Formannafundur Starfsgreinasambands Íslands var haldinn á Ísafirði föstudaginn 6. september. Þar kom meðal annars fram að fiskvinnslufólki á Íslandi hefur fækkað um 500 á milli ára.

Helsta skýringin á þessari fækkun er væntanlega lokun loðnuverksmiðja og einnig rækjuverksmiðja víða um land á síðustu misserum.  Félagsmönnum innan Verkalýðsfélags Akraness sem starfa í fiskvinnslu hefur verið að fækka töluvert á liðnum misserum.  Nægir þar að nefna að einungis einn starfsmaður er eftir í Síldar- og fiskimjölsverksmiðju HB-Granda, en þar störfuðu 25 manns þegar mest var. 

 Það er alveg óhætt að segja að formanni félagsins hafi verið verulega brugðið þegar hann heyrði þessar tölur en þess má geta að fiskvinnslufólk á Íslandi er á bilinu 5-6 þúsund.

Haldi þessi þróun áfram eru ekki mörg ár í það að fiskvinnsla leggist af á Íslandi.  Formaður Verkalýðsfélags Akraness telur þetta mikið áhyggjuefni og vonast til þess að menn efli fiskvinnsluna í landinu til að sporna við þessari þróun.

Stjórn og trúnaðarráð kom saman til fundar á mánudaginn var.  Á fundinum voru nokkur mál til umfjöllunar. T.d gerði formaður félagsins grein fyrir þeim málum sem rædd voru á formannafundi Starfsgreinasambandsins sem haldinn var á Ísafirði í síðustu viku.  Málefni erlends vinnuafls var einnig til umræðu á fundinum. 

Það kom skýrt fram hjá þeim sem eiga sæti í trúnaðarráði félagsins að þeir hafa verulegar áhyggur af þeirri gríðarlegu fjölgun sem hefur orðið hefur á erlendu vinnuafli á íslenskum vinnumarkaði á undanförnum mánuðum.  

Verkalýðsfélag Akraness hefur ítrekað bent á að félagsleg undirboð og svört atvinnustarfsemi hefur stóraukist eftir að takmörkunum á frjálsu flæði launafólks frá hinum nýju aðildarríkum EES var aflétt 1.maí sl.

Á fundinum voru einnig valdir þeir fulltrúar sem munu eiga sæti á ársfundi ASÍ sem haldinn verður 26. og 27. október nk.  Þeir aðilar sem sitja fyrir hönd Verkalýðsfélags Akraness eru:  Vilhjálmur Birgisson, Þórarinn Helgason, Björgólfur Einarsson og Tómas Rúnar Andrésson.