Formaður félagsins ásamt aðaltrúnaðarmanni Íslenska járnblendifélagsins funduðu með Ingamundi Birni forstjóra IJ og  Önnu Dóru Guðmundsdóttur en hún er ný tekin við starfi sem nefnist  mannauðsstjórnandi hjá ÍJ.

Tilefni fundarins var að fara yfir ýmsa þætti í bónuskerfi fyrirtækisins sem ekki hafa verið að virka sem skildi.  Því miður hefur bónuskerfið  ekki verið að skilja þeim árangri sem samningsaðilar voru sammála um að það ætti að geta gefið starfsmönnum. 

Í samningaviðræðunum þegar kjarasamningur var gerður árið 2005 kom fram að aðilar áætluðu að bónusinn myndi að jafnaði vera í kringum 5,6% á samningstímanum.  Á árinu 2006 var bónusinn hins vegar einungis 3.38% eða sem nemur 2.2% minna heldur en aðilar vonuðust til að hann myndi gefa.

Formaður hefur fundað með trúnaðartengiliðum vegna þessa máls.  Fólu trúnaðartengiliðir ÍJ formanni að leggja til breytingar á bónuskerfinu og á fundinum í morgun afhenti formaður félagsins fram tillögur þar að lútandi. 

Forstjóri Íj tók nokkuð jákvætt í þessar tillögur.  Ákveðið var að funda aftur í byrjun apríl og mun forstjóri IJ væntanlega svara á þeim fundi hvort fyrirtækið sé tilbúið að ganga að þessum tillögum eða ekki.

Fram kom í máli Ingimunds að gríðarlegur tími og orka hefur farið í að undirbúa verkefni er lítur að hinni nýju sérframleiðslu sem hefst væntanlega næsta vor . 

En eins og fram hefur komið hér á heimasíðunni þá mun Íslenska járnblendifélagið hefja framleiðslu á svokölluðu sérefni sem nefnist FSM og við það mun rekstur verksmiðjunnar styrkjast til mikilla muna að sögn þeirra sem til þekkja.  Við þessa stækkun munu skapast í kringum 35 til 40 ný störf.

Formaður félagsins telur afar ánægjulegt að forsvarsmönnum Íj hafi tekist að ná þessari sérframleiðslu hingað til lands,  einfaldlega vegna þess að rekstur IJ hefur verið nokkuð sveiflukenndur á liðnum árum og áratugum.  En eins og áður sagði þá eru umtalsverðar líkur á því rekstur verksmiðjunar sé nokkuð vel tryggður í það minnsta næsta áratuginn með tilkomu á áðurnefndri sérframleiðslu FSM.

Það er óhægt að segja að það sé líf og fjör á bryggjunni þessa dagana.  Það er ekki aðeins að mikið berist af loðnu heldur er alger landburður hjá smábátnum Ísaki Ak 67.

Rétt í þessu lagðist Ísak að bryggju með rúm 7 tonn og var einungis búinn að draga þrjár trossur og átti aðrar þrjár úti.  Um leið og búið var að landa héldu þeir félagar Eiður Ólafsson og Kristófer Jónsson út til að vitja þeirra neta sem eftir voru. 

Ekki óvarlegt að áætla að heildaraflinn verði nálægt 15 tonnum þegar þeir félagar hafa vitjað þeirra neta sem þeir áttu eftir að draga. Ísak AK er 11,6 tonn að stærð.  Það hefur gengið ótrúlega vel hjá þeim félögum á þessari vertíð enda er hér um algera harðjaxla um að ræða.  Það verður hins vegar ekki tekið af Eiði Ólafssyni að hann er  einstaklega fengsæll skipstjóri. 

Rétt er að geta þess að þeir félagar á Ísaki Ak eru báðir félagsmenn í Verkalýðsfélagi Akraness.