Það mun koma í ljós á morgun hvort mat formanns félagsins var rétt um að samningsaðilar séu að nálgast kröfu stéttarfélaganna varðandi gildissviðið í kjarasamningi Norðuráls.  Það var mat formannsins, eftir síðasta samningafund með forsvarsmönnum Norðuráls, að menn væru að nálgast verulega hvað varðar gildissvið samningsins.  Mjög gott væri ef samningsaðilar myndu ná niðurstöðu í þessu máli á fundinum á morgun.  

Fundað var hjá ríkissáttasemjara í dag vegna kjaradeilu stéttarfélaganna við Íslenska járnblendifélagið.  Voru deiluaðilar að ræða um nýtt bónuskerfi og eru samningsaðilar langt komir með það mál.  Hinsvegar ber töluvert á milli deiluaðila hvað varðar aðrar kröfur stéttarfélaganna.  Samningsaðilar voru samt sem áður sammála um að hittast á föstudaginn kl. 13:00 hjá sáttasemjara.  

Starfsmenn í ræstingu og býtibúrum á Sjúkrahúsi Akraness hafa sent framkvæmdastjórn SHA yfirlýsingu og áskorun vegna ákvörðunar um að breyta vinnufyrirkomulagi starfmanna.  Eru starfsmenn SHA afar óánægðir með þá ákvörðun.  Yfirlýsinguna og áskorunina er hægt að lesa í heild sinni með því að smella á meira.

Yfirlýsing og áskorun til stjórnenda Sjúkrahúss Akraness 

Við undirritaðir starfsmenn á Sjúkrahúsi Akraness sem störfum í ræstingu og býtibúrum lýsum yfir gríðarlegri óánægju með þá ákvörðun stjórnenda SHA að segja upp núverandi vinnufyrirkomulagi, sem við teljum að muni leiða til aukins álags á starfsmenn. Einnig mun þessi breyting leiða til skerðingar á launakjörum okkar.  Erum við sárar og reiðar með þessa ákvörðun stjórnenda SHA. Er það vegna þess að það er nýbúið að gera nýjan kjarasamning við okkur og áttum við því síst von á einhverju þessu líku.

Við undirritaðir skorum á  stjórnendur SHA, að endurskoða fyrri ákvörðun sína um breytt vinnufyrirkomulag, eða að bæta þeim starfsmönnum sem verða fyrir launaskerðingu vegna þessa það upp með einum eða öðrum hætti.

Fundað var í dag um gildissvið kjarasamnings Norðuráls.  Er það mat formanns Verkalýðsfélags Akraness að samningsaðilar hafi nálgast nokkuð á fundinum í dag.  Ákváðu samningsaðilar að hittast aftur föstudaginn 17. des.   Mun á þeim fundi væntanlega koma  í ljós hvort mat formanns félagsins eigi við rök að styðjast eða ekki.   Formenn og trúnaðarmenn funduðu síðan eftir hádegi í dag, voru menn að fara yfir stöðuna á þeim fundi.