Samningafundur var haldinn í dag hjá ríkissáttasemjara vegna kjaradeilu við Íslenska járnblendifélagið.  Á fundunum lögðu samningsaðilar fram kröfugerðir sínar.  Ofngæslumenn og dagmenn lögðu fram sínar sérkröfur sem verða síðan til umræðu á  næsta samningafundi, sem verður fimmtudaginn 18. nóvember kl. 09.00.    Eins ræddu menn um gildissvið samningsins og eru samningsaðilar að leita leiða til lausar í því máli.

Samningafundur vegna kjaradeilu við Íslenska járnblendifélagið verður haldinn í dag og hefst hann kl. 13.00.  Fundurinn er haldinn í húsakynnum ríkissáttsemjara. 

Fundur var haldinn í gær í samráðsnefnd Sjúkrahúss Akraness.  Er þetta í 4 sinn sem nefndin kemur saman frá því hún var sett á laggirnar.  Hlutverk samráðsnefndarinnar er að leysa úr ágreiningi sem upp kann að koma á milli starfsmanna og stofnunarinnar í hinum ýmsu málum.  Hefur nefndinni gengið mjög vel að leysa úr þeim málum sem hefur verið vísað til hennar.  

Á fundinum í morgun óskaði VLFA eftir því við forsvarsmenn SHA að hugað yrði að því að  halda  námskeið fyrir starfsmenn.  Tóku þeir afar vel í þessa hugmynd formanns félagsins og til stendur að eftir áramót verði námskeiðin haldin.   Námskeiðin geta hugsanlega veitt starfsmönnum launaflokkahækkun. 

Áform eru um að stækka Járnblendiverksmiðjuna á Grundartanga og bæta jafnvel við tveimur ofnum. Þetta kemur fram í viðtali í norska blaðinu Aftenposten við Johan Svensson, forstjóra verksmiðjunnar en verksmiðjan er í eigu norska fyrirtækisins Elkem.

Svensson segir í viðtalinu að framleiðslukostnaður á Íslandi sé mun lægri en í Noregi. Þá sé hið pólitíska umhverfi stöðugt. Verið sé að íhuga að bæta fjórða og fimmta ofninum við í verksmiðjunni á Grundartanga og helsta ástæðan fyrir þeim stækkunaráformum sé hagstætt raforkuverð á Íslandi. Þá sé einnig stefnt að því að auka framleiðslu á sérhæfðari vöru í verksmiðjunni.

Frétt Aftenposten

Verkalýðsfélag Akraness er afar ánægt með að rekstur fyrirtækisins gangi jafn vel og segir í fréttinni.  Verkalýðsfélag Akraness telur að þessi góða afkoma muni væntanlega liðka vel fyrir komandi samningum við Íslenska járnblendifélagið.  Næsti fundur vegna nýs kjarasamnings er á þriðjudaginn, og verður fundurinn haldinn í húsakynnum Ríkissáttasemjara, hefst fundurinn kl. 13.00.