Eins og fram hefur komið hér á heimasíðunni þá hafa fjölmargir starfsmenn Norðuráls kvartað sáran yfir stórauknu vinnuálagi á liðnum misserum.  Starfsmönnum ber flestum saman um að þetta álag hafi verið að aukast jafn og þétt á síðastliðnum árum.

Félagið hélt t.d. fund fyrir rétt rúmri viku síðan með starfsmönnum steypuskála en þar hefur vinnuálagið að sögn starfsmanna verið ómanneskjulegt að undanförnu.  Það liggur fyrir að á 12 tíma vakt hafa starfsmenn þurft að nærast í sínum neysluhléum undir mikilli pressu og ná vart 30 mínútna matartíma á 12 tíma vakt.  Meira að segja hefur það komið fyrir að menn hafa vart komist í neysluhlé. 

Verkalýðsfélag Akraness hefur ítrekað komið á framfæri þessum umkvörtunum starfsmanna um aukið álag, en þetta aukna álag er ekki bara einskorðað við steypuskálann heldur teygir það anga sína víðar í verksmiðjunni m.a. inn í kerskálana.

Ugglaust eru margar ástæður fyrir þessu aukna álagi en það liggur m.a. fyrir að framleiðsla fyrirtækisins hefur aukist umtalsvert á liðnum árum og hvert framleiðslumetið hefur verið slegið á fætur öðru en núna er framleiðslan að verða komin upp í 300 þúsund tonn á ári. Á sama tíma og þessi framleiðsluaukning á sér stað hefur starfsfólki verið að fækka enda hefur launakostnaður fyrirtækisins lækkað á milli árana 2012 og 2013 um tæp 7%.

Að sjálfsögðu liggur fyrir að álag eykst á þá sem eftir verða þegar starfsfólki fækkar á sama tíma og framleiðslan er að aukast. 

Í gær áttu formaður og aðaltrúnaðarmaður fund með framkvæmdastjóra Norðuráls og einnig framkvæmdastjóra mannauðssvið.  Það er mat formanns að skilningur yfirstjórnar fyrirtækisins á þeim kvörtunum sem hafa borist um aukið álag sé því miður ekki til staðar enda kemur skýrt fram í máli stjórnenda að þetta aukna álag eigi vart stoð í raunverulekanum.  En framkvæmdastjórarnir viðurkenndu þó að það væri tímabundið álag í steypuskálanum vegna steypu á nýrri sérframleiðslu en tóku skýrt fram að við því hafi fyrirtækið brugðist með fjölgun starfsmanna í steypuskálanum.

Starfsmenn segja hins vegar að eðli málsins samkvæmt þurfi að fjölga vegna þessa sérframleiðslu en hún ein og sér kallar á allt að þrjú nú störf. En álagið í steypuskálanum er áfram nánast það sama og ennþá standa menn nánast samfleytt í 12 tíma með einu 30 mínútna neysluhléi sem starfsmenn þurfa að taka undir pressu eins og áður sagði.

Á fundinum í gær var rædd sú krafa sem upp er komin inni í steypuskálanum um að tekið verði upp 8 tíma vaktakerfi eins og er hjá Elkem en ekki var annað að heyra á framkvæmdastjóra Norðuráls að honum hugnaðist ekki slíkt kerfi, en benti þó á að vissulega sé allt undir þegar kjarasamningar losna um næstu áramót.

Það er morgunljóst að komandi kjaraviðræður vegna kjarasamnings Norðuráls verða erfiðar enda er mikilvægt að ef menn ætla að greiða úr að mínu mati réttmætum  umkvörtunum starfsmanna þá verði stjórnendur að hlusta og vera tilbúnir til að viðurkenna vandann en gera ekki eins og strútarnir þegar þeir skynja utanaðkomandi hættu með því að stinga hausnum í sandinn og halda að vandamálið og hættan hverfi við slíkt.

Verkalýðsfélag Akraness mun mjög fljótlega boða til fundar með öllum starfsmönnum Norðuráls í Bíóhöllinni þar sem þetta aukna álag verður til umræðu sem og hvaða áherslur starfsmenn vilji leggja upp með í komandi kjarasamningum.

Verkalýðsfélag Akraness hélt fjölmennan fund með starfsmönnum steypuskála Norðuráls á þriðjudaginn síðastliðinn. Tilefni fundarins var umkvörtun starfsmanna yfir stórauknu álagi á undanförnum misserum. Óskuðu starfsmenn eftir aðstoð félagsins við að reyna að koma óánægju þeirra vel á framfæri.

Það liggur fyrir að álag á starfsmenn Norðuráls vítt og breitt um verksmiðjuna hefur aukist á liðnum árum og er það samróma álit þeirra sem þar starfa. Ástæðan er margþætt, meðal annars hefur framleiðsla fyrirtækisins aukist umtalsvert og sem dæmi þá er fyrirtækið að framleiða uppundir 300.000 tonn af áli ár hvert. Á sama tíma og það hefur verið að gerast hefur starfsmönnum á gólfi, ef þannig má að orði komast, fækkað töluvert. Það liggur til dæmis fyrir að launakostnaður Norðuráls vegna verkafólks lækkaði á milli áranna 2012 og 2013 um 3,1% og þegar tekið hefur verið tillit til kjarasamningsbundinna hækkana á tímabilinu þá nemur þessi lækkun 6,6%.

Þetta er einfaldlega vegna þess að starfsmönnum hefur fækkað þrátt fyrir þessa miklu framleiðsluaukningu fyrirtækisins sem síðan kemur fram sem stóraukið álag á þá starfsmenn sem eftir eru. Það var mikill hiti í starfsmönnum steypuskála á fundinum sem töluðu um að þeir væru að bugast undan auknu álagi og voru fundarmenn sammála um að þeir hræðast það að þetta álag muni ógna velferð og auka slysahættu starfsmanna.

Fundurinn samþykkti að fela formanni Verkalýðsfélags Akraness að koma þessum umkvörtunum starfsmanna rækilega á framfæri við yfirstjórn fyrirtækisins og þeir kröfðust þess einnig að teknar verði án tafar upp viðræður um 8 tíma vaktakerfi með sambærilegum hætti og gerist hjá Elkem Ísland. Í dag eru starfsmenn Norðuráls að vinna á 12 tíma vöktum og undir því álagi sem starfsmenn eru tekur slíkt verulega á.

Formaður hefur sent forstjóra, framkvæmdastjóra og starfsmannastjóra fyrirtækisins erindi þar sem þessum áhyggjum og umkvörtunum starfsmanna er komið vel á framfæri og einnig ósk um að hafnar verði viðræður um manneskjulegt vinnufyrirkomulag sem byggist á rótgrónu vaktakerfi Elkem Ísland. Vaktakerfi sem er fjölskylduvænt og fer mun betur með starfsmenn í alla staði en 12 tímavaktakerfi. 

Formaður vonast til að fá jákvætt svar frá forsvarsmönnum fyrirtækisins og átti hann meðal annars gott samtal við forstjóra fyrirtækisins í gær sem lofaði að kynna sér þessi mál vel og rækilega enda kom fram í máli hans að það skipti Norðurál miklu máli að starfsmenn séu ánægðir í starfi og öll fyrirtæki þurfi að hafa jákvæða og ánægða starfsmenn til að ná árangri. Það liggur fyrir að starfsmenn Norðuráls eru orðnir þreyttir á þessu álagi og það er mikilvægt fyrir Norðurál að átta sig á því að ef ekki verður tekið á þessu aukna álagi getur það haft alvarlegar afleiðingar fyrir fyrirtækið þegar atvinnuástand á vinnumarkaði lagast.

Það er til að mynda morgunljóst í huga formanns að ef þetta mikla álag og 12 tíma vaktakerfi muni ekki lagast þá muni margir núverandi starfsmenn Norðuráls horfa hýru auga á nýjan 400 manna vinnustað sem hugsanlega rís við hliðina á Norðuráli á Grundartanga. En eins og flestir vita stefnir í að sólarkísilverksmiðjan Silicor hefji framkvæmdir á haustmánuðum sem skapa eins og áður sagði allt að 400 ný störf og því er mikilvægt að yfirstjórn Norðuráls hlusti af athygli á þessar sem og aðrar umkvartanir starfsmanna og bregðist við þeim því annars getur farið illa.