• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Fréttir

Fréttir

04
 Aug

Samið við Ráðgjafastofu heimilanna !

Verkalýðsfélag Akraness, Svæðismiðlun Vesturlands og Akraneskaupstaður munu á mánudaginn kemur undirrita samning við Ráðgjafastofu heimilanna.  Samningurinn er fólginn í því að ráðgjafar frá Ráðgjafastofunni munu koma einu sinni í mánuði upp á Akranes og veita einstaklingum í fjárhagsvandræðum endurgjaldslausa fjárhagsráðgjöf.  Ráðgjöfinni er ætlað að veita fólki yfirsýn yfir stöðu fjármála sinna og aðstoð við að gera greiðsluáætlanir velja úræði og semja við lánadrottna.   Verkalýðsfélag Akraness er ekki í neinum vafa um þörfina fyrir þjónustu af þessu tagi.  Fyrirkomulagið á þessari þjónustu verður auglýst þegar nær dregur.  En áætlað er að byrja að veita þessa þjónustu 25. ágúst.

Formaður fundaði með framkvæmdastjóra Fangs í dag vegna nýs fyrirtækjasamnings
02
 Aug

Formaður fundaði með framkvæmdastjóra Fangs í dag vegna nýs fyrirtækjasamnings

Formaður félagsins fundaði með framkvæmdastjóra Fangs ehf. í dag.  Tilefni fundarins var að  ræða hugsanlega útfærslu á fyrirtækjasamningi fyrir starfsmenn Fangs .  Fundurinn í dag var mjög góður og er félagið nokkuð bjartsýnt á að lausn finnist vonbráðar.  Formaður félagsins gerðir þó grein fyrir þeim kröfum sem starfsmenn og stéttarfélagið telja að þurfi klárlega að vera í nýjum fyrirtækjasamningi svo hægt sé að ganga frá nýjum samningi.  Eins og áður sagði þá finnur Verkalýðsfélag Akraness fyrir miklum samnings vilja hjá forsvarsmönnum Fangs.  Verkalýðsfélag Akraness mun samt sem áður standa fast á þeim kjaraatriðum sem skipta starfsmenn hvað mestu máli.  Einnig að almennar kauphækkanir verði með sambærilegum hætti og gerður voru í kjarasamningum Íslenska járnblendifélagsins og Klafa.

31
 Jul

Verkalýðsfélag Akraness innheimti vangreidd laun upp á 1.5 milljón króna fyrir fyrrverandi starfsmenn Knarrar ehf

Fyrrverandi starfsmenn Knarrar ehf leituðu til Verkalýðsfélags Akraness  vegna vangreiddra launa, en fyrirtækið var tekið til gjaldþrotaskipta í desember 2004.  Óskuðu starfsmennirnir eftir aðstoð stéttarfélagsins við að ná launum sínum út hjá fyrirtækinu.  Ekki reyndust neinar eignir vera í þrotabúi Knarrar ehf.  Verkalýðsfélag Akraness gerði því kröfu á ábyrgðarsjóðlauna fyrir hinum vangreiddu launum starfsmanna.  Á föstudaginn barst  síðan greiðsla frá ábyrgðarsjóðlauna til fyrrverandi starfsmanna Knarrar og náði stéttarfélagið að koma greiðslum til allra starfsmanna fyrir verslunarmannahelgi.  Voru starfsmenn afar þakklátir stéttarfélaginu fyrir þessa þjónustu sem félagið býður upp á.  Þjónustan er starfsmönnunum Knarrar að sjálfsögðu að kostnaðarlausu.  Það getur skipt miklu máli að vera í öflugu stéttarfélagi, eins og dæmin sanna !

Eigendur Fangs hafa óskað eftir því við Verkalýðsfélag Akraness að hefja viðræður um nýjan fyrirtækjasamning
28
 Jul

Eigendur Fangs hafa óskað eftir því við Verkalýðsfélag Akraness að hefja viðræður um nýjan fyrirtækjasamning

Eins og fram hefur komið hér á heimasíðunni þá var Verkalýðsfélag Akraness búið að ákveða að vísa ágreiningi við eigendur Fangs fyrir félagsdóm.  Ágreiningurinn byggðist á því að starfsmenn Fangs hafa unnið eftir sérkjarasamningi Íslenska járnblendifélagsins, en sá samningur rann út 30. nóvember 2004.  Eigendur Fangs halda því fram að kjarasamningur á hinum almenna vinnumarkaði sem undirritaður var 7. mars 2004 gildi fyrir starfsmenn Fangs eftir að sérkjarasamningurinn rann út.   Þessu hefur Verkalýðsfélag Akraness alfarið hafnað og talið fráleitt.  Því ákvað félagið í samráði við starfsmenn að fara með málið fyrir félagsdóm þar sem eigendur fyrirtækisins höfnuðu að ræða við stéttarfélagið um nýjan kjarasamning.  Nú hafa forsvarsmenn Fangs óskað eftir því við Verkalýðsfélag Akraness að ágreiningurinn fari ekki fyrir félagsdóm. Heldur vilja forsvarmenn fyrirtækisins að deiluaðilar setjist niður og reynt verði að ná niðurstöðu sem stéttarfélagið og starfsmenn geta sætt sig við.

Pólverjarnir sem starfa hjá Spútnik bátum hækka um 196.2% í launum !
27
 Jul

Pólverjarnir sem starfa hjá Spútnik bátum hækka um 196.2% í launum !

Verkalýðsfélag Akraness hefur verið að aðstoða eigendur Spútnik báta við að sækja um dvalar og atvinnuleyfi fyrir Pólverjana fimm.  Félagið gekk frá ráðningarkjörum fyrir Pólverjana í gær og verður tímakaupið í dagvinnu 948 krónur og tímakaupið í yfirvinnunni verður 1.587.  Eins fram hefur komið hér á heimasíðunni þá var haft eftir Pólverjunum sjálfum að þeir væru með 320 kr. á tímann að jafnaði.  Með þessum nýja ráðningarsamningi við eigendur Spútnik báta hækka Pólverjarnir um 196.2% í launum.  Er Verkalýðsfélag Akraness afar stolt af því hvernig mál þetta endaði.  Einnig vill félagið þakka Ingólfi Árnasyni stjórnarmanni Spútnik báta fyrir að hafa viljað leysa málið jafn vel og raunin varð.   Það er og verður stefna Verkalýðsfélags Akraness að verja hagsmuni okkar félagsmanna eins og kostur er, ekki mun verða horft í tíma né aura í þeirri hagsmunagæslu.

Verkalýðsfélag Akraness gerði samkomulag við Spútnik báta ehf vegna Pólsku verkamannanna
25
 Jul

Verkalýðsfélag Akraness gerði samkomulag við Spútnik báta ehf vegna Pólsku verkamannanna

Samkomulag náðist í dag á milli eigenda Spútnik báta og Verkalýðsfélags Akraness um erlendu starfsmennina sem hafa starfað hér á landi að undanförnu án atvinnuleyfis.  Samkomulagið gengur út á það að sótt verður um atvinnuleyfi fyrir Pólverjanna fimm og þeim greitt eftir íslenskum kjarasamningum.  Einnig eru samningsaðilar sammála um að þetta sé eina leiðin til að tryggja að Pólverjarnir fái greitt lögbundinn starfskjör samkvæmt íslenskum kjarasamningum.   Með þessu samkomulagi munu Pólverjarnir greiða skatta og aðrar skyldur til okkar samfélags.  Verkalýðsfélag Akraness er afar ánægt með samkomulagið og er ekki í nokkrum vafa að hagsmunum Pólverjana eru vel tryggðir með þessu samkomulagi.  Hægt er að lesa samkomulagið með því að smella á meira. 

Fréttatilkynning frá Verkalýðsfélagi Akraness og Spútnik bátum ehf.

Verkalýðsfélag Akraness og Sputnik bátar ehf. hafa að undanförnu deilt um heimild Sputnik báta ehf. til að fá til starfa erlenda verkamenn á grundvelli þjónustusamnings við erlenda starfsmannaleigu. 

Sputnik bátar ehf. hafa borið fyrir sig að sá langi tími sem almennt tekur að fá atvinnuleyfi neyði fyrirtæki til að nýta sér þessa þjónustu. Verkalýðsfélag Akraness hefur hins vegar talið að umræddir verkamenn séu í þessu tilviki launþegar Sputnik báta ehf. og lúti því alfarið íslenskum lögum. 

Málsaðilar hafa unnið að lausn málsins  með hagsmuni hinna erlendu starfsmanna að leiðarljósi og samkomulag er nú um að Sputnik bátar ehf. sæki um tímabundið atvinnuleyfi fyrir starfsmennina og þeim verði tryggð lágmarkskjör á grundvelli viðkomandi kjarasamninga með skriflegum ráðningarsamningi. Eru aðilar sammála um að  þetta sé eina leiðina til að tryggja hinum erlendu starfsmönnum  lögbundinn starfskjör samkvæmt íslenskum kjarasamningum. Verkalýðsfélag Akraness hefur á grundvelli  þessa dregið til baka kæru vegna málsins 

Vilhjálmur Birgisson formaður Verkalýðsfélags Akraness.

Ingólfur Árnason stjórnarformaður Sputnik báta.

Verkalýðsfélag Akraness kynnir fyrir 16 ára unglingum hver séu réttindi og skyldur þeirra á hinum almenna vinnumarkaði
25
 Jul

Verkalýðsfélag Akraness kynnir fyrir 16 ára unglingum hver séu réttindi og skyldur þeirra á hinum almenna vinnumarkaði

Verkalýðsfélag Akraness hélt kynningarfund í samráði við vinnuskólann fyrir 16 ára unglinga um réttindi og skyldur á vinnumarkaðinum.  Formaður félagsins fór yfir hin ýmsu réttindi sem eru í kjarasamningum á hinum almenna vinnumarkaði. Þá gerði formaðurinn unglingunum grein fyrir þeim skyldum sem launþeginn hefur gagnvart sínum atvinnurekanda.   Einnig fór formaðurinn yfir starfsemi Verkalýðsfélags Akraness og hvað félagsmönnum stæði til  boða ef þeir væru  fullgildir félagsmenn.  Verkalýðsfélag Akraness er ekki í nokkrum vafa um mikilvægi þess að kynna fyrir unglingum réttindi og skyldur á íslenskum vinnumarkaði.  Þegar kynningunni var lokið bauð félagið uppá grillaðar pylsur og gos með.  Hægt er að skoða myndir frá kynningunni með því að smella á myndir og síðan á kynning fyrir 16 ára unglinga.   

23
 Jul

Sveinn Andri lögmaður segir að Verkalýðsfélag Akraness hafi fengið rangan samning í hendur !

Í fréttablaðinu í dag er haft eftir Ingólfi Árnasyni sem er einn af eigendum Spútnik báta að aðför Verkalýðsfélags Akraness sé í raun hlægileg.  Einnig segir Ingólfur að Pólverjarnir uni sínum hag vel hjá fyrirtækinu og framganga Verkalýðsfélags Akraness sé ekki Pólverjunum til framdráttar.  Eitt er víst að Verkalýðfélagi Akraness er ekki hlátur í huga að vita til þess að blessaðir Pólverjarnir séu með einungis 320 krónur á tímann.  Það er haft eftir Pólverjunum sjálfum að þeir séu með 77 þúsund fyrir 240 klukkustundir á mánuði.  Hvernig í himninum fá eigendur fyrirtækisins það út að framganga félagsins sé ekki til framdráttar fyrir starfsmennina, þegar öll gögn í málinu benda til þess að verið sé að brjóta gróflega á þeim. 

Eitt liggur alveg ljóst fyrir í þessu máli, forsvarsmenn Spútnik báta afhentu formanni félagsins samninginn  á milli fyrirtækisins og starfsmannaleigunnar.  Í samningum kemur skýrt fram að heildarupphæðin fyrir Pólverjanna fimm er 2.1 milljón fyrir þriggja mánaða tímabil.  Ekki 3.5 milljónir eins og Sveinn Andri lögmaður  Spútnik báta heldur fram í Morgunblaðinu í dag.  Núna eru eigendur fyrirtækisins með Svein Andra Sveinsson lögmann í broddi fylkingar byrjaðir að halda því fram að Verkalýðsfélag Akraness hafi fengið rangan samning í hendurnar.  Væntanlega eru þeir búnir að átta sig illilega á því að samningurinn við starfsmannaleiguna uppfyllir á engan hátt  kjarasamninga á hinum Íslenska vinnumarkaði.  Sveinn Andri segir í Morgunblaðinu í dag að formaður félagsins hafi fengið rangar upplýsingar og samningurinn sem Verkalýðsfélag Akraness hafi fengið hafi einungis verið drög að samningi og miðaðist við færri starfsmenn heldur en fimm.  Þessi málflutningur Sveins Andra er hlægilegur og greinilegt að nú á að klóra í bakkann eins og hægt er.   Í samningum sem forsvarsmenn Spútnik báta létu formann félagsins hafa stendur að samið sé um  fimm pólverja til þriggja mánaða.  Einnig var fróðlegt að Sveinn Andri lögmaður og einnig Gunnar Leifur Stefánsson framkvæmdastjóri fyrirtækisins  höfðu ekki tök á að láta blaðamann Morgunblaðsins hafa eintak að samningum sem fram kemur að Spútnik bátar greiði 3.5 milljónir fyrir Pólverjana fimm, en ekki 2.1 milljón eins og samningurinn sem Verklýðsfélag Akraness hefur undir höndum.  Getur verið að það sé verið að búa til nýjan samning ? spyr sá sem ekki veit.

Formaður félagsins fór í eftirlitsferð á byggingarsvæði Norðuráls í dag
22
 Jul

Formaður félagsins fór í eftirlitsferð á byggingarsvæði Norðuráls í dag

Formaður félagsins fór inná byggingarsvæði Norðuráls í dag til að kanna hvernig starfsmannamálum þeirra fyrirtækja sem vinna við stækkun Norðuráls er háttað.  Ljóst er að töluvert er af erlendu vinnuafli að störfum við stækkun Norðuráls.  Í þessari eftirlitsferð í dag kom ekkert fram sem bendir til þess að verið sé að fara á mis við Íslenska kjarasamninga.  Reyndar náðist ekki í öll þau verktakafyrirtæki sem eru að störfum á svæðinu.  Strax eftir helgi mun Verkalýðsfélag Akraness halda áfram eftirliti sínu á því hvort verið sé að brjóta á atvinnuréttindum útlendinga með því að gera samninga við erlendar starfsmannaleigur með það eitt að markmiði að komast hjá því að greiða eftir kjarasamningum á hinum Íslenska vinnumarkaði .  Verkalýðsfélag Akraness skorar á alla að hafa samband við skrifstofu félagsins sem hafa einhverja vitneskju um  fyrirtæki sem eru að ráða erlenda starfsmenn í gegnum erlendar starfsmannaleigur. Töluverðar líkur eru á því að verið sé að brjóta á réttindum þessara starfsmanna sem koma frá erlendum starfsmannaleigum. 

Heilbrigðisfulltrúi Vesturlands mun á morgun taka út húsnæðið þar sem Pólverjarnir eru látnir gista
21
 Jul

Heilbrigðisfulltrúi Vesturlands mun á morgun taka út húsnæðið þar sem Pólverjarnir eru látnir gista

Verkalýðsfélag Akraness hefur sett sig í samband við heilbrigðisfulltrúa Vesturlands og óskað eftir að heilbrigðisfulltrúinn taki út það húsnæði þar sem erlendu starfsmennirnir eru látnir gista.  Það kom fram í máli heilbrigðisfulltrúans í dag að forsvarsmenn Spútnik báta hafa ekki látið heilbrigðisnefnd Vesturlands  taka út það húsnæði sem Pólverjarnir eru látnir gista í, á meðan þeir eru að störfum hjá fyrirtækinu.  Húsnæðið sem eigendur fyrirtækisins hafa skaffað handa erlendu stafsmönnunum er gamalt og hrörlegt iðnaðarhúsnæði.  Eins og áður sagði mun heilbrigðisfulltrúi Vesturlands taka húsnæðið út á morgun og kemur þá í ljós hvort húsnæðið uppfylli þau skilyrði sem eru gerðar til íbúðarhúsnæðis.

Page 179 of 208

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image