Fundur var haldinn á laugardaginn var í Skrúðgarðinum vegna þeirrar ákvörðunar að hækka strætófargjöld á milli Akraness og Reykjavíkur. En eins og fram hefur komið hér á heimasíðunni þá eru stakar ferðir að hækka úr 280 kr. í 840 kr. eða sem nemur 200% hækkun. Eðlilega gætir mikillar gremju á meðal þeirra aðila sem nýta sér þessa þjónustu hjá Strætó bs. og á þeirri forsendu var boðað til þessa fundar.

Á fundinum var óskað eftir skýringum frá bæjaryfirvöldum. Frá bæjaryfirvöldum mætti  Gísli S. Einarsson bæjarstjóri og Karen Jónsdóttir forseti bæjarstjórnar. Einnig voru á fundinum tveir fulltrúar frá minnihlutanum, þau Guðmundur Páll Jónsson og Hrönn Ríkharðsdóttir.

Fram kom í máli Gísla og Karenar að þetta væri einhliða ákvörðun Strætó bs. og því miður hefði ekki tekist að hnekkja þeirri ákvörðun. Einnig kom fram í máli þeirra að Akraneskaupstaður hafi greitt þessa þjónustu niður um 30 milljónir á síðasta ári og áætlað væri að svo yrði áfram.

Það fór ekki á milli mála að þungt hljóð var í fólki vegna þessarar ákvörðun og kom fram í máli einstakra fundarmanna að það væri alveg spurning hvort þeir myndu áfram nýta sér þjónustu Strætó sökum þessara hækkana.

Formaður félagsins lagði til að bæjaryfirvöld myndu funda með eigendum Strætó bs. sem eru sjö sveitarfélög á höfuðborgarsvæðinu til að reyna að fá þessari ákvörðun stjórnar Strætó bs. breytt því það er alveg ljóst að hér eru miklir hagsmunir í húfi fyrir þá einstaklinga sem stunda nám og vinnu á höfuðborgarsvæðinu.

Vera Knútsdóttir og Guðríður Haraldsdóttir hafa ritað bæjarstjórn bréf um þetta mál, og einnig stjórn Strætó bs. Hægt er að lesa þau bréf hér.

Hvað eiga þessi lög sem Alþingi afgreiddi í gær að þýða? Hækkun gjalda á áfengi, tóbaki og bifreiðum auk kílómetragjalds og vörugjalds af ökutækjum og eldsneyti mun þýða umtalsverða hækkun á verðbólgu.

Hækkun þessara gjalda mun leiða til þess að neysluvísitalan mun hækka um 0,4-0,5%. Þetta koma m.a. fram hjá sérfræðingum Hagstofu Íslands í hádegisfréttum RUV.

Afleiðing þessa er að verðtryggt lán upp á eina milljón króna mun hækka um 5 þús.kr. og 20 milljón króna verðtryggt húsnæðislán því hækka um 100 þúsund krónur. Samtals munu verðtryggð lán heimilanna, sem eru 1.400 milljarðar króna, hækka um 6-7 milljarða króna bara vegna þessarar ákvörðunar og þá eru ótaldar aðrar gjaldskrárhækkanir eins og afnotagjöld RÚV o.fl.

Áttar ríkisstjórn Íslands sig ekki á því að það er ekki hægt að leggja meiri byrðar á skuldsett heimili landsins. Formaður Verkalýðsfélags Akraness spyr: varla eru þessar hækkanir hluti af aðgerðapakka ríkisstjórnarinnar til bjargar heimilum landsins.  Svo er bara bíða og sjá hvaða álögur sveitarfélögin munu leggja á almenning, en það liggur fyrir að mörg þeirra eiga í umtalsverðum rekstrarvandræðum vegna þess ástands sem nú ríkir í íslensku efnahagslífi.

Það er alveg ljóst að þolinmæði alþýðu þessa lands er að þrotum komin.  Það er ótrúlegt að engin hafi verið látinn sæta ábyrgð á þessu grafalvarlega ástandi sem ríkir í íslensku samfélagi og það á sama tíma og fólk verður fyrir skerðingu á sínum launum, atvinnumissi og verðlag á vöru og þjónustu stórhækkar og allur þessi vandi sem blasir við íslenskri þjóð er vegna græðgisvæðingar nokkurra fjárglæframanna.