Formaður félagsins fór í morgun ásamt framkvæmdastjóra Starfsgreinasambandsins á fund sérnefndar Alþingis sem hefur það verkefni að fjalla um frumvarp um auðlindaákvæði í stjórnarskrá (þjóðareign á náttúruauðlindum).

Hafði Birgir Ármannsson, þingmaður Sjálfstæðisflokksins og formaður nefndarinnar óskað eftir áliti SGS á umræddu frumvarpi. 

Skúli Thoroddsen framkvæmdastjóri SGS fór yfir afstöðu SGS í þessu máli og kom fram í hans máli að SGS vill að náttúruauðlindir Íslands séu í þjóðareign og þær nýttar til hagsbóta fyrir þjóðina.  

Formaður félagsins telur það afar brýnt að auðlindir hafsins sem og aðrar auðlindir séu eign þjóðarinnar.  Hins vegar verður að tryggja að frumvarpið skapi ekki réttarfarslega óvissu. 

Það er með öllu óþolandi að horfa uppá hvernig kvótakerfið hefur leikið margar byggðir þessa lands.  

Það getur vart verið eðlilegt að útgerðamaður sem hefur umráðarétt yfir aflaheimildum geti ákveðið uppá sitt einsdæmi að hætta útgerð og selt allar aflaheimildir frá sér og skilið heilt byggðarlag í sárum.  Gengið í burtu með tugi ef ekki hundruði milljóna króna í vasanum og skilið sjómenn og fiskivinnslufólk eftir atvinnulaust og nánast allslaust. 

Þetta atvinnuóöryggi sem sjómenn og fiskvinnslufólk þarf að búa við er ekki nokkrum bjóðandi.  Við Skagamenn höfum að undanförnum misserum þurft að horfa eftir umtalsverðum aflaheimildum sem seldar hafa verið burt úr bænum.  Nægir þar að nefna að smábátaútgerð hér á Akranesi hefur dregist stórlega saman á síðustu mánuðum.  Einnig hefur starfsfólki Haraldar Böðvarssonar fækkað umtalsvert við sameiningu við Granda.  Starfsöryggi sjómanna og fiskivinnslufólks er verulega ótryggt í núverandi fiskveiðistjórnarkerfi.

Það er gríðarlega mikilvægt að sátt náist í þjóðfélaginu um sjávarútvegsmál okkar Íslendinga.  Það sjávarútvegskerfi sem við búum við núna er eins ósanngjarnt og hugsast getur og því þarf að breyta, þjóðinni allri til hagsbóta.

Formaður félagsins kíkti á bryggjuna snemma í morgun og hitti þar harðjaxlana Eið Ólafsson og Kristófer Jónsson en þeir eru félagsmenn í Verkalýðsfélagi Akraness.

Þeir félagar er á tólf tonna bát sem ber nafnið Ísak Ak 67.  Voru þeir Eiður og Kristófer að  koma úr róðri í skítabrælu, suðvestan 7 til 8 vindstigum með drekkhlaðinn bát samtals um 11 tonn.

Þeir tjáðu formanni að fiskiríið sé búið að vera með ágætum það sem af er vertíð.   Núna sé staðan hins vegar þannig að erfitt sé að fá leigukvóta og verðið sé einnig mjög hátt. 

Það er alveg óhætt að segja að trillusjómennskan sé ekkert sældarlíf þegar veður eru válynd eins og oft vill verða hér á Íslandi.  Nægir að heyra fréttir að sjóslysinu frá því í gærkveldi vestur á fjörðum til að sjá hversu hættulegt starf trillusjómennska getur verið.  En vissulega eru æði margir ljósir punktar varðandi trillusjómennsku, tekjurnar geta t.d verið mjög góðar þegar aflar vel.  Og í góðri tíð og góðu fiskiríi er fátt skemmtilegra en að vera í snertingu við hafið og anda að sér tærum sjávarilmi.