• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Subscribe to this RSS feed
Lífskjarasamningar undirritaðir
04
 Apr

Lífskjarasamningar undirritaðir

Verkalýðsfélag Akraness, Verkalýðsfélag Grindavíkur, VR, LÍV, Efling-stéttarfélag, Framsýn og Starfsgreinasamband Íslands skrifuðu undir nýjan kjarasamning við Samtök atvinnulífsins vegna starfa á hinum almenna vinnumarkaði.

Það er mat formanns Verkalýðsfélags Akraness að hér sé um algjöran tímamótasamning að ræða, samning sem byggist á þríhliða samkomulagi verkalýðshreyfingarinnar, Samtaka atvinnulífsins og stjórnvalda.

Formaður félagsins hefur tekið þátt í að gera kjarasamninga í 15 ár og er það mat hans að þessi kjarasamningsgerð sé ein sú erfiðasta sem hann hefur tekið þátt í.

Þessi kjaradeila var mjög erfið og nægir að nefna í því samhengi að í miðri kjaradeilunni eða nánar tiltekið fyrir viku síðan varð efnahagslífið fyrir verulegu höggi, eins og allir vita þá varð flugfélagið WOW air gjaldþrota. Það leiddi til þess að upp undir 2000 þúsund félagsmenn félaganna misstu lífsviðurværi sitt á einni nóttu.

Þessi breytta staða gerði það að verkum að við urðum að endurskipuleggja og nálgast kjarasamningsgerðina með öðrum hætti vegna þessarra breyttu aðstæðna. Meðal annars á þessari forsendu ákváðum við að nálgast þetta verkefni með nýrri hugmyndafræði sem byggist á því að taka tillit til þeirra hjartsláttatruflanna sem hagkerfið okkar varð tímabundið fyrir.  En samt vorum við staðráðin í að halda okkur við megin markmið okkar sem var að hækka laun þeirra sem eru á lægstu launatöxtum mest og það tókst okkur svo sannarlega.

 

Þessi lífskjarasamningur byggist á því að samið var eingöngu með krónutölum en ekki prósentur en eins og formaður VLFA hefur margoft sagt þá eru prósentulaunahækkanir aflgjafi misskiptingar, óréttlætis og gerir ekkert annað en að auka á ójöfnuð. Það er ekki bara það að samið sé í krónutölum heldur er svigrúm til launabreytinga nýtt meira til þeirra sem taka laun eftir launatöxtum en þeir sem taka ekki laun eftir launatöxtum fá ögn minni krónutöluhækkanir en þeir sem eru á launatöxtum.

Þessu til viðbótar tryggðum við í þessum lífskjarasamningi að þegar hagkerfið tekur við sér á nýjan leik þá komi svokallaður hagvaxtarauki til viðbótar almennum kauptaxta launahækkunum. Þessi hagvaxtarauki byggist á hagvexti á mann sem Hagstofan reiknar út á hverju ári.

Ég fullyrði að þessi lífskjarasamningur er albesti samningur sem ég hef komið að, hvað verkafólk á hinum almenna vinnumarkaði varðar.

Hagvaxtaraukin virkar með eftirfarandi hætti:

  • 1% hagvöxtur á mann
    • + 3000 kr.
  • 1,5% hagvöxtur á mann
    • +5.500 kr.
  • 2% hagvöxtur á mann
    • +8000 kr.
  • 2,5% hagvöxtur á mann
    • 10.500 kr.
  • 3% hagvöxtur á mann
    • 13.000 kr.

Á þessu sést að með þessu erum við að tryggja launafólki um leið og afkoma fyrirtækja eykst og batnar þá er það tryggt í gegnum þennan hagvaxtarauka. Rétt er að geta þess að meðaltal hagvaxtar á mann frá árinu 1990 til 2018 er 1,84% en ef hrunárin eru tekin út þá er hagvöxtur á mann um 2,5% að meðaltali á ári. Á þessu sést að launafólk mun fá viðbótar ávinning með þessari hugmyndafræði.

Það er mjög mikilvægt að allir átti sig á því að samningsaðilar eru sammála um að þessi lífskjarasamningur skapi forsendur fyrir Seðlabankann að lækka stýrivexti sem er eitt mesta hagsmunamál alþýðunnar og íslenskra heimila. Samningaaðilar gera sér hinsvegar grein fyrir að Seðlabankinn er sjálfstæð stofnun sem tekur sínar ákvarðanir frá sínum forsendum en við teljum að þessi samningur gefi tilefni til verulegar vaxtalækkunar. Rétt að geta þess að 1% vaxtalækkun getur skilað íslenskum heimilum um 20 milljarða ávinningi en heimilin skulda um 2000 þúsund milljarða.

Það er mat formanns að þessi nýja hugmyndafræði sem aldrei áður hefur verið framkvæmd við kjarasamningsgerð á Íslandi muni klárlega geta orðið öllu samfélaginu til hagsbóta.

Eins og áður sagði er þetta þríhliða samkomulag og því skiptir aðkoma stjórnvalda miklu máli við lausn á þessari deilu en um 40 atriði eru í yfirlýsingu stjórnvalda til að styðja við gerð lífskjarasamningsins. Helstu atriði yfirlýsingar stjórnvalda eru:

  • Skattalækkun til handa tekjulægsta fólkinu sem nemur 10.000 kr.
  • Hækkun skerðingamarka barnabóta uppí 325.000 kr.
  • Risastórt skerf til afnáms verðtryggingar
  • Átak í húsnæðismálum

Á öllu þessu sem hér hefur komið fram er alls ekki allt upptalið þá eru þessir lífskjarasamningar algjör tímamót við gerð kjarasamninga á íslenskum vinnumarkaði.

Helstu atriði nýs kjarasamnings

  • Kjarasamningarnir gilda frá 1. apríl 2019 – 1. nóvember 2022
  • Krónutöluhækkanir – 17 þúsund kr. hækkun á öll mánaðarlaun frá 1. apríl 2019
  • Lægstu laun hækka mest – 30% hækkun á lægstu taxta
  • Aukið vinnustaðalýðræði með möguleika á verulegri styttingu vinnutímans (mestu breytingar í tæpa hálfa öld)
  • Eingreiðsla upp á 26 þúsund kr. sem kemur til útborgunar í byrjun maí 2019
  • Skilyrði sköpuð fyrir verulegri vaxtalækkun á samningstímanum
  • Skattbyrði hinna tekjulægstu lækkar um 10 þúsund kr. á mánuði


Almenn hækkun á mánaðarlaun fyrir fullt starf

  • apríl 2019 17.000 kr. á mánuði
  • apríl 2020 18.000 kr.
  • janúar 2021 15.750 kr.
  • janúar 2022 17.250 kr.


Kauptaxtar hækka sérstaklega

  1. apríl 2019 17.000 kr. á mánuði
    1. apríl 2020 24.000 kr.
    1. janúar 2021 23.000 kr.
    1. janúar 2022 26.000 kr.

Á árunum 2020-2023 komi til framkvæmda launaauki að gefinni ákveðinni þróun á vergri landsframleiðslu á hvern íbúa.

Tenging við hagvöxt (hagvaxtarauki) tryggir launafólki hlutdeild í verðmætasköpuninni. Þetta ákvæði nýtist best þeim tekjulægri þar sem þessi hækkun fer af fullum þunga á taxtakaup og ¾ á önnur laun. Hagvaxtarauki getur hækkað taxtalaun um 3-13 þúsund á ári eftir því hvað verg landsframleiðsla á mann hækkar mikið á tímabilinu.
2,5% hækkun á aðra liði kjarasamninganna eins og bónusa 2020-2022.

Lágmarkstekjur fyrir fullt starf

  • apríl 2019: 317.000 kr. á mánuði
  • apríl 2020: 335.000 kr.
  • janúar 2021: 351.000 kr.
  • janúar 2022: 368.000 kr.

 

Desemberuppbót (var 89.000 kr. 2018)

  • 2019: 92.000 kr.
  • 2020: 94.000 kr.
  • 2021: 96.000 kr.
  • 2022: 98.000 kr.


Orlofsuppbót fyrir hvert orlofsár (var 48.000 kr. 2018)

  • Maí 2019: 50.000 kr.
  • Maí 2020: 51.000 kr.
  • Maí 2021: 52.000 kr.
  • Maí 2022: 53.000 kr.

Eingreiðslan kemur sem sérstakt álag á orlofsuppbót árið 2019 uppá 26.000 kr. sem greiðist eigi síðar en 2. maí.

Hér er hægt að skoða kynningu á Lífskjarasamningnum

Skoða hér sjálfan lífkjarasamninginn

Umfjöllun RUV

Sumarið 2019
02
 Apr

Sumarið 2019

Þá fer allt að verða klárt fyrir sumarið, en það fara örfáir bæklingar í póst í dag.

Við tókum þá ákvörðun að senda ekki út bréfapóst á alla félagsmenn okkar þetta árið, vera aðeins umhverfisvænni og hafa þetta bara rafrænt.

Það verður þó hægt að nálgast bæði umsóknina og bæklinginn útprentað hérna á skrifstofunni.

Einnig er hægt að finna bæklinginn HÉR og Umsókn til að prenta út HÉR

Það verður opnað fyrir rafrænar umsóknir á félagavefnum þann 5. apríl.

Það er líka hægt að senda okkur útfyllta umsóknina á This email address is being protected from spambots. You need JavaScript enabled to view it.

Sexándi samningafundurinn hjá ríkissáttasemjara haldinn í gær
28
 Mar

Sexándi samningafundurinn hjá ríkissáttasemjara haldinn í gær

Í gær var haldinn sextándi samningafundur Verkalýðsfélags Akraness, Verkalýðsfélags Grindavíkur, VR, Framsýnar, Eflingar, og LÍV var haldinn hjá ríkissáttasemjara í gær í kjaradeilu félaganna við Samtök atvinnulífsins.

Á þessum fundi lögðu forsvarsmenn Samtaka atvinnulísins  fram tölur í launaliðnum ásamt öðrum hugmyndum að nýjum kjarasamningi og eftir dágóða yfirlegu áðurnefndara stéttarfélaga var ákveðið að leggja til að gerð yrði krafa um að gera atlögu að nýjum samningi næstu daga.

En rétt er að geta þess að það var gert með nokkrum skilyrðum af hálfu stéttarfélaganna er lýtur að því að öllum hugmyndum um vinnutímabreytingar sem hefðu leitt til tekjuskerðinga hjá okkar félagsmönnum var endanlega ýtt útaf samningsborðinu.

Eftir þessa nálgun var samþykkt að VR og Efling myndu aflýsa tveggja daga verkfalli sem átti að hefjast á miðnætti og var ákveðið að funda aftur í dag og hefst fundurinn klukkan 13.00

Hæstiréttur-trúnaðarmenn njóta lakari réttarstöðu!
28
 Mar

Hæstiréttur-trúnaðarmenn njóta lakari réttarstöðu!

Í gær fell dómur í Hæstarétti í máli félagsins gegn Skaganum 3x. Málið laut að starfsmanni sem var trúnaðarmaður og átti inni lágmarksréttindi sem lutu að lágmarkshvíldartímum og svokölluðum vikulegum frídegi.

En Verkalýðsfélag Akraness hafði unnið málið fyrir Landsrétti þar sem starfsmanninum voru dæmdar rúmlega ein milljón vegna þessara lágmarkshvíldar og vikulega frídags.

Eftir dóm Landsréttar óskuðu forsvarsmenn Skagans 3x. eftir því að málinu yrði áfrýjað til Hæstaréttar á grundvelli þess að trúnaðarmaðurinn hafi sýnt af sér tómlæti við fylgjast með sínum réttindum. Vildi Skaginn 3x  meina að um fordæmisgildi gæti verið um að ræða þar sem um trúnaðarmann væri um að ræða og hann ætti að hafa mun betri stöðu til að átta sig á að verið væri að „brjóta“ á honum en hinn almenni starfsmaður.

Á óskiljanlegan hátt samþykkti Hæstiréttur þessa áfrýjun og er skemmst frá því að semja að meirihluti Hæstaréttar tók undir það með Skaganum 3x að trúnaðarmenn hefðu ekki sömu réttindi til að sækja rétt sinn ef verið væri að brjóta á réttindum þeirra eins og almennir starfsmenn.

Með öðrum orðum þá tapaði VLFA málinu á þessum forsendum og Hæstiréttur lét það algerlega ótalið að bæði Héraðsdómur og Landsréttur hafi komist að þeirri niðurstöðu að ráðningarsamningur starfsmanna væru ólöglegir enda var skýrt kveðið á í þeim að starfsmenn ættu ekki rétt að greiðslu á hvíldartímum því þeir væru á jafnaðarkaupi!

Einn dómari fyrir Hæstarétti skilaði séráliti sem er algerlega í anda dóms Landsréttar en í þessu séráliti er tekið undir allar kröfur Verkalýðsfélags Akraness. Í þessu séráliti segir m.a orðrétt:

„Eins og greinir í hinum áfrýjaða dómi ver ráðningarsamningur þessi í andstöðu við 7. Gr. laga nr. 80/1938 um stéttarfélög og 1. Gr. nr. 55/1980 um starfskjör launafólks og skyldutryggingu lífeyrisréttinda“  Þetta þýðir á mannamáli eins og áður hefur komið fram að ráðningarsamningurinn sem starfsmaðurinn var með var ólöglegur!

Einnig segir í þessu séráliti orðrétt:

Hvíli á áfrýjanda sem atvinnurekenda sú afdráttarlausa skylda að virða þau lágmarksréttindi til hvíldar starfsmanna sinna sem sérstaklega eru bundin í lög, sbr. 53. Og 54. Gr. laga nr. 46/1980 um aðbúnað og hollustuhætti og öryggi á vinnustöðum. Eru réttindi þessi jafnframt tíunduð og útfærð í viðkomandi kjarasamningi, en þar segi meðal annars í 5. mgr. Greinar 2.8.2 kjarasamnings um uppgjör þeirra: "Við starfslok skal ónýttur frítökuréttur starfsmanns gerður upp og teljast hluti ráðningartíma“

Á þessu sést að dómur Hæstaréttar er kolrangur enda er hér um lágmarksréttindi sem á að gera upp við starfslok og krafa á hendur Skaganum 3x var gerð um leið og starfslok áttu sér stað og því fráleitt að sýkna Skagann 3x á grundvelli þess að starfsmaðurinn var trúnaðarmaður og hann hafi sýnt af sér tómlæti.

Þessi dómur er alvarleg aðför að trúnaðarmannakerfi verkalýðshreyfingarinnar, enda ljóst með þessum dómi að trúnaðarmenn njóta ekki sömu réttinda og almennir starfsmenn fyrir það eitt að gegna stöðu trúnaðarmanns.

Það er sorglegt að stór og öflug fyrirtæki skuli komast upp með að brjóta á réttindum starfsmanna sinna og komast hjá greiðslu á grundvelli þess að viðkomandi sýndi af sér tómlæti sem trúnaðarmaður.  Ömurleg skilaboð sem Hæstiréttur sendir íslensku launafólki með þessum dómi!

Það er ljóst að verkalýðshreyfingin verður að bregðast við þessum dómi í komandi kjarasamningum þannig að tryggt verði að trúnaðarmenn njóti ekki lakara réttarstöðu en almennir starfsmenn fyrir það eitt að gegna stöðu trúnaðarmanns.

Fimmtánda árangurslausa samningafundi hjá ríkissáttasemjara lokið.
26
 Mar

Fimmtánda árangurslausa samningafundi hjá ríkissáttasemjara lokið.

Rétt i þessu lauk fimmtánda árangurslausa samningafundi Verkalýðsfélags Akraness, Verkalýðsfélags Grindavíkur, VR, LÍV , Framsýnar og Eflingar-stéttarfélags við Samtök atvinnulífsins hjá ríkissáttasemjara.

Það er orðið dálítið dapurlegt að forsvarsmenn Samtaka atvinnulífsins skuli enn og aftur víkja sér undan því að leggja tölur á launaliðnum á borðið gagnvart áðurnefndum stéttarfélögum í ljósi þess að nú eru liðnir þrír mánuðir frá því að kjarasamningar á hinum almenna vinnumarkaði runnu út.

Forsvarsmenn Samtaka atvinnulífsins bera það nú fyrir sig ítrekað að ekki séu forsendur til að leggja fram tölur hvað launaliðinn varðar vegna þeirra óvissu sem uppi er vegna WOW air.

Stéttarfélögin gera sér algerlega grein fyrir þeirri stöðu sem uppi er varðandi WOW air en sú óvissa hefur verið uppi um allanga hríð og á því ekki að koma neinum á óvart. Hugur formanna stéttarfélaganna vegna þessara óvissu sem ríkir um atvinnuöryggi starfsmanna er hjá starfsmönnum WOW air og starfsmönnum sem starfa hjá fyrirtækjum sem eru að þjónusta flugfélagið.

Það vekur athygli formanna áðurnefndra stéttarfélaga að sú sviðsmynd sem forsvarsmenn SA draga upp ef WOW air fer í þrot endurspeglar alls ekki þá sviðsmynd sem t.d. Björgólf­ur Jó­hanns­son, fyrr­ver­andi for­stjóri Icelanda­ir, sagði í sam­tali við mbl.is. En orðrétt sagði hann:

Það er orðið ljóst að WOW air er orðið helm­ing­ur­inn af því sem að var þannig að áhrif­in eru kom­in fram. Ég velti því fyr­ir mér hvort verið sé að mála skratt­ann á vegg­inn í þessu sam­bandi,“

Formaður VLFA ítrekar að vissulega verður það skellur fyrir starfsfólkið ef það missir lífsviðurværi sitt vegna þess að WOW air fari í þrot og hugur okkar verður að sjálfsögðu hjá þeim ef til þess kemur en það liggur fyrir að um tímabundið áfall verður um að ræða fyrir efnahagslífið í heild sinni.

Rétt er líka að geta þess að formaður VLFA sagði á fundinum í morgun að hugur hans væri líka hjá íslenskum heimilum því ef þessar sviðmyndir væru réttar þá mættu íslensk heimili eiga von á því að verðtryggðar skuldir þeirra myndu hækka á skömmum tíma um allt að 60 milljarða.

Þetta sýndi hverslags skaðvaldur íslensk verðtrygging er fyrir almenning og heimili, sem endurspeglast í því að ef eitt fjólublátt lítið flugfélag fer í þrot þá geti verðtryggðar skuldir heimilanna hækkað um allt að 60 milljarða vegna falls íslensku krónunnar.

Það er algjörlega fráleitt hjá forsvarsmönnum Samtaka atvinnulífsins að halda kjaraviðræðum tugþúsunda launamanna í gíslingu vegna þeirra óvissu, óvissu sem launafólk ber ekki nokkra ábyrgð á og vegna tímabundina áhrifa sem hlytist af gjaldþroti fyrirtækisins.

Rétt er að geta þess að næsti fundur hefur verið boðaður á morgun klukkan 14:00 hjá ríkissáttasemjara

Fjórtánda samningafundi hjá ríkissáttasemjara lokið
25
 Mar

Fjórtánda samningafundi hjá ríkissáttasemjara lokið

Rétt i þessu lauk fjórtánda samningafundi Verkalýðsfélags Akraness, Verkalýðsfélags Grindavíkur, VR, LÍV og Eflingar-stéttarfélags við Samtök atvinnulífsins hjá ríkissáttasemjara.

Það er óhætt að segja að afar lítið hafi komið út úr þessum samningafundi annað en það að áðurnefnd stéttarfélög hafa ítrekað óskað eftir að SA leggi fram tölu í launaliðnum til að hægt sé að meta hvort viðræðugrundvöllur sé til áframhaldandi samningaviðræðna.

En Samtök atvinnulífsins hafa ítrekað vikið sér undan því að leggja fram tölur í launaliðnum og núna telja forsvarsmenn SA að sú óvissa sem uppi er hjá flugfélaginu WOW air geri það að verkum að þeir treysta sér ekki til að leggja neitt fram í þeim efnum fyrr en þeirri óvissu hafi verið eytt.

Það er rétt að geta þess að áðurnefnd stéttarfélög gera alls ekki lítið úr þeirri óvissu sem uppi er hvað varðar WOW air, enda liggur fyrir að óvissa er um störf þúsunda starfsmanna fyrirtækisins, sem eru margir í einhverjum af þeim stéttarfélögum sem nú eru í viðræðum við Samtök atvinnulífsins.

Það er einnig rétt að geta þess að forsvarsmenn stéttarfélagana hafa áhyggjur af því að ef WOW air lifir þetta ekki af þá muni verðbólgan geta farið af stað og félögin spyrja hvernig á að tryggja að verðtryggðar skuldir heimilanna aukist ekki um t.d. 34 milljarða ef verðbólgan eykst t.d. um 2% vegna falls WOW air?  Eða á bara að senda þannig reikning enn og aftur á heimilin sem bera ekki nokkra ábyrgð á rekstri viðkomandi flugfélags? 

Hins vegar liggur fyrir að það þarf að ganga frá kjarasamningi og það verkefni fer ekkert frá samningsaðilum, en erfið staða einstakra fyrirtækja á ekkert með að raska þeirri staðreynd. En í ljósi óvissunnar sem nú er uppi hvað WOW air varðar var ákveðið að fresta viðræðum til 10 i fyrramálið, en stéttarfélögin ítrekuðu mikilvægi þess að SA myndi leggja fram hugmyndir að launaliðnum á fundinum á morgun.

Einnig ítrekuðu félögin enn og aftur á fundinum í morgun að stéttarfélögin hafna með öllu þeim vinnutímabreytingum sem uppi hafa verið enda klárt mál að þær muni leiða til kjaraskerðingar hjá afar stórum hópi okkar félagsmanna.

Page 64 of 487

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image