Verðbólga mældist 15,9% í október og hefur verðlag hækkað um 2,2% frá því í septembermánuði. Þetta er mesta verðbólga sem mælst hefur hér á landi síðan vorið 1990.

Mest áhrif til hækkunar á verðlagi nú hefur hækkun á mat og drykkjarvörum um 4,3% á milli mánaða. Þar af hækkar verð á innfluttum mat- og drykkjarvörum um rúm 8%, innlendum vörum öðrum en grænmeti og búvörum um 4%, grænmeti um tæp 9% og búvörur um 1,7%. Á síðustu 12 mánuðum hefur verð á mat- og drykkjarvörum hækkað um 24,5%.

Þá hækkar verð á fötum og skóm um 4,9% frá því í septembermánuði og þar af hækkar verð á barnafötum mest eða um tæp 14%. Verð á ýmsum öðrum innfluttum vörum hækkar mikið á milli mánaða.  Má þar nefna húsgögn, heimilistæki og ýmsan húsbúna sem hækka um 7,1%, varahluti og hjólbarða sem  hækka um 19,6%, flugfargjöld til útlanda um 18,7% og verð á sjónvörpum, dvd-spilurum, tölvum o.fl. um 10,6%.

Af öðrum liðum vístiölunnar sem hækka á milli mánaða má nefna að hitakostnaður hækkar um 6,6% sem rekja má til hækkunar á gjaldskrá Orkuveitu Reykjavíkur fyrir heitt vatn.

Til lækkunar á vísitölunni nú kemur verðlækkun á bensíni og olíum sem lækka um 3,4% frá því í september. Þá lækkar kostnaður vegna eigin húsnæðis um 1,3% á milli mánaða sem rekja má að mestu til lækkunar á markaðsverði húsnæðis.

Alþýðusambandið hefur ítrekað á síðustu mánuðum bent á að við núverandi aðstæður er nauðsynlegt að opinberir aðilar og fyrirtæki á þeirra vegum gangi á undan með góðu fordæmi og hækki ekki gjaldskrár sínar. Slíkt er þó enn raunin. Mikil óvissa í gengismálum um þessar mundir gerir alla verðlagningu á innfluttum vörum erfiða og staðfestir enn nauðsyn þess að koma gjaldeyrisviðskiptum í eðlilegt horf. Það er brýnna nú en nokkru sinni að allir, bæði fyrirtæki og opinberir aðilar, leggist á árar og haldi aftur af verðhækkunum á vörum sínum og þjónustu til þess að koma í veg fyrir frekari hækkun verðlags á næstu mánuðum.

VLFA þakkar Grétari Þorsteinssyni fyrir gott samstarfí gær lauk ársfundi Alþýðsambands Íslands. Yfirskrift fundarins bar heitið Áfram Ísland - fyrir ungt fólk og framtíðina.  Verkalýðsfélag Akraness átti fimm fulltrúa á fundinum.

Kosið var um nýjan forseta ASÍ en fyrir lá að Grétar Þorsteinsson myndi ekki gefa kost á sér til áframhaldandi setu sem forseti ASÍ. Gylfi Arnbjörnsson framkvæmdastjóri ASÍ og Ingibjörg R. Guðmundsdóttir varaforseti ASÍ buðu sig fram til forseta og bar Gylfi sigurorð í þeirri kosningu.

Gylfi Arnbjörnsson nýkjörinn forseti Alþýðusambandsins sagðist árétta fyrirheit sín um að efla samstöðu og samheldni innan verkalýðshreyfingarinnar, þegar hann sleit 8. ársfundi ASÍ síðdegis. Hann sagðist hafa staðfasta trú á því að með samstöðunni muni verkalýðshreyfingunni takast að vinna sig í gegnum þrengingarnar, fyrir ungt fólk og framtíðina. Í lok fundarins var Grétar Þorsteinsson fráfarandi forseti ASÍ ákaft hylltur fyrir frábær störf í þágu verkalýðshreyfingarinnar.

Stjórn Verkalýðsfélag Akraness vill þakka Grétari Þorsteinssyni kærlega fyrir mjög gott samstarf á liðnum árum og óskar honum velfarnaðar á komandi árum.