Hafinn er undirbúningur að halda fiskvinnslunámskeið um miðjan nóvember.  Verkalýðsfélag Akraness mun auglýsa þetta námskeið vel, því það er til töluverðs að vinna, því að afloknu námskeiði hækkar starfsmaðurinn um tvo launaflokka.  Námskeiðið verður unnið í fullri samvinnu við atvinnurekendur.

Nú hafa trúnaðarmenn Íslenska járnblendifélagsins og formaður Verkalýðsfélags Akraness lokið við að funda með öllum verkamönnum sem vinna á vöktum sem og verkamönnum í dagvinnu.  Alls voru haldnir fimm fundir, þar sem farið var yfir hvaða kröfur starfsmenn vilja leggja mesta áherslu á. 

Trúnaðarmenn og formaður VLFA hafa tekið við um 40 kröfum sem starfsmenn ÍJ vilja reyna að ná fram í komandi   kjarasamningum. Samningurinn rennur út 30. nóvember.  Starfsmenn ÍJ hafa skrifað undir áskorun til þeirra félaga sem eiga aðild að kjarasamningi við ÍJ, um að félögin tryggi að kjarasamningur Íslenska járnblendifélagsins verði lágmarkssamningur á starfssvæði ÍJ við Grundartanga. Munu stéttarfélögin svo sannarlega taka þessari áskorun, og reyna að varðveita þau réttindi sem starfsmenn ÍJ bæði núverandi og fyrrverandi (GT Tækni, Fang og Klafi) hafa áunnið sér  á liðnum áratugum.  Sú barátta verður ekki átakalaus, en með samstöðu allra starfsmanna eru meiri líkur á að það takist.  Formaður VLFA lagði til að þegar samningaviðræður væru komnar á fullt skrið, þá verði haldnir fundir með starfsmönnum ÍJ eins oft og þurfa þykir og þeim gerð grein fyrir stöðu mála, með því verða starfsmenn vel upplýstir um gang viðræðnanna. Starfsmönnum ÍJ leist mjög vel á þessa tillögu formanns VLFA.

Samráðsnefnd Sjúkrahúss Akraness kom saman til fundar miðvikudaginn 29. september.  Tilefni fundarins var að fara yfir mál sem starfsmenn hafa óskað eftir að Samráðsnefndin tæki til afgreiðslu.  Vel gekk hjá Samráðsnefndinni að afgreiða þau erindi sem kom á borð nefndarinnar og ekki var ágreiningur um afgreiðslu þeirra mála.

Tvö mál eru til nánari skoðunar hjá forsvarsmönnum SHA og er niðurstöðu í þeim málum að vænta mjög fljótlega.  Það er afar brýnt að hafa virka Samráðsnefnd sem tekur strax á þeim ágreiningi sem upp kemur.  Það er líka gott fyrir starfsmenn SHA að hafa þann rétt að geta skotið málum til Samráðsnefndarinnar telji þeir að það sé verið með einum eða öðrum hætti verið að brjóta á sér.  

Formaður félagsins hefur ásamt trúnaðarmönnum Íslenska járnblendifélagsins  fundað með þremur vakthópum og í dag var fundað með dagvinnumönnum. Á þessum fundum eru starfsmenn að fara yfir hvaða kröfur starfsmenn vilja leggja mestu áherslu á í komandi Kjarasamningum, og ennfremur hafa starfsmenn komið með margar tillögur í kröfugerðina .   Það á eftir  að funda með tveimur  vöktum og eru þeir fundir fyrirhugaðir með þeim á næstu dögum.
 

Starfsmenn Íslenska járnblendifélagsins, Fangs, GT Tækni og Klafa hafa skorað á þau stéttarfélög sem eiga aðild að kjarasamningi við Íslenska járnblendifélagið að tryggt verði að kjarasamningurinn verði lámarks samningur á starfssvæði járnblendifélagsins.
 

Verkalýðsfélag Akraness er innilega sammála þeim starfsmönnum sem skorað hafa á stéttarfélögin að standa vörð um þann kjarasamning sem starfsmenn  ÍJ hafa með elju og atorkusemi náð á liðnum áratugum.
 

Það blasir við hvað vakir fyrir eigendum Íslenska járnblendifélagsins.
 

Nú þegar er Íslenska járnblendifélagið búið að stofna þrjú dótturfyrirtæki með það eitt í huga að lækka rekstrarkostnað Íslenska járnblendifélagsins, og er það gert með því að starfsmenn taki laun eftir öðrum kjarasamningi en Íslenska járnblendifélagsins.   
 

Verkalýðsfélag Akraness mun taka þessa áskorun mjög alvarlega   og mun  leggja sitt að mörkum til að tryggja að kjarasamningur Íslenska járnblendifélagsins verði lámarks samningur á járnblendisvæðinu.  Hér eru miklir hagsmunir í húfi fyrir okkar félagsmenn sem og alla sem starfa á þessu svæði.