Mikið gaman var hjá börnum félagsmanna sem komu á jólaball félagsins sem haldið var í gær.  Það var töluverður  fjöldi barna sem komu á jólaballið í ár.  Hljómsveitin Færibandið spilaði jólalögin og síðan en ekki síst komu jólasveinarnir í heimsókn.  Það voru þeir  Giljagaur og Kertasníkir sem komu í ár, höfðu þeir á orði hvað börn félagsmanna VLFA væru ofsalega þæg og góð, um leið og þeir afhentu börnunum góðgæti.  Foreldrum var boðið uppá kaffi, konfekt og smákökur.

Forsvarsmenn Íslenska járnblendifélagsins lögðu fram tilboð að nýjum kjarasamningi á fundi sem var haldinn á föstudaginn.  Í þessu tilboði hefur verið komið verulega til móts við þær kröfur sem trúnaðarmenn og stéttarfélögin lögðu upp með í sinni kröfugerð.  Verkalýðsfélag Akraness hefur notað helgina til að skoða þetta tilboð eins vel og hægt er.  Ennfremur hefur formaður félagsins verið í sambandi við starfsmenn til að meta stöðuna og kynna þeim innihald tilboðsins.  Ákveðið hefur verið að funda hjá ríkissáttasemjara á morgun kl. 14:00 og mun væntanlega skýrast á þeim fundi hvort deiluaðilar nái saman eða ekki, því enn ber á milli deiluaðila.