• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Subscribe to this RSS feed
30
 Jan

Jákvæðar fréttir frá forstjóra HB Granda

Forstjóri HB-GrandaForstjóri HB-GrandaÍ dag er viðtal við forstjóra HB Granda á vef Skessuhorns þar sem kemur fram að landvinnslan hér á Akranesi geti hugsanlega aukist vegna 30 þúsund tonna aukningar á þorski sem sjávarútvegsráðherra tilkynnti ekki alls fyrir löngu.

Þetta eru afar jákvæð tíðindi ef niðurstaðan verður sú að fjölga þurfi starfsfólki í frystihúsi HB Granda hér á Akranesi, en eins og fram hefur komið hér á heimasíðunni þá hefur fiskvinnslufólki fækkað umtalsvert á liðnum árum.

Þetta sagði Eggert Guðmundsson forstjóri HB Granda í viðtali við Skessuhorn:

Við höfum ekki verið að auka þorskinn til frystiskipanna og mér sýnist að aukningin í þorskinum muni fara í ísfiskiskipin. Sá fiskur færi þá til vinnslu á Akranesi. Það eru því líkur á því að vinnslan aukist eitthvað á Akranesi á árinu. Við bíðum átekta vegna óvissu á mörkuðum og erum fyrst og fremst að reyna að laga veiðar og vinnslu að stöðunni eins og hún er í dag,“ segir Eggert Benedikt Guðmundsson forstjóri HB Granda í samtali við Skessuhorn fyrr í vikunni.  Sem kunnugt er var starfsmönnum landsvinnslu HB Granda á Akranesi fækkað stórlega og til uppsagna kom í kjölfar skerðingar á þorskkvótanum úr 190.000 tonnum niður í 130.000 í byrjun næstsíðasta kvótaárs. Nú þegar þessi skerðing hefur gengið hálfa leið til baka virðast góðar líkur á að vinnslan aukist eitthvað að nýju, en Eggert segir ekki hægt að tímasetja nákvæmlega hvenær það komi til, væntanlega ekki fyrir en líður á árið og heldur ekki tímabært að segja til um hversu mikið fjölga muni í vinnslunni að nýju.

„Það fer hreinlega eftir því hvernig markaðirnir fyrir þorskinn þróast á næstunni, hversu mikið verkafólk á Skaganum kemur til með að njóta aukningar þorskkvótans,“ segir Eggert. Frá miðju síðasta sumri hafa rúmlega 20 manns unnið við landvinnslu HB Granda á Akranesi og um fimm manns sem áður unnu þar sótt vinnu í fiskiðjuverinu í Reykjavík.
Verkalýðsfélag Akraness og Akraneskaupstaður óska eftir opnum bæjarmálafundi um hvalveiðar með þingmönnum NV-kjördæmis
29
 Jan

Verkalýðsfélag Akraness og Akraneskaupstaður óska eftir opnum bæjarmálafundi um hvalveiðar með þingmönnum NV-kjördæmis

Formaður Verkalýðsfélags Akraness ætlaði vart að trúa fréttum sem honum bárust til eyrna gær um að væntanleg ríkisstjórn Samfylkingar og Vinstri Grænna hygðist hnekkja ákvörðun sjávarútvegsráðherra um heimild til veiða á langreyði og hrefnu til ársins 2013.

Það liggur fyrir að með þessari ákvörðun er verið að skapa allt að 300 ný störf í þessu landi sem er um hundrað störfum fleiri en hjá Járnblendifélaginu Elkem Ísland á Grundartanga. Með öðrum orðum má segja að hér sé um hálfgerða vistvæna stóriðju að ræða. Ekki aðeins mun störfum fjölga hér umtalsvert heldur mun þetta skapa þjóðarbúinu umtalsverðar útflutningstekjur sem ekki veitir af nú á þeim erfiðu tímum sem íslenskt samfélag er að ganga í gegnum. Það væri fróðlegt að vita hjá komandi ríkisstjórn afturkalli hún þessa ákvörðun sjávarútvegsráðherra, hvaða nýju störf geta þau boðið okkur landsmönnum í staðinn?

Það liggur fyrir að hrefnuveiðimenn og Kristján Loftsson hjá Hval hf. hafa í hyggju að vera með starfsstöð sína að stórum hluta hér á Akranesi. Í dag eru um 300 Akurnesingar á atvinnuleysisskrá þannig að þessi ákvörðun um að heimila hvalveiðar myndi verða gríðarlega jákvæð innspýting í atvinnulífið hér á Akranesi.

Á þeirri forsendu er um mikla hagsmuni að ræða fyrir okkur Akurnesinga og nærsveitunga og ljóst að stjórn Verkalýðsfélags Akraness mun ekki sætta sig við að komandi ríkisstjórn muni afturkalla þessa jákvæðu ákvörðun sjávarútvegsráðherra um heimild til hvalveiða.

Það liggur einnig fyrir að fjöldi hagsmunaaðila í sjávarútvegi, svo sem Landssamband íslenskra útvegsmanna og Samtök fiskvinnslustöðva hafa lýst yfir fullum stuðningi við þessa ákvörðun og með þeirri stuðningsyfirlýsingu eru þeir einnig að segja að þeir óttist ekki að hvalveiðar muni skaða markaði erlendis tengdum fiskútflutningi.  Samtök hvalskoðunarmanna hafa lýst yfir áhyggjum af því að hrefnuveiðar verði auknar og hafnar verið veiðar á langreyðum. Telja þeir að slíkt muni draga úr ferðaþjónustu. Hins vegar er það nú einu sinni þannig að allar rannsóknir sýna að ferðamönnum tengdum hvalveiðiskoðunum hefur fjölgað jafnt og þétt þó svo að stundaðar hafi verið hér hrefnuveiðar um alllanga hríð. Það er einnig rétt að rifja það upp að þegar að hvalveiðar voru stundaðar hér á árum áður þá kom fjöldinn allur af erlendum ferðamönnum í skoðunarferðir upp í hvalstöð þannig að það er mat formanns að það sé vel hægt að tengja saman hvalaskoðunarferðir og ferðir upp í hvalstöð þar sem erlendir ferðamenn geti séð þessi stórhveli í návígi.

Það var ótrúleg frétt sem birtist á Vísi.is í gær þar sem vitnað var í Jón Ásgeir Jóhannesson stjórnarformann Baugs og Icelandic verslunarkeðjunnar. Í viðtalinu segir hann að ákvörðun sjávarútvegsráðherra um að heimila hvalveiðar muni skaða eignir Íslendinga erlendis og vonast hann til að ný ríkisstjórn taki á þessu strax og láti þetta verða sitt annað verk að snúa þessari ákvörðun við.

Að Jón Ásgeir skuli voga sér að tala sér með þessum hætti, aðili sem virðist eiga stóran þátt í því neyðarástandi sem nú ríkir í íslensku samfélagi er með öllu óþolandi. Það á hins vegar að vera fyrsta verk nýrrar ríkisstjórnar að frysta eigur þessara manna sem hafa komið okkur Íslendingum í þessa skelfilegu stöðu sem við nú erum í. Jón Ásgeir hefur áhyggjur af ímynd þjóðarinnar, en það liggur hins vegar fyrir að það eru útrásarvíkingarnir sem fóru fram með græðgisvæðinguna eina að leiðarljósi sem eru búnir að eyðileggja ímynd þessa lands. Það er alveg ljóst að það verða ekki hvalveiðar sem munu skaða hana enda er það skylda okkar og réttur að nýta þær sjávarauðlindir sem við eigum að gefinni veiðiráðgjöf frá Hafrannsóknarstofnun.

Formaður hefur haft samband við forseta Alþingis og óskað eftir því við hann að haldinn verði opinn fundur með öllum þingmönnum kjördæmisins fljótlega í næstu viku. Þar verður til umræðu ákvörðun sjávarútvegsráðherra um heimild til hvalveiða að nýju.  Tók forseti Alþings vel í þessa hugmynd og ætlar að hafa samband við þingmenn kjördæmisins til að finna hentugan tíma í næstu viku.

Stjórn Verkalýðsfélags Akraness vill sjá hver afstaða þingmanna kjördæmisins er til þessara jákvæðu ákvörðunar sjávarútvegsráðherra enda mun þessi ákvörðun, ef hún fær að standa óhögguð, skapa tugi nýrra starfa hér á Akranesi og skapa umtalsverðar útflutningstekjur fyrir þjóðarbúið.

Starfsmenn Klafa hafa ákveðið að grípa til vinnustöðvunar
29
 Jan

Starfsmenn Klafa hafa ákveðið að grípa til vinnustöðvunar

Í dag átti formaður félagsins fund með öllum starfsmönnum Klafa vegna þeirrar alvarlegu stöðu sem upp er komin í kjaradeilu félagsins við eigendur fyrirtækisins og Samtök atvinnulífsins.

Eins og fram kom hér á heimasíðunni í gær þá lagði ríkissáttasemjari fram innhússáttatillögu til lausnar á deilunni á fundi í fyrradag. 

Það kom einnig fram hér á heimasíðunni í gær að formaður Verkalýðsfélags Akraness og trúnaðarmaður voru tilbúnir að ganga að fyrirlagðri sáttatillögu ríkissáttasemjara og leggja hana til atkvæðagreiðslu á meðal starfsmanna til að koma í veg fyrir að deilan myndi fara í algeran hnút. Því voru það gríðarleg vonbrigði að eigendur Klafa, sem eru Norðurál og Elkem Ísland, höfnuðu í gær sáttatillögu ríkissáttasemjara algerlega sem gerir það að verkum að deilan er nú nánast illleysanleg.

Formaður félagsins og starfsmenn hörmuðu þessa afstöðu eigenda Klafa og Samtaka atvinnulífsins og telja það mikið ábyrgðarleysi af þeirra hálfu að hafna tillögu ríkissáttasemjara jafn afdráttarlaust og fram kom á fundinum í gær. Það er einnig grafalvarlegt að Samtök atvinnulífsins virðast vera að nýta sér það alvarlega ástand sem nú ríkir á íslenskum vinnumarkaði með því að hafna algerlega að ganga frá kjarasamningi við starfsmenn Klafa á svipuðum nótum og gert var við starfsmenn Elkem Ísland.

Grundvallaratriðið í þessari deilu er að búið er að semja fyrir starfsmenn Elkem Ísland sem starfa á sama starfsvæði, en gengið var frá þeim samningi í byrjun desember, eins og fram hefur komið fram hér á heimasíðunni. Byggðist krafa félagsins á sambærilegum hækkunum og þar um samdist enda eru starfsmenn Klafa fyrrverandi starfsmenn Elkem Ísland.

Einnig er rétt að minna á að þessi samningur er einn af þeim örfáu sem á eftir að ganga frá í samningahrinu síðastliðins árs. Á þeirri forsendu er algjörlega óþolandi að SA ætli sér að skilja eftir þann hluta starfsmanna sem á eftir að ganga frá sínum samningum frá liðnu ári með jafn afgerandi hætti og tillaga SA hljóðar upp á.

Vegna þeirrar ákvörðunar Samtaka atvinnulífsins og eigenda Klafa að hafna sáttatillögu frá ríkissáttasemjara alfarið ákváðu starfsmenn að kjósa um verkfallsheimild og var hún samþykkt með öllum greiddum atkvæðum.  Formaður reiknar með að verkfallið muni hefjast eftir um 12 daga.  Ugglaust eru einhverjir hissa á því að starfsmenn ætli að gripa til verkfallsvopnsins á þeim tímum eins og nú ríkja í íslensku samfélagi.  Rétt er ítreka það enn og aftur að búið er að semja við aðra starfsmenn á sama vinnusvæði með allt öðrum hætti en starfsmönnum Klafa er boðið af Samtökum atvinnulífsins, á þeirri forsendu sjá starfsmenn sig knúna til að grípa til aðgerða.

Samtök atvinnulífsins höfnuðu sáttatillögu ríkissáttasemjara
28
 Jan

Samtök atvinnulífsins höfnuðu sáttatillögu ríkissáttasemjara

Í morgun átti formaður félagsins ásamt trúnaðarmanni starfsmanna Klafa fund með Samtökum atvinnulífsins þar sem ríkissáttasemjari lagði fram innanhúss sáttatillögu í þeirri kjaradeilu sem staðið hefur yfir frá því að kjarasamningur rann út þann 1. desember sl.

Deiluaðilar hafa fundað 7 sinnum frá því að kjarasamningurinn rann út og hefur deilan lítið þokast. Á grundvelli þess ákvað ríkissáttasemjari að leggja fram áðurnefnda innanhússtillögu, en sú tillaga tók tillit til sjónarmiða beggja aðila og hljóðaði uppá á hækkun grunnlauna frá 1. desember sl. upp á 10%. Heildarhækkun samningsins ef tillaga sáttasemjara hefði náð fram að ganga hefði gefið starfsmönnum á fyrsta ári samningsins hækkun upp á 13-15%.

Formaður Verkalýðsfélags Akraness og trúnaðarmaður voru tilbúnir að ganga að þessari sáttatillögu og leggja hana til atkvæðagreiðslu á meðal starfsmanna til að koma í veg fyrir að deilan myndi fara í algeran hnút. Því voru það gríðarleg vonbrigði að eigendur Klafa, sem eru Norðurál og Elkem Ísland, höfnuðu sáttatillögu ríkissáttasemjara algerlega sem gerir það að verkum að deilan er nú nánast illleysanleg.

Formaður félagsins harmar þessa afstöðu eigenda Klafa og Samtaka atvinnulífsins og telur það mikið ábyrgðarleysi af þeirra hálfu að hafna tillögu ríkissáttasemjara jafn afdráttarlaust og fram kom á fundinum. Það er einnig grafalvarlegt að Samtök atvinnulífsins virðast vera að nýta sér það alvarlega ástand sem nú ríkir á íslenskum vinnumarkaði með því að hafna algerlega að ganga frá kjarasamningi við starfsmenn Klafa á svipuðum nótum og gert var við starfsmenn Elkem Ísland.

Grundvallaratriðið í þessari deilu er að búið er að semja fyrir starfsmenn Elkem Ísland sem starfa á sama starfsvæði, en gengið var frá þeim samningi í byrjun desember, eins og fram hefur komið fram hér á heimasíðunni. Byggðist krafa félagsins á sambærilegum hækkunum og þar um samdist enda eru starfsmenn Klafa fyrrverandi starfsmenn Elkem Ísland.

Einnig er rétt að minna á að þessi samningur er einn af þeim örfáu sem á eftir að ganga frá í samningahrinu síðastliðins árs. Á þeirri forsendu er algjörlega óþolandi að SA ætli sér að skilja eftir þann hluta starfsmanna sem á eftir að ganga frá sínum samningum frá liðnu ári með jafn afgerandi hætti og tillaga SA hljóðar upp á.

Það er ljóst að myndast hefur mikil gjá á milli félagsins og eigenda Klafa vegna þessarar afstöðu. Óhætt er að segja að staðan sé ekki vænleg en formaður mun funda með starfsmönnum á morgun þar sem tekin verður ákvörðun um framhaldið.

Fjallað var um málið á mbl.is í dag. Lesa má fréttina hér.

27
 Jan

Stjórn Verkalýðsfélags Akraness fagnar innilega ákvörðun sjávarútvegsráðherra um að hefja hvalveiðar

Stjórn félagsins fagnar ákvörðun sjávarútvegsráðherraEinar Kr. Guðfinnsson fráfarandi sjávarútvegs- og landbúnaðarráðherra gaf í morgun út reglugerð um veiðar á hrefnu og langreyði til næstu fimm ára og stóraukinn kvóta á þessum veiðitegundum. Leyfilegur heildarafli skal nema þeim fjölda dýra sem kveðið er á um í veiðiráðgjöf Hafrannsóknastofnunarinnar. Þessi ákvörðun þýðir að leyfilegt er að veiða allt að 150 langreyðir á árinu og 200 hrefnur. Heimilt er að flytja allt að 20% af veiðiheimildum hvers árs yfir á næsta ár á eftir. Ljóst er að þessi ákvörðun sjávarútvegsráðherra þýðir mikla innspýtingu í atvinnulífið á Vesturlandi. Talið er að 24 til 28 störf geti skapast í kringum hrefnuveiðar og vinnslu og þegar allt sé talið skapist yfir 200 störf kringum veiðar á hrefnu og langreyði.

Veiðar á langreyði hófust í atvinnuskyni haustið 2006 með leyfi til veiða á níu dýrum. Þær hafa legið niðri síðan vegna óvissu um sölu afurða. Nú hefur þeirri óvissu verið eytt, samkvæmt tilkynningu ráðherra. Því má búast við að aukið líf færist yfir athafnasvæði Hvals hf. í Hvalfirði með vorinu.

Eins og Skessuhorn greindi frá nýlega hafa samtök hrefnuveiðimanna beint augum að Akranesi sem framtíðarstað til útgerðar og vinnslu. Gunnar Bergmann Jónsson framkvæmdastjóri Hrefnuveiðimanna ehf. segir að ákvörðun ráðherrans sé mikið gleðiefni. Nú verði farið í að gera bátana þrjá klára og húsnæðið sem félagið hefur fengið undir starfsemina á Akranesi, þar sem hrefnukjötið verður unnið. Veiðarnar byrji síðan væntanlega fyrri hluta aprílmánaðar.

Sem kunnugt er hafa markaðir í Japan nú opnast á ný, en ráðherra hefur lagt áherslu á að markaðsmál væru tryggð áður en veiðar yrðu heimilaðar. Sú ákvörðun að veiðiheimildir séu til fimm ára er í samræmi við almenna venju innan Alþjóðahvalveiðiráðsins. Þar eru veiðiheimildir, t.d. veiðiheimildir Bandaríkjanna, jafnan ákveðnar til 5 ára í senn.

Stjórn Verkalýðsfélags Akraness fagnar því að samtök hrefnuveiðimanna hafi beint augum sínum að Akranesi sem framtíðarstað til útgerðar- og vinnslu.  Rétt er að minna á að þegar þær níu langreyðar sem veiddar voru haustið 2006 voru þær Langreyðar að hluta til unnar hér á Akranesi og vonandi verður sá háttur einnig hafður á þegar veiðarnar hefjast á nýjan leik, enda myndi það verða töluverð innspýting inní atvinnulífið hér á Akranesi.

Stjórn Verkalýðsfélags Akraness fagnar þessari ákvörðun sjávarútvegsráðherra innilega, enda ljóst að með þessari ákvörðun er verið að skapa ný störf hér á Akranesi og ekki veitir af í þeim erfiðleikum sem atvinnulífið á nú við að etja um þessar mundir.  Einnig telur stjórn félagsins öll vísindarleg rök sem mæli með því að hefja hvalveiðar að nýju. Enda er það okkar réttur að nýta okkar auðlindir að teknu tilliti til þeirrar veiðiráðgjafar sem hafrannsóknarstofnun Íslands hefur gefið.

Á vef Skessuhorns er sagt að fljótlega eftir að ákvörðun ráðherrans var kynnt í dag, hafi heyrst raddir innan flokkanna sem vinna að stjórnarmyndun, um að ákvörðun ráðherrans yrði hugsanlega hnekkt eftir að ný stjórn tæki við völdum.

Það er morgunljóst að Verkalýðsfélag Akraness mun líta það mjög alvarlegum augum ef þeir flokkar sem nú vinna að stjórnarmyndun taki upp á því hnekkja þessari jákvæðu ákvörðun sjávarútvegsráðherra, en slík ákvörðun myndi verða þess valdandi að á annað hundruð störf myndu ekki verða að veruleika.
27
 Jan

Kjaradeilu Sementsverksmiðjunnar vísað til Ríkissáttasemjara

Samninganefnd Sementsverksmiðjunnar hefur vísað kjaradeilu sinni við Samtök atvinnulífsins til ríkissáttasemjara.  Kjarasamningur starfsmanna Sementsverksmiðjunnar rann út 1. desember sl. en viðræður við SA um nýjan kjarasamning hafa ekki gengið sem skyldi hingað til.

Samninganefndin hefur átt nokkra fundi með fulltrúum Samtaka atvinnulífsins að undanförnu en eins og áður hefur komið fram hafa þær viðræður ekki borið árangur.  Krafa starfsmanna Sementsverksmiðjunnar hljóðar uppá sambærilegar launahækkanir og um samdist hjá Elkem Ísland.

Ríkissáttasemjari hefur boðað deiluaðila til fundar á morgun í húsakynnum sáttasemjara og hefst fundurinn kl. 14.00 

Page 303 of 493

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image