Það er óhætt að segja að félagsmenn Verkalýðsfélags Akraness séu duglegir að nýta sér þjónustu félagsins og sækja um þá styrki sem þeim bjóðast úr sjóðum félagsins. Það sem af er þessu ári hafa greiðslur úr sjúkrasjóði aukist um 18,7% miðað við sama tímabil í fyrra. Þessar greiðslur eru t.d. sjúkradagpeningar, heilsueflingarstyrkir, gleraugnastyrkir, fæðingarstyrkir, styrkir vegna sjúkraþjálfunar, heilsufarsskoðana, sálfræðiþjónustu og göngugreiningar.

Mestu munar um aukningu í fæðingarstyrkjum en þeir jukust um 195% á tímabilinu. Þess ber að geta að þann 1. janúar 2012 hækkaði fæðingarstyrkurinn úr kr. 35.000 í kr. 70.000. Þar sem félagsmenn eiga sjálfstæðan rétt til styrksins nemur styrkur vegna fæðingar barns sem á báða foreldra í félaginu kr. 140.000. Einnig eru félagsmenn mun duglegri að sækja um styrk vegna heilsufarsskoðana, en aukningin þar er 91%.

Af öðrum liðum í þjónustu félagsins má nefna að það sem af er sumri hafa selst yfir 250 Veiði- og Útilegukort á skrifstofu félagsins. Verður það að teljast góð ásókn, en hver félagsmaður getur aðeins keypt eitt kort af hvoru. Allt árið í fyrra seldust 215 kort.

Styrkir til félagsmanna úr þeim fræðslusjóðum sem VLFA á aðild að hefur einnig aukist og eru 31,6% hærri fyrstu sex mánuði þessa árs miðað við sama tímabil í fyrra.

Þessi þróun er í takt við fjölgun virkra félagsmanna, aukningu í félagsgjöldum og átak sem félagið hefur gert í kynningu á þjónustu félagsins. Það er mikilvægt að félagsmenn þekki rétt sinn, en allar upplýsingar er að finna hér á heimasíðunni. Verður það að teljast mjög jákvætt að félagsmenn nýti það sem þeim býðst, því það hefur alltaf verið markmið félagsins að láta félagsmenn njóta góðs af því þegar vel gengur og það á svo sannarlega við þessi misserin.

Í gær landaði ísfisktogarinn Sturlaugur H Böðvarsson AK 10 rúmum 50 tonnum af ferskum makríl hér á Akranesi til manneldis og var þetta fyrsti makrílfarmurinn sem landað er hér á þessari vertíð. Sturlaugur hélt aftur til veiða um miðnættið í gær og var um 6 tíma á miðin aftur. Ekki tók það Sturlaug langan tíma að ná í skammtinn sinn á ný, eða einungis um 3 tíma en skammturinn er eins og áður sagði rúm 50 tonn og er áætlað að Sturlaugur H Böðvarsson verði kominn aftur til Akraness um þrjú-leytið.

Makrílveiðar Íslendinga á árinu 2011 skiluðu þjóðarbúinu yfir 25 milljörðum króna og sköpuðu yfir 1000 ársverk á sjó og landi og því morgunljóst að makrílveiðar okkar Íslendinga skipta þjóðarbúið gríðarlega miklu máli enda mikilvægt fyrir okkur Íslendinga að átta okkur vel og rækilega á því að við byggjum okkar velferðakerfi upp á því að skapa gjaldeyristekjur og það gera makrílveiðarnar svo sannarlega.