Fyrir helgi barst félaginu greiðsla frá Ábyrgðasjóði launa vegna gjaldþrots TH ehf., en VLFA hafði lagt fram innheimtukröfu vegna 10 félagsmanna sinna sem áttu inni laun og orlof þegar fyrirtækið varð gjaldþrota í desember sl. Allar kröfurnar voru samþykktar af skiptastjóra og Ábyrgðasjóði launa og nam upphæðin 8,8 milljónum króna. Það var afar ánægjulegt að geta komið þessum fjármunum í réttar hendur fyrir verslunarmannahelgina.

Ferlið sem innheimtumál fara í þegar um gjaldþrot er að ræða er nokkuð langt, en það getur tekið upp undir ár að fá slíkar kröfur greiddar úr Ábyrgðasjóði launa. Í málum sem þessum sannast það enn á ný hversu mikilvægt það er að vera í sterku stéttarfélagi, því það er skrifstofa félagsins ásamt lögfræðingi þess sem sér um kröfugerðina, innheimtu og eftirfylgni fyrir hönd sinna félagsmanna, án þess að nokkur kostnaður falli á þá félagsmenn sem um ræðir.