Aðalfundur opinberrar deildar var haldinn í kvöld.  Kosið var í stjórn deildarinnar og þeir sem skipa stjórnina eru:  Steinunn G. Guðjónsdóttir meðstjórnandi, Guðrún Guðbjartsdóttir varameðstjórnandi, ritari Sigurlaug Guðmundsdóttir og vararitari Ásgerður Magnúsdóttir.  Formaður deildarinnar er Sigríður Sigurðardóttir og varaformaður er Hrönn Ásgeirsdóttir.  Formaður félagsins vill að það komi skýrt fram að það hefur verið afar ánægjulegt að eiga samskipti við þá sem tilheyra opinberu deildinni.  Sér í lagi hefur verið gott samstarf við starfsfólk á Sjúkrahúsi Akraness.  Vill formaður félagsins þakka trúnaðarmönnum SHA og einnig þeim sem eru í samráðsnefnd SHA kærlega fyrir frábært samstarf  á liðnu ári.    

Það kom fram hjá starfsmönnum SHA að þær eru afar óánægðar með þá ákvörðun stjórnenda SHA að breyta um vinnufyrirkomulag.  Telja að álag hafi aukist til mikilla muna eftir þessar breytingar, og nokkrar hafi lækkað í launum.  Formaður félagsins og starfsmenn sendu forsvarsmönnum SHA í desember áskorun og yfirlýsingu þar sem þessari ákvörðun var harðlega mótmælt.  En því miður breytti það ekki ákvörðun stjórnenda SHA.  Formaður félagsins kynnti að fyrirhugað væri að koma á námskeiðum fyrir starfsmenn SHA og óskaði formaðurinn eftir tillögum um hvernig námskeið starfsmenn vilja fara á.

Það verður að segjast alveg eins og er að útlitið er orðið verulega dökkt í kjaraviðræðum við forsvarsmenn Íslenska járnblendifélagsins.  Allavega er það mat formanns félagsins eftir  samningafundinn sem haldinn var í dag hjá ríkissáttasemjara.  Einnig er það mat Verkalýðsfélags Akraness að töluverðar líkur séu orðnar á því að til verkfalls geti komið hjá starfsmönnum Íslenska járnblendifélagsins.  Eins og áður segir er þetta mat formanns félagsins miðað við þær viðræður sem áttu sér stað í dag. Vonandi er þetta mat rangt, en því miður telur VLFA að svo sé alls ekki. 

Yfir 90% starfsmanna Íslenska járnblendifélagsins eru félagsmenn í Verkalýðsfélagi Akraness.  Það liggur því alveg ljóst fyrir að hagsmunir félagsins í þessum kjaraviðræðum er feyki miklir.  Forsvarsmönnum Íslenska járnblendifélagsins voru afhent áhersluatriði á blaði fyrir nokkrum dögum, sem eru forsenda félagsins til að hægt verði að ganga frá nýjum kjarasamningi og það er alveg ljóst að hvergi verður hvikað frá þeim áhersluatriðum.  Og eitt er víst að Verkalýðsfélag Akraness er svo sannarlega tilbúið að berjast fyrir bættum hag starfsmanna Íslenska járnblendifélagsins, með öllum tiltækum ráðum.  Verkalýðsfélag Akraness er búið að reyna frá því í byrjun október að leysa þessa kjaradeilu bæði í formlegum viðræðum sem og óformlegum, og hefur félagið lagt gríðarlega mikla vinnu í að leysa þessa kjaradeilu.  Því veldur þessi niðurstaða í dag verulegum vonbrigðum.  Ekki verður farið efnislega í þau ágreiningsatriði sem um ræðir að svo stöddu.  Formaður félagsins mun setja sig í samband við starfsmenn Íj og gera þeim grein fyrir þeirri alvarlegu stöðu sem upp er komin.  Í framhaldi af þeim viðræðum við starfsmenn mun félagið taka ákvörðun um hvað sé heppilegast að gera í framhaldinu.  Næsti samningafundur verður mánudaginn 31. janúar, en eins og áður sagði er útlitið verulega dökkt, og er þar vægt til orða tekið.