Árleg ferð félagsins með eldri félagsmenn var farin í gær og heppnaðist vel. Lagt var af stað kl. 9 og ekið sem leið lá til Hveragerðis. Leiðsögumaður í ferðinni var Gísli Einarsson og sagði hann frá ýmsu áhugaverðu á leiðinni, meðal annars frá skáldum Hveragerðis. Fyrsti viðkomustaður var kirkjan í Hveragerði en þar var vel tekið á móti hópnum með stuttri kynningu á kirkjunni og safnaðarheimilinu og að henni lokinni var öllum frjálst að ganga um og skoða.
Næst var haldið í Hespuhúsið í Ölfusinu en þar er Guðrún Bjarnadóttir með opna jurtalitunarvinnustofu. Guðrún tók á móti hópnum og sagði frá sínum verkefnum og vinnustofunni. Hún sýndi svo þeim sem vildu hvernig jurtalitunin fer fram. Vinnustofan er mjög rúmgóð og ýmislegt hægt að skoða en einnig hægt að fá sér sæti og slaka á eða glugga í bók. Guðrún selur jurtalitað garn en jafnframt fullgerðar prjónavörur, spil og púsl. Eftir að hafa fræðst og verslað hjá Guðrúnu hélt hópurinn áfram ferð sinni.
Hádegismaturinn var borðaður á Stracta hóteli á Hellu og þar fengu allir góðan mat og drykk og var þjónustan til fyrirmyndar. Boðið var upp á lambakjöt í aðalrétt og litlar pavlovur í eftirrétt. Allir fóru saddir og sælir af stað aftur og ekið var að Sólheimum í Grímsnesi.
Á Sólheimum fékk hópurinn fræðslu um starf Sesselju Hreindísar Sigmundsdóttur og hvernig hún með mikilli elju og framsýni stofnaði Sólheima árið 1930. Nú 95 árum síðar er starfið á Sólheimum í miklum blóma og var bæði áhugavert og gaman að fá að heyra um það. Sólheimahús var skoðað en það er húsið sem Sesselja reisti á fyrstu árum Sólheima og þar bjó hún ásamt börnunum. Eftir að hafa gengið um svæðið fékk hópurinn kaffi, hjónabandssælu og pönnukökur í kaffihúsi Sólheima.
Að lokinni heimsókn að Sólheimum var komið að heimferð. Komið var til Akraness á slaginu kl. 18 og voru allir ánægðir með viðburðaríkan dag í góðum félagsskap.
Myndir frá ferðinni má sjá hér.
Á aðalfundi félagsins í maí sl. voru breytingar gerðar á eftirfarandi styrkjum og tóku gildi 31. maí 2025.
Breyting á heilsueflingarstyrk er gerð í samræmi við lög og reglur um tekjuskatt nr. 90/2003. Styrkurinn er áfram að hámarki 55.000 kr. á hverjum 12 mánuðum (50% af reikningi) og hægt að nota hann vegna kaupa á kortum á líkamsræktarstöðvum og sundstöðum, hjá íþróttafélögum, vegna æfinga/þjálfunar hjá þjálfara og annarri skipulagðri hreyfingu.
Félagið hvetur félagsmenn til að kynna sér þá styrki sem veittir eru á hverjum tíma og hvað þeir fela í sér.
Upplýsingar um styrki eru aðgengilegir á heimasíðu félagsins, www.vlfa.is - sjúkrasjóður
Þeir styrkir sem félagið veitir eru;
Verkalýðsfélag Akraness óskar öllum sjómönnum og fjölskyldum þeirra innilega til hamingju með daginn.
Lagður var blómsveigur við minningarreit um týnda sjómenn í kirkjugarðinum á Akranesi og við guðþjónustu í Akraneskirkju var íslenskum sjómönnum þökkuð mikilvæg störf við oft á tíðum krefjandi aðstæður.
Í guðþjónustunni voru heiðraðir bræðurnir Einar Vignir og Eymar Einarssynir, fyrrum sjómenn, fyrir sín störf til sjós.
Að lokinni guðþjónustu var lagður blómsveigur við styttu sjómannsins á Akratorgi en styttan var reist til minningar um látna sjómenn.
Sjómannadagurinn er mikilvægur hátíðisdagur, bæði til að minnast þeirra sem hafa í gegnum árin og áratugina stundað sjóinn sem og að þakka þeim sem sinna enn þessari mikilvægu starfsgrein. Sjómenn eiga stóran sess í sögu þjóðarinnar.
Eins og ætíð reynir Verkalýðsfélag Akraness að halda orlofshúsum sínum eins vel við og kostur er. Einn mikilvægasti þátturinn varðandi ástand húsanna er að félagsmenn gangi vel um. Mikilvægt er að félagsmenn hafi það að leiðarljósi að ganga frá orlofshúsunum eins og þeir myndu sjálfir vilja koma að þeim. Með góðri umgengni endist búnaður húsanna betur og gott er að hafa í huga að húsin eru sameiginleg eign félagsmanna.
Alltaf er af nógu að taka hvað varðar almennar endurbætur á húsum félagsins og nú er nýlokið gríðarlegum endurbótum á sumarhúsi félagsins í Bláskógum í Svínadal. Þar má segja að nánast allt hafi verið endurnýjað í húsinu enda eru Bláskógar eitt af elstu orlofshúsum félagsins og var kominn tími á að gefa því góða yfirhalningu. Skipt var um gólfefni, allir veggir rifnir niður og byggðir upp, skipt um eldhúsinnréttingu, baðherbergið tekið í gegn, settur upp aðgengilegri stigi til að komast upp á svefnloftið og bústaðurinn málaður að innan. Bústaðurinn er eins og nýr ef þannig má að orði komast og vonandi verða félagsmenn ánægðir með þessar endurbætur enda skiptir máli að halda eignum félagsins vel við. Hægt er að sjá myndir af húsinu eftir breytingar hér.
Aðalfundur Verkalýðsfélags Akraness var haldinn í gær og í skýrslu stjórnar fór formaður yfir alla kjarasamninga sem félagið hefur gert á liðnu ári sem og önnur verkefni sem félagið hefur unnið að í þágu sinna félagsmanna. Meðal annars fór formaðurinn yfir vel heppnað 100 ára afmæli félagsins sem var þann 14. október. Félagið hélt upp á afmælið með því að hafa opið hús fyrir félagsmenn sem og aðra gesti og komu uppundir 300 manns og um kvöldið voru vel heppnaðir tónleikar sem félagið bauð félagsmönnum sínum á og voru þeir með Helga Björnssyni og Reiðmönnum vindanna. Einnig gaf félagið út 100 ára afmælisrit sem var afar vel gert þar sem farið var yfir sögu félagsins.
Rekstrarafkoma samstæðunnar var vel við undandi en hún var jákvæð um sem nemur tæpum 225 milljónum og nemur eigið fé félagsins um 2,7 milljörðum.
Rétt er að geta þess að rekstrarútgjöld sjúkrasjóðs jukust umtalsvert á liðnu ári og námu þau 205 milljónum og jukust um 52 milljónir eða sem nemur 34%. Mestu munar um gríðarlega aukningu á greiðslu sjúkradagpeninga en þær jukust um 55% á milli ára.
Formaður fór yfir fjölda þeirra sem nýttu sér þjónustu félagsins á síðasta ári og þar kom meðal annars eftirfarandi fram:
Á gjafabréfum og útilegu-og veiðikortum er umtalsverð niðurgreiðsla til félagsmanna og því ávinningur fyrir félagsmenn af að nýta sér þessa þjónustu umtalsverður.
Félagið keypti nýtt sumarhús í Húsafelli í fyrra en það er í Birkihlíð 11 í Húsafelli og einnig endurnýjaði félagið gestahúsið við Ásenda 9 í Húsafelli. Mikill kostnaður fer í að halda bústöðunum við enda viljum við reyna að hafa okkar bústaði eins aðlaðandi og kostur er og því er afar brýnt að félagsmenn gangi vel um bústaðina enda eru þeir eign okkar allra sem erum í félaginu. Það kom fram hjá formanni að mikilvægt sé að fólk gangi frá bústöðunum eins og það vill sjálft koma að þeim.
Í heildina á Verkalýðsfélag Akraness 14 sumarhús vítt og breitt um landið en nýting á þeim hefur verið mjög góð.
Verkalýðsfélag Akraness
Kt. 680269-6889
Til skrifstofunnar geta félagsmenn leitað eftir
upplýsingum og annarri aðstoð.
300 Akranes
4309900
skrifstofa@vlfa.is
Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.
