Eins og fram hefur komið hér á heimasíðunni á félagið í harðri kjaradeilu vegna starfsmanna Elkem Ísland á Grundartanga. Einnig hefur komið fram að yfirvinnubann hefur nú staðið yfir í 6 daga og er þetta yfirvinnubann einn liður í því að reyna að ná fram sanngjörnum og réttlátum kröfum starfsmanna um hækkun launa.

Í gærmorgun lá orðið fyrir að Samtök atvinnulífsins höfnuðu því alfarið að láta Verkalýðsfélag Akraness hafa þá kjarasamninga sem gerðir höfðu verið á hinum almenna vinnumarkaði, og einnig við síldarbræðslurnar fyrir austan og í Vestmannaeyjum, nema félagið myndi skuldbinda sig til að ganga í takt við samræmda launastefnu ASÍ og SA. Launastefnu sem kveður einungis á um 2,8% launahækkun. Slíkri kröfu hefur Verkalýðsfélag Akraness algjörlega hafnað og ríkir algjör einhugur á meðal starfsmanna Elkem um að slíka launahækkun verði ekki undir nokkrum kringumstæðum samið um.

Um hádegið í gær höfðu Samtök atvinnulífsins samband við félagið og viðruðu þá hugmynd hvort félagið vildi skoða að gera samning til lengri tíma fyrir Elkem en gerður var á hinum almenna vinnumarkaði og snerust þær hugmyndir þá um 2-3 ára samning. Slík hugmynd er í anda þess sem félagið sjálft hefur meðal annars viðrað bæði við forsvarsmenn fyrirtækisins og við Samtök atvinnulífsins þannig að það hefur alltaf legið fyrir að þessa leið væri félagið til í að skoða. Enda mun slík leið verða þess valdandi að félagið er ekki þátttakandi í þeirri samræmdu launastefnu sem samið hefur verið um.

Félagið hélt tvo öfluga starfsmannafundi í gær með starfsmönnum Elkem og fóru þeir fram á Gamla kaupfélaginu á Akranesi. Á þeim fundum var farið ítarlega yfir þá grafalvarlegu stöðu sem upp er komin í þessari kjaradeilu og það var gríðarlega ánægjulegt og jákvætt að finna þá ofboðslegu samstöðu sem ríkir á meðal starfsmanna í þessari kjaradeilu. Þessi ákvörðun SA varð þess valdandi að starfsmenn samþykktu að fresta því í nokkra daga að láta kjósa um verkfall í fyrirtækinu og vilja menn sjá hvort kjaraviðræðurnar í byrjun næstu viku muni skila einhverjum árangri eður ei. Krafa starfsmanna er alveg skýr. Ef kjaraviðræðurnar í byrjun næstu viku skila ekki árangri og fyrirtækið og SA koma ekki verulega til móts við kröfur starfsmanna þá verður kosið um allsherjarverkfall hjá Elkem Ísland á Grundartanga um miðja næstu viku.

Það liggur fyrir að fyrirtækið hefur leitað til mikillar hagræðingar er tengist starfsmannahaldi og á það reyndar við um flest fyrirtæki sem tengjast stóriðju. Sem dæmi hefur launakostnaður Elkem Ísland á Grundartanga lækkað um tæp 10% hjá verkafólki á árunum 2012 og 2013. Þessa lækkun má rekja til þess að starfsmönnum hefur fækkað og hefur sú fækkun leitt af sér stóraukið álag á þá starfsmenn sem eftir eru. Formaður fór líka yfir það á fundinum að hlutfall launa af heildarveltu fyrirtækisins er afar lágt en það nemur einungis 6,15% af heildarveltunni. Þetta er umhugsunarefni því það sama er uppi á teningnum hjá Norðuráli á Grundartanga, þar er hlutfall launa af heildarveltu einungis 6,85%. Með öðrum orðum, önnur atriði sem hafa áhrif á rekstur þessara fyrirtækja eru rúm 93%. Því má segja að hækkun launa hefur ekki mikil áhrif á það hver rekstrarafkoma stóriðja er.

Að mati formanns félagsins eru það forréttindi að fá að stjórna stéttarfélagi þar sem slíkur einhugur og samstaða ríkir þegar kemur til jafnalvarlegra átaka eins og félagið á nú í. Það morgunljóst að forystumaður í stéttarfélagi er ekki neitt nema hann njóti víðtæks stuðnings sinna félagsmanna í þeirri kjarabaráttu sem félagið stendur í á hverjum tíma fyrir sig. Samstaða er hornsteinninn í allri verkalýðsbaráttu á Íslandi en því miður er þeirri samstöðu ekki til að dreifa þegar horft er yfir verkalýðshreyfinguna í heild sinni. Nægir að nefna í því samhengi að það eru fjögur önnur stéttarfélög sem eiga aðild að kjarasamningi Elkem á Grundartanga en þau hafa neitað að taka þátt í þeirri kjarabaráttu sem háð er nú á Grundartanga og neitað að taka þátt í yfirvinnubanninu sem allir sem þátt tóku í kosningu um bannið samþykktu. Þetta er að mati formanns þeim félögum til skammar.

Nú í morgun skrifuðu fulltrúar Verkalýðsfélags Akraness og Samtaka atvinnulífsins undir sáttatillögu ríkissáttasemjara vegna kjarasamninga á almennum vinnumarkaði. Þessi sáttatillaga er viðauki við kjarasamninginn sem mörg félög undirrituðu þann 21. desember sl.

Í viðaukanum felst að kjarasamningurinn frá 21. desember 2013 tekur gildi 1. febrúar, en með þeim breytingum að orlofsuppbætur hækka samtals um 32.300 kr., en desemberuppbót verður kr. 73.600 og orlofsuppbót fyrir orlofsárið sem hefst 1. maí 2014 verður 39.500. Einnig kemur til sérstök eingreiðsla kr. 14.600 í stað launabreytinga frá 1. janúar 2014. Miðast upphæðin við fullt starf, enda hafi starfsmaður starfað í janúar og var enn í starfi 1. febrúar 2014. Samningurinn gildir til loka febrúar 2015.

Launabreytingar eru þær að frá 1. febrúar 2014 skulu laun og kauptaxtar hækka um 2,8%, þó að lágmarki kr. 8.000 á mánuði fyrir dagvinnu miðað við fullt starf. Aðrir kjaratengdir liðir hækka um 2,8% á sama tíma. Kauptaxtar kr. 230.000 og lægri á mánuði hækka sérstaklega um jafnvirði eins launaflokks. Launaflokkur 1, byrjunarlaun, hækkar um kr. 9.565 og launaflokkur 17 , eftir sjö ár, hækkar um kr. 10.107. Lágmarkslaun verða kr. 214.000 á mánuði fyrir starfsmenn 18 ára og eldri sem starfað hafa fjóra mánuði samfellt hjá sama fyrirtæki.

Sáttatillöguna má sjá í heild sinni hér.

Í næstu viku fer fram kosning um sáttatillöguna og verður kjörfundur á skrifstofu VLFA frá kl. 10:00 mánudaginn 3. mars og stendur hann yfir til kl. 12:00 á hádegi föstudaginn 7. mars. Hægt er að kjósa á opnunartíma skrifstofu milli kl. 8 og 16, en einnig er hægt að óska eftir því að fulltrúar félagsins mæti á vinnustaði og gefi fólki kost á að kjósa þar.

Í morgun var einnig skrifað undir kjarasamning fyrir starfsmenn Síldarbræðslunnar og munu starfsmenn fá kynningu í næstu viku og kjósa um samninginn þá.