Formaður félagsins og trúnaðarmaður funduðu með forsvarsmönnum Sjúkrahúss Akraness í dag.  Var fundur haldinn að ósk formanns VLFA vegna þeirrar miklu óánægju starfsmanna með fyrirætlanir forsvarsmanna SHA að breyta vinnufyrirkomulagi starfsmanna.  Það liggur orðið nokkuð ljóst fyrir að starfsmenn munu skerðast í launum, að einhverju leiti.  Ósk formanns félagsins og trúnaðarmanns starfsmanna var að stjórnendur SHA myndu skoða með opnum hug hvort hægt væri að mæta þessari skerðingu á launum með einhverjum hætti.   Það verður starfsmanna vegna að finnast viðunandi lausn á þessu máli sem allra fyrst.

Framkvæmdastjóri SHA lofaði að skoða málið og ætlaði að svara stéttarfélaginu fljótlega eftir helgi.  Er það einlæg  von Verkalýðsfélags Akraness að forsvarsmenn SHA geri allt sem í þeirra valdi stendur, til að draga úr þeirri gríðarlegu óánægju starfsmanna, sem skapast hefur útaf þessum hugmyndum að breyttu vinnufyrirkomulagi starfsmanna.

Samningafundur var haldinn í dag.  Aðeins eitt mál var til umræðu það var um nýtt bónuskerfi starfsmanna Íslenska járnblendifélagsins.  Voru menn að velta fyrir sér hugmyndum hvaða þætti eigi að nota í vigtun á nýju bónuskerfi.  Komu fram ýmsar hugmyndir fram sem menn eru með til skoðunar.  Næsti fundur er á mánudaginn og verða sérmál ofn og dagmanna til umræðu þá.