Gengistryggð lán hafa hækkað um allt að 100%Það var afar fróðlegt að hlusta á þáttinn Ísland í býtið á miðvikudaginn sl.  en þar sat Árni Páll Árnason félagsmálaráðherra fyrir svörum hjá þeim Heimi Karlssyni og Kolbrúnu Björnsdóttur.

Það er ekki annað hægt en að hrósa Heimi fyrir hans framstöðu í þættinum en hann krafði félagsmálaráðherra ítrekað eftir svörum um hvernig ríkisstjórnin hyggist aðstoða heimilin í landinu vegna þeirra hremminga sem gengið hafa yfir landið á síðustu misserum.  Það var sorglegt að heyra hversu málefna fátækur félagsmálaráðherra var þegar kom að því að svara hvernig ætti að hjálpa fólki sem tók gengistryggð lán sem hafa hækkað mörg hver yfir 100%

Fjölmargar fjölskyldur sem tóku ákvörðun um að endurnýja fjölskyldubílinn sinn á síðustu árum eru nú í skelfilegum málum sökum þess að gengistryggðu lánin hafa hækkað um og yfir 100%  Það hringdi maður inn í þáttinn hjá Heimi og Kollu og tjáði hann að hann hafi tekið gengistryggt bílalán uppá rúmar 5 milljónir og stæði lánið í dag í tæpum 12 milljónum.

Það var dapurlegt að heyra að félagsmálaráðherrann hefur lítil sem enginn úræði fyrir fjölskyldur sem svona er ástand fyrir. Það er morgunljóst að það var ekki almenningi að kenna að íslenska krónan hefur hrunið á undanförnum mánuðum og í dag stendur gengisvísitalan í 234 stigum og ekkert sem bendir til þess að breyting verði þar á til batnaðar næstu árin.  Á þeirri forsendu er ljóst að fjölmargar fjölskyldur munu alls ekki geta staðið við skuldbindingar sem hafa hækkað yfir 100%

Þessum hópi skuldara verður að koma til hjálpar, best væri að færa gengisvísitöluna niður í 150 stig eða svo og gefa fólki síðan kost á því að umbreyta lánunum í íslenskar krónur.  Formaður skorar á alla að hlusta á Ísland í býtið frá miðvikudeginum 12 ágúst.  Hægt hér Ísland Í bítið   

Vinnuslys varð í álverksmiðju Norðuráls á Grundartanga skömmu fyrir miðnætti í gærkvöldi. Verið var að skipta um skaut í keri.

Slysið varð með þeim hætti að verið var að skipta um skaut og vildi þá ekki betur til en svo að maðurinn rann til og lenti með báða fætur ofan í fljótandi deiglu. Maðurinn er nú til meðferðar á Landspítalanum. Er hann með alvarleg brunasár á báðum fótum, að sögn læknis.

Það hefur ætíð verið ljóst að störf í stóriðjum geta verið mjög hættuleg og krefjandi og á þeirri forsendu er afar mikilvægt að öryggismál starfsmanna í stóriðjum séu eins trygg og kostur er.

Töluverð vinna hefur verið í frystihúsi HB Granda hér á Akranesi í sumar og var t.d unnið alla virka daga í júlí frá 6 að morgni til 18 að kveldi.  Síðustu tvö sumur hefur frystihúsinu verið lokað í allt 6 vikur vegna sumarleyfa, en í ár var ekki nein sumarlokun.

Það að ekki skyldi vera sumarlokun hafði jákvæð áhrif fyrir skólakrakkana og fengu vel á annan tug unglinga vinnu í sumar hjá HB Granda.  Þessi mikla vinna mun klárlega hjálpa unglingunum að stunda námið sitt í vetur og léttir á útgjöldum foreldra þeirra unglinga sem fengu vinnu hjá HB Granda í sumar, sem er afar jákvætt því víða hefur greiðslubyrði heimilanna aukist gríðarllega að undanförnu.

Starfsmenn HB Granda tjáðu formanni félagsins sem fór í vinnustaðaheimsókn í gær að verið væri að vinna Þorsk sem fluttur sé erlendis í flugi til Belgíu og Þýskalands.  Það þarf ekkert að fara í grafgötur með það að þær gengisbreytingar sem orðið hafa á gjaldmiðlinum er klárlega að hjálpa fyrirtækjum sem selja sínar afurðir erlendis umtalsvert.

Eftirfarandi viðtal birtist á mbl.is við formann Verkalýðsfélags Akraness í dag.  Einnig var viðtal við formann félagsins í Reykjavík síðdegis á Bylgjunni í dag. Hægt er að hlusta á viðtalið hér

„Forsendur stöðugleikasáttmálans eru brostnar. Hann er marklaust plagg og var raunar allt frá upphafi, innihaldið var ekkert. Það var í raun verið að fífla launþega með því að semja um 6.500 króna launahækkun og skella um leið á þá kjaraskerðingum upp á tugi þúsunda, launalækkunum, gjaldskrárhækkunum og fleiru,“ segir Vilhjálmur Birgisson, formaður Verkalýðsfélags Akraness.

Vilhjálmur þingaði í morgun með forseta bæjarstjórnar Akraness og oddvita Framsóknarflokksins í bæjarstjórn vegna fyrirhugaðra sparnaðaráforma í rekstri bæjarins.  Þeirra á meðal eru verulegar breytingar á vinnutilhögun starfsmanna íþróttamannvirkja og skólaliða sem að mati formanns Verkalýðsfélags Akraness, VLFA, munu hafa umtalsverð áhrif á launakjör þessara hópa. Starfsmenn munu samkvæmt tillögunum lækka í launum um 10% til 15%.

Formaður VLFA sendi fyrir nokkru bæjarráði og bæjarstjórn Akraness bréf þar sem óskað er eftir því að skipaður verði vinnuhópur vegna sparnaðaraðgerðanna. Í þessum vinnuhópi auk bæjaryfirvalda yrðu fulltrúar þeirra stéttarfélaga sem eiga aðild að kjarasamningum við Akraneskaupstað auk trúnaðarmanna.  Oddvitar meirihlutaflokkanna í bæjarstjórn Akraness buðu formanni VLFA á sinn fund í morgun til að ræða fyrirhugaðar aðgerðir.

Sanngirni verði gætt

„Þetta var svo sem ágætur fundur. Ég gerði grein fyrir afstöðu okkar til tillagnanna og gerði alvarlegar athugasemdir við þessa fyrirætlan. Það hefur alltaf verið okkar skilningur að það ætti að slá skjaldborg um þá tekjulægstu. Viðmiðunartalan var 300 þúsund krónur en við höfum dæmi um einstakling sem er með um 280 þúsund krónur í mánaðarlaun sem þarf að sæta skerðingu upp á tæplega fjörutíu þúsund krónur á mánuði. Þetta er ekki sú sanngirni sem við gerum kröfu um að gætt verði,“ segir Vilhjálmur Birgisson.

Stéttarfélagið hefur kallað eftir upplýsingum um hvað forstöðumenn bæjarstofnana, kennarar, starfsmenn í stjórnunarstöðum og æðstu stjórnendur bæjarins þurfa að leggja af mörkum í hagræðingunni. Vilhjálmur segir að verið sé að vinna frekari tillögur á vegum bæjarins og ákveðið hafi verið að funda á ný þegar þeirri vinnu lýkur.

Það er með hreinustu ólíkindum að það hafi verið undirritaður stöðugleikasáttmáli sem ríkisvaldið, verkalýðshreyfingin, samtök atvinnulífsins og sveitarfélög vitna ítrekað í. Ég velti því fyrir mér hvort það sé stöðugleiki að lækka laun starfsmanna um tugi þúsunda, hækka gjaldskrár sveitarfélaga, jafnvel um tugi prósenta á sama tíma og launafólk má sæta gríðarlegri skerðingu vegna hagræðingaraðgerða. Er þetta það sem menn kalla stöðugleika og státa sig af?;“ spyr formaður VLFA.

Jarðsyngur stöðugleikasáttmálann

Vilhjálmur Birgisson segist jarðsyngja stöðugleikasáttmálann, allar forsendur hans séu foknar út í veður og vind.

„Þetta er bara í mínum huga algjörlega marklaust plagg. Ég tók ekki þátt í gerð þessa plaggs og ég hef alla tíð verið mótfallinn því að fresta umsömdum launahækkunum.

En minn skilningur var sá að með undirritun stöðugleikasáttmálans kæmu allir að borðinu. Það væri ekki hægt fyrir ríki, sveitarfélög, verslunareigendur, tryggingafélög og svo framvegis, að varpa öllum sínum vanda beint út í verðlagið á sama tíma og launþegar horfa fram á gríðarlegt tekjutap og stóraukna greiðslubyrði. Þetta er enginn stöðugleiki,“ segir formaður VLFA.

Hann segir að allir verði að koma að borðinu. Það gangi ekki upp að olíufélögin tilkynni um hækkun á eldsneytisverði upp á 4 krónur hvern lítra í dag, meðan starfsmennirnir sem dæla bensíninu þurfi að gefa eftir af sínum launum. Þetta fari beint út í vísitöluna og íbúðalán almennings hækki.

Engin von gefin 

„Ég óttast að ástandið á næstu vikum og mánuðum eigi eftir að verða alveg skelfilegt. Það styttist í að frystingum lána ljúki og öðrum skammtímaaðgerðum sem gripið var til. Þá mun fólk almennt ekki geta staðið undir greiðslubyrðinni. Og það er með ólíkindum að hlusta á félagsmálaráðherra tilkynna fólki það að ekki verði um neinar leiðréttingar á skuldum að ræða. Fólki er ekki gefin nein von. Opinberir aðilar, ríki og sveitarfélög, þau ætla bara að varpa vandanum yfir á launþegana og heimilin í landinu. Þeir tekjulægstu eiga að sitja eftir í launum með stóraukna greiðslubyrði. Þetta endar varla nema með stórri bombu. Ég held að verkalýðshreyfingin ætti að vakna, þetta gengur ekki upp,“ segir formaður VLFA.

Hann segir að það verði að koma fólki til hjálpar. Með einum eða öðrum hætti þurfi að leiðrétta gengistryggð lán sem fólk tók. Þar komi til greina að færa gengisvísitöluna niður og gefa fólki kost á að breyta gengistryggðum lánum í krónulán.

„Það verður a.m.k. að gera eitthvað því fólkið hefur enga möguleika á að mæta sínum vanda með aukinni vinnu eða öðru slíku, því er ekki til að dreifa. Þvert á móti er verið að þrengja að möguleikum fólks til þess, eins og dæmin sanna hér á Akranesi“ segir Vilhjálmur Birgisson, formaður Verkalýðsfélags Akraness.