• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Fréttir

Fréttir

05
 Dec

Frumvarp um starfsmannaleigur alls ekki nógu gott að mati Verkalýðsfélags Akraness

Verkalýðsfélag Akraness skilaði inn til félagsmálanefndar Alþingis tillögum um breytingar á lögum um starfsmannaleigur.  Verkalýðsfélag Akraness er undrandi á að Alþýðusamband Íslands skuli ekki vera tilbúið að beita sér fyrir nauðsynlegum breytingum á frumvarpinu.

Það er mat Verkalýðsfélags Akraness að þessar breytingatillögur verði að koma inní frumvarpið til að það nái þeim tilgangi sem til frumvarpsins er ætlast.

Það er t.b með ólíkindum að það eigi að festa það í lög (gr. 16 í frumvarpinu lög nr.54/2001) að kjarasamningar á íslenskum vinnumarkaði gildi ekki að fullu fyrir starfsmenn sem starfa hér tímabundið á vegum erlendra fyrirtækja. (þjónustusamningum) Vantar þar töluvert uppá að þeim erlendu starfsmönnum sem munu starfa eftir lögum nr. 54/2001 séu tryggð lágmarkskjör.

Einnig vill félagið benda á að hendur stéttarfélaga eru algerlega bundnar hvað varðar eftirlit með kjörum þeirra sem koma á vegum starfsmannaleiga samkvæmt frumvarpinu. Það verður að veita stéttarfélögunum einhverja heimild til eftirlits með starfskjörum þessara starfsmanna sem koma á vegum starfsmannaleiga og þá í fullri samvinnu við Vinnumálastofnun.

Verkalýðsfélag Akraness hefur þó nokkra reynslu hvað varðar erlent vinnuafl og þeim vandamálum sem því hefur fylgt. Stéttarfélagið er ekki í neinum vafa að frumvarpið eins og það er nú, er alls ekki til þess fallið að leysa þann vanda sem stéttarfélögin hafa verið að glíma við á undanförnum mánuðum, því miður vantar meira til.

Breytingartillögur og greinargerð  Verkalýðsfélags Akraness við frumvarp til laga um starfsmannaleigur eru eftirfarandi:

1.       Á eftir 9.gr. frumvarpsins komi ný grein, 10. gr. ásamt fyrirsögn, svohljóðandi, og breytast greinatölur annarra greina samkvæmt því.

 

10.gr.

Ábyrgð og skyldur notendafyrirtækis.

 

Starfsmannaleiga skal afhenda notendafyrirtæki ráðningarsamninga þeirra starfsmanna sem leigðir eru. Er notendafyrirtæki óheimilt að nýta sér þjónustu viðkomandi starfsmanna nema ljóst sé af ráðningarsamningi að starfskjör séu í samræmi við kjarasamninga og íslenska löggjöf. Notendafyrirtæki getur leitað umsagnar viðkomandi stéttarfélags.

 

 

2.       Við 10.gr. er verður 11.gr.

    a.      Í upphafi greinarinnar bætist ný málsgrein svohljóðandi:

 

Stéttarfélag getur krafið notendafyrirtæki á félagssvæði sínu um ráðningarsamninga þeirra starfsmanna starfsmannaleiga sem þar starfa sem og önnur þau gögn sem notendafyrirtæki hefur undir höndum um vinnu starfsmanna svo sem tímaskýrslur. Ef stéttarfélag telur að brotið hafi verið gegn ákvæðum laganna ber því að senda Vinnumálastofnun rökstudda kvörtun.

 

                 b.      Í lok greinarinnar bætist við ný setning svohljóðandi:

Sama gildir um starfsmenn stéttarfélaga

 

3.          Við 16.gr. er verður 17.gr.  Liður a.i. orðist svo:

 

    1. Eftirfarandi breytingar verða á 3.gr. laganna:

i.               1.tölul. 1.mgr. hljóði þannig:

             Lög nr. 55/1980  um starfskjör launafólks og skyldutryggingu

             lífeyrisréttinda 1.gr., 6.gr. og 7.gr.

 

 

Athugasemdir við einstaka greinar breytingatillagna.

 

                                                            Um lið 1.

Telja verður eðlilegt að gera þá kröfu til notendafyrirtækja að þau hafi undir höndum ráðningarsamninga og ábyrgist að kjör starfsmanna séu í samræmi við íslensk lög og kjarasamninga. Er lagt til að fyrirtækin geti leitað umsagnar viðkomandi stéttarfélags hvort svo sé.  Notendafyrirtækin hafa hingað til getað skýlt sér bak við ábyrgð starfsmannaleigunnar og hefur það að mati verkalýðshreyfingarinnar torveldað allar aðgerðir til að tryggja starfsmönnum starfsmannaleiga lögbundin starfskjör. Ætla verður einnig að notendafyrirtækin hafa  mun betri þekkingu á kjarasamningum og íslenskri löggjöf en starfsmannaleigur.  Má ætla að ábyrgð notendafyrirtækja skapi meiri festu í þessum málum og tilraunum til að komast hjá lögboðnum launagreiðslum fækki. Þessi ábyrgð ætti ekki að íþyngja notendafyrirtækjum og geta þau falið stéttarfélögum málið með því að leita umsagnar þeirra.   Samkomulag aðila vinnumarkaðarins um samráðsnefnd til að fjalla um málefni útlendinga nær almennt ekki til starfsmannaleiga þar sem þær eru í fæstum tilvikum aðilar að samtökum atvinnulífsins. Á grundvelli framangreindrar ábyrgðar notendafyrirtækis getur nefndin hins vegar kallað eftir gögnum frá þeim, m.a. ráðningarsamningi.

                                                            Um lið 2.

Telja verður að stéttarfélög á starfssvæði notendafyrirtækis sé hæfast til að hafa  eftirlit með því hvort brotið sé gegn ákvæðum laganna. Þekking þeirra á kjarasamningum, nálægð og samneyti almennra félagsmanna við starfsmenn starfsmannaleiganna auðveldar þetta eftirlit. Er eðlilegt að félögin geti kallað eftir ráðningarsamningum hjá notendafyrirtækjunum sem og önnur gögn sem fyrirtækin eru með um vinnu þessara starfsmanna, svo sem tímaskýrslur. Þessi eftirlitsheimild stéttarfélaga ætti að tryggja að mál komi fyrr til athugunar hjá Vinnumálastofnun og kvartanir samkvæmt 9.gr. verði færri og rökstuðningur betri. Má ætla að þetta fyrirkomulag leiði til minna álags á Vinnumálastofnun vegna þessara mála en ella.

                                                            Um lið 3.

Í frumvarpi til laga um útsenda starfsmenn sem síðar varð að lögum nr.54/2001 um réttarstöðu starfsmanna sem starfa tímabundið á Íslandi á vegum erlendra fyrirtækja kemur fram að frumvarpið er sett fram til að innleiða ákvæði tilskipunar Evrópusambandsins nr. 96/71EB um störf útsendra starfsmanna í tengslum við veitingu þjónustu.  Kemur fram í frumvarpinu að lög bandalagsins útiloki ekki einstök aðildarríki frá því að beita löggjöf sinni eða kjarasamningum gagnvart hverjum þeim sem ráðinn er til starfa á yfirráðasvæði þeirra þótt vinnuveitandinn hafi staðfestu í öðru aðildarríki, jafnvel þótt ráðningin sé tímabundinn.   ( þetta kemur fram í tl. 10 og 19 í inngangi tilskipunarinnar.)    Er talið eðlilegt að erlendum starfsmönnum séu tryggð sömu lágmarksréttindi og íslenskt starfsfólk nýtur á grundvelli kjarasamninga og löggjafar.

Með því er einnig tryggt að notkun á þjónustu starfsmannaleiga skekki síður samkeppnisstöðuna á íslenskum vinnumarkaði. 

 

Fh.  Verkalýðsfélags Akraness

 

_____________________________________
Vilhjálmur Birgisson, formaður

05
 Dec

Fyrirtækið Geca tekið til gjaldþrotaskipta !

Óskað hefur verið eftir að fyrirtækið Geca ehf verði tekið til gjaldþrotaskipta.  Það eru 6 félagsmenn VLFA sem starfa hjá Geca og hafa þeir verið í nánu sambandi við stéttarfélagið á undanförnum dögum vegna þessa.  Starfsmennirnir fengu ekki greidd laun nú um mánaðarmótin vegna þeirra fjárhagsvandræða sem fyrirtækið er komið í.  Verkalýðsfélag Akraness mun gæta að hagsmunum starfsmannanna eins og kostur er og mun félagið tb. sjá um að gera launakröfu fyrir alla starfsmennina sem send verður til skiptastjóra.  Verkalýðsfélag Akraness er að skoða með hvaða hætti félagið getur létt undir með þeim félagsmönnum sem störfuðu hjá Geca.  Það er jú skelfilegt fyrir starfsmennina að lenda í því að fá ekki laun sín greidd og það í sjálfum jólamánuðnum.  Það munu líða 6 til 8 mánuðir þar til ábyrgðasjóður launa greiðir starfsmönnum þau vangreiddu laun sem þeir eiga inni hjá fyrirtækinu.  Eins og áður sagði þá mun stéttarfélagið leita allra leiða til að aðstoða okkar félagsmenn.  Til þess eru jú stéttarfélögin. 

01
 Dec

Bæjarstjórinn boðaði til fundar vegna erlends vinnuafls á Akranesi

Verkalýðsfélag Akraness  fagnar innilega að bæjaryfirvöld á Akranesi vilji leggja sitt af mörkum til þess að leikreglur á vinnumarkaði séu virtar við þátttöku erlendra starfsmanna á Akranesi og hefur verið komið á fót formlegum samstarfsvettvangi til þess að auðvelda samstarf þeirra félaga og stofnana sem vinna að málum.

 

 

Í morgun var haldinn fundur um málefni erlends vinnuafls á Akranesi.  Það voru bæjaryfirvöld á Akranesi sem stóðu fyrir fundinum.  Til fundarins voru boðaðir  Ólafur Þ. Hauksson sýslumaður á Akranesi, Vilhjálmur Birgisson formaður Verkalýðsfélags Akraness, Stefán Skjaldarson skattstjóri Vesturlandsumdæmis og Tryggvi Bjarnason lögfræðingur Skattstofu Vesturlandsumdæmis Í bókun fundarins segir að aðilar séu sammála um að hafa með sér samstarf og miðla upplýsingum um málið.

Guðmundur Páll Jónsson bæjarstjóri segir að boðað hafi verið til fundarins vegna þeirra umræðu sem átt hefur sér stað að undanförnu um erlenda starfsmenn hér á landi þar á meðal á Akranesi. Hann segir engan vafa á því í sínum huga að ekki hafi verið farið að settum reglum. Því hafi þótt nauðsynlegt að koma á fót samstarfsvettvangi um þessi mál.  Ákveðið hefur verið að funda aftur í næstu viku.  Bæjarstjórinn sagði í viðtali

við skessuhorn í dag  hvers vegna bæjarfélagið hafi ákveðið að koma að málinu segir hann mikla hagsmuni í húfi fyrir bæjarfélagið.  Einnig sagði Bæjarstjórinn það mjög mikilvægt að staðið sé skil á útsvari vegna þeirra erlendu starfsmanna er hér starfa. Einnig er mjög mikilvægt að sveitarfélagið tryggi að jafnræði sé meðal þegnanna. Ef einstök fyrirtæki komast upp með að brjóta lög og reglur grefur það undan þeim fyrirtækjum hér um slóðir sem standa löglega að hlutum. Slíkt megum við ekki og getum ekki fallist á. Því var mjög ánægjulegt að undirtektir við að koma þessum samstarfsvettvangi á voru góðar. Þannig getum við auðveldað starf þeirra er að þessum málum koma.  Sagði Guðmundur Páll Jónsson að lokum í viðtali við Skessuhornið í dag.
30
 Nov

Verkalýðsfélag Akraness mun leggja fyrir félagsmálanefnd Alþingis tillögur um breytingar á lögum um starfsmannaleigur

Formaður Verkalýðsfélags Akraness var boðaður á fund félagsmálanefndar Alþingis í morgun.  Vildu nefndarþingmenn fá álit og afstöðu stéttarfélagsins til nýs frumvarps um starfsmannaleigur.  Formaður gerði félagsmálanefnd grein fyrir þeim málum sem félagið hefur verið að vinna að undanförnu og lítur að brotum á erlendu vinnuafli.  Einnig gerði formaður félagsins félagsmálanefnd Alþingis grein fyrir þeim atriðum í frumvarpinu sem Verkalýðsfélag Akraness er ósátt við.  Það eru aðallega þrjú atriði sem félagið myndi vilja sjá breytingu á.  Mun Verkalýðsfélag Akraness skila inn til félagsmálanefndar fyrir laugardag tillögum um breytingar á lögum um starfsmannaleigur.  Þau atriði í frumvarpinu sem félagið vill sjá breytingar á eru eftirfarandi:

  1. Starfskjör. Verkalýðsfélag Akraness vill sjá breytingu á lögum nr. 54/2001 Um starfskjör 3.gr. í 1. tölulið. 1. mgr. komi:  Kjarasamningar á íslenskum vinnumarkaði gildi fyrir starfsmenn sem starfa tímabundið á Íslandi á vegum erlendra fyrirtækja.  Í frumvarpinu sem nú liggur fyrir er þetta ekki tryggt að öllu leiti og vantar þar töluvert upp á.
  2. Eftirlit.  Verkalýðsfélag Akraness vill sjá breytingu á 9.gr og 10. gr sem hefur með eftirlit með lögum um starfsmannaleigur sé framfyllt.  Í frumvarpinu er talað um að eftirlitið sem alfarið hjá Vinnumálastofnun og að Vinnumálastofnun sé óheimilt að láta öðrum í té upplýsingar.  Verkalýðsfélag Akraness telur að öruggasta leiðin til að tryggja að löggjöf er varðar starfskjör launafólks verði farmfylgt sé að fela stéttarfélögunum hlutdeild í nauðsynlegu eftirliti.  Verkalýðsfélag Akraness sér alls ekki hvernig Vinnumálastofnun getur sinnt þessu eftirlitshlutverki svo vel sé, þar sem sérþekking á kjarasamningum og kjörum liggur hjá stéttarfélögunum. 
  3. Ábyrgð notendafyrirtækis.  Verkalýðsfélag Akraness telur að  eðlilegt að setja þá kröfu á notendafyrirtækin að þau hafi undir höndum ráðningasamninga starfsmanna sem koma frá starfsmannaleigum og einnig að notendafyrirtækin ábyrgist að kjör starfsmanna séu í samræmi við íslenska löggjöf og íslenska kjarasamninga. 
29
 Nov

Verkalýðsfélag Akraness lýsir furðu sinni á ummælum Hjörleifs Jónssonar í fréttablaðinu á sunnudaginn sl.

Á forsíðu fréttablaðsins á sunnudaginn sl. var vitnað í eiganda fyrirtækisins sem sætir rannsókn lögreglu vegna gruns um að vera með ólöglegt vinnuafl að störfum og einnig gruns um að greiða laun langt undir gildandi kjarasamningum.  Verklýðsfélag Akraness lýsir furðu sinni á ummælum eiganda fyrirtækisins í blaðinu á sunnudaginn sl.  En þar segir Hjörleifur Jónsson að afskipti yfirvalda og Verkalýðsfélags Akraness vegna þeirra erlendu starfsmanna sem hjá honum starfa sé með öllu óviðunandi.  Einnig segir Hjörleifur að ekkert muni koma útúr þessari rannsókn því ekkert sé óeðlilegt við kjör sinna starfsmanna.  Verkalýðsfélagi Akraness er vart hlátur í huga yfir þessum ummælum, en vill benda á að stéttarfélagið hefur gögn og upplýsingar undir höndum sem staðfestir að fyrirtæki Hjörleifs Jónssonar er ekki að greiða þau laun sem ráðningarsamningar Litháana kveða á um.  Gögn sýna tb. að einum Litháanum sem starfar hjá Hjörleifi Jónssyni vantar allt að 300 þúsund krónur í laun fyrir einn mánuð miðað við vinnustundafjölda í umræddum mánuði.  Ef Hjörleifur Jónsson telur að hann hafi ekkert að fela í ljósi þessara staðreynda, að það vanti tb. uppá laun eins starfsmannsins sem nemur tæpum 300 þúsund krónum á einum mánuði, þá hvað.   Málið er enn í rannsókn hjá lögreglunni á Akranesi og hefur lögreglan fengið gögn frá Verkalýðsfélagi Akraness sem sýnir og staðfestir að töluvert vantar uppá að Litháunum sé greidd laun eftir þeim ráðningarsamningum sem atvinnuleyfi mannanna voru veitt út á á sínum tíma.     Í ljósi alls þessa eru ummæli Hjörleifs Jónssonar í fréttablaðinu á sunndaginn afar undarleg svo ekki sé fastar að orði kveðið.  Þeir atvinnurekendur sem ekki fara eftir þeim leikreglum sem gilda á íslenskum vinnumarkaði eiga að hafa vit á því að skammast sín.   Verkalýðsfélag Akraness mun gera ítarlega grein fyrir þessu máli hér heimasíðunni á fimmtudaginn nk.

26
 Nov

Formaður félagsins fundaði með Litháunum sem starfa hjá fyrirtækinu sem sætir rannsókn lögreglu

Formaður Verkalýðfélags Akraness fundaði með erlendu starfsmönnunum sem starfa hjá fyrirtækinu sem sætir rannsókn lögreglu vegna gruns um brot á atvinnuréttindum útlendinga.  Fundurinn var á fimmtudaginn sl,   túlkur kom formanni félagsins til aðstoðar en erlendu starfsmennirnir koma allir frá Litháen.  Verklýðsfélag Akraness óskaði eftir því við lögregluna á Akranesi að hún rannsakaði hvort allir starfsmennirnir væru með tilskilin leyfi til að starfa hér á landi, en félagið hafði vísbendingar um að nokkrir væru ekki með atvinnuleyfi.   Einnig hafði félagið mjög svo sterkar grunsemdir um að ekki væri verið að greiða starfsmönnum laun samkvæmt þeim ráðningarsamningum sem lagðir voru fram með umsóknum um atvinnuleyfi fyrir  starfsmennina.  Fundurinn með erlendu starfsmönnum var afar gagnlegur og er félagið að vinna úrúr þeim upplýsingum sem fram komu á fundinum.  Fram kom í máli starfsmannanna að þeir hafa tb. ekki séð launaseðil frá því þeir hófu störf hér á landi, en sumir erlendu starfsmannanna hafa starfað hér í þó nokkur ár.    Einnig kom fram hjá hjá Litháunum að mjög mikil vinna hafi verið síðustu þrjá til fjóra mánuði og hefur komið fyrir að nokkrir starfsmenn hafi unnið yfir 300 vinnustundir á mánuði.  Verkalýðsfélag Akraness telur að miðað við þau gögn og þær upplýsingar sem liggja fyrir sýni  klárlega að  töluvert vanti upp á að Litháunum sé greidd laun eins og ráðningarsamningur mannanna kveði á um.  Jafnvel sem nemur tvö til þrjú hundruð þúsund krónur á einum mánuði hjá einstaka starfsmanni.  Eitt er víst að Verkalýðsfélag Akraness mun fylgja þessu máli eftir af fullum þunga.  Væntanlega munu mál Litháana skýrast endanlega í næstu viku. 

23
 Nov

Verkalýðsfélag Akraness mótmælir harðlega fyrirhugaðri skerðingu á starfsemi lögreglunar á Akranesi

Stjórn Verklaýðsfélags Akraness hefur sent frá sér eftirfarandi ályktun vegna fyrirhugaðar skerðingar á löggæslu á Akranesi.

Ályktun

Akranesi 23. nóvember 2005

 

Stjórn Verkalýðsfélags Akraness mótmælir harðlega fyrirhugaðri skerðingu á starfsemi lögreglunnar á Akranesi. Telur stjórnin varhugavert með hliðsjón af stærð bæjarfélagsins að flytja rannsókn mála í annað umdæmi.  

Samskipti félagsins við lögregluyfirvöld í Borgarnesi vegna atvika á starfssvæði félagsins á Grundartanga styrkja þessa skoðun. 

Telur stjórn félagsins mun eðlilegra að starfsemi lögreglunnar á Akranesi verði efld og umdæmi hennar stækkað og látið m.a. ná til Grundartanga, en mikill meiri hluti þeirra sem þar starfa búa á Akranesi.

Það er mat stjórnar félagsins að tillögur um skerðingu á löggæslu á Akranesi sé mjög svo óeðlilegt.  Sé tekið mið af því að í næsta nágreni við umdæmi lögreglunar á Akranesi er mesta umferðarsvæði landsins bæði á sjó og landi.  Einnig hefur á síðustu árum orðið gríðarleg aukin á allri starfsemi á stóriðjusvæðinu á Grundartanga.

Stjórn Verkalýðsfélag Akraness skorar á dómsmálaráðherra sem og þingmenn Norðurvesturkjördæmis að tryggja að fyrirhuguð skerðing á löggæslumálum Akurnesinga verði ekki að veruleika. 

Einnig skorar stjórn Verkalýðsfélag Akraness á dómsmálaráðherra og þingmenn Norðurvesturkjördæmis að beita sér fyrir því að lögreglan á Akranesi verði efld til muna og umdæmi hennar stækkað.

F.h stjórnar, Verkalýðsfélags Akraness

______________________________________

Vilhjálmur Birgisson, formaður

22
 Nov

Lögreglan á Akranesi hefur kallað eftir launaseðlum og vinnustundafjölda erlendu starfmannanna !

Rannsókninni á fyrirtækinu hér á Akranesi sem er með erlenda starfsmenn frá Litháen miðar vel áfram.  Verkalýðsfélag Akraness hafði mjög svo rökstuddan grun um að hluti starfsmannanna væru ekki með atvinnuleyfi til að starfa hér á landi.  Í rannsókninni í gær og í dag var sá grunur staðfestur. Það eru að minnsta kosti tveir Litháana sem ekki voru með tilskilin leyfi til að starfa hér á landi .  Einnig hefur Verkalýðsfélag Akraness sterkar vísbendingar um að erlendu starfsmönnunum séu ekki  greidd þau laun sem kveðið er á um í ráðningarsamningum sem atvinnuleyfin voru veitt út á, og vantar þar verulega upp á.  Er þessi þáttur málsins nú í rannsókn hjá lögreglunni og hefur lögreglan verið að afla sér gagna eins og launaseðla og tímaskriftir starfsmannanna.  Einnig hafa erlendu starfsmennirnir sem ekki voru með atvinnuleyfi verið teknir í skýrslutöku og kom túlkur frá Reykjavík til að aðstoða lögregluna við þá vinnu.  Verkalýðsfélag Akraness mun greina mjög ítarlega frá niðurstöðu rannsóknarinnar um leið og henni lýkur.  Það er stefna stjórnar Verkalýðsfélags Akraness að taka mál af þessum toga af fullri hörku og það mun félagið gera.  Því allur íslenskur vinnumarkaður er í húfi.  Enn og aftur vill Verkalýðsfélag Akraness hrósa sýslumanninum á Akranesi sem og lögreglunni fyrir að taka jafn vel á málinu og raunin er.  Það mættu fleiri sýslumenn þessa lands taka þessi vinnubrögð sýslumannsins á Akranesi sér til fyrirmyndar.   Vegna þess að stéttarfélögin verða að fá aðstoð frá lögreglunni við að koma í veg fyrir að einstaka atvinnurekendur komist upp með svíkja og pretta erlent vinnuafl.  Þessi svik og undirboð á erlendu vinnuafli  grafa undan þeim kjörum sem íslensk verkafólk hefur áunnið sér inn á liðnum áratugum og einnig því velferðarkerfi sem við höfum komið okkur upp.  Þeim atvinnurekendum sem ógna íslenskum vinnumarkaði með þessum hætti á að draga fyrir dómstóla og láta þá klárlega svara til saka. 

21
 Nov

Víðtæk rannsókn hófst í morgun á fyrirtæki á Akranesi sem er með erlenda starfsmenn í vinnu !

Verkalýðsfélag Akraness óskaði eftir því við lögregluna á Akranesi að hefja rannsókn á fyrirtæki sem hefur erlenda starfsmenn í sinni þjónustu.  Erlendu starfsmennirnir sem umræðir koma frá Litháen og hafa starfað hér um all langt skeið.  Stéttarfélagið hefur rökstuddan grun um að hluti starfsmannanna séu að starfa hér án atvinnuleyfa og einnig hefur félagið grundsemdir um að starfsmönnunum sé greidd laun langt undir þeim ráðningarsamningum sem atvinnuleyfin voru veitt út á.  Víðtæk rannsókn lögreglunar á Akranesi hófst í morgun og mun halda áfram strax í fyrramálið.  Verkalýðsfélag Akraness getur ekki tjáð sig ítarlega um málið að svo stöddu  þar sem rannsóknin er á frumstigi, en margt bendir til að málefni þessa fyrirtækis séu langt í frá að vera í lagi.  Verkalýðsfélag Akraness getur ekki annað en hrósað lögreglunni á Akranesi fyrir skjót viðbrögð í þessu máli. 

Málefni allra pólsku starfsmannanna sem starfa á félagsvæði Verkalýðsfélags Akraness og komu í gegnum starfsmannaleigunnar 2b hafa verið leyst !
19
 Nov

Málefni allra pólsku starfsmannanna sem starfa á félagsvæði Verkalýðsfélags Akraness og komu í gegnum starfsmannaleigunnar 2b hafa verið leyst !

Fagsmíði ehf. hefur sótt um atvinnuleyfi fyrir tvo pólverja sem eru í starfi hjá fyrirtækinu, en þeir komu hingað í gegnum starfsmannaleiguna 2b.  Þessi leið sem Fagsmíði fer nú er sú sama og Ístak gerði fyrir um tveimur vikum gagnvart þeim pólverjum sem starfa hjá fyrirtækinu.  Nú hefur öllum þeim pólverjum sem hingað komu til starfa á vegum starfsmannleigunnar 2b og starfa á félagssvæði Verkalýðsfélags Akraness verið komið í beint ráðningarsamband við þau fyrirtæki sem pólverjarnir starfa hjá.  Verkalýðsfélag Akraness fagnar að tekist hafi að leysa málefni pólsku starfsmannanna með þessum hætti.  Verkalýðsfélag Akraness er nú með til skoðunar enn eitt fyrirtækið sem er með erlenda starfsmenn að störfum en margt bendir til að ekki sé allt með felldu hvað varðar atvinnuleyfi og launakjör þeirra starfsmanna. 

Page 174 of 208

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image