Formaður félagsins fór í vinnustaðaheimsókn í dag til Norðuráls.  Tilefni heimsóknarinnar var að heyra hljóðið í dagmönnum, og kynna hvað hefur farið fram í samningaviðræðunum við forsvarsmenn Norðuráls hingað til.  Eins og komið hefur fram hér á síðunni hefur formaðurinn heyrt í starfsmönnum allra vakta, og veit því hver vilji þeirra er í komandi samningum.  Þessi heimsókn  í dag  var afar jákvæð.  Gott er fyrir formann félagsins að vita hvaða væntingar starfsmenn  í dagvinnu hafa  til nýs kjarasamnings. 

Það er alveg grundvallarregla hjá Verkalýðsfélagi Akraness að vera í nánu sambandi við sína félagsmenn.  Er þessi vinnustaðaheimsókn einn liður í þeirri vinnu.  Formaður félagsins veit ekki hvernig hann getur unnið fyrir sína félagsmenn ef hann heyrir ekki reglulega í starfsmönnum, bæði til að upplýsa þá um gang viðræðna og eins til að fá þeirra álit.  Þetta eru jú þeirra launakjör.  Næsti samningafundur verður fimmtudaginn 25. nóvember kl. 09:00.

Sjúkrahúsið og heilsugæslustöðin á Akranesi hefur sagt upp  núverandi vinnufyrirkomulagi með þriggja mánaða fyrirvara við starfsfólk í ræstingu og býtibúri.  Breytingin mun taka gildi 1. janúar 2005.   Í bréfi til starfsmanna kemur fram að að tímabilið til áramóta verði notað til þess að undirbúa og kynna fyrirhugaðar breytingar og leita samráðs við viðkomandi starfsfólk.  Töluverðrar gremju gætir meðal starfsmanna með þessar breytingar. 

Verkalýðsfélag Akraness skilur gremju þeirra mjög vel.  Breytingar á vinnufyrirkomulagi koma á slæmum tíma, það er jú nýbúið að gera kjarasamning við starfsmenn SHA.  Allar breytingar af þessu tagi valda starfsmönnum óþægindum, og einverjir starfsmenn verða fyrir skerðingu á launum í kjölfar þessarra breytinga.  Forsvarsmenn SHA hafa leyft Verkalýðsfélaginu að fylgjast vel með í þessu máli og er það mjög gott.  Forsvarsmenn SHA hafa líka tjáð félaginu að reynt verði eftir fremsta megni að koma til móts við starfsmenn og að skerðing á launakjörum starfsmanna verði sem minnst.