Gríðarlega jákvæð tíðindi bárust í dag hvað atvinnumál varðar en forstjóri Hvals hf tilkynnti að hvalveiðar og vinnsla myndu hefjast í sumar eftir 2 ára hlé. Það liggur fyrir að allt að 150 manns muni fá atvinnu tengda þessum veiðum sem skiptir gríðarlega miklu máli fyrir okkur Akurnesinga og nærsveitir og reyndar samfélagið í heild sinni. Það hefur verið slegist um að fá störf hjá Hval þegar vertíðin stendur yfir enda eru tekjumöguleikarnir umtalsverðir í ljósi þess að unnið er á sólarhringsvöktum yfir vertíðina. Sem dæmi voru meðallaun í vinnslunni yfir 700 þúsund krónur á vertíðunum árin 2009 og 2010 og þessar miklu tekjur skila sér svo sannarlega inn í samfélagið bæði hvað varðar útsvarstekjur fyrir sveitarfélögin og ekki síður hvað varðar verslun og þjónustu.

Þetta skiptir reyndar þjóðarbúið allt gríðarlega miklu máli enda er mikilvægt fyrir almenning í þessu landi að átta sig á því að við höldum úti okkar velferðarsamfélagi með því að skapa gjaldeyristekjur og það eru fyrirtæki eins og Hvalur sem svo sannarlega gera okkur kleift að halda hér úti löggæslu og öflugri heilsugæslu. Við þurfum fyrirtæki sem skapa íslenskri þjóð gjaldeyri og af þeirri ástæðu fagnar formaður VLFA því innilega að hvalveiðar muni hefjast að nýju í sumar. Formaður VLFA lítur á hvalveiðarnar sem vistvæna stóriðju enda eru eins og áður sagði uppundir 150 manns sem hafa atvinnu af þessari starfsemi yfir hávertíðina.

Um 200 manns tóku þátt í hátíðarhöldum vegna 1. maí á Akranesi í gær. Dagskráin hófst með kröfugöngu kl. 14:00, og annaðist Skólahljómsveit Akraness hljóðfæraleik í göngunni af miklum myndarskap.

Að göngu lokinni safnaðist fólk saman á Kirkjubraut 40, þar sem hátíðar- og baráttufundur var settur. Vilhjálmur Birgisson, fundarstjóri, ávarpaði fundinn og kynnti ræðumann dagsins, Regínu Ásvaldsdóttur bæjarstjóra Akraness. Regína kom víða við í ræðu sinni, rifjaði upp hvað áunnist hefur í verkalýðsbaráttunni hér á landi og minntist þess hversu mikið fólk hefur lagt á sig aukalega frá hruni til að halda öllu gangandi, í þeirri von að það væri tímabundið. Nú, fimm árum síðar, væri komið að þolmörkum hjá mörgum starfsstéttum eftir viðvarandi niðurskurð og aðrar hagræðingar. Góður rómur var gerður að ræðu bæjarstjórans, og er hana að finna í heild sinni hér.

Milli ávarpa sá kvennatríóið Stúkurnar um tónlistarflutning og sungu þær nokkur lög. Að venju sameinuðust fundargestir í fjöldasöng í lok dagskrár og sungu Maístjörnuna og Internasjónalinn. Það var Lionsklúbburinn Eðna sem sá um glæsilegar kaffiveitingar sem fundargestum var boðið upp á að dagskrá lokinni.

Myndir frá hátíðarhöldunum eru komnar á heimasíðuna, og er þær að finna hér.