Á kynningarfundi í gær var ríkissamningurinn borinn upp til atkvæðagreiðslu, eftir að Snær Karlsson frá SGS hafði farið yfir helstu atriði samningsins, og svarað spurningum frá félagsmönnum. Ennfremur kynnti formaður félagsins nýgerðan stofnanasamning sem samráðsnefnd Verklýðsfélags Akraness hefði undirritað í gær. Það kom skýrt fram hjá starfsmönnum SHA sem tóku til máls á fundinum að þeir teldu að það hefði verið meginmarkmið hjá samningarnefnd SGS að færa kjaraumhverfi okkar félagsmanna nær því sem er að gerast hjá starfsmönnum ríkisins. Það er mat starfsmanna SHA að svo sé alls ekki um að ræða í þessum samningi og enn sé töluverður launamunur á milli okkar félagsmanna og þeirra sem starfa hjá ríkinu.

Í lok fundarins var kosið um ríkissamninginn, á kjörskrá voru 80 félagsmenn, alls kusu 32 félagsmenn. 28 sögðu nei og 4 sögðu já. Ríkissamningurinn var því felldur með afgerandi hætti. Kom fram í máli formanns félagsins þegar úrslit kosninganna lágu fyrir, að hann harmaði að sú mikla samstaða sem var búin að skapast hjá aðildarfélögum SGS væri því miður ekki lengur til staðar, og taldi formaður félagsins að á brattann yrði að sækja með frekari kjarabætur. Lýsti formaðurinn yfir mikilli ánægju með þá miklu samstöðu sem ríkir meðal starfsmanna SHA í þessu máli og með hana að vopni er vonandi allt hægt.

Kynningarfundur um ríkissamninginn. verður haldinn mánudaginn 25. maí kl 20:00, að kirkjubraut 40, 3. hæð.

Dagskrá 

1.     Snær Karlsson frá SGS kemur og kynnir ríkissamninginn

2.     Kynntur verður stofnanasamningur við starfsmenn SHA.

3.     Kosningar-kosið verður um ríkissamninginn.

4.     Önnur mál.

Þeir félagsmenn sem vinna eftir ríkissamningum eru eindregið hvattir til að mæta.

Ákveðið hefur verið að hittast í dag  verður reynt til þrautar að ganga frá stofnanasamningi fyrir starfsmann SHA.  Flest félög innan SGS eru að klára sína stofnanasamninga eða eru alveg við það.  Þeir stofnanasamningar sem við höfum séð hjá þeim félögum sem eru nú þegar búin að semja við sínar stofnanir, eru því miður töluvert frá þeim væntingum sem starfsmenn SHA hafa. 

Það verður að segjast alveg eins og er, að við teljum að það hafi verið markmiðið hjá SGS  að jafna launamun okkar félagsmanna við starfsmenn sem eru í opinberum félögum.  En miðað við það sem er verið að bjóða í þeim stofnanasamningum sem nú þegar er búið að gera ,teljum við að launamunur sé ennþá töluverður.  Hefði Verkalýðsfélag Akraness viljað sjá þá miklu samstöðu hjá aðildarfélögum SGS sem  skapast við gerð aðalkjasamningsins, því það fé sem ríkið er að láta heilbrigðissofnanirnar hafa til að gera stofnasamninga við félögin , getur á engan hátt jafnað þann launamun sem er á milli okkar félagsmanna og þeirra sem eru í opinberum félögum.

Verkalýðsfélag Akraness hefur gert samkomulag við HB-Granda um að taka upp  vaktafyrirkomulag í frystihúsi fyrirtækisins vegna nýrrar flæðilínu sem tekin verður í notkun á allara næstu dögum. Þetta breytta fyrirkomulag er með þeim hætti að það verður unnið í 12 tíma á tveimur vöktum sú fyrri byrjar kl 07:00 og stendur til 15:00 og sú síðari stendur frá 15:00 til 19:00.  Starfsmenn HB-Granda samþykktu samkomulagið í morgun í kosningu með yfirgnæfandi meirihluta.  Við þessa breytingu munu skapast allt að 40 ný störf í frystihúsi HB-Granda hér á Akranesi.  Er stjórn Verklýðsfélag Akraness afar ánægð með að þetta samkomulag skuli hafa náðst við stjórnendur HB-Granda og síðan en ekki síst við þá starfsmenn sem munu vinna eftir þessu nýja fyrirkomulagi.  Verkalýðsfélag Akraness mun fylgjast vel með að þetta breytta vaktafyrirkomulag virki sem allra best og mun aðstoða starfsmenn ef einhver vandamál kunni að koma upp.