsins, gerði grein fyrir úttektarskýrslunni og kom fram í hans máli að hann gerði ýmsar athugasemdir við aðferðafræði nefndarinnar og taldi tapið vera mun minna en fram kæmi í skýrslunni.

Formaður Verkalýðsfélags Akraness sagði að það væri bláköld staðreynd að tap lífeyrissjóðanna í heild hafi numið tæpum 500 milljörðum króna og það væri grátbroslegt að heyra forstjóra og framkvæmdastjóra lífeyrissjóðanna reyna að bera ætíð í bætifláka fyrir slíkt tap. Formaður gagnrýndi lífeyrissjóðskerfið harðlega því aðilar í lífeyrissjóðskerfinu töluðu ætíð um að hér væri besta lífeyrissjóðskerfið í heimi og spurði formaður í því samhengi hvernig stæði á því að lífeyrissjóðskerfið vantaði 700 milljarða króna til að geta staðið við sínar skuldbindingar samkvæmt ársreikningum 2010. Að eiga rúma 2000 milljarða en vanta 700 milljarða til að geta staðið við sínar skuldbindingar getur vart verið túlkað sem besta kerfi í heimi. Það liggur fyrir að neikvæð tryggingafræðileg staða lífeyirssjóðsins Festu nemi uppundir 10 milljörðum króna og hjá öllum lífeyrissjóðum innan ASÍ vantar uppundir 120 milljarða til að hægt sé að standa við sínar skuldbindingar.

Það kemur fram í rannsóknarskýrslunni að raunávöxtun lífeyrissjóðsins Festu síðustu 10 ár hafi einungis verið 0,1%. Formaður sagði á fundinum að framkvæmdastjóri sem stjórnaði lífeyrissjóði sem hefði tapað 20 milljörðum króna eða sem nemur 36% af heildareignum sjóðsins ætti skýlaust að segja af sér. En formaður ítrekaði það að það ætti alls ekki bara við framkvæmdastjóra Festu heldur alla aðra framkvæmdastjóra sem hefðu tapað stjarnfræðilegum upphæðum að undanförnu. Það kom einnig fram á fundinum að hugsanlega hefðu verið framin lögbrot er varða verðbréfaviðskipti og er lúta að innherjaupplýsingum. En eins og fram kemur í úttektarskýrslunni (sjá bls. 97) þá liggur fyrir að einn stjórnarmaður sat bæði í Sparisjóði Keflavíkur og einnig sem stjórnarmaður í lífeyrissjóði Festu. En lífeyrissjóðurinn Festa tapaði tæpum 2 milljörðum vegna Sparisjóðs Keflavíkur. Um þennan þátt er ítarlega fjallað í úttektarskýrslunni og ýjað sterklega að því að þarna hafi lög er lúta að innherjaupplýsingum verið brotin. Það kom fram hjá fundarmönnum að þetta mál þarf svo sannarlega að skoða nánar enda liggur fyrir að lífeyrissjóðurinn Festa fjárfesti í stofnfjárbréfum í Sparisjóði Keflavíkur fyrir tæpar 800 milljónir á árinu 2007 og það er því ólíðandi að hugsanlega hafi lög verið brotin hvað varðar verðbréfaviðskipti sem tengjast bæði Sparisjóði Keflavíkur og lífeyrissjóðnum Festu.

Það er óhætt að segja að sorgartíðindi hafi borist þegar tilkynnt var í dag að 4-5 starfsmönnum hjá Elkem Ísland hafi verið sagt upp störfum sökum þess að verið er að hætta með framleiðsluna á FSM í verksmiðjunni, en þessi framleiðsla hefur nú verið flutt til Noregs. Á síðustu 6 mánuðum hafa hvorki fleiri né færri en 17 manns misst vinnuna hjá Elkem Ísland á Grundartanga, sem verða að teljast skelfileg tíðindi vegns þess atvinnuástands sem nú ríkir á íslenskum vinnumarkaði.

Það er þyngra en tárum taki þegar fjölskyldumenn missa vinnuna við þær aðstæður sem nú ríkja eins og áður sagði, því ekki er um auðugan garð að gresja hvað atvinnu varðar um þessar mundir.

Í ljósi þessara staðreynda að hér hafa 17 manns misst vinnuna á síðustu 6 mánuðum þá hafa starfsmenn haft samband við Verkalýðsfélag Akraness og kvartað sáran yfir því að verktakar séu látnir vinna störf sem tilheyra svokallaðri kjarnastarfsemi innan fyrirtækisins. Félagið hefur margoft gert athugasemdir við þessa starfsemi verktakanna enda telur félagið að þeir séu að ganga í störf sem tilheyra svokallaðri kjarastarfsemi.

Það er ljóst að á þessu máli verður tekið núna og á það látið reyna, því það er grundvallaratriði á milli samningsaðila að báðir virði gildandi samninga. Mun félagið því verða við þeirri þungu undiröldu starfsmanna að fara í málið af fullum þunga og leita lausna hvað þetta varðar.

Jaðarsbakkalaug á AkranesiFundur Verkalýðsfélags Akraness með fulltrúum Akraneskaupstaðar vegna starfsmatsniðurstaðna fyrir sundlaugarverði II með vakstjórn var haldinn í morgun. Á fundinum var tilkynnt að þeir sem gegna áðurnefndum störfum skulu hækka vegna starfsmats sem fram fór árið 2007 úr 329 stigum í 364 stig sem þýðir að viðkomandi starfsmenn færast úr launaflokki 121 í launaflokk 125 eða sem nemur fjórum launaflokkum.

Stéttarfélögin sem eiga aðild að kjarasamningi við Akraneskaupstað skiluðu inn á sínum tíma athugasemdum vegna áðurnefndra starfa en einhverra hluta vegna láðist Launanefnd sveitafélaga eða Akraneskaupstað að afgreiða þessi starfsmöt og á þeirri forsendu eru þeir starfsmenn sem um ræðir að fá leiðréttingu allt til ársins 2006. Leiðréttingin nemur um það bil frá 800 þúsund krónum og til allt að 1200 þúsund krónum hjá þeim starfsmönnum sem gegnt hafa þessum störfum.

Það var afar ánægjulegt að þessi niðurstaða skuli hafa fengist enda er um umtalsverða kjarabót að ræða fyrir vaktstjóra í sundlaugunum en um er að ræða fimm einstaklinga. Endurgreiðslan mun að öllum líkindum eiga sér stað um þarnæstu mánaðarmót þegar endanlegur útreikningur á leiðréttingunni hefur átt sér stað hjá launadeild Akraneskaupstaðar.