Í dag funduðu formaður og varaformaður Matvælasviðs Starfsgreinasambands Íslands með Einari K. Guðfinnssyni sjávarútvegsráðherra vegna fyrirhugaðrar skerðingar á aflaheimildum fyrir komandi fiskveiðiár.  Formaður sviðsins er Aðalsteinn Á. Baldursson formaður Verkalýðsfélags Húsavíkur og varaformaður er Vilhjálmur Birgisson formaður Verkalýðsfélags Akraness.

Fundur með sjávarútvegsráðherra stóð í rúman einn og hálfan tíma og var hann mjög góður og gagnlegur.  Ráðherra fór yfir þær tillögur sem Hafrannsóknarstofnun hefur lagt til fyrir komandi fiskveiðiár, en í tillögum frá Hafró er lagt til þorskvótinn verði skertur um allt að 30%.  

Fram kom í máli ráðherra að ekki væri búið að taka neina ákvörðun um skerðingu á komandi fiskveiðiári. Ráðherra taldi þó fullvíst að um skerðingu verði að ræða en hversu mikil hún verður liggur ekki fyrir þessa stundina.

Fram kom í máli Vilhjálms og Aðalsteins að þeir hafa verulegar áhyggjur af afkomu fiskvinnslufólks ef tillögur Hafró verða að veruleika.  Fram kom í máli þeirra félaga að þeir telja að stórauka þurfi rannsóknir á nytjastofnum hafsins og einnig telja þeir að auka þurfi eftirlit fiskistofu með fiskveiðibrotum t.d. löndunum framhjá vigt.

Þeir félagar gagnrýndu þá ákvörðun ráðherra harðlega að afnema 10% álag á gámafiski og telja þeir að þessi ákvörðun muni leiða til mun meiri útflutnings á fiski í gámum en nú er.

Það er alls ekki heppilegt að íslensk stjórnvöld skuli hafa tekið ákvörðun um að afnema þetta álag á sama tíma og fyrirhugað er að skerða aflaheimildir um allt að 30%.

Á árinu 2002 nam útflutningur á gámafiski 21 þúsund tonnum og á árinu 2006 var útflutningur á gámafiski kominn uppí 56 þúsund tonn og algerlega ljóst að útflutningur muni aukast enn frekar eftir afnám 10% álagsins.  Þessi ákvörðun mun bitna illilega á íslensku fiskvinnslufólki og líkur eru á að töluverður fjöldi fiskvinnslufólks muni missa vinnuna sökum þessa.

Það verður að vera krafa um að dregið verði úr útflutningi á gámafiski til minnka það áfall sem fiskvinnslufólk verður fyrir ef verulegur samdráttur á veiðiheimildum verður á komandi fiskveiðiári. 

Árið 1984 þegar kvótakerfið var sett á þá mátti veiða um 260 þúsund tonn af þorski. Nú rúmum 20 árum síðar kemur tillaga frá Hafró sem felur í sér heimild til veiða á 130 þúsund tonnum af þorski.  Á þessu sést að tilgangur kvótakerfisins, sem var að byggja upp þorskstofninn, hefur algerlega mistekist að mati formanns VLFA

Formenn Verkalýðsfélags Akraness og Verkalýðsfélags Húsavíkur munu funda með Einari K. Guðfinnssyni sjávarútvegsráðherra í dag.  Þeir félagar Vilhjálmur og Aðalsteinn gegna formennsku í Matvælasviði Starfsgreinasambands Íslands.

Tilefni fundarins er væntanlegur niðurskurður á aflaheimildum á þorski en eins og fram hefur komið í fréttum þá leggur Hafró til að niðurskurður verði 30%.

Ljóst er að ef tillögur Hafró verða að veruleika þá munu þær hafa mjög víðtæk áhrif á laun bæði hjá fiskvinnslufólki og ekki síður hjá sjómönnum.

Heyrst hefur að íslensk stjórnvöld hafi tekið ákvörðun um að fella úr gildi 10% álag sem greitt hefur verið vegna útflutnings á gámafiski frá Íslandsmiðum. Fréttavefurinn Fishupdate.com greinir frá því í gær að mikil gleði sé nú meðal þeirra sem starfa í sjávarútvegi í Hull og Grimsby vegna þessa samnings við íslensk stjórnvöld. Menn sjá fram á betri tíma vegna bættra möguleika á að keppa um íslenskan fisk. Fram kemur að hagsmunaaðilar í Bretlandi hafi þrýst á um þessa breytingu ásamt íslenskum fiskútflytjendum og eigendum íslenskra togara.

Þessi ákvörðun mun ekki bæta stöðu fiskvinnslufólks svo mikið er víst því allt útlit er á því að við afnám á umræddu 10% álagi á gámafiski muni útflutningur á fiski aukast og mun það bætast ofaná þann niðurskurð sem fyrirhugaður er 1. september.  Þessi atriði verða klárlega til umræðu á fundinum sem og tillögur Hafró almennt, en formaður VLFA telur að menn verði að horfast í augu við það að tilgangurinn með kvótakerfinu sem var að byggja upp þorskstofninn hefur gersamlega mistekist.