Kolbeinn Gunnarsson frá verkalýðsfélagi Hlífar í Hafnarfirði mun koma og kynna hvernig stóriðjuskólinn í Ísal virkar, og eins hversu mikla launahækkun hann er að gefa starfsmönnum að loknu námi.  Með því að smella á meira þá er hægt að lesa helstu punkta um skólann.

Það mun hafa verið árið l993  sem trúnaðarmenn Hlífar fóru að huga að menntamálum starfsmanna, og í samningum l995, var námið ein af kröfum Hlífar.

Það náðist svo í samningunum sem voru undirritaðir voru 10. apríl l997 og hófst síðan námið haustið l998.

Þessir samningar höfðust ekki baráttulaust en nú er svo málum komið að allir vildu Lilju kveðið hafa. Ríkir mikil ánægja jafnt hjá starfsmönnum og atvinnurekendum með þessi mál, og allir sammála um að hér hafi verið stigið heillaspor bæði fyrir starfsmenn og atvinnurekendur.

Námstilhögun.

Það sem starfsmenn læra í skólanum eru  Mannleg samskipti, tjáning, fyrirtæki og þjóðlíf, stærðfræði, eðlisfræði, efnafræði, framleiðsluferli í stóriðju, tölvur og stýringar, eldföst efni, vélfræði með fyrirbyggjandi viðhaldi, vistfræði og umhverfismál, vinnuumhverfi, og gæðastjórnun. Samtals er námslengdin 325 kennslustundir og skal náminu vera lokið innan tveggja ára frá því það var hafið.

Réttur til námsins.

Sá starfsmaður sem hefur verið í starfi við eitt framleiðsluferli í 45 mánuði á rétt að fara í námið.  Og er miðað við að starfsmaðurinn nái að ljúka þessum starfstíma við lok námsins. Starfsmenn sem fara í námið eru í náminu undanþegnir vinnuskyldu og halda óskertum launum.

Að loknu námi.

Þeir sem hafa lokið 325 stundum í starfsnámi, fá launahækkun sem nemur 10,5%. Kennslan hefur farið þannig fram að kennt er frá kl 12:00 -  16.00, hluti námsins er í vinnutíma, og einnig mæta starfsmenn í sínum vinnutíma, en ef næturvakt er á undan skólatíma fá starfsmenn  frí þá vakt.

Að loknu námi fá starfsmenn starfsheitið “Stóriðjugreinir”. Og atvinnurekendur fá betri starfsmenn og starfsmenn eru ánægðari og öruggari með sig í starfi. Það hefur reynslan sýnt.

Stjórn Verkalýðsfélags Akraness er eins árs í dag 19. nóvember. Það verður að segjast alveg eins og er að félagið hefur tekið algjörum stakaskiptum á þessu eina ári.  Stjórn félagsins hefur staðið í ströngu á þessu eina ári. 

Á þessu tæpa ári sem núverandi stjórn Verkalýðsfélags Akraness hefur starfað höfum við lent í erfiðum málum gagnvart atvinnurekendum. Í þessum málum vorum við sannfærð um að verið væri að brjóta á réttindum félagsmanna. Tekist var hraustlega á og að lokum náðist samkomulag í öllum þessum málum. Þessi réttindabarátta hefur skilað rúmum 13 milljónum króna í vasa félagsmanna okkar. Meginverkefni stéttarfélaga er að standa vörð um áunnin réttindi félagsmanna og bæta þau eins og kostur er. Það er og verður stefna stjórnar Verkalýðsfélags Akraness að standa einarðlega vörð um öll áunnin réttindi félagsmanna og verður hvergi hvikað í þeirri baráttu.

Þegar stjórn félagsins tók við Verkalýðsfélagi Akranes átti félagið útistandandi skuldir hjá atvinnurekendum vegna ógreiddra iðgjalda rúmar 21 milljón króna, hefur stjórn félagsins tekist að innheimta 13 milljónir af þessum ógreiddum iðgjöldum.  Voru innheimtumál og iðgjaldaskráning í verulegum ólestri, þeim hlutum hefur verið kippt í lag. 

Hvað varðar almenna þjónustu við hin almenna félagsmann þá hefur hún stóraukist. Markmið okkar sem nú stjórnum félaginu er skýrt. Markmiðið er að vera það félag á Íslandi sem mest og best þjónar sínum félagsmönnum. Vissulega eru þetta háleit markmið en að mínu mati verður að setja markið hátt. Við hljótum að vilja aðeins það besta til handa félagsmönnum okkar.

Heimsíða félagsins er komin í fulla notkun og hefur fjöldi innlita á síðuna stóraukist en daglega eru um 100 innlit inná síðuna.  Ekki er hægt annað en að minnast á að nánast allir kjarasamningar félagsins voru og eru lausir á árinu og hefur verið gríðarlegt álag vegna þess. 

Formaður félagsins hefur farið og heimsótt flest þau fyrirtæki sem félagsmenn okkar starfa hjá – ekki öll - en flest. Markmið okkar með þessum vinnustaðaheimsóknum er að auka bein tengsl milli stéttarfélagsins og félagsmanna og upplýsa þá  um réttindi þeirra og skyldur. Það er lykilatriði fyrir forustumenn í stéttarfélögum að vera í góðu sambandi við félagsmenn.