Rétt í þessu undirritaði Verkalýðsfélag Akraness nýjan kjarasamning við forsvarsmenn Elkem Ísland og Samtök atvinnulífsins, en eins og fram hefur komið átti verkfall að skella á í verksmiðjunni næsta þriðjudag tækist ekki að semja fyrir þann tíma.

Formaður félagsins skal fúslega viðurkenna að það var afar ánægjulegt og mikilvægt að ná að klára undirritun á nýjum kjarasamningi áður en til verkfalls kæmi, enda er það morgunljóst að í verkfallsátökum stendur sjaldan einhver upp sem sigurvegari.

Þessi nýi kjarasamningur fyrir starfsmenn Elkem Ísland á Grundartanga gildir frá 1. janúar 2014 og gildir í þrjú ár. Við lausn á þessari deilu var reynt að finna leið sem gæti skilað báðum aðilum ávinningi, þ.e.a.s. bæði fyrirtækinu og starfsmönnum.  Eftir mikla yfirlegu og vinnu komust menn að niðurstöðu um lausn sem byggist á því að taka upp nýja bónusa til handa starfsmönnum, sem mun klárlega einnig nýtast fyrirtækinu ef vel tekst til.

Formaður félagsins er mjög sáttur með þennan samning, enda er hann að skila starfsmönnum góðum ávinningi og mun formaður fara ítarlega yfir innihald samningsins með starfsmönnum á tveimur kynningarfundum sem haldnir verða þriðjudaginn 25. mars á Gamla Kaupfélaginu kl. 13:00 og 19:00. Hægt verður að kjósa um samninginn að kynningum afloknum. Starfsmenn geta haft samband við formann félagsins til að fá nánari upplýsingar um innihald samningsins og er síminn hjá formanni 8651294. Formaður ítrekar það að hann er afar ánægður með að farsæl lausn hafi náðst þar sem hagsmunir starfsmanna og fyrirtækisins voru hafðir að leiðarljósi við að leysa þessa mjög svo erfiða kjaradeilu.

Glitti í smá vonarglætu á síðasta fundiÍ gær var haldinn fundur vegna þeirrar alvarlegu kjaradeilu sem nú stendur yfir vegna Elkem Ísland á Grundartanga. Eins og fram hefur komið mun skella á verkfall í verksmiðjunni þriðjudaginn 25. mars sem þýðir að það eru einungis 6 dagar til stefnu og því morgunljóst að menn þurfa að hafa hraðar hendur ef koma á í veg fyrir verkfall. 

Það er ljóst að enn ber töluvert í milli samningsaðila þó formaður vilji samt viðurkenna að hann sjái örlitla vonarglætu um að hægt verði að ganga frá kjarasamningi áður en verkfall skellur á. Forsvarsmenn Elkem Ísland viðruðu nokkrar hugmyndir á fundinum í gær sem félagið telur vert að skoða og lúta þær að bónuskerfi fyrirtækisins og það má segja að það sé eðlilegt að fyrirtækið vilji horfa á slíka hluti því það getur jafnframt skilað fyrirtækinu ávinningi ef vel tekst til í slíku bónuskerfi. Enda eru bónuskerfi ætíð þannig að bæði starfsmenn og fyrirtæki geta hagnast ágætlega.

En eins og áður sagði ber töluvert í milli hjá samningsaðilum ennþá en næsti fundur er á morgun hjá ríkissáttasemjara. Þá munu þessi mál skýrast enn frekar en það liggur fyrir að samstaða og einhugur starfsmanna er gríðarlegur í þessari kjarabaráttu og það eru viss þolmörk sem Verkalýðsfélag Akraness og starfsmenn hafa sett sér í þessari kjaradeilu og morgunljóst er að frá þeim þolmörkum verður ekki hvikað.

Hinsvegar liggur það algjörlega fyrir að Verkalýðsfélag Akraness telur það afar brýnt að finna leið til að ganga frá kjarasamningi við fyrirtækið því það skiptir miklu máli að hægt verði að forðast verkfall því það er morgunljóst að í verkfalli tapa allir. En ef með þarf er það alveg hvellskýrt að félagið mun fara í verkfallsátök til að knýja fram sínar sanngjörnu, eðlilegu og réttlátu launakröfur. Það er ljóst að kröfugerð félagsins er hvorki ósanngjörn né yfirhlaðin.